໑. ສມຓສຸຕ຺ຕວຓ຺ຓນາ

໘໒. ຈຕຸຕ຺ຖສ຺ສ ປຐເມ ສມຓິຍານີຕິ ສມຓສນ຺ຕການິ. ສມຓກຣຓີຍານີຕິ ສມເຓນ ກຕ຺ຕພ຺ພກິຈ຺ຈານິ. ອຘິສີລສິກ຺ຂາສມາທານນ຺ຕິອາທີສຸ ສມາທານໍ ວຸຈ຺ຈຕິ ຄຫຓໍ, ອຘິສີລສິກ຺ຂາຍ ສມາທານໍ ຄຫຓໍ ປູຣຓໍ ອຘິສີລສິກ຺ຂາສມາທານໍ. ເສສປທທ຺ວເຍປິ ເອເສວ ນໂຍ. ເອຕ຺ຖ ຈ ສີລໍ ອຘິສີລໍ, ຈິຕ຺ຕໍ ອຘິຈິຕ຺ຕໍ, ປຎ຺ຎາ ອຘິປຎ຺ຎາຕິ ອຍໍ ວິຠາໂຄ ເວທິຕພ຺ໂພ. ຕຕ຺ຖ ປຎ຺ຈສີລໍ ສີລໍ ນາມ, ຕໍ ອຸປາທາຍ ທສສີລໍ ອຘິສີລໍ ນາມ, ຕມ຺ປິ ອຸປາທາຍ ຈຕຸປາຣິສຸທ຺ຘິສີລໍ ອຘິສີລໍ ນາມ. ອປິຈ ສພ຺ພມ຺ປິ ໂລກິຍສີລໍ ສີລໍ ນາມ, ໂລກຸຕ຺ຕຣສີລໍ ອຘິສີລໍ, ຕເທວ ສິກ຺ຂິຕພ຺ພໂຕ ສິກ຺ຂາຕິ ວຸຈ຺ຈຕິ. ກາມາວຈຣຈິຕ຺ຕໍ ປນ ຈິຕ຺ຕໍ ນາມ, ຕໍ ອຸປາທາຍ ຣູປາວຈຣໍ ອຘິຈິຕ຺ຕໍ ນາມ, ຕມ຺ປິ ອຸປາທາຍ ອຣູປາວຈຣໍ ອຘິຈິຕ຺ຕໍ ນາມ. ອປິຈ ສພ຺ພມ຺ປິ ໂລກິຍຈິຕ຺ຕໍ ຈິຕ຺ຕເມວ, ໂລກຸຕ຺ຕຣໍ ອຘິຈິຕ຺ຕໍ. ປຎ຺ຎາຍປິ ເອເສວ ນໂຍ. ຕສ຺ມາຕິ ຍສ຺ມາ ອິມານິ ຕີຓິ ສມຓກຣຓີຍານິ, ຕສ຺ມາ. ຕິພ຺ໂພຕິ ພຫໂລ. ຉນ຺ໂທຕິ ກຕ຺ຕຸກມ຺ຍຕາກຸສລຈ຺ຉນ຺ໂທ. ອິຕິ ອິມສ຺ມິໍ ສຸຕ຺ຕນ຺ເຕ ຕິສ຺ໂສ ສິກ຺ຂາ ໂລກິຍໂລກຸຕ຺ຕຣາ ກຖິຕາຕິ.