໔. ພຫຸກາຣສຸຕ຺ຕວຓ຺ຓນາ

໒໔. ຈຕຸຕ຺ເຖ ຕໂຍເມ, ຠິກ຺ຂເວ, ປຸຄ຺ຄລາຕິ ຕໂຍ ອາຈຣິຍປຸຄ຺ຄລາ. ປຸຄ຺ຄລສ຺ສ ພຫຸກາຣາຕິ ອນ຺ເຕວາສິກປຸຄ຺ຄລສ຺ສ ພຫູປກາຣາ. ພຸທ຺ຘນ຺ຕິ ສພ຺ພຎ຺ຎຸພຸທ຺ຘໍ. ສຣຓໍ ຄໂຕ ໂຫຕີຕິ ອວສ຺ສຍໍ ຄໂຕ ໂຫຕິ. ຘມ຺ມນ຺ຕິ ສຕນ຺ຕິກໍ ນວໂລກຸຕ຺ຕຣຘມ຺ມໍ. ສງ຺ຆນ຺ຕິ ອຏ຺ຐອຣິຍປຸຄ຺ຄລສມູຫໍ. ອິທຎ຺ຈ ປນ ສຣຓຄມນໍ ອຄ຺ຄຫິຕສຣຓປຸພ຺ພສ຺ສ ອກຕາຠິນິເວສສ຺ສ ວເສນ ວຸຕ຺ຕໍ. ອິຕິ ອິມສ຺ມິໍ ສຸຕ຺ເຕ ສຣຓທາຍໂກ ໂສຕາປຕ຺ຕິມຄ຺ຄສມ຺ປາປໂກ ອຣຫຕ຺ຕມຄ຺ຄສມ຺ປາປໂກຕິ ຕໂຍ ອາຈຣິຍາ ພຫຸກາຣາຕິ ອາຄຕາ, ປພ຺ພຊ຺ຊາທາຍໂກ ພຸທ຺ຘວຈນທາຍໂກ ກມ຺ມວາຈາຈຣິໂຍ ສກທາຄາມິມຄ຺ຄສມ຺ປາປໂກ ອນາຄາມິມຄ຺ຄສມ຺ປາປໂກຕິ ອິເມ ອາຈຣິຍາ ນ ອາຄຕາ, ກິໍ ເອເຕ ນ ພຫຸກາຣາຕິ? ໂນ, ນ ພຫຸກາຣາ. ອຍໍ ປນ ເທສນາ ທຸວິເຘນ ປຣິຈ຺ຉິນ຺ນາ. ຕສ຺ມາ ສພ຺ເພເປເຕ ພຫຸກາຣາ. ເຕສຸ ສຣຓຄມນສ຺ມິໍເຍວ ອກຕາຠິນິເວໂສ ວຏ຺ຏຕິ, ຈຕຸປາຣິສຸທ຺ຘິສີລກສິຓປຣິກມ຺ມວິປສ຺ສນາຎາຓານິ ປນ ປຐມມຄ຺ຄສນ຺ນິສ຺ສິຕານິ ໂຫນ຺ຕິ, ອຸປຣິ ທ຺ເວ ມຄ຺ຄາ ຈ ຜລານິ ຈ ອຣຫຕ຺ຕມຄ຺ຄສນ຺ນິສ຺ສິຕານີຕິ ເວທິຕພ຺ພານິ.

ອິມິນາ ປຸຄ຺ຄເລນາຕິ ອິມິນາ ອນ຺ເຕວາສິກປຸຄ຺ຄເລນ. ນ ສຸປ຺ປຕິກາຣໍ ວທາມີຕິ ປຕິກາຣໍ ກາຕຸໍ ນ ສຸກຣນ຺ຕິ ວທາມິ. ອຠິວາທນາທີສຸ ອເນກສຕວາຣໍ ອເນກສຫສ຺ສວາຣມ຺ປິ ຫິ ປຎ຺ຈປຕິຏ຺ຐິເຕນ ນິປຕິຕ຺ວາ ວນ຺ທນ຺ໂຕ ອາສນາ ວຸຏ຺ຐາຍ ປຈ຺ຈຸຄ຺ຄຈ຺ຉນ຺ໂຕ ທິຏ຺ຐທິຏ຺ຐກ຺ຂເຓ ອຎ຺ຊລິໍ ປຄ຺ຄຓ຺ຫນ຺ໂຕ ອນຸຈ຺ຉວິກໍ ສາມີຈິກມ຺ມໍ ກໂຣນ຺ໂຕ ທິວເສ ທິວເສ ຈີວຣສຕໍ ຈີວຣສຫສ຺ສໍ ປິຓ຺ຑປາຕສຕໍ ປິຓ຺ຑປາຕສຫສ຺ສໍ ທທມາໂນ ຈກ຺ກວາຬປຣິຍນ຺ເຕນ ສພ຺ພຣຕນມຍໍ ອາວາສໍ ກໂຣນ຺ໂຕ ສປ຺ປິນວນີຕາທິນານປ຺ປກາຣໍ ເຠສຊ຺ຊໍ ອນຸປ຺ປທຊ຺ຊມາໂນ ເນວ ສກ຺ໂກຕິ ອາຈຣິເຍນ ກຕສ຺ສ ປຕິກາຣໍ ນາມ ກາຕຸນ຺ຕິ ເອວມຕ຺ໂຖ ເວທິຕພ຺ໂພ.