໗. ທຸຕິຍສິກ຺ຂາສຸຕ຺ຕວຓ຺ຓນາ

໘໘. ສຕ຺ຕເມ ໂກລໍໂກໂລຕິ ກຸລາ ກຸລໍ ຄມນໂກ. ກຸລນ຺ຕິ ເຈຕ຺ຖ ຠໂວ ອຘິປ຺ເປໂຕ, ຕສ຺ມາ ‘‘ທ຺ເວ ວາ ຕີຓິ ວາ ກຸລານີ’’ຕິ ເອຕ຺ຖປິ ທ຺ເວ ວາ ຕໂຍ ວາ ຠເວຕິ ອຕ຺ໂຖ ເວທິຕພ຺ໂພ. ອຍຎ຺ຫິ ທ຺ເວ ວາ ຠເວ ສນ຺ຘາວຕິ ຕໂຍ ວາ, ອຸຕ຺ຕມໂກຏິຍາ ຉ ວາ. ຕສ຺ມາ ທ຺ເວ ວາ ຕີຓິ ວາ ຈຕ຺ຕາຣິ ວາ ປຎ຺ຈ ວາ ຉ ວາຕິ ເອວເມຕ຺ຖ ວິກປ຺ໂປ ທຏ຺ຐພ຺ໂພ. ເອກພີຊີຕິ ເອກສ຺ເສວ ຠວສ຺ສ ພີຊໍ ເອຕສ຺ສ ອຕ຺ຖີຕິ ເອກພີຊີ. ອຸທ຺ຘໍໂສໂຕຕິອາທີສຸ ອຕ຺ຖິ ອຸທ຺ຘໍໂສໂຕ ອກນິຏ຺ຐຄາມີ, ອຕ຺ຖິ ອຸທ຺ຘໍໂສໂຕ ນ ອກນິຏ຺ຐຄາມີ, ອຕ຺ຖິ ນ ອຸທ຺ຘໍໂສໂຕ ອກນິຏ຺ຐຄາມີ, ອຕ຺ຖິ ນ ອຸທ຺ຘໍໂສໂຕ ນ ອກນິຏ຺ຐຄາມີ. ຕຕ຺ຖ ໂຍ ອິຘ ອນາຄາມິຜລໍ ປຕ຺ວາ ອວິຫາທີສຸ ນິພ຺ພຕ຺ໂຕ ຕຕ຺ຖ ຍາວຕາຍຸກໍ ຐຕ຺ວາ ອຸປຣູປຣິ ນິພ຺ພຕ຺ຕິຕ຺ວາ ອກນິຏ຺ຐໍ ປາປຸຓາຕິ, ອຍໍ ອຸທ຺ຘໍໂສໂຕ ອກນິຏ຺ຐຄາມີ ນາມ. ໂຍ ປນ ອວິຫາທີສຸ ນິພ຺ພຕ຺ໂຕ ຕຕ຺ເຖວ ອປຣິນິພ຺ພາຍິຕ຺ວາ ອກນິຏ຺ຐມ຺ປິ ອປ຺ປຕ຺ວາ ອຸປຣິມພ຺ຣຫ຺ມໂລເກ ປຣິນິພ຺ພາຍຕິ, ອຍໍ ອຸທ຺ຘໍໂສໂຕ ນ ອກນິຏ຺ຐຄາມີ ນາມ. ໂຍ ອິໂຕ ຈວິຕ຺ວາ ອກນິຏ຺ເຐເຍວ ນິພ຺ພຕ຺ຕຕິ, ອຍໍ ນ ອຸທ຺ຘໍໂສໂຕ ອກນິຏ຺ຐຄາມີ ນາມ. ໂຍ ປນ ອວິຫາທີສຸ ຈຕູສຸ ອຎ຺ຎຕຣສ຺ມິໍ ນິພ຺ພຕ຺ຕິຕ຺ວາ ຕຕ຺ເຖວ ປຣິນິພ຺ພາຍຕິ, ອຍໍ ນ ອຸທ຺ຘໍໂສໂຕ ນ ອກນິຏ຺ຐຄາມີ ນາມ.

ຍຕ຺ຖ ກຕ຺ຖຈິ ອຸປ຺ປນ຺ໂນ ປນ ສສງ຺ຂາເຣນ ສປ຺ປໂຍເຄນ ອຣຫຕ຺ຕໍ ປຕ຺ໂຕ ສສງ຺ຂາຣປຣິນິພ຺ພາຍີ ນາມ. ອສງ຺ຂາເຣນ ອປ຺ປໂຍເຄນ ປຕ຺ໂຕ ອສງ຺ຂາຣປຣິນິພ຺ພາຍີ ນາມ. ໂຍ ປນ ກປ຺ປສຫສ຺ສາຍຸເກສຸ ອວິເຫສຸ ນິພ຺ພຕ຺ຕິຕ຺ວາ ປຎ຺ຈມໍ ກປ຺ປສຕໍ ອຕິກ຺ກມິຕ຺ວາ ອຣຫຕ຺ຕໍ ປຕ຺ໂຕ, ອຍໍ ອຸປຫຈ຺ຈປຣິນິພ຺ພາຍີ ນາມ. ອຕປ຺ປາທີສຸປິ ເອເສວ ນໂຍ. ອນ຺ຕຣາປຣິນິພ຺ພາຍີຕິ ໂຍ ອາຍຸເວມຊ຺ຌໍ ອນຕິກ຺ກມິຕ຺ວາ ປຣິນິພ຺ພາຍຕິ, ໂສ ຕິວິໂຘ ໂຫຕິ. ກປ຺ປສຫສ຺ສາຍຸເກສຸ ຕາວ ອວິເຫສຸ ນິພ຺ພຕ຺ຕິຕ຺ວາ ເອໂກ ນິພ຺ພຕ຺ຕທິວເສເຍວ ອຣຫຕ຺ຕໍ ປາປຸຓາຕິ. ໂນ ເຈ ນິພ຺ພຕ຺ຕທິວເສ ປາປຸຓາຕິ, ປຐມສ຺ສ ປນ ກປ຺ປສຕສ຺ສ ມຕ຺ຖເກ ປາປຸຓາຕິ, ອຍໍ ປຐໂມ ອນ຺ຕຣາປຣິນິພ຺ພາຍີ. ອປໂຣ ເອວໍ ອສກ຺ໂກນ຺ໂຕ ທ຺ວິນ຺ນໍ ກປ຺ປສຕານໍ ມຕ຺ຖເກ ປາປຸຓາຕິ, ອຍໍ ທຸຕິໂຍ. ອປໂຣ ເອວມ຺ປິ ອສກ຺ໂກນ຺ໂຕ ຈຕຸນ຺ນໍ ກປ຺ປສຕານໍ ມຕ຺ຖເກ ປາປຸຓາຕິ, ອຍໍ ຕຕິໂຍ ອນ຺ຕຣາປຣິນິພ຺ພາຍີ. ເສສໍ ວຸຕ຺ຕນຍເມວ.

ອິມສ຺ມິໍ ປນ ຐາເນ ຐຕ຺ວາ ຈຕຸວີສຕິ ໂສຕາປນ຺ນາ, ທ຺ວາທສ ສກທາຄາມິໂນ, ອຏ຺ຐຈຕ຺ຕາລີສ ອນາຄາມິໂນ, ທ຺ວາທສ ຈ ອຣຫນ຺ໂຕ ກເຖຕພ຺ພາ. ອິມສ຺ມິໍ ຫິ ສາສເນ ສທ຺ຘາຘຸຣໍ ປຎ຺ຎາຘຸຣນ຺ຕິ ທ຺ເວ ຘຸຣານິ, ທຸກ຺ຂປຏິປທາທນ຺ຘາຠິຎ຺ຎາທໂຍ ຈຕສ຺ໂສ ປຏິປທາ. ຕຕ຺ເຖໂກ ສທ຺ຘາຘຸເຣນ ອຠິນິວິສິຕ຺ວາ ໂສຕາປຕ຺ຕິຜລໍ ປຕ຺ວາ ເອກເມວ ຠວໍ ນິພ຺ພຕ຺ຕິຕ຺ວາ ທຸກ຺ຂສ຺ສນ຺ຕໍ ກໂຣຕິ, ອຍເມໂກ ເອກພີຊີ. ໂສ ປຏິປທາວເສນ ຈຕຸພ຺ພິໂຘ ໂຫຕິ. ຍຖາ ເຈສ, ເອວໍ ປຎ຺ຎາຘຸເຣນ ອຠິນິວິຏ຺ໂຐປີຕິ ອຏ຺ຐ ເອກພີຊິໂນ. ຕຖາ ໂກລໍໂກລາ ສຕ຺ຕກ຺ຂຕ຺ຕຸປຣມາ ຈາຕິ ອິເມ ຈຕຸວີສຕິ ໂສຕາປນ຺ນາ ນາມ. ຕີສຸ ປນ ວິໂມກ຺ເຂສຸ ສຸຎ຺ຎຕວິໂມກ຺ເຂນ ສກທາຄາມິຠູມິໍ ປຕ຺ຕາ ຈຕຸນ຺ນໍ ປຏິປທານໍ ວເສນ ຈຕ຺ຕາໂຣ ສກທາຄາມິໂນ, ຕຖາ ອນິມິຕ຺ຕວິໂມກ຺ເຂນ ປຕ຺ຕາ ຈຕ຺ຕາໂຣ, ອປ຺ປຓິຫິຕວິໂມກ຺ເຂນ ປຕ຺ຕາ ຈຕ຺ຕາໂຣຕິ ອິເມ ທ຺ວາທສ ສກທາຄາມິໂນ. ອວິເຫສຸ ປນ ຕໂຍ ອນ຺ຕຣາປຣິນິພ຺ພາຍິໂນ, ເອໂກ ອຸປຫຈ຺ຈປຣິນິພ຺ພາຍີ, ເອໂກ ອຸທ຺ຘໍໂສໂຕ ອກນິຏ຺ຐຄາມີຕິ ປຎ຺ຈ ອນາຄາມິໂນ, ເຕ ອສງ຺ຂາຣປຣິນິພ຺ພາຍິໂນ ປຎ຺ຈ, ສສງ຺ຂາຣປຣິນິພ຺ພາຍິໂນ ປຎ຺ຈາຕິ ທສ ໂຫນ຺ຕິ, ຕຖາ ອຕປ຺ປາທີສຸ. ອກນິຏ຺ເຐສຸ ປນ ອຸທ຺ຘໍໂສໂຕ ນຕ຺ຖິ, ຕສ຺ມາ ຕຕ຺ຖ ຈຕ຺ຕາໂຣ ສສງ຺ຂາຣປຣິນິພ຺ພາຍີ, ຈຕ຺ຕາໂຣ ອສງ຺ຂາຣປຣິນິພ຺ພາຍີຕິ ອຏ຺ຐ, ອິເມ ອຏ຺ຐຈຕ຺ຕາລີສ ອນາຄາມິໂນ. ຍຖາ ປນ ສກທາຄາມິໂນ, ຕເຖວ ອຣຫນ຺ໂຕປິ ທ຺ວາທສ ເວທິຕພ຺ພາ. ອິຘາປິ ຕິສ຺ໂສ ສິກ຺ຂາ ມິສ຺ສິກາວ ກຖິຕາ.