໑. ອຈ຺ຈາຍິກສຸຕ຺ຕວຓ຺ຓນາ

໙໓. ປຎ຺ຈມສ຺ສ ປຐເມ ອຈ຺ຈາຍິການີຕິ ອຕິປາຕິການິ. ກຣຓີຍານີຕິ ອວສ຺ສກິຈ຺ຈານິ. ຍຎ຺ຫິ ນ ອວສ຺ສໍ ກາຕພ຺ພໍ, ຕໍ ກິຈ຺ຈນ຺ຕິ ວຸຈ຺ຈຕິ. ອວສ຺ສໍ ກາຕພ຺ພໍ ກຣຓີຍໍ ນາມ. ສີຆໍ ສີຆນ຺ຕິ ເວເຄນ ເວເຄນ. ຕສ຺ສ ໂຂ ຕນ຺ຕິ ເອຕ຺ຖ ຕນ຺ຕິ ນິປາຕມຕ຺ຕໍ. ນຕ຺ຖິ ສາ ອິທ຺ຘິ ວາ ອານຸຠາໂວ ວາຕິ ສາ ວາ ອິທ຺ຘິ ໂສ ວາ ອານຸຠາໂວ ນຕ຺ຖິ. ອຸຕ຺ຕຣສ຺ເວຕິ ຕຕິຍທິວເສ. ອຸຕຸປຣິຓາມິນີຕິ ລທ຺ຘອຸຕຸປຣິຓາມານິ ຫຸຕ຺ວາ. ຊາຍນ຺ຕິປີຕິ ຕຕິຍທິວເສ ນິກ຺ຂນ຺ຕເສຕງ຺ກຸຣານິ ໂຫນ຺ຕິ, ສຕ຺ຕາເຫ ປຕ຺ເຕ ນີລງ຺ກຸຣານິ ໂຫນ຺ຕິ. ຄພ຺ຠີນິປິ ໂຫນ຺ຕີຕິ ທິຍຑ຺ຒມາສໍ ປຕ຺ວາ ຄຫິຕຄພ຺ຠານິ ໂຫນ຺ຕິ. ປຈ຺ຈນ຺ຕິປີຕິ ຕໂຍ ມາເສ ປຕ຺ວາ ປຈ຺ຈນ຺ຕິ. ອິທານິ ຍສ຺ມາ ພຸທ຺ຘານໍ ຄຫປຕິເກນ ວາ ສສ຺ເສຫິ ວາ ອຕ຺ໂຖ ນຕ຺ຖິ, ສາສເນ ປນ ຕປ຺ປຏິຣູປກໍ ປຸຄ຺ຄລໍ ວາ ອຕ຺ຖໍ ວາ ທສ຺ເສຕຸໍ ຕໍ ຕໍ ໂອປມ຺ມໍ ອາຫຣນ຺ຕິ. ຕສ຺ມາ ຍມຕ຺ຖໍ ທສ຺ເສຕຸກາເມນ ເອຕໍ ອາຠຕໍ, ຕໍ ທສ຺ເສນ຺ໂຕ ເອວເມວ ໂຂຕິອາທິມາຫ. ຕໍ ອຕ຺ຖໂຕ ອຸຕ຺ຕານເມວ. ສິກ຺ຂາ ປນ ອິຘາປິ ມິສ຺ສິກາ ເອວ ກຖິຕາ.