໔. ວຊ຺ຊິຍມາຫິຕສຸຕ຺ຕວຓ຺ຓນາ

໙໔. ຈຕຸຕ຺ເຖ ວຊ຺ຊິຍມາຫິໂຕຕິ ເອວໍນາມໂກ. ສພ຺ພໍ ຕປນ຺ຕິ ສພ຺ພເມວ ທຸກ຺ກຣກາຣິກໍ. ສພ຺ພໍ ຕປສ຺ສິນ຺ຕິ ສພ຺ພໍ ຕປນິສ຺ສິຕກໍ. ລູຂາຊີວິນ຺ຕິ ທຸກ຺ກຣກາຣິກຊີວິການຸໂຍຄໍ ອນຸຍຸຕ຺ຕໍ. ຄາຣຍ຺ຫນ຺ຕິ ຄຣຫິຕພ຺ພຍຸຕ຺ຕກໍ. ປສໍສິຍນ຺ຕິ ປສໍສິຕພ຺ພຍຸຕ຺ຕກໍ. ເວນຍິໂກຕິ ສຍໍ ອວິນີໂຕ ອຎ຺ເຎຫິ ວິເນຕພ຺ໂພ. ອປຎ຺ຎຕ຺ຕິໂກຕິ ນ ກິຎ຺ຈິ ປຎ຺ຎາເປຕຸໍ ສກ຺ໂກຕິ. ອຖ ວາ ເວນຍິໂກຕິ ສຕ຺ຕວິນາສໂກ. ອປຎ຺ຎຕ຺ຕິໂກຕິ ອປຈ຺ຈກ຺ຂໍ ນິພ຺ພານໍ ປຎ຺ຎາເປຕິ, ສຍໍກຕາທີສຸ ກິຎ຺ຈິ ປຎ຺ຎາເປຕຸໍ ນ ສກ຺ໂກຕິ. ນ ໂສ ຠຄວາ ເວນຍິໂກຕິ ໂສ ຠຄວາ ເອວໍ ຍາຖາວໂຕ ຎຕ຺ວາ ກຸສລາກຸສລໍ ປຎ຺ຎາເປນ຺ໂຕ ນ ອຎ຺ເຎນ ວິເນຕພ຺ໂພ ນ ອຎ຺ຎສິກ຺ຂິໂຕ. ເຍ ຈ ຘມ຺ເມ ອຸປາທາຍ ສຕ຺ໂຕ ປຎ຺ຎາປິຍຕິ, ເຕສໍ ປຎ຺ຎາປນໂຕ ນ ສຕ຺ຕວິນາສໂກ, ສຸວິນີໂຕ ສຸສິກ຺ຂິໂຕ ສຕ຺ຕວິນາຍໂກຕິ ອຕ຺ໂຖ. ຕສ຺ສ ຈ ປຎ຺ຎຕ຺ຕິໂຍ ສປຎ຺ຎຕ຺ຕິໂຍເຍວາຕິ ທສ຺ເສຕິ. ວິມຸຕ຺ຕິໍ ວິມຸຈ຺ຈໂຕ ອກຸສລາ ຘມ຺ມາຕິ ມິຈ຺ຉາທິຏ຺ຐິສງ຺ຂາຕໍ ຈິຕ຺ຕສ຺ສ ອຘິມຸຕ຺ຕິໍ ອຘິມຸຈ຺ຈໂຕ ອກຸສລາ ຘມ຺ມາ ວຑ຺ຒນ຺ຕິ ນາມ, ຕໍ ສນ຺ຘາເຍຕໍ ວຸຕ຺ຕໍ. ສາສເນ ປນ ຈິຕ຺ຕສ຺ສ ວິມຸຕ຺ຕິສງ຺ຂາໂຕ ວິມຸຕ຺ຕິ ກຸສລານໍເຍວ ປຈ຺ຈໂຍ ໂຫຕິ.