໘. ປພ຺ພຊິຕອຠິຓ຺ຫສຸຕ຺ຕວຓ຺ຓນາ

໔໘. ອຏ຺ຐເມ ປພ຺ພຊິເຕນາຕິ ຆຣາວາສໍ ປຫາຍ ສາສເນ ປພ຺ພຊ຺ຊໍ ອຸປຄເຕນ. ອຠິຓ຺ຫນ຺ຕິ ອຠິກ຺ຂຓໍ ປຸນປ຺ປຸນໍ, ປຈ຺ຈເວກ຺ຂິຕພ຺ພາ ໂອໂລເກຕພ຺ພາ ສລ຺ລກ຺ເຂຕພ຺ພາ. ເວວຓ຺ຓິຍນ຺ຕິ ວິວຓ຺ຓຠາວໍ. ຕໍ ປເນຕໍ ເວວຓ຺ຓິຍໍ ທຸວິຘໍ ໂຫຕິ ສຣີຣເວວຓ຺ຓິຍໍ ປຣິກ຺ຂາຣເວວຓ຺ຓິຍຎ຺ຈ. ຕຕ຺ຖ ເກສມສ຺ສຸໂອໂຣປເນນ ສຣີຣເວວຓ຺ຓິຍໍ ເວທິຕພ຺ພໍ. ປຸພ຺ເພ ປນ ນານາວິຣາຄານິ ສຸຂຸມວຕ຺ຖານິ ນິວາເສຕ຺ວາປິ ນານຄ຺ຄຣສໂຠຊນໍ ສຸວຓ຺ຓຣຊຕຠາຊເນສຸ ຠຸຎ຺ຊິຕ຺ວາປິ ສິຣິຄພ຺ເຠ ວຣສຍນາສເນສຸ ນິປຊ຺ຊິຕ຺ວາປິ ນິສີທິຕ຺ວາປິ ສປ຺ປິນວນີຕາທີຫິ ເຠສຊ຺ຊໍ ກຕ຺ວາປິ ປພ຺ພຊິຕກາລໂຕ ປຏ຺ຐາຍ ຉິນ຺ນສງ຺ຆຏິຕກສາວຣສປີຕານິ ວຕ຺ຖານິ ນິວາເສຕພ຺ພານິ, ອຍປຕ຺ເຕ ວາ ມຕ຺ຕິກປຕ຺ເຕ ວາ ມິສ຺ສໂກທໂນ ຠຸຎ຺ຊິຕພ຺ໂພ, ຣຸກ຺ຂມູລາທິເສນາສເນ ມຸຎ຺ຊຕິຓສນ຺ຖຣຓາທີສຸ ນິປຊ຺ຊິຕພ຺ພໍ, ຈມ຺ມຂຓ຺ຑຕຏ຺ຏິກາທີສຸ ນິສີທິຕພ຺ພໍ, ປູຕິມຸຕ຺ຕາທີຫິ ເຠສຊ຺ຊໍ ກຕ຺ຕພ຺ພໍ ໂຫຕິ. ເອວເມຕ຺ຖ ປຣິກ຺ຂາຣເວວຓ຺ຓິຍໍ ເວທິຕພ຺ພໍ. ເອວໍ ປຈ຺ຈເວກ຺ຂໂຕ ໂກໂປ ຈ ມາໂນ ຈ ປຫີຍຕິ.

ປຣປຏິພທ຺ຘາ ເມ ຊີວິກາຕິ ມຍ຺ຫໍ ປເຣສຸ ປຏິພທ຺ຘາ ປຣາຍຕ຺ຕາ ຈຕຸປຈ຺ຈຍຊີວິກາຕິ. ເອວໍ ປຈ຺ຈເວກ຺ຂໂຕ ຫິ ອາຊີໂວ ປຣິສຸຊ຺ຌຕິ, ປິຓ຺ຑປາໂຕ ຈ ອປຈິໂຕ ໂຫຕິ, ຈຕູສຸ ປຈ຺ຈເຍສຸ ອປຈ຺ຈເວກ຺ຂິຕປຣິໂຠໂຄ ນາມ ນ ໂຫຕິ. ອຎ຺ໂຎ ເມ ອາກປ຺ໂປ ກຣຓີໂຍຕິ ໂຍ ຄິຫີນໍ ອຸຣໍ ອຠິນີຫຣິຕ຺ວາ ຄີວໍ ປຄ຺ຄເຫຕ຺ວາ ລລິເຕນາກາເຣນ ອນິຍຕປທວີຕິຫາເຣນ ຄມນາກປ຺ໂປ ໂຫຕິ, ຕໂຕ ອຎ຺ໂຎວ ອາກປ຺ໂປ ມຍາ ກຣຓີໂຍ, ສນ຺ຕິນ຺ທ຺ຣິເຍນ ສນ຺ຕມານເສນ ຍຸຄມຕ຺ຕທສ຺ສິນາ ວິສມຏ຺ຐາເນ ອຸທກສກເຏເນວ ມນ຺ທມິຕປທວີຕິຫາເຣນ ຫຸຕ຺ວາ ຄນ຺ຕພ຺ພນ຺ຕິ ປຈ຺ຈເວກ຺ຂິຕພ຺ພໍ. ເອວໍ ປຈ຺ຈເວກ຺ຂໂຕ ຫິ ອິຣິຍາປໂຖ ສາຣຸປ຺ໂປ ໂຫຕິ, ຕິສ຺ໂສ ສິກ຺ຂາ ປຣິປູເຣນ຺ຕິ. ກຈ຺ຈິນຸໂຂຕິ ສລກ຺ຂເຓ ນິປາຕສມຸທາໂຍ. ອຕ຺ຕາຕິ ຈິຕ຺ຕໍ. ສີລໂຕ ນ ອຸປວທຕີຕິ ອປຣິສຸທ຺ຘໍ ເຕ ສີລນ຺ຕິ ສີລປຈ຺ຈໂຍ ນ ອຸປວທຕິ. ເອວໍ ປຈ຺ຈເວກ຺ຂໂຕ ຫິ ອຊ຺ຌຕ຺ຕໍ ຫິຣີ ສມຸຏ຺ຐາຕິ, ສາ ຕີສຸ ທ຺ວາເຣສຸ ສໍວຣໍ ສາເຘຕິ, ຕີສຸ ທ຺ວາເຣສຸ ສໍວໂຣ ຈຕຸປາຣິສຸທ຺ຘິສີລໍ ໂຫຕິ, ຈຕຸປາຣິສຸທ຺ຘິສີເລ ຐິໂຕ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ຄຓ຺ຫາຕິ. ອນຸວິຈ຺ຈ ວິຎ຺ຎູ ສພ຺ຣຫ຺ມຈາຣີຕິ ປຓ຺ຑິຕາ ສພ຺ຣຫ຺ມຈາຣິໂນ ອນຸວິຈາເຣຕ຺ວາ. ເອວໍ ປຈ຺ຈເວກ຺ຂໂຕ ຫິ ພຫິທ຺ຘາ ໂອຕ຺ຕປ຺ປໍ ສຓ຺ຐາຕິ, ຕໍ ຕີສຸ ທ຺ວາເຣສຸ ສໍວຣໍ ສາເຘຕີຕິ ອນນ຺ຕຣນເຍເນວ ເວທິຕພ຺ພໍ.

ນານາຠາໂວ ວິນາຠາໂວຕິ ຊາຕິຍາ ນານາຠາໂວ, ມຣເຓນ ວິນາຠາໂວ. ເອວໍ ປຈ຺ຈເວກ຺ຂໂຕ ຫິ ຕີສຸ ທ຺ວາເຣສຸ ອສໍວຸຕາກາໂຣ ນາມ ນ ໂຫຕິ, ມຣຓສ຺ສຕິ ສູປຏ຺ຐິຕາ ໂຫຕິ. ກມ຺ມສ຺ສໂກມ຺ຫີຕິອາທີສຸ ກມ຺ມໍ ມຍ຺ຫໍ ສກໍ ອຕ຺ຕໂນ ສນ຺ຕກນ຺ຕິ ກມ຺ມສ຺ສກາ. ກມ຺ເມນ ທາຕພ຺ພໍ ຜລໍ ທາຍໍ, ກມ຺ມສ຺ສ ທາຍໍ ກມ຺ມທາຍໍ, ຕໍ ອາທີຍາມີຕິ ກມ຺ມທາຍາໂທ. ກມ຺ມໍ ມຍ຺ຫໍ ໂຍນິ ກາຣຓນ຺ຕິ ກມ຺ມໂຍນິ. ກມ຺ມໍ ມຍ຺ຫໍ ພນ຺ຘຸ ຎາຕໂກຕິ ກມ຺ມພນ຺ຘຸ. ກມ຺ມໍ ມຍ຺ຫໍ ປຏິສຣຓໍ ປຕິຏ຺ຐາຕິ ກມ຺ມປຏິສຣໂຓ. ຕສ຺ສ ທາຍາໂທ ຠວິສ຺ສາມີຕິ ຕສ຺ສ ກມ຺ມສ຺ສ ທາຍາໂທ ເຕນ ທິນ຺ນຜລໍ ປຏິຄ຺ຄາຫໂກ ຠວິສ຺ສາມິ. ເອວໍ ກມ຺ມສ຺ສກຕໍ ປນ ປຈ຺ຈເວກ຺ຂໂຕ ປາປກຣຓໍ ນາມ ນ ໂຫຕິ. ກຖໍຠູຕສ຺ສ ເມ ຣຕ຺ຕິນ຺ທິວາ ວີຕິວຕ຺ຕນ຺ຕີຕິ ກິນ຺ນຸ ໂຂ ເມ ວຕ຺ຕປ຺ປຏິປຕ຺ຕິໍ ກໂຣນ຺ຕສ຺ສ, ອຸທາຫຸ ອກໂຣນ຺ຕສ຺ສ, ພຸທ຺ຘວຈນໍ ສຊ຺ຌາຍນ຺ຕສ຺ສ, ອຸທາຫຸ ອສຊ຺ຌາຍນ຺ຕສ຺ສ, ໂຍນິໂສມນສິກາເຣ ກມ຺ມໍ ກໂຣນ຺ຕສ຺ສ, ອຸທາຫຸ ອກໂຣນ຺ຕສ຺ສາຕິ ກຖໍຠູຕສ຺ສ ເມ ຣຕ຺ຕິນ຺ທິວາ ວີຕິວຕ຺ຕນ຺ຕິ, ປຣິວຕ຺ຕນ຺ຕີຕິ ອຕ຺ໂຖ. ເອວໍ ປຈ຺ຈເວກ຺ຂໂຕ ຫິ ອປ຺ປມາໂທ ປຣິປູຣຕິ.

ສຸຎ຺ຎາຄາເຣ ອຠິຣມາມີຕິ ວິວິຕ຺ໂຕກາເສ ສພ຺ພິຣິຍາປເຖສຸ ເອກໂກວ ຫຸຕ຺ວາ ກຈ຺ຈິ ນຸ ໂຂ ອຠິຣມາມີຕິ ອຕ຺ໂຖ. ເອວໍ ປຈ຺ຈເວກ຺ຂໂຕ ກາຍວິເວໂກ ປຣິປູຣຕິ. ອຸຕ຺ຕຣິມນຸສ຺ສຘມ຺ໂມຕິ ອຸຕ຺ຕຣິມນຸສ຺ສານໍ ອຸກ຺ກຏ຺ຐມນຸສ຺ສຠູຕານໍ ຌາຍີນຎ຺ເຈວ ອຣິຍານຎ຺ຈ ຌານາທິຘມ຺ໂມ, ທສກຸສລກມ຺ມປຖສງ຺ຂາຕມນຸສ຺ສຘມ຺ມໂຕ ວາ ອຸຕ຺ຕຣິຕໂຣ ວິສິຏ຺ຐຕໂຣ ຘມ຺ໂມ ເມ ມມ ສນ຺ຕາເນ ອຕ຺ຖິ ນຸ ໂຂ, ສນ຺ຕິ ນຸ ໂຂຕິ ອຕ຺ໂຖ. ອລມຣິຍຎາຓທສ຺ສນວິເສໂສຕິ ມຫຄ຺ຄຕໂລກຸຕ຺ຕຣປຎ຺ຎາ ປຊານນຏ຺ເຐນ ຎາຓໍ, ຈກ຺ຂຸນາ ທິຏ຺ຐມິວ ຘມ຺ມໍ ປຈ຺ຈກ຺ຂກຣຓໂຕ ທສ຺ສນຏ຺ເຐນ ທສ຺ສນນ຺ຕິ ຎາຓທສ຺ສນໍ, ອຣິຍໍ ວິສຸທ຺ຘໍ ອຸຕ຺ຕມໍ ຎາຓທສ຺ສນນ຺ຕິ ອຣິຍຎາຓທສ຺ສນໍ, ອລໍ ປຣິຍຕ຺ຕກໍ ກິເລສວິທ຺ຘໍສນສມຕ຺ຖໍ ອຣິຍຎາຓທສ຺ສນເມຕ຺ຖ, ອສ຺ສ ວາຕິ ອລມຣິຍຎາຓທສ຺ສໂນ, ຌານາທິເຠໂທ ອຸຕ຺ຕຣິມນຸສ຺ສຘມ຺ໂມ ອລມຣິຍຎາຓທສ຺ສໂນ ຈ ໂສ ວິເສໂສ ຈາຕິ ອລມຣິຍຎາຓທສ຺ສນວິເສໂສ. ອຖ ວາ ຕເມວ ກິເລສວິທ຺ຘໍສນສມຕ຺ຖໍ ວິສຸທ຺ຘໍ ຎາຓທສ຺ສນເມວ ວິເສໂສຕິ ອລມຣິຍຎາຓທສ຺ສນວິເສໂສ ວາ. ອຘິຄໂຕຕິ ປຏິລທ຺ໂຘ ເມ ອຕ຺ຖິ ນຸ ໂຂ. ໂສຫນ຺ຕິ ປຏິລທ຺ຘວິເສໂສ ໂສ ອຫໍ. ປຈ຺ຉິເມ ກາເລຕິ ມຣຓມຎ຺ເຈ ນິປນ຺ນກາເລ. ປຸຏ຺ໂຐຕິ ສພ຺ຣຫ຺ມຈາຣີຫິ ອຘິຄຕຄຸຓວິເສສໍ ປຸຈ຺ຉິໂຕ. ນ ມງ຺ກຸ ຠວິສ຺ສາມີຕິ ປຕິຕກ຺ຂນ຺ໂຘ ນິຕ຺ເຕໂຊ ນ ເຫສ຺ສາມີຕິ. ເອວໍ ປຈ຺ຈເວກ຺ຂນ຺ຕສ຺ສ ຫິ ໂມຆກາລກິຣິຍາ ນາມ ນ ໂຫຕິ.