໔. ວຊ຺ຊິປຸຕ຺ຕສຸຕ຺ຕວຓ຺ຓນາ

໘໕. ຈຕຸຕ຺ເຖ ວຊ຺ຊິປຸຕ຺ຕໂກຕິ ວຊ຺ຊິຣາຊກຸລສ຺ສ ປຸຕ຺ໂຕ. ທິຍຑ຺ຒສິກ຺ຂາປທສຕນ຺ຕິ ປຓ຺ຓາສາຘິກໍ ສິກ຺ຂາປທສຕໍ. ຕສ຺ມິໍ ສມເຍ ປຎ຺ຎຕ຺ຕານິ ສິກ຺ຂາປທາເນວ ສນ຺ຘາເຍຕໍ ວຸຕ຺ຕໍ. ໂສ ກິຣ ຠິກ຺ຂຸ ອຊ຺ຊວສມ຺ປນ຺ໂນ ອຸຊຸຊາຕິໂກ ອວງ຺ໂກ ອກຸຏິໂລ, ຕສ຺ມາ ‘‘ອຫໍ ເອຕ຺ຕການິ ສິກ຺ຂາປທານິ ຣກ຺ຂິຕຸໍ ສກ຺ກຸເຓຍ຺ຍໍ ວາ ນ ວາ’’ຕິ ຈິນ຺ເຕຕ຺ວາ ສຕ຺ຖຸ ອາໂຣເຈສິ. ສກ຺ໂກມຫນ຺ຕິ ສກ຺ໂກມິ ອຫໍ. ໂສ ກິຣ ‘‘ເອຕ຺ຕເກສຸ ສິກ຺ຂາປເທສຸ ສິກ຺ຂນ຺ຕສ຺ສ ອຄຣຸ ຕີສຸ ສິກ຺ຂາສຸ ສິກ຺ຂິຕຸ’’ນ຺ຕິ ມຎ຺ຎມາໂນ ເອວມາຫ. ອຖ ຠຄວາ ຍຖາ ນາມ ປຎ຺ຎາສ ຕິຓກລາປິໂຍ ອຸກ຺ຂິປິຕຸໍ ອສກ຺ໂກນ຺ຕສ຺ສ ກລາປິຍສຕໍ ພນ຺ຘິຕ຺ວາ ສີເສ ຐເປຍ຺ຍ, ເອວເມວ ເອກິສ຺ສາປິ ສິກ຺ຂາຍ ສິກ຺ຂິຕຸໍ ອສກ຺ໂກນ຺ຕສ຺ສ ອປຣາ ທ຺ເວປິ ສິກ຺ຂາ ອຸປຣິ ປກ຺ຂິປນ຺ໂຕ ຕສ຺ມາຕິຫ ຕ຺ວໍ ຠິກ຺ຂູຕິອາທິມາຫ. ສຸຂຸມາໂລ ກິຣ ອຸຕ຺ຕໂຣ ນາມ ຊານປທມນຸສ຺ໂສ ໂລຫປາສາທວິຫາເຣ ວສຕິ. ອຖ ນໍ ທຫຣຠິກ຺ຂູ ອາຫໍສຸ – ‘‘ອຸຕ຺ຕຣ, ອຄ຺ຄິສາລາ ໂອວສ຺ສຕິ, ຕິຓໍ ກປ຺ປິຍໍ ກຕ຺ວາ ເທຫີ’’ຕິ. ຕໍ ອາທາຍ ອຏວິໍ ຄນ຺ຕ຺ວາ ເຕນ ລາຍິຕໍ ຕິຓໍເຍວ ກຣເຬ ພນ຺ຘິຕ຺ວາ ‘‘ປຎ຺ຎາສ ກຣເຬ ຄເຫຕຸໍ ສກ຺ຂິສ຺ສສິ ອຸຕ຺ຕຣາ’’ຕິ ອາຫໍສຸ. ໂສ ‘‘ນ ສກ຺ຂິສ຺ສາມີ’’ຕິ ອາຫ. ອສີຕິໍ ປນ ສກ຺ຂິສ຺ສສີຕິ? ນ ສກ຺ຂິສ຺ສາມິ, ຠນ຺ເຕຕິ. ເອກໍ ກຣຬສຕໍ ສກ຺ຂິສ຺ສສີຕິ? ອາມ, ຠນ຺ເຕ, ຄຓ຺ຫິສ຺ສາມີຕິ. ທຫຣຠິກ຺ຂູ ກຣຬສຕໍ ພນ຺ຘິຕ຺ວາ ຕສ຺ສ ສີເສ ຐປຍິໍສຸ. ໂສ ອຸກ຺ຂິປິຕ຺ວາ ນິຕ຺ຖຸນນ຺ໂຕ ຄນ຺ຕ຺ວາ ອຄ຺ຄິສາລາຍ ສມີເປ ປາເຕສິ. ອຖ ນໍ ຠິກ຺ຂູ ‘‘ກິລນ຺ຕຣູໂປສິ ອຸຕ຺ຕຣາ’’ຕິ ອາຫໍສຸ. ອາມ, ຠນ຺ເຕ, ທຫຣາ ຠິກ຺ຂູ ມໍ ວຎ຺ເຈສຸໍ, ອິມໍ ເອກມ຺ປິ ກຣຬສຕໍ ອຸກ຺ຂິປິຕຸໍ ອສກ຺ໂກນ຺ຕໍ ມໍ ‘‘ປຓ຺ຓາສ ກຣເຬ ອຸກ຺ຂິປາຫີ’’ຕິ ວທິໍສຸ. ອາມ, ອຸຕ຺ຕຣ, ວຎ຺ຈຍິໍສຸ ຕນ຺ຕິ. ເອວໍ ສມ຺ປທມິທໍ ເວທິຕພ຺ພໍ. ອິຘາປິ ຕິສ຺ໂສ ສິກ຺ຂາ ມິສ຺ສິກາວ ກຖິຕາ.