໖. ເສວິຕພ຺ພສຸຕ຺ຕວຓ຺ຓນາ

໒໖. ຉຏ຺ເຐ ເສວິຕພ຺ໂພຕິ ອຸປສງ຺ກມິຕພ຺ໂພ. ຠຊິຕພ຺ໂພຕິ ອລ຺ລີຍິຕພ຺ໂພ. ປຍິຣຸປາສິຕພ຺ໂພຕິ ສນ຺ຕິເກ ນິສີທນວເສນ ປຸນປ຺ປຸນໍ ອຸປາສິຕພ຺ໂພ. ສກ຺ກຕ຺ວາ ຄຣຸໍ ກຕ຺ວາຕິ ສກ຺ກາຣຎ຺ເຈວ ຄຣຸກາຣຎ຺ຈ ກຕ຺ວາ. ຫີໂນ ໂຫຕິ ສີເລນາຕິອາທີສຸ ອຸປາທາຍຸປາທາຍ ຫີນຕາ ເວທິຕພ຺ພາ. ຕຕ຺ຖ ໂຍ ຫິ ປຎ຺ຈ ສີລານິ ຣກ຺ຂຕິ, ໂສ ທສ ສີລານິ ຣກ຺ຂນ຺ເຕນ ນ ເສວິຕພ຺ໂພ. ໂຍ ທສ ສີລານິ ຣກ຺ຂຕິ, ໂສ ຈຕຸປາຣິສຸທ຺ຘິສີລໍ ຣກ຺ຂນ຺ເຕນ ນ ເສວິຕພ຺ໂພ. ອຎ຺ຎຕ຺ຣ ອນຸທ຺ທຍາ ອຎ຺ຎຕ຺ຣ ອນຸກມ຺ປາຕິ ຐເປຕ຺ວາ ອນຸທ຺ທຍຎ຺ຈ ອນຸກມ຺ປຎ຺ຈ. ອຕ຺ຕໂນ ອຕ຺ຖາເຍວ ຫິ ເອວຣູໂປ ປຸຄ຺ຄໂລ ນ ເສວິຕພ຺ໂພ, ອນຸທ຺ທຍານຸກມ຺ປາວເສນ ປນ ຕໍ ອຸປສງ຺ກມິຕຸໍ ວຏ຺ຏຕິ.

ສີລສາມຎ຺ຎຄຕານໍ ສຕນ຺ຕິ ສີເລນ ສມານຠາວໍ ຄຕານໍ ສນ຺ຕານໍ. ສີລກຖາ ຈ ໂນ ຠວິສ຺ສຕີຕິ ເອວໍ ສມານສີລານໍ ອມ຺ຫາກໍ ສີລເມວ ອາຣພ຺ຠ ກຖາ ຠວິສ຺ສຕິ. ສາ ຈ ໂນ ປວຕ຺ຕິນີ ຠວິສ຺ສຕີຕິ ສາ ຈ ອມ຺ຫາກໍ ກຖາ ທິວສມ຺ປິ ກເຖນ຺ຕານໍ ປວຕ຺ຕິສ຺ສຕິ ນ ປຏິຫຎ຺ຎິສ຺ສຕິ. ສາ ຈ ໂນ ຜາສຸ ຠວິສ຺ສຕີຕິ ສາ ຈ ທິວສມ຺ປິ ປວຕ຺ຕມານາ ສີລກຖາ ອມ຺ຫາກໍ ຜາສຸວິຫາໂຣ ສຸຂວິຫາໂຣ ຠວິສ຺ສຕິ. ສມາຘິປຎ຺ຎາກຖາສຸປິ ເອເສວ ນໂຍ.

ສີລກ຺ຂນ຺ຘນ຺ຕິ ສີລຣາສິໍ. ຕຕ຺ຖ ຕຕ຺ຖ ປຎ຺ຎາຍ ອນຸຄ຺ຄເຫສ຺ສາມີຕິ ເອຕ຺ຖ ສີລສ຺ສ ອສປ຺ປາເຍ ອນຸປກາຣຘມ຺ເມ ວຊ຺ເຊຕ຺ວາ ສປ຺ປາເຍ ອຸປກາຣຘມ຺ເມ ເສວນ຺ໂຕ ຕສ຺ມິໍ ຕສ຺ມິໍ ຐາເນ ສີລກ຺ຂນ຺ຘໍ ປຎ຺ຎາຍ ອນຸຄ຺ຄຓ຺ຫາຕິ ນາມ. ສມາຘິປຎ຺ຎາກ຺ຂນ຺ເຘສຸປິ ເອເສວ ນໂຍ. ນິຫີຍຕີຕິ ອຕ຺ຕໂນ ຫີນຕຣໍ ປຸຄ຺ຄລໍ ເສວນ຺ໂຕ ຂາຣປຣິສ຺ສາວເນ ອາສິຕ຺ຕອຸທກໍ ວິຍ ສຕຕໍ ສມິຕໍ ຫາຍຕິ ປຣິຫາຍຕິ. ຕຸລ຺ຍເສວີຕິ ອຕ຺ຕນາ ສມານເສວີ. ເສຏ຺ຐມຸປນມນ຺ຕິ ເສຏ຺ຐໍ ປຸຄ຺ຄລໍ ໂອຓມນ຺ໂຕ. ອຸເທຕິ ຂິປ຺ປນ຺ຕິ ຂິປ຺ປເມວ ວຑ຺ຒຕິ. ຕສ຺ມາ ອຕ຺ຕໂນ ອຸຕ຺ຕຣິໍ ຠເຊຖາຕິ ຍສ຺ມາ ເສຏ຺ຐໍ ປຸຄ຺ຄລໍ ອຸປນມນ຺ໂຕ ອຸເທຕິ ຂິປ຺ປໍ, ຕສ຺ມາ ອຕ຺ຕໂນ ອຸຕ຺ຕຣິຕຣໍ ວິສິຏ຺ຐຕຣໍ ຠເຊຖ.