໗-໘. ສຎ຺ເຈຕນິກສຸຕ຺ຕທ຺ວຍວຓ຺ຓນາ

໒໑໗-໒໑໘. ສຕ຺ຕເມ ສຎ຺ເຈຕນິການນ຺ຕິ ເຈເຕຕ຺ວາ ປກປ຺ເປຕ຺ວາ ກຕານໍ. ອຸປຈິຕານນ຺ຕິ ຈິຕານໍ ວຑ຺ຒິຕານໍ. ອປ຺ປຏິສໍເວທິຕ຺ວາຕິ ເຕສໍ ກມ຺ມານໍ ວິປາກໍ ອເວທິຍິຕ຺ວາ. ພ຺ຍນ຺ຕີຠາວນ຺ຕິ ວິຄຕນ຺ຕຠາວໍ ເຕສໍ ກມ຺ມານໍ ປຣິຈ຺ເຉທປຣິວຏຸມຕາກຣຓໍ. ຕຎ຺ຈ ໂຂ ທິຏ຺ເຐວ ຘມ຺ເມຕິ ຕຎ຺ຈ ໂຂ ວິປາກໍ ທິຏ຺ຐຘມ຺ມເວທນີຍໍ ທິຏ຺ເຐວ ຘມ຺ເມ. ອຸປປຊ຺ຊນ຺ຕິ ອຸປປຊ຺ຊເວທນີຍໍ ອນນ຺ຕເຣ ອຕ຺ຕຠາເວ. ອປເຣ ວາ ປຣິຍາເຍຕິ ອປຣປຣິຍາຍເວທນີຍໍ ປນ ສໍສາຣປ຺ປວຕ຺ເຕ ສຕິ ສຫສ຺ສິເມປິ ອຕ຺ຕຠາເວຕິ. ອິມິນາ ອິທໍ ທສ຺ເສຕິ ‘‘ສໍສາຣປ຺ປວຕ຺ເຕ ປຏິລທ຺ຘວິປາກາຣຫກມ຺ເມ ນ ວິຊ຺ຊຕິ ໂສ ຊຄຕິປ຺ປເທໂສ, ຍຕ຺ຖ ຐິໂຕ ມຸຈ຺ເຈຍ຺ຍ ປາປກມ຺ມາ’’ຕິ. ຕິວິຘາຕິ ຕິປ຺ປກາຣາ. ກາຍກມ຺ມນ຺ຕສນ຺ໂທສພ຺ຍາປຕ຺ຕີຕິ ກາຍກມ຺ມນ຺ຕສງ຺ຂາຕາ ວິປຕ຺ຕິ. ອິມິນາ ນເຍນ ສພ຺ພປທານິ ເວທິຕພ຺ພານິ. ອຏ຺ຐເມ ອປຓ຺ຓໂກ ມຓີຕິ ສມນ຺ຕໂຕ ຈຕຸຣສ຺ໂສ ປາສໂກ.