໖. ນິຊ຺ຊຣສຸຕ຺ຕວຓ຺ຓນາ

໑໐໖. ຉຏ຺ເຐ ນິຊ຺ຊຣວຕ຺ຖູນີຕິ ນິຊ຺ຊຣກາຣຓານິ. ມິຈ຺ຉາທິຏ຺ຐິ ນິຊ຺ຊິຓ຺ຓາ ໂຫຕີຕິ ອຍໍ ເຫຏ຺ຐາ ວິປສ຺ສນາຍປິ ນິຊ຺ຊິຓ຺ຓາ ເອວ ປຫີນາ. ກສ຺ມາ ປຸນ ຄຫິຕາຕິ? ອສມຸຈ຺ຉິນ຺ນຕ຺ຕາ. ວິປສ຺ສນາຍ ຫິ ກິຎ຺ຈາປິ ນິຊ຺ຊິຓ຺ຓາ, ນ ປນ ສມຸຈ຺ຉິນ຺ນາ. ມຄ຺ໂຄ ປນ ອຸປ຺ປຊ຺ຊິຕ຺ວາ ຕໍ ສມຸຈ຺ຉິນ຺ທຕິ, ນ ປຸນ ວຸຏ຺ຐາຕຸໍ ເທຕິ. ຕສ຺ມາ ປຸນ ຄຫິຕາ. ເອວໍ ສພ຺ພປເທສຸ ໂຍເຊຕພ຺ໂພ. ເອຕ຺ຖ ຈ ສມ຺ມາວິມຸຕ຺ຕິປຈ຺ຈຍາ ຈຕຸສຏ຺ຐິ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕິ. ກຕເມ ຈຕຸສຏ຺ຐິ? ໂສຕາປຕ຺ຕິມຄ຺ຄກ຺ຂເຓ ອຘິໂມກ຺ຂຏ຺ເຐນ ສທ຺ຘິນ຺ທ຺ຣິຍໍ ປຣິປູຣຕິ, ປຄ຺ຄຫຏ຺ເຐນ ວີຣິຍິນ຺ທ຺ຣິຍໍ, ອຸປຏ຺ຐານຏ຺ເຐນ ສຕິນ຺ທ຺ຣິຍໍ, ອວິກ຺ເຂປຏ຺ເຐນ ສມາຘິນ຺ທ຺ຣິຍໍ, ທສ຺ສນຏ຺ເຐນ ປຎ຺ຎິນ຺ທ຺ຣິຍໍ ປຣິປູເຣຕິ, ວິຊານນຏ຺ເຐນ ມນິນ຺ທ຺ຣິຍໍ, ອຠິນນ຺ທນຏ຺ເຐນ ໂສມນສ຺ສິນ຺ທ຺ຣິຍໍ, ປວຕ຺ຕສນ຺ຕຕິອາຘິປເຕຍ຺ຍຏ຺ເຐນ ຊີວິຕິນ຺ທ຺ຣິຍໍ ປຣິປູຣຕິ…ເປ… ອຣຫຕ຺ຕຜລກ຺ຂເຓ ອຘິໂມກ຺ຂຏ຺ເຐນ ສທ຺ຘິນ຺ທ຺ຣິຍໍ…ເປ… ປວຕ຺ຕສນ຺ຕຕິອາຘິປເຕຍ຺ຍຏ຺ເຐນ ຊີວິຕິນ຺ທ຺ຣິຍໍ ປຣິປູຣຕີຕິ ເອວໍ ຈຕູສຸ ຈ ມຄ຺ເຄສຸ ຈຕູສຸ ຈ ຜເລສຸ ອຏ຺ຐຏ຺ຐ ຫຸຕ຺ວາ ຈຕຸສຏ຺ຐິ ຘມ຺ມາ ປາຣິປູຣິໍ ຄຈ຺ຉນ຺ຕິ.