(໑໔) ໔. ໂຍຘາຊີວວຄ຺ໂຄ

໑. ໂຍຘາຊີວສຸຕ຺ຕວຓ຺ຓນາ

໑໓໔. ຈຕຸຕ຺ຖສ຺ສ ປຐເມ ຍຸທ຺ຘໍ ອຸປຊີວຕີຕິ ໂຍຘາຊີໂວ. ຣາຊາຣໂຫຕິ ຣຎ຺ໂຎ ອນຸຈ຺ຉວິໂກ. ຣາຊໂຠຄ຺ໂຄຕິ ຣຎ຺ໂຎ ອຸປໂຠຄປຣິໂຠໂຄ. ອງ຺ຄນ຺ເຕວ ສງ຺ຂ຺ຍໍ ຄຈ຺ຉຕີຕິ ຫຕ຺ໂຖ ວິຍ ປາໂທ ວິຍ ຈ ອວສ຺ສໍ ອິຈ຺ຉິຕພ຺ພຕ຺ຕາ ອງ຺ຄນ຺ຕິ ສງ຺ຂ຺ຍໍ ຄຈ຺ຉຕິ. ທູເຣ ປາຕີ ໂຫຕີຕິ ອຸທເກ ອຸສຠມຕ຺ຕໍ, ຖເລ ອຏ຺ຐຸສຠມຕ຺ຕໍ, ຕໂຕ ວາ ອຸຕ຺ຕຣິນ຺ຕິ ທູເຣ ກຓ຺ຑໍ ປາເຕຕິ. ທຸຏ຺ຐຄາມຓິອຠຍສ຺ສ ຫິ ໂຍຘາຊີໂວ ນວອຸສຠມຕ຺ຕໍ ກຓ຺ຑໍ ປາເຕສິ, ປຈ຺ຉິມຠເວ ໂພຘິສຕ຺ໂຕ ໂຍຊນປ຺ປມາຓໍ. ອກ຺ຂຓເວຘີຕິ ອວິຣາຘິຕເວຘີ, ອກ຺ຂຓໍ ວາ ວິຊ຺ຊຸ ວິຊ຺ຊນ຺ຕຣິກາຍ ວິຊ຺ຌິຕຸໍ ສມຕ຺ໂຖຕິ ອຕ຺ໂຖ. ມຫໂຕ ກາຍສ຺ສ ປທາເລຕາຕິ ເອກໂຕພທ຺ຘໍ ຜລກສຕມ຺ປິ ມຫິໍສຈມ຺ມສຕມ຺ປິ ອງ຺ຄຸຏ຺ຐປມາຓພຫລໍ ໂລຫປຏ຺ຏມ຺ປິ ຈຕຸຣງ຺ຄຸລພຫລໍ ອສນປທຣມ຺ປິ ວິທຕ຺ຖິພຫລໍ ອຸທຸມ຺ພຣປທຣມ຺ປິ ທີຆນ຺ເຕນ ວາລິກສກຏມ຺ປິ ວິນິວິຊ຺ຌິຕຸໍ ສມຕ຺ໂຖຕິ ອຕ຺ໂຖ. ຍໍກິຎ຺ຈິ ຣູປນ຺ຕິອາທິ ວິສຸທ຺ຘິມຄ຺ເຄ ວິຕ຺ຖາຣິຕເມວ. ເນຕໍ ມມາຕິອາທິ ຕຓ຺ຫາມານທິຏ຺ຐິປຏິກ຺ເຂປວເສນ ວຸຕ຺ຕໍ. ສມ຺ມປ຺ປຎ຺ຎາຍ ປສ຺ສຕີຕິ ສມ຺ມາ ເຫຕຸນາ ກາຣເຓນ ສຫວິປສ຺ສນາຍ ມຄ຺ຄປຎ຺ຎາຍ ປສ຺ສຕິ. ປທາເລຕີຕິ ອຣຫຕ຺ຕມຄ຺ເຄນ ປທາເລຕິ.

໒. ປຣິສາສຸຕ຺ຕວຓ຺ຓນາ

໑໓໕. ທຸຕິເຍ ອຸກ຺ກາຈິຕວິນີຕາຕິ ອປ຺ປຏິປຸຈ຺ຉິຕ຺ວາ ວິນີຕາ ທຸພ຺ພິນີຕປຣິສາ. ປຏິປຸຈ຺ຉາວິນີຕາຕິ ປຸຈ຺ຉິຕ຺ວາ ວິນີຕາ ສຸວິນີຕປຣິສາ. ຍາວຕາວິນີຕາຕິ ປມາຓວເສນ ວິນີຕາ, ປມາຓໍ ຎຕ຺ວາ ວິນີຕປຣິສາຕິ ອຕ຺ໂຖ. ‘‘ຍາວຕຊ຺ຌາ’’ຕິ ປາຬິຍາ ປນ ຍາວ ອຊ຺ຌາສຍາຕິ ອຕ຺ໂຖ, ອຊ຺ຌາສຍໍ ຎຕ຺ວາ ວິນີຕປຣິສາຕິ ວຸຕ຺ຕໍ ໂຫຕິ. ຕຕິຍໍ ອຸຕ຺ຕານເມວ.

໔. ອຸປ຺ປາທາສຸຕ຺ຕວຓ຺ຓນາ

໑໓໗. ຈຕຸຕ຺ເຖ ຘມ຺ມຏ຺ຐິຕຕາຕິ ສຠາວຏ຺ຐິຕຕາ. ຘມ຺ມນິຍາມຕາຕິ ສຠາວນິຍາມຕາ. ສພ຺ເພ ສງ຺ຂາຣາຕິ ຈຕຸຠູມກສງ຺ຂາຣາ. ອນິຈ຺ຈາຕິ ຫຸຕ຺ວາ ອຠາວຏ຺ເຐນ ອນິຈ຺ຈາ. ທຸກ຺ຂາຕິ ສມ຺ປຏິປີຬນຏ຺ເຐນ ທຸກ຺ຂາ. ອນຕ຺ຕາຕິ ອວສວຕ຺ຕນຏ຺ເຐນ ອນຕ຺ຕາ. ອິຕິ ອິມສ຺ມິໍ ສຸຕ຺ເຕ ຕີຓິ ລກ຺ຂຓານິ ມິສ຺ສການິ ກຖິຕານິ.

໕. ເກສກມ຺ພລສຸຕ຺ຕວຓ຺ຓນາ

໑໓໘. ປຎ຺ຈເມ ຕນ຺ຕາວຸຕານໍ ວຕ຺ຖານນ຺ຕິ ປຈ຺ຈຕ຺ເຕ ສາມິວຈນໍ, ຕນ຺ເຕຫິ ວາຍິຕວຕ຺ຖານີຕິ ອຕ຺ໂຖ. ເກສກມ຺ພໂລຕິ ມນຸສ຺ສເກເສຫິ ວາຍິຕກມ຺ພໂລ. ປຸຖຸສມຓພ຺ຣາຫ຺ມຓວາທານນ຺ຕິ ອິທມ຺ປິ ປຈ຺ຈຕ຺ເຕ ສາມິວຈນໍ. ປຏິກິຏ຺ໂຐຕິ ປຈ຺ຉິມໂກ ລາມໂກ. ໂມຆປຸຣິໂສຕິ ຕຸຈ຺ຉປຸຣິໂສ. ປຏິພາຫຕີຕິ ປຏິເສເຘຕິ. ຂິປ຺ປໍ ອຸຑ຺ເຑຍ຺ຍາຕິ ກຸມິນໍ ໂອຑ຺ເຑຍ຺ຍ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

໘. ອສ຺ສຂຬຸງ຺ກສຸຕ຺ຕວຓ຺ຓນາ

໑໔໑. ອຏ຺ຐເມ ອສ຺ສຂຬຸງ຺ໂກຕິ ອສ຺ສໂປໂຕ. ອິທມສ຺ສ ຊວສ຺ມິໍ ວທາມີຕິ ອຍມສ຺ສ ຎາຓຊໂວຕິ ວທາມິ. ອິທມສ຺ສ ວຓ຺ຓສ຺ມິໍ ວທາມີຕິ ອຍມສ຺ສ ຄຸຓວຓ຺ໂຓຕິ ວທາມິ. ອິທມສ຺ສ ອາໂຣຫປຣິຓາຫສ຺ມິນ຺ຕິ ອຍມສ຺ສ ອຸຈ຺ຈຠາໂວ ປຣິມຓ຺ຑລຠາໂວຕິ ວທາມີຕິ.

໙. ອສ຺ສປຣສ຺ສສຸຕ຺ຕວຓ຺ຓນາ

໑໔໒. ນວເມ ອສ຺ສປຣສ຺ເສຕິ ອສ຺ເສສຸ ປຣສ຺ເສ. ປຸຣິສປຣສ຺ເສຕິ ປຸຣິເສສຸ ປຣສ຺ເສ, ປຸຣິສປຸຣິເສຕິ ອຕ຺ໂຖ. ອິມສ຺ມິໍ ສຸຕ຺ເຕ ຕີຓິ ມຄ຺ຄຜລານິ ກຖິຕານິ. ຕຕ຺ຖ ອຍໍ ຕີຫິ ມຄ຺ເຄຫິ ຎາຓຊວສມ຺ປນ຺ໂນຕິ ເວທິຕພ຺ໂພ.

໑໐. ອສ຺ສາຊານີຍສຸຕ຺ຕວຓ຺ຓນາ

໑໔໓. ທສເມ ຠທ຺ເຣຕິ ຠທ຺ທເກ. ອສ຺ສາຊານີເຍຕິ ກາຣຓາກາຣຓໍ ຊານນເກ ອສ຺ເສ. ປຸຣິສາຊານີເຍສຸປິ ເອເສວ ນໂຍ. ອິມສ຺ມິໍ ສຸຕ຺ເຕ ອຣຫຕ຺ຕຜລໍ ກຖິຕໍ. ຕຕ຺ຣາຍໍ ອຣຫຕ຺ຕມຄ຺ເຄນ ຎາຓຊວສມ຺ປນ຺ໂນຕິ ເວທິຕພ຺ໂພ.

໑໑. ປຐມໂມຣນິວາປສຸຕ຺ຕວຓ຺ຓນາ

໑໔໔. ເອກາທສເມ ອຈ຺ຈນ຺ຕນິຏ຺ໂຐຕິ ອນ຺ຕໍ ອຕິກ຺ກນ຺ຕນິຏ຺ໂຐ, ອກຸປ຺ປນິຏ຺ໂຐ ຘຸວນິຏ຺ໂຐຕິ ອຕ຺ໂຖ. ເສສໍ ສທິສເມວ.

໑໒. ທຸຕິຍໂມຣນິວາປສຸຕ຺ຕວຓ຺ຓນາ

໑໔໕. ທ຺ວາທສເມ ອິທ຺ຘິປາຏິຫາຣິເຍນາຕິ ອິຊ຺ຌນກປາຏິຫາຣິເຍນ. ອາເທສນາປາຏິຫາຣິເຍນາຕິ ອາທິສິຕ຺ວາ ອປທິສິຕ຺ວາ ກຖນອນຸກຖນກຖາປາຏິຫາຣິເຍນ.

໑໓. ຕຕິຍໂມຣນິວາປສຸຕ຺ຕວຓ຺ຓນາ

໑໔໖. ເຕຣສເມ ສມ຺ມາທິຏ຺ຐິຍາຕິ ຜລສມາປຕ຺ຕຕ຺ຖາຍ ສມ຺ມາທິຏ຺ຐິຍາ. ສມ຺ມາຎາເຓນາຕິ ຜລຎາເຓນ. ສມ຺ມາວິມຸຕ຺ຕິຍາຕິ ເສເສຫິ ຜລສມາປຕ຺ຕິຘມ຺ເມຫິ. ອິເມສຸ ຕີສຸປິ ສຸຕ຺ເຕສຸ ຂີຓາສໂວວ ກຖິໂຕຕິ.

ໂຍຘາຊີວວຄ຺ໂຄ ຈຕຸຕ຺ໂຖ.