໕. ມິຄສາລາສຸຕ຺ຕວຓ຺ຓນາ

໗໕. ປຎ຺ຈມສ຺ສ ອາທິມ຺ຫິ ຕາວ ຍໍ ວຕ຺ຕພ຺ພໍ, ຕໍ ຉກ຺ກນິປາເຕ ວຸຕ຺ຕເມວ. ທຸສ຺ສີໂລ ໂຫຕີຕິອາທີສຸ ປນ ທຸສ຺ສີໂລຕິ ນິສ຺ສີໂລ. ເຈໂຕວິມຸຕ຺ຕິນ຺ຕິ ຜລສມາຘິໍ. ປຎ຺ຎາວິມຸຕ຺ຕິນ຺ຕິ ຜລຎາຓໍ. ນປ຺ປຊານາຕີຕິ ອຸຄ຺ຄຫປຣິປຸຈ຺ຉາວເສນ ນ ຊານາຕິ. ທຸສ຺ສີລ຺ຍໍ ອປຣິເສສໍ ນິຣຸຊ຺ຌຕີຕິ ເອຕ຺ຖ ປຎ຺ຈ ທຸສ຺ສີລ຺ຍານິ ຕາວ ໂສຕາປຕ຺ຕິມຄ຺ເຄນ ປຫີຍນ຺ຕິ, ທສ ອຣຫຕ຺ຕມຄ຺ເຄນ. ຜລກ຺ຂເຓ ຕານິ ປຫີນານິ ນາມ ໂຫນ຺ຕິ. ຜລກ຺ຂຓໍ ສນ຺ຘາຍ ອິຘ ‘‘ນິຣຸຊ຺ຌຕີ’’ຕິ ວຸຕ຺ຕໍ. ປຸຖຸຊ຺ຊນສ຺ສ ສີລໍ ປຎ຺ຈຫິ ກາຣເຓຫິ ຠິຊ຺ຊຕິ ປາຣາຊິກາປຊ຺ຊເນນ ສິກ຺ຂາປຈ຺ຈກ຺ຂາເນນ ຕິຕ຺ຖິຍປກ຺ຂນ຺ທເນນ ອຣຫຕ຺ເຕນ ມຣເຓນາຕິ. ຕຕ຺ຖ ປຸຣິມາ ຕໂຍ ຠາວນາປຣິຫານາຍ ສໍວຕ຺ຕນ຺ຕິ, ຈຕຸຕ຺ໂຖ ວຑ຺ຒິຍາ, ປຎ຺ຈໂມ ເນວ ຫານາຍ ນ ວຑ຺ຒິຍາ. ກຖໍ ປເນຕໍ ອຣຫຕ຺ເຕນ ສີລໍ ຠິຊ຺ຊຕີຕິ? ປຸຖຸຊ຺ຊນສ຺ສ ຫິ ສີລໍ ອຈ຺ຈນ຺ຕກຸສລເມວ ໂຫຕິ, ອຣຫຕ຺ຕມຄ຺ໂຄ ຈ ກຸສລາກຸສລກມ຺ມກ຺ຂຍາຍ ສໍວຕ຺ຕຕີຕິ ເອວໍ ເຕນ ຕໍ ຠິຊ຺ຊຕິ. ສວເນນປິ ອກຕໍ ໂຫຕີຕິ ໂສຕພ຺ພຍຸຕ຺ຕກໍ ອສ຺ສຸຕໍ ໂຫຕິ. ພາຫຸສຈ຺ເຈນປິ ອກຕໍ ໂຫຕີຕິ ເອຕ຺ຖ ພາຫຸສຈ຺ຈນ຺ຕິ ວີຣິຍໍ. ວີຣິເຍນ ກຕ຺ຕພ຺ພຍຸຕ຺ຕກໍ ອກຕໍ ໂຫຕິ, ຕສ຺ສ ອກຕຕ຺ຕາ ສຄ຺ຄໂຕປິ ມຄ຺ຄໂຕປິ ປຣິຫາຍຕິ. ທິຏ຺ຐິຍາປິ ອປ຺ປຏິວິທ຺ຘໍ ໂຫຕີຕິ ທິຏ຺ຐິຍາ ປຏິວິຊ຺ຌິຕພ຺ພໍ ອປ຺ປຏິວິທ຺ຘໍ ໂຫຕິ ອປຈ຺ຈກ຺ຂກຕໍ. ສາມຍິກມ຺ປິ ວິມຸຕ຺ຕິໍ ນ ລຠຕີຕິ ກາລານຸກາລໍ ຘມ຺ມສ຺ສວນໍ ນິສ຺ສາຍ ປີຕິປາໂມຊ຺ຊໍ ນ ລຠຕິ. ຫານາຍ ປເຣຕີຕິ ຫານາຍ ປວຕ຺ຕຕິ.

ຍຖາຠູຕໍ ປຊານາຕີຕິ ‘‘ໂສຕາປຕ຺ຕິຜລໍ ປຕ຺ວາ ປຎ຺ຈວິຘໍ ທຸສ຺ສີລ຺ຍໍ ອປຣິເສສໍ ນິຣຸຊ຺ຌຕີ’’ຕິ ອຸຄ຺ຄຫປຣິປຸຈ຺ຉາວເສນ ຊານາຕິ. ຕສ຺ສ ສວເນນປິ ກຕໍ ໂຫຕີຕິ ໂສຕພ຺ພຍຸຕ຺ຕກໍ ສຸຕໍ ໂຫຕິ. ພາຫຸສຈ຺ເຈນປິ ກຕໍ ໂຫຕີຕິ ວີຣິເຍນ ກຕ຺ຕພ຺ພຍຸຕ຺ຕກໍ ອນ຺ຕມໂສ ທຸພ຺ພລວິປສ຺ສນາມຕ຺ຕກມ຺ປິ ກຕໍ ໂຫຕິ. ທິຏ຺ຐິຍາປິ ສຸປ຺ປຏິວິທ຺ຘໍ ໂຫຕີຕິ ອນ຺ຕມໂສ ໂລກິຍປຎ຺ຎາຍປິ ປຈ຺ຈຍປຏິເວໂຘ ກໂຕ ໂຫຕິ. ອິມສ຺ສ ຫິ ປຸຄ຺ຄລສ຺ສ ປຎ຺ຎາ ສີລໍ ປຣິໂຘວຕິ, ໂສ ປຎ຺ຎາປຣິໂຘເຕນ ວິເສສໍ ປາປຸຓາຕິ.

ປມາຓິກາຕິ ປຸຄ຺ຄເລສຸ ປມາຓຄ຺ຄາຫກາ. ປມິຓນ຺ຕີຕິ ປເມຕຸໍ ຕຸເລຕຸໍ ອຣຫນ຺ຕິ. ເອໂກ ຫີໂນຕິ ເອໂກ ຄຸເຓຫິ ຫີໂນ. ປຓີໂຕຕິ ເອໂກ ຄຸເຓຫິ ປຓີໂຕ ອຸຕ຺ຕໂມ. ຕໍ ຫີຕິ ຕໍ ປມາຓກຣຓໍ. ອຠິກ຺ກນ຺ຕຕໂຣຕິ ສຸນ຺ທຣຕໂຣ. ປຓີຕຕໂຣຕິ ອຸຕ຺ຕມຕໂຣ. ຘມ຺ມໂສໂຕ ນິພ຺ພຫຕີຕິ ສູຣໍ ຫຸຕ຺ວາ ປວຕ຺ຕມານໍ ວິປສ຺ສນາຎາຓໍ ນິພ຺ພຫຕິ, ອຣິຍຠູມິໍ ປາເປຕິ. ຕທນ຺ຕຣໍ ໂກ ຊາເນຍ຺ຍາຕິ ຕໍ ເອວໍ ກາຣຓໍ ໂກ ຊາເນຍ຺ຍ. ສີລວາ ໂຫຕີຕິ ໂລກິຍສີເລນ ສີລວາ ໂຫຕິ. ຍຕ຺ຖສ຺ສ ຕໍ ສີລນ຺ຕິ ອຣຫຕ຺ຕວິມຸຕ຺ຕິໍ ປຕ຺ວາ ສີລໍ ອປຣິເສສມ຺ປິ ນິຣຸຊ຺ຌຕິ ນາມ, ຕຕ຺ຖ ຍຸຕ຺ຕິ ວຸຕ຺ຕາເຍວ. ອິໂຕ ປເຣສຸ ທ຺ວີສຸ ອງ຺ເຄສຸ ອນາຄາມິຜລໍ ວິມຸຕ຺ຕິ ນາມ, ປຎ຺ຈເມ ອຣຫຕ຺ຕເມວ. ເສສເມຕ຺ຖ ວຸຕ຺ຕນຍານຸສາເຣເນວ ເວທິຕພ຺ພໍ. ຉຏ຺ຐໍ ອຸຕ຺ຕານຕ຺ຖເມວ.