໗. ປຐມນາຖສຸຕ຺ຕວຓ຺ຓນາ

໑໗. ສຕ຺ຕເມ ສນາຖາຕິ ສຎາຕກາ ພຫຸຎາຕິວຄ຺ຄາ ຫຸຕ຺ວາ ວິຫຣຖ. ນາຖໍ ກໂຣນ຺ຕີຕິ ນາຖກຣຓາ, ອຕ຺ຕໂນ ສນາຖຠາວກຣາ ປຕິຏ຺ຐາກຣາຕິ ອຕ຺ໂຖ. ກລ຺ຍາຓມິຕ຺ໂຕຕິອາທີສຸ ສີລາທິຄຸຓສມ຺ປນ຺ນາ ກລ຺ຍາຓາ ມິຕ຺ຕາ ອສ຺ສາຕິ ກລ຺ຍາຓມິຕ຺ໂຕ. ເຕວສ຺ສ ຐານນິສຊ຺ຊາທີສຸ ສຫ ອຍນໂຕ ສຫາຍາຕິ ກລ຺ຍາຓສຫາໂຍ. ຈິຕ຺ເຕນ ເຈວ ກາເຍນ ຈ ກລ຺ຍາຓມິຕ຺ເຕສຸເຍວ ສມ຺ປວງ຺ໂກ ໂອຓໂຕຕິ ກລ຺ຍາຓສມ຺ປວງ຺ໂກ. ສຸວໂຈ ໂຫຕີຕິ ສຸເຂນ ວຕ຺ຕພ຺ໂພ ໂຫຕິ, ສຸເຂນ ອນຸສາສິຕພ຺ໂພ. ຂໂມຕິ ຄາຬ຺ເຫນ ຜຣຸເສນ ກກ຺ຂເຬນ ວຸຕ຺ໂຕ ຂມຕິ ນ ກຸປ຺ປຕິ. ປທກ຺ຂິຓຄ຺ຄາຫີ ອນຸສາສນິນ຺ຕິ ຍຖາ ເອກຈ຺ໂຈ ໂອວທິຍມາໂນ ວາມໂຕ ຄຓ຺ຫາຕິ, ປຏິປ຺ຜຣຕິ ວາ, ອສ຺ສຸຓນ຺ໂຕ ວາ ຄຈ຺ຉຕິ, ເອວໍ ອກຕ຺ວາ ‘‘ໂອວທຖ, ຠນ຺ເຕ, ອນຸສາສຖ, ຕຸມ຺ເຫສຸ ອໂນວທນ຺ເຕສຸ ໂກ ອຎ຺ໂຎ ໂອວທິສ຺ສຕີ’’ຕິ ປທກ຺ຂິຓໍ ຄຓ຺ຫາຕິ.

ອຸຈ຺ຈາວຈານີຕິ ອຸຈ຺ຈນີຈານິ. ກິໍກຣຓີຍານີຕິ ‘‘ກິໍ ກໂຣມີ’’ຕິ ເອວໍ ວຕ຺ວາ ກຕ຺ຕພ຺ພກມ຺ມານິ. ຕຕ຺ຖ ອຸຈ຺ຈກມ຺ມໍ ນາມ ຈີວຣສ຺ສ ກຣຓໍ ຣຊນໍ, ເຈຕິເຍ ສຸຘາກມ຺ມໍ, ອຸໂປສຖາຄາຣເຈຕິຍຆຣໂພຘິຆເຣສຸ ກຕ຺ຕພ຺ພກມ຺ມນ຺ຕິ ເອວມາທິ. ອວຈກມ຺ມໍ ນາມ ປາທໂຘວນມກ຺ຂນາທິຂຸທ຺ທກກມ຺ມໍ. ຕຕ຺ຣູປາຍາຍາຕິ ຕຕ຺ຣຸປຄມນິຍາຍ. ອລໍ ກາຕຸນ຺ຕິ ກາຕຸໍ ສມຕ຺ໂຖ ໂຫຕິ. ອລໍ ສໍວິຘາຕຸນ຺ຕິ ວິຈາເຣຕຸໍ ສມຕ຺ໂຖ ໂຫຕິ.

ຘມ຺ເມ ອສ຺ສ ກາໂມ ສິເນໂຫຕິ ຘມ຺ມກາໂມ, ເຕປິຏກໍ ພຸທ຺ຘວຈນໍ ປິຍາຍຕີຕິ ອຕ຺ໂຖ. ປິຍສມຸທາຫາໂຣຕິ ປຣສ຺ມິໍ ກເຖນ຺ເຕ ສກ຺ກຈ຺ຈໍ ສຸຓາຕິ, ສຍຎ຺ຈ ປເຣສໍ ເທເສຕຸກາໂມ ໂຫຕີຕິ ອຕ຺ໂຖ. ອຠິຘມ຺ເມ ອຠິວິນເຍຕິ ເອຕ຺ຖ ຘມ຺ໂມ ອຠິຘມ຺ໂມ, ວິນໂຍ ອຠິວິນໂຍຕິ ຈຕຸກ຺ກໍ ເວທິຕພ຺ພໍ. ຕຕ຺ຖ ຘມ຺ໂມຕິ ສຸຕ຺ຕນ຺ຕປິຏກໍ. ອຠິຘມ຺ໂມຕິ ສຕ຺ຕ ປກຣຓານິ. ວິນໂຍຕິ ອຸຠໂຕວິຠງ຺ໂຄ. ອຠິວິນໂຍຕິ ຂນ຺ຘກປຣິວາຣາ. ອຖ ວາ ສຸຕ຺ຕນ຺ຕປິຏກມ຺ປິ ອຠິຘມ຺ມປິຏກມ຺ປິ ຘມ຺ໂມ ເອວ, ມຄ຺ຄຜລານິ ອຠິຘມ຺ໂມ. ສກລວິນຍປິຏກໍ ວິນໂຍ, ກິເລສວູປສມກຣຓໍ ອຠິວິນໂຍ. ອິຕິ ສພ຺ພສ຺ມິມ຺ປິ ເອຕ຺ຖ ຘມ຺ເມ ຈ ອຠິຘມ຺ເມ ຈ ວິນເຍ ຈ ອຠິວິນເຍ ຈ ອຸຬາຣປາໂມຊ຺ໂຊ ໂຫຕີຕິ ອຕ຺ໂຖ. ກຸສເລສຸ ຘມ຺ເມສູຕິ ກາຣຓຕ຺ເຖ ຠຸມ຺ມໍ, ຈາຕຸຠູມກກຸສລຘມ຺ມກາຣຓາ ເຕສໍ ອຘິຄມຕ຺ຖາຍ ອນິກ຺ຂິຕ຺ຕຘຸໂຣ ໂຫຕີຕິ ອຕ຺ໂຖ.