໒. ອຘິວຸຕ຺ຕິປທສຸຕ຺ຕວຓ຺ຓນາ

໒໒. ທຸຕິເຍ ເຍ ເຕ ຘມ຺ມາຕິ ເຍ ເຕ ທສພລຎາຓໍ ສພ຺ພຎ຺ຎຸຕຎ຺ຎາຓຘມ຺ມາ. ອຘິວຸຕ຺ຕິປທານນ຺ຕິ ອຘິວຈນປທານໍ, ຂນ຺ຘາຍຕນຘາຕຸຘມ຺ມານນ຺ຕິ ອຕ຺ໂຖ. ອຘິວຸຕ຺ຕິໂຍຕິ ຫິ ອຘິວຈນານິ ວຸຈ຺ຈນ຺ຕິ, ເຕສໍ ເຍ ປທຠູຕາ ເທສນາຍ ປທຏ຺ຐານຕ຺ຕາ. ອຕີຕາ ພຸທ຺ຘາປິ ຫິ ເອເຕ ຘມ຺ເມ ກຖຍິໍສຸ, ອນາຄຕາປິ ເອເຕວ ກຖຍິສ຺ສນ຺ຕິ. ຕສ຺ມາ ຂນ຺ຘາທໂຍ ອຘິວຸຕ຺ຕິປທານິ ນາມ. ເຕສໍ ອຘິວຸຕ຺ຕິປທານໍ. ອຖ ວາ ຠູຕມຕ຺ຖໍ ອຠິຠວິຕ຺ວາ ຍຖາສຠາວໂຕ ອຄ຺ຄເຫຕ຺ວາ ວຕ຺ຕນໂຕ ອຘິວຸຕ຺ຕິໂຍຕິ ທິຏ຺ຐິໂຍ ວຸຈ຺ຈນ຺ຕິ, ອຘິວຸຕ຺ຕີນໍ ປທານິ ອຘິວຸຕ຺ຕິປທານິ, ທິຏ຺ຐິທີປການິ ວຈນານີຕິ ອຕ຺ໂຖ. ເຕສໍ ອຘິວຸຕ຺ຕິປທານໍ ທິຏ຺ຐິໂວຫາຣານໍ. ອຠິຎ຺ຎາ ສຈ຺ຉິກິຣິຍາຍາຕິ ຊານິຕ຺ວາ ປຈ຺ຈກ຺ຂກຣຓຕ຺ຖາຍ. ວິສາຣໂທຕິ ຎາຓໂສມນສ຺ສປ຺ປຕ຺ໂຕ. ຕຕ຺ຖາຕິ ເຕສຸ ຘມ຺ເມສຸ ເຕສໍ ເຕສໍ ຕຖາ ຕຖາ ຘມ຺ມໍ ເທເສຕຸນ຺ຕິ ເຕສໍ ເຕສໍ ທິຏ຺ຐິຄຕິການໍ ວາ ອິຕເຣສໍ ວາ ອາສຍໍ ຎຕ຺ວາ ຕຖາ ຕຖາ ຘມ຺ມໍ ເທເສຕຸໍ. ຫີນໍ ວາ ຫີນນ຺ຕິ ຎສ຺ສຕີຕິ ຫີນໍ ວາ ຘມ຺ມໍ ‘‘ຫີໂນ ຘມ຺ໂມ’’ຕິ ຊານິສ຺ສຕິ. ຎາເຕຍ຺ຍນ຺ຕິ ຎາຕພ຺ພໍ. ທຏ຺ເຐຍ຺ຍນ຺ຕິ ທຏ຺ຐພ຺ພໍ. ສຈ຺ຉິກເຣຍ຺ຍນ຺ຕິ ສຈ຺ຉິກາຕພ຺ພໍ. ຕຕ຺ຖ ຕຕ຺ຖ ຍຖາຠູຕຎາຓນ຺ຕິ ເຕສຸ ເຕສຸ ຘມ຺ເມສຸ ຍຖາສຠາວຎາຓໍ. ອິມິນາ ສພ຺ພຎ຺ຎຸຕຎ຺ຎາຓໍ ທສ຺ເສຕິ. ເອວໍ ສພ຺ພຎ຺ຎຸຕຎ຺ຎາຓໍ ທສ຺ເສຕ຺ວາ ປຸນ ທສພລຎາຓໍ ທສ຺ເສນ຺ໂຕ ທສຍິມານີຕິອາທິມາຫ. ທສພລຎາຓມ຺ປິ ຫິ ຕຕ຺ຖ ຕຕ຺ຖ ຍຖາຠູຕຎາຓເມວາຕິ.