໔. ກຸສິນາຣສຸຕ຺ຕວຓ຺ຓນາ

໔໔. ປຎ຺ຈມສ຺ສ ຈຕຸຕ຺ເຖ ກຸສິນາຣາຍນ຺ຕິ ເອວໍນາມເກ ນຄເຣ. ເທວຕານໍ ອຕ຺ຖາຍ ພລິໍ ຫຣນ຺ຕິ ເອຕ຺ຖາຕິ ພລິຫຣໂຓ, ຕສ຺ມິໍ ພລິຫຣເຓ. ອຈ຺ຉິທ຺ເທນ ອປ຺ປຏິມໍເສນາຕິອາທີສຸ ເຍນ ເກນຈິເທວ ປຫໂຏ ວາ ໂຫຕິ, ເວຊ຺ຊກມ຺ມາທີນິ ວາ ກຕານິ, ຕສ຺ສ ກາຍສມາຈາໂຣ ອຸປຈິກາທີຫິ ຂາຍິຕຕາລປຓ຺ຓໍ ວິຍ ຉິທ຺ໂທ ຈ, ປຏິມສິຕຸໍ ຍຕ຺ຖ ກຕ຺ຖຈິ ຄເຫຕ຺ວາ ອາກຑ຺ຒິຕຸໍ ສກ຺ກຸເຓຍ຺ຍຕາຍ ປຏິມໍໂສ ຈ ໂຫຕິ, ວິປຣີໂຕ ອຈ຺ຉິທ຺ໂທ ອປ຺ປຏິມໍໂສ ນາມ. ວຈີສມາຈາໂຣ ປນ ມຸສາວາທໂອມສວາທເປສຸຎ຺ຎອມູລການຸທ຺ຘໍສນາທີຫິ ຉິທ຺ໂທ ສປ຺ປຏິມໍໂສ ຈ ໂຫຕິ, ວິປຣີໂຕ ອຈ຺ຉິທ຺ໂທ ອປ຺ປຏິມໍໂສ. ເມຕ຺ຕໍ ນຸ ໂຂ ເມ ຈິຕ຺ຕນ຺ຕິ ປລິໂພຘໍ ຉິນ຺ທິຕ຺ວາ ກມ຺ມຏ຺ຐານຠາວນານຸໂຍເຄນ ອຘິຄຕໍ ເມ ເມຕ຺ຕຈິຕ຺ຕໍ. ອນາຆາຕນ຺ຕິ ອາຆາຕວິຣຫິຕໍ, ວິກ຺ຂມ຺ຠເນນ ວິຫຕາຆາຕນ຺ຕິ ອຕ຺ໂຖ. ກຕ຺ຖ ວຸຕ຺ຕນ຺ຕິ ອິທໍ ສິກ຺ຂາປທໍ ກິສ຺ມິໍ ນຄເຣ ວຸຕ຺ຕໍ.

ກາເລນ ວກ຺ຂາມີຕິອາທີສຸ ເອໂກ ເອກໍ ໂອກາສໍ ກາເຣຕ຺ວາ ໂຈເທນ຺ໂຕ ກາເລນ ວທຕິ ນາມ. ສງ຺ຆມຊ຺ເຌ ວາ ຄຓມຊ຺ເຌ ວາ ສລາກຄ຺ຄຍາຄຄ຺ຄວິຕກ຺ກມາຬກຠິກ຺ຂາຈາຣມຄ຺ຄອາສນສາລາທີສຸ ວາ ອຸປຏ຺ຐາເກຫິ ປຣິວາຣິຕກ຺ຂເຓ ວາ ໂຈເທນ຺ໂຕ ອກາເລນ ວທຕິ ນາມ. ຕຈ຺ເຉນ ວທນ຺ໂຕ ຠູເຕນ ວທຕິ ນາມ. ‘‘ທຫຣມຫລ຺ລກປຣິສາວຈຣກປໍສຸກູລິກຘມ຺ມກຖິກປຕິຣູປໍ ຕວ ອິທ’’ນ຺ຕິ ວທນ຺ໂຕ ຜຣຸເສນ ວທຕິ ນາມ. ກາຣຓນິສ຺ສິຕໍ ປນ ກຕ຺ວາ, ‘‘ຠນ຺ເຕ ມຫລ຺ລກຕ຺ຖ, ປຣິສາວຈຣກຕ຺ຖ, ປໍສຸກູລິກຕ຺ຖ, ຘມ຺ມກຖິກຕ຺ຖປຕິຣູປໍ ຕຸມ຺ຫາກມິທ’’ນ຺ຕິ ວທນ຺ໂຕ ສຓ຺ເຫນ ວທຕິ ນາມ. ກາຣຓນິສ຺ສິຕໍ ກຕ຺ວາ ວທນ຺ໂຕ ອຕ຺ຖສໍຫິເຕນ ວທຕິ ນາມ. ເມຕ຺ຕຈິຕ຺ໂຕ ວກ຺ຂາມິ ໂນ ໂທສນ຺ຕໂຣຕິ ເມຕ຺ຕຈິຕ຺ຕໍ ປຈ຺ຈຸປຏ຺ຐເປຕ຺ວາ ວກ຺ຂາມິ, ນ ທຸຏ຺ຐຈິຕ຺ໂຕ ຫຸຕ຺ວາ.