໑໐. ຄິຣິມານນ຺ທສຸຕ຺ຕວຓ຺ຓນາ
໖໐. ທສເມ ອນຸກມ຺ປໍ ອຸປາທາຍາຕິ ຄິຣິມານນ຺ທຕ຺ເຖເຣ ອນຸກມ຺ປໍ ປຏິຈ຺ຈ. ຈກ຺ຂຸໂຣໂຄຕິອາທໂຍ ວຕ຺ຖຸວເສນ ເວທິຕພ຺ພາ. ນິພ຺ພຕ຺ຕິຕປ຺ປສາທານຎ຺ຫິ ໂຣໂຄ ນາມ ນຕ຺ຖິ. ກຓ຺ຓໂຣໂຄຕິ ພຫິກຓ຺ເຓ ໂຣໂຄ. ປິນາໂສຕິ ພຫິນາສິກາຍ ໂຣໂຄ. ນຂສາຕິ ນເຂຫິ ວິເລຂິຕຏ຺ຐາເນ ໂຣໂຄ. ປິຕ຺ຕສມຸຏ຺ຐານາຕິ ປິຕ຺ຕສມຸຏ຺ຐິຕາ. ເຕ ກິຣ ທ຺ວຕ຺ຕິໍສ ໂຫນ຺ຕິ. ເສມ຺ຫສມຸຏ຺ຐານາທີສຸປິ ເອເສວ ນໂຍ. ອຸຕຸປຣິຓາມຊາຕິ ອຸຕຸປຣິຓາເມນ ອຈ຺ຈຸຓ຺ຫາຕິສີເຕນ ອຸປ຺ປຊ຺ຊນກໂຣຄາ. ວິສມປຣິຫາຣຊາຕິ ອຕິຈິຣຏ຺ຐານນິສຊ຺ຊາທິນາ ວິສມປຣິຫາເຣນ ຊາຕາ. ໂອປກ຺ກມິກາຕິ ວຘພນ຺ຘນາທິນາ ອຸປກ຺ກເມນ ຊາຕາ. ກມ຺ມວິປາກຊາຕິ ພລວກມ຺ມວິປາກສມ຺ຠູຕາ. ສນ຺ຕນ຺ຕິ ຣາຄາທິສນ຺ຕຕາຍ ສນ຺ຕໍ. ອຕປ຺ປກຏ຺ເຐນ ປຓີຕໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.
ສຈິຕ຺ຕວຄ຺ໂຄ ປຐໂມ.