໑. ສມິທ຺ຘສຸຕ຺ຕວຓ຺ຓນາ

໒໑. ຕຕິຍສ຺ສ ປຐເມ ຌານຜສ຺ສໍ ປຐມໍ ຜຸສຕິ, ປຈ຺ຉາ ນິໂຣຘໍ ນິພ຺ພານໍ ສຈ຺ຉິກໂຣຕີຕິ ກາຍສກ຺ຂິ. ທິຏ຺ຐນ຺ຕໍ ປຕ຺ໂຕຕິ ທິຏ຺ຐິປ຺ປຕ຺ໂຕ. ສທ຺ທຫນ຺ໂຕ ວິມຸຕ຺ໂຕຕິ ສທ຺ຘາວິມຸຕ຺ໂຕ. ຂມຕີຕິ ຣຸຈ຺ຈຕິ. ອຠິກ຺ກນ຺ຕຕໂຣຕິ ອຕິສຸນ຺ທຣຕໂຣ. ປຓີຕຕໂຣຕິ ອຕິປຓີຕຕໂຣ. ສທ຺ຘິນ຺ທ຺ຣິຍໍ ອຘິມຕ຺ຕໍ ໂຫຕີຕິ ສມິທ຺ຘຕ຺ເຖຣສ຺ສ ກິຣ ອຣຫຕ຺ຕມຄ຺ຄກ຺ຂເຓ ສທ຺ຘິນ຺ທ຺ຣິຍໍ ຘຸຣໍ ອໂຫສິ, ເສສານິ ຈຕ຺ຕາຣິ ສຫຊາຕິນ຺ທ຺ຣິຍານິ ຕສ຺ເສວ ປຣິວາຣານິ ອເຫສຸໍ. ອິຕິ ເຖໂຣ ອຕ຺ຕນາ ປຏິວິທ຺ຘມຄ຺ຄໍ ກເຖນ຺ໂຕ ເອວມາຫ. ມຫາໂກຏ຺ຐິກຕ຺ເຖຣສ຺ສ ປນ ອຣຫຕ຺ຕມຄ຺ຄກ຺ຂເຓ ສມາຘິນ຺ທ຺ຣິຍໍ ຘຸຣໍ ອໂຫສິ, ເສສານິ ຈຕ຺ຕາຣິ ອິນ຺ທ຺ຣິຍານິ ຕສ຺ເສວ ປຣິວາຣານິ ອເຫສຸໍ. ຕສ຺ມາ ໂສປິ ສມາຘິນ຺ທ຺ຣິຍໍ ອຘິມຕ຺ຕນ຺ຕິ ກເຖນ຺ໂຕ ອຕ຺ຕນາ ປຏິວິທ຺ຘມຄ຺ຄເມວ ກເຖສິ. ສາຣິປຸຕ຺ຕຕ຺ເຖຣສ຺ສ ປນ ອຣຫຕ຺ຕມຄ຺ຄກ຺ຂເຓ ປຎ຺ຎິນ຺ທ຺ຣິຍໍ ຘຸຣໍ ອໂຫສິ. ເສສານິ ຈຕ຺ຕາຣິ ອິນ຺ທ຺ຣິຍານິ ຕສ຺ເສວ ປຣິວາຣານິ ອເຫສຸໍ. ຕສ຺ມາ ໂສປິ ປຎ຺ຎິນ຺ທ຺ຣິຍໍ ອຘິມຕ຺ຕນ຺ຕິ ກເຖນ຺ໂຕ ອຕ຺ຕນາ ປຏິວິທ຺ຘມຄ຺ຄເມວ ກເຖສິ.

ນ ຂ຺ເວຕ຺ຖາຕິ ນ ໂຂ ເອຕ຺ຖ. ເອກໍເສນ ພ຺ຍາກາຕຸນ຺ຕິ ເອກນ຺ເຕນ ພ຺ຍາກຣິຕຸໍ. ອຣຫຕ຺ຕາຍ ປຏິປນ຺ໂນຕິ ອຣຫຕ຺ຕມຄ຺ຄສມງ຺ຄິໍ ທສ຺ເສຕິ. ເອວເມຕສ຺ມິໍ ສຸຕ຺ເຕ ຕີຫິປິ ເຖເຣຫິ ອຕ຺ຕນາ ປຏິວິທ຺ຘມຄ຺ໂຄວ ກຖິໂຕ, ສມ຺ມາສມ຺ພຸທ຺ໂຘ ປນ ຠຸມ຺ມນ຺ຕເຣເນວ ກເຖສິ.