໒໐. ອມຕວຄ຺ຄວຓ຺ຓນາ

໖໐໐-໖໑໑. ອມຕໍ ເຕ, ຠິກ຺ຂເວ, ນ ປຣິຠຸຎ຺ຊນ຺ຕີຕິ ມຣຓວິຣຫິຕໍ ນິພ຺ພານໍ ນ ປຣິຠຸຎ຺ຊນ຺ຕີຕິ ອຕ຺ໂຖ. ນນຸ ຈ ນິພ຺ພານໍ ໂລກຸຕ຺ຕຣໍ, ກາຍຄຕາສຕິ ໂລກິຍາ, ກຖໍ ຕໍ ປຣິຠຸຎ຺ຊນ຺ຕາ ອມຕໍ ປຣິຠຸຎ຺ຊນ຺ຕີຕິ? ຕໍ ຠາເວຕ຺ວາ ອຘິຄນ຺ຕພ຺ພໂຕ. ກາຍຄຕຎ຺ຫິ ສຕິໍ ຠາເວນ຺ໂຕ ອມຕມຘິຄຈ຺ຉຕິ, ອຠາເວນ຺ໂຕ ນາຘິຄຈ຺ຉຕິ. ຕສ຺ມາ ເອວໍ ວຸຕ຺ຕໍ. ເອເຕນຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ອປິ ເຈຕ຺ຖ ວິຣທ຺ຘນ຺ຕິ ວິຣາຘິຕໍ ນາຘິຄຕໍ. ອາຣທ຺ຘນ຺ຕິ ປຣິປຸຓ຺ຓໍ. ປມາທິໍສູຕິ ປມຊ຺ຊນ຺ຕິ. ປມຸຏ຺ຐນ຺ຕິ ສມ຺ມຸຏ຺ຐໍ ວິສ຺ສຣິຕໍ ນຏ຺ຐໍ ວາ. ອາເສວິຕນ຺ຕິ ອາທິໂຕ ເສວິຕໍ. ຠາວິຕນ຺ຕິ ວຑ຺ຒິຕໍ. ພຫຸລີກຕນ຺ຕິ ປຸນປ຺ປຸນໍ ກຕໍ. ອນຠິຎ຺ຎາຕນ຺ຕິ ຎາຕອຠິຎ຺ຎາຍ ອຊານິຕໍ. ອປຣິຎ຺ຎາຕນ຺ຕິ ຎາຕປຣິຎ຺ຎາວເສເນວ ອປຣິຎ຺ຎາຕໍ. ອສຈ຺ຉິກຕນ຺ຕິ ອປຈ຺ຈກ຺ຂກຕໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ອມຕວຄ຺ຄວຓ຺ຓນາ.