໑໙. ກາຍຄຕາສຕິວຄ຺ຄວຓ຺ຓນາ

໕໖໓. ເຈຕສາ ຜຸໂຏຕິ ເອຕ຺ຖ ທຸວິຘໍ ຜຣຓໍ ອາໂປຜຣຓຎ຺ຈ ທິພ຺ພຈກ຺ຂຸຜຣຓຎ຺ຈ. ຕຕ຺ຖ ອາໂປກສິຓໍ ສມາປຊ຺ຊິຕ຺ວາ ອາເປນ ຜຣຓໍ ອາໂປຜຣຓໍ ນາມ. ເອວໍ ຜຸເຏປິ ມຫາສມຸທ຺ເທ ສພ຺ພາ ສມຸທ຺ທງ຺ຄມາ ກຸນ຺ນທິໂຍ ອນ຺ໂຕຄຘາວ ໂຫນ຺ຕິ. ອາໂລກໍ ປນ ວຑ຺ເຒຕ຺ວາ ທິພ຺ພຈກ຺ຂຸນາ ສກລສມຸທ຺ທທສ຺ສນໍ ທິພ຺ພຈກ຺ຂຸຜຣຓໍ ນາມ. ເອວໍ ຜຸເຏປິ ມຫາສມຸທ຺ເທ ສພ຺ພາ ມຫາສມຸທ຺ທງ຺ຄມາ ກຸນ຺ນທິໂຍ ອນ຺ໂຕຄຘາວ ໂຫນ຺ຕິ. ອນ຺ໂຕຄຘາ ຕສ຺ສາຕິ ຕສ຺ສ ຠິກ຺ຂຸໂນ ຠາວນາຍ ອພ຺ຠນ຺ຕຣຄຕາວ ໂຫນ຺ຕິ. ວິຊ຺ຊາຠາຄິຍາຕິ ເອຕ຺ຖ ສມ຺ປໂຍຄວເສນ ວິຊ຺ຊໍ ຠຊນ຺ຕີຕິ ວິຊ຺ຊາຠາຄິຍາ, ວິຊ຺ຊາຠາເຄ ວິຊ຺ຊາໂກຏ຺ຐາເສ ວຕ຺ຕນ຺ຕີຕິປິ ວິຊ຺ຊາຠາຄິຍາ. ຕຕ຺ຖ ວິປສ຺ສນາຎາຓໍ ມໂນມຍິທ຺ຘິ ຉ ອຠິຎ຺ຎາຕິ ອຏ຺ຐ ວິຊ຺ຊາ, ປຸຣິເມນ ອຕ຺ເຖນ ຕາຫິ ສມ຺ປຍຸຕ຺ຕຘມ຺ມາປິ ວິຊ຺ຊາຠາຄິຍາ. ປຈ຺ຉິເມນ ອຕ຺ເຖນ ຕາສຸ ຍາ ກາຈິ ເອກາ ວິຊ຺ຊາ ວິຊ຺ຊາ, ເສສາ ວິຊ຺ຊາຠາຄິຍາຕິ ເອວໍ ວິຊ຺ຊາປິ ວິຊ຺ຊາສມ຺ປຍຸຕ຺ຕຘມ຺ມາປິ ວິຊ຺ຊາຠາຄິຍາເຕວ ເວທິຕພ຺ພາ.

໕໖໔. ມຫໂຕ ສໍເວຄາຍາຕິ ມຫນ຺ຕສ຺ສ ສໍເວຄສ຺ສ ອຕ຺ຖາຍ. ອຸປຣິປທທ຺ວເຍປິ ເອເສວ ນໂຍ. ເອຕ຺ຖ ຈ ມຫາສໍເວໂຄ ນາມ ວິປສ຺ສນາ, ມຫາອຕ຺ໂຖ ນາມ ຈຕ຺ຕາໂຣ ມຄ຺ຄາ, ມຫາໂຍຄກ຺ເຂໂມ ນາມ ຈຕ຺ຕາຣິ ສາມຎ຺ຎຜລານິ. ອຖ ວາ ມຫາສໍເວໂຄ ນາມ ສຫ ວິປສ຺ສນາຍ ມຄ຺ໂຄ, ມຫາອຕ຺ໂຖ ນາມ ຈຕ຺ຕາຣິ ສາມຎ຺ຎຜລານິ, ມຫາໂຍຄກ຺ເຂໂມ ນາມ ນິພ຺ພານໍ. ສຕິສມ຺ປຊຎ຺ຎາຍາຕິ ສຕິຍາ ຈ ຎາຓສ຺ສ ຈ ອຕ຺ຖາຍ. ຎາຓທສ຺ສນປຏິລາຠາຍາຕິ ທິພ຺ພຈກ຺ຂຸຎາຓາຍ. ທິຏ຺ຐຘມ຺ມສຸຂວິຫາຣາຍາຕິ ອິມສ຺ມິໍເຍວ ປຈ຺ຈກ຺ເຂ ອຕ຺ຕຠາເວ ສຸຂວິຫາຣຕ຺ຖາຍ. ວິຊ຺ຊາວິມຸຕ຺ຕິຜລສຈ຺ຉິກິຣິຍາຍາຕິ ວິຊ຺ຊາວິມຸຕ຺ຕີນໍ ຜລສ຺ສ ປຈ຺ຈເວກ຺ຂກຣຓຕ຺ຖາຍ. ເອຕ຺ຖ ຈ ວິຊ຺ຊາຕິ ມຄ຺ຄປຎ຺ຎາ, ວິມຸຕ຺ຕີຕິ ຕໍສມ຺ປຍຸຕ຺ຕາ ເສສຘມ຺ມາ. ເຕສໍ ຜລໍ ນາມ ອຣຫຕ຺ຕຜລໍ, ຕສ຺ສ ສຈ຺ຉິກິຣິຍາຍາຕິ ອຕ຺ໂຖ.

໕໗໑. ກາໂຍປິ ປສ຺ສມ຺ຠຕີຕິ ນາມກາໂຍປິ ກຣຊກາໂຍປິ ປສ຺ສມ຺ຠຕິ, ວູປສນ຺ຕທຣໂຖ ໂຫຕິ. ວິຕກ຺ກວິຈາຣາປີຕິ ເອເຕ ຘມ຺ມາ ທຸຕິຍຊ຺ຌາເນນ ວູປສມ຺ມນ຺ຕິ ນາມ, ອິຘ ປນ ໂອຬາຣິກວູປສມໍ ສນ຺ຘາຍ ວຸຕ຺ຕໍ. ເກວລາຕິ ສກລາ, ສພ຺ເພ ນິຣວເສສາຕິ ອຕ຺ໂຖ. ວິຊ຺ຊາຠາຄິຍາຕິ ວິຊ຺ຊາໂກຏ຺ຐາສິຍາ, ເຕ ເຫຏ຺ຐາ ວິຠຊິຕ຺ວາ ທສ຺ສິຕາວ.

໕໗໔. ອວິຊ຺ຊາ ປຫີຍຕີຕິ ອຏ຺ຐສຸ ຐາເນສຸ ວຏ຺ຏມູລກໍ ພຫລນ຺ຘກາຣໍ ມຫາຕມໍ ອຎ຺ຎາຓໍ ປຫີຍຕິ. ວິຊ຺ຊາ ອຸປ຺ປຊ຺ຊຕີຕິ ອຣຫຕ຺ຕມຄ຺ຄວິຊ຺ຊາ ອຸປ຺ປຊ຺ຊຕິ. ອສ຺ມິມາໂນ ປຫີຍຕີຕິ ອສ຺ມີຕິ ນວວິໂຘ ມາໂນ ປຫີຍຕິ. ອນຸສຍາຕິ ສຕ຺ຕ ອນຸສຍາ. ສໍໂຍຊນານີຕິ ທສ ສໍໂຍຊນານິ.

໕໗໕. ປຎ຺ຎາປເຠທາຍາຕິ ປຎ຺ຎາຍ ປເຠທຄມນຕ຺ຖໍ. ອນຸປາທາປຣິນິພ຺ພານາຍາຕິ ອປຈ຺ຈຍປຣິນິພ຺ພານສ຺ສ ສຈ຺ຉິກິຣິຍຕ຺ຖາຍ.

໕໗໖. ອເນກຘາຕຸປຏິເວໂຘ ໂຫຕີຕິ ອຏ຺ຐາຣສນ຺ນໍ ຘາຕູນໍ ລກ຺ຂຓປຏິເວໂຘ ໂຫຕິ. ນານາຘາຕຸປຏິເວໂຘ ໂຫຕີຕິ ຕາສໍເຍວ ອຏ຺ຐາຣສນ຺ນໍ ຘາຕູນໍ ນານາຠາເວນ ລກ຺ຂຓປຏິເວໂຘ ໂຫຕິ. ອເນກຘາຕຸປຏິສມ຺ຠິທາ ໂຫຕີຕິ ອິມິນາ ຘາຕຸເຠທຎາຓໍ ກຖິຕໍ. ຘາຕຸປເຠທຎາຓໍ ນາມ ‘‘ອິມາຍ ຘາຕຸຍາ ອຸສ຺ສນ຺ນາຍ ອິທໍ ນາມ ໂຫຕີ’’ຕິ ຊານນປຎ຺ຎາ. ຕໍ ປເນຕໍ ຘາຕຸເຠທຎາຓໍ ນ ສພ຺ເພສໍ ໂຫຕິ, ພຸທ຺ຘານເມວ ນິປ຺ປເທສໍ ໂຫຕິ. ຕໍ ສມ຺ມາສມ຺ພຸທ຺ເຘນ ສພ຺ພໂສ ນ ກຖິຕໍ. ກສ຺ມາ? ຕສ຺ມິໍ ກຖິເຕ ອຕ຺ໂຖ ນຕ຺ຖີຕິ.

໕໘໔. ປຎ຺ຎາປຏິລາຠາຍາຕິອາທີນິ ໂສຬສ ປທານິ ປຏິສມ຺ຠິທາມຄ຺ເຄ ‘‘ສປ຺ປຸຣິສສໍເສໂວ, ສທ຺ຘມ຺ມສວນໍ, ໂຍນິໂສມນສິກາໂຣ, ຘມ຺ມານຸຘມ຺ມປຏິປຕ຺ຕິ. ອິເມ ໂຂ, ຠິກ຺ຂເວ, ຈຕ຺ຕາໂຣ ຘມ຺ມາ ຠາວິຕາ ພຫຸລີກຕາ ປຎ຺ຎາປຏິລາຠາຍ ສໍວຕ຺ຕນ຺ຕິ …ເປ… ນິພ຺ເພຘິກປຎ຺ຎຕາຍ ສໍວຕ຺ຕນ຺ຕີ’’ຕິ ເອວໍ ມາຕິກໍ ຐເປຕ຺ວາ ວິຕ຺ຖາຣິຕາເນວ. ວຸຕ຺ຕຎ຺ເຫຕໍ (ປຏິ. ມ. ໓.໔) –

ປຎ຺ຎາປຏິລາຠາຍ ສໍວຕ຺ຕນ຺ຕີຕິ. ‘‘ກຕໂມ ປຎ຺ຎາປຏິລາໂຠ? ຈຕຸນ຺ນໍ ມຄ຺ຄຎາຓານໍ, ຈຕຸນ຺ນໍ ຜລຎາຓານໍ, ຈຕຸນ຺ນໍ ປຏິສມ຺ຠິທາຎາຓານໍ, ຉນ຺ນໍ ອຠິຎ຺ຎາຎາຓານໍ, ເຕສຕ຺ຕຕີນໍ ຎາຓານໍ, ສຕ຺ຕສຕ຺ຕຕີນໍ ຎາຓານໍ ລາໂຠ ປຏິລາໂຠ ປຕ຺ຕິສມ຺ປຕ຺ຕິ ຜສ຺ສນາ ສຈ຺ຉິກິຣິຍາ ອຸປສມ຺ປທາ, ປຎ຺ຎາປຏິລາຠາຍ ສໍວຕ຺ຕນ຺ຕີຕິ ອຍໍ ປຎ຺ຎາປຏິລາໂຠ.

ປຎ຺ຎາວຸທ຺ຘິຍາ ສໍວຕ຺ຕນ຺ຕີຕິ. ‘‘ກຕມາ ປຎ຺ຎາວຸທ຺ຘິ? ສຕ຺ຕນ຺ນຎ຺ຈ ເສກ຺ຂານໍ ປຸຖຸຊ຺ຊນກລ຺ຍາຓກສ຺ສ ຈ ປຎ຺ຎາ ວຑ຺ຒຕິ, ອຣຫໂຕ ປຎ຺ຎາ ວຑ຺ຒິຕວຑ຺ຒນາ, ປຎ຺ຎາວຸທ຺ຘິຍາ ສໍວຕ຺ຕນ຺ຕີຕິ ອຍໍ ປຎ຺ຎາວຸທ຺ຘິ.

ປຎ຺ຎາເວປຸລ຺ລາຍ ສໍວຕ຺ຕນ຺ຕີຕິ. ‘‘ກຕມໍ ປຎ຺ຎາເວປຸລ຺ລໍ? ສຕ຺ຕນ຺ນຎ຺ຈ ເສກ຺ຂານໍ ປຸຖຸຊ຺ຊນກລ຺ຍາຓກສ຺ສ ຈ ປຎ຺ຎາ ເວປຸລ຺ລໍ ຄຈ຺ຉຕິ, ອຣຫໂຕ ປຎ຺ຎາ ເວປຸລ຺ລໍ ຄຕາ, ປຎ຺ຎາເວປຸລ຺ລາຍ ສໍວຕ຺ຕນ຺ຕີຕິ ອິທໍ ປຎ຺ຎາເວປຸລ຺ລໍ.

ມຫາປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ມຫາປຎ຺ຎາ? ມຫນ຺ເຕ ອຕ຺ເຖ ປຣິຄ຺ຄຓ຺ຫາຕີຕິ ມຫາປຎ຺ຎາ, ມຫນ຺ເຕ ຘມ຺ເມ…ເປ… ມຫນ຺ຕາ ນິຣຸຕ຺ຕິໂຍ, ມຫນ຺ຕານິ ປຏິຠານານິ, ມຫນ຺ເຕ ສີລກ຺ຂນ຺ເຘ, ມຫນ຺ເຕ ສມາຘິປຎ຺ຎາວິມຸຕ຺ຕິວິມຸຕ຺ຕິຎາຓທສ຺ສນກ຺ຂນ຺ເຘ, ມຫນ຺ຕານິ ຐານາຏ຺ຐານານິ, ມຫນ຺ຕາ ວິຫາຣສມາປຕ຺ຕິໂຍ, ມຫນ຺ຕານິ ອຣິຍສຈ຺ຈານິ, ມຫນ຺ເຕ ສຕິປຏ຺ຐາເນ, ສມ຺ມປ຺ປຘາເນ, ອິທ຺ຘິປາເທ, ມຫນ຺ຕານິ ອິນ຺ທ຺ຣິຍານິ, ມຫນ຺ຕານິ ພລານິ, ມຫນ຺ເຕ ໂພຊ຺ຌງ຺ເຄ, ມຫນ຺ເຕ ອຣິຍມຄ຺ເຄ, ມຫນ຺ຕານິ ສາມຎ຺ຎຜລານິ, ມຫາຠິຎ຺ຎາໂຍ, ມຫນ຺ຕໍ ປຣມຕ຺ຖໍ ນິພ຺ພານໍ ປຣິຄ຺ຄຓ຺ຫາຕີຕິ ມຫາປຎ຺ຎາ, ມຫາປຎ຺ຎຕາຍ ສໍວຕ຺ຕນ຺ຕີຕິ ອຍໍ ມຫາປຎ຺ຎາ.

ປຸຖຸປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ປຸຖຸປຎ຺ຎາ? ປຸຖຸ ນານາກ຺ຂນ຺ເຘສຸ ຎາຓໍ ປວຕ຺ຕຕີຕິ ປຸຖຸປຎ຺ຎາ. ປຸຖຸ ນານາຘາຕູສຸ, ປຸຖຸ ນານາອາຍຕເນສຸ, ປຸຖຸ ນານາປຏິຈ຺ຈສມຸປ຺ປາເທສຸ, ປຸຖຸ ນານາສຸຎ຺ຎຕມນຸປລພ຺ເຠສຸ, ປຸຖຸ ນານາອຕ຺ເຖສຸ, ຘມ຺ເມສຸ, ນິຣຸຕ຺ຕີສຸ, ປຏິຠາເນສຸ, ປຸຖຸ ນານາສີລກ຺ຂນ຺ເຘສຸ, ສມາຘິປຎ຺ຎາວິມຸຕ຺ຕິວິມຸຕ຺ຕິຎາຓທສ຺ສນກ຺ຂນ຺ເຘສຸ, ປຸຖຸ ນານາຐານາຏ຺ຐາເນສຸ, ປຸຖຸ ນານາວິຫາຣສມາປຕ຺ຕີສຸ, ປຸຖຸ ນານາອຣິຍສຈ຺ເຈສຸ, ປຸຖຸ ນານາສຕິປຏ຺ຐາເນສຸ, ສມ຺ມປ຺ປຘາເນສຸ, ອິທ຺ຘິປາເທສຸ, ອິນ຺ທ຺ຣິເຍສຸ, ພເລສຸ, ໂພຊ຺ຌງ຺ເຄສຸ, ປຸຖຸ ນານາອຣິຍມຄ຺ເຄສຸ, ປຸຖຸ ນານາສາມຎ຺ຎຜເລສຸ, ປຸຖຸ ນານາອຠິຎ຺ຎາສຸ ຎາຓໍ ປວຕ຺ຕຕີຕິ ປຸຖຸປຎ຺ຎາ. ປຸຖຸ ນານາຊນສາຘາຣເຓ ຘມ຺ເມ ສມຕິກ຺ກມ຺ມ ປຣມຕ຺ເຖ ນິພ຺ພາເນ ຎາຓໍ ປວຕ຺ຕຕີຕິ ປຸຖຸປຎ຺ຎາ. ປຸຖຸປຎ຺ຎຕາຍ ສໍວຕ຺ຕນ຺ຕີຕິ ອຍໍ ປຸຖຸປຎ຺ຎາ.

ວິປຸລປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ວິປຸລປຎ຺ຎາ? ວິປຸເລ ອຕ຺ເຖ ປຣິຄຓ຺ຫາຕີຕິ ວິປຸລປຎ຺ຎາ…ເປ… ວິປຸລໍ ປຣມຕ຺ຖໍ ນິພ຺ພານໍ ປຣິຄຓ຺ຫາຕີຕິ ວິປຸລປຎ຺ຎາ, ວິປຸລປຎ຺ຎຕາຍ ສໍວຕ຺ຕນ຺ຕີຕິ ອຍໍ ວິປຸລປຎ຺ຎາ.

ຄມ຺ຠີຣປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ຄມ຺ຠີຣປຎ຺ຎາ? ຄມ຺ຠີເຣສຸ ຂນ຺ເຘສຸ ຎາຓໍ ປວຕ຺ຕຕີຕິ ຄມ຺ຠີຣປຎ຺ຎາ. ປຸຖຸປຎ຺ຎາສທິໂສ ວິຕ຺ຖາໂຣ. ຄມ຺ຠີເຣ ປຣມຕ຺ເຖ ນິພ຺ພາເນ ຎາຓໍ ປວຕ຺ຕຕີຕິ ຄມ຺ຠີຣປຎ຺ຎາ, ຄມ຺ຠີຣປຎ຺ຎຕາຍ ສໍວຕ຺ຕນ຺ຕີຕິ ອຍໍ ຄມ຺ຠີຣປຎ຺ຎາ.

ອສາມນ຺ຕປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ອສາມນ຺ຕປຎ຺ຎາ? ຍສ຺ສ ປຸຄ຺ຄລສ຺ສ ອຕ຺ຖວວຕ຺ຖານໂຕ ອຕ຺ຖປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ. ຘມ຺ມນິຣຸຕ຺ຕິປຏິຠານວວຕ຺ຖານໂຕ ປຏິຠານປຏິສມ຺ຠິທາ ອຘິຄຕາ ໂຫຕິ ສຈ຺ຉິກຕາ ຜສ຺ສິຕາ ປຎ຺ຎາຍ, ຕສ຺ສ ອຕ຺ເຖ ຈ ຘມ຺ເມ ຈ ນິຣຸຕ຺ຕິຍາ ຈ ປຏິຠາເນ ຈ ນ ອຎ຺ໂຎ ໂກຈິ ສກ຺ໂກຕິ ອຠິສມ຺ຠວິຕຸໍ, ອນຠິສມ຺ຠວນີໂຍ ຈ ໂສ ອຎ຺ເຎຫີຕິ ອສາມນ຺ຕປຎ຺ໂຎ.

ປຸຖຸຊ຺ຊນກລ຺ຍາຓກສ຺ສ ປຎ຺ຎາ ອຏ຺ຐມກສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ, ປຸຖຸຊ຺ຊນກລ຺ຍາຓກໍ ອຸປາທາຍ ອຏ຺ຐມໂກ ອສາມນ຺ຕປຎ຺ໂຎ. ອຏ຺ຐມກສ຺ສ ປຎ຺ຎາ ໂສຕາປນ຺ນສ຺ສ ປຎ຺ຎາຍ ທູເຣ…ເປ… ອຏ຺ຐມກໍ ອຸປາທາຍ ໂສຕາປນ຺ໂນ ອສາມນ຺ຕປຎ຺ໂຎ. ໂສຕາປນ຺ນສ຺ສ ປຎ຺ຎາ ສກທາຄາມິສ຺ສ ປຎ຺ຎາຍ. ສກທາຄາມິສ຺ສ ປຎ຺ຎາ ອນາຄາມິສ຺ສ ປຎ຺ຎາຍ. ອນາຄາມິສ຺ສ ປຎ຺ຎາ ອຣຫໂຕ ປຎ຺ຎາຍ. ອຣຫໂຕ ປຎ຺ຎາ ປຈ຺ເຈກພຸທ຺ຘສ຺ສ ປຎ຺ຎາຍ ທູເຣ ວິທູເຣ ສຸວິທູເຣ ນ ສນ຺ຕິເກ ນ ສາມນ຺ຕາ, ອຣຫນ຺ຕໍ ອຸປາທາຍ ປຈ຺ເຈກພຸທ຺ໂຘ ອສາມນ຺ຕປຎ຺ໂຎ. ປຈ຺ເຈກພຸທ຺ຘຎ຺ຈ ສເທວກຎ຺ຈ ໂລກໍ ອຸປາທາຍ ຕຖາຄໂຕ ອຣຫໍ ສມ຺ມາສມ຺ພຸທ຺ໂຘ ອຄ຺ໂຄ ອສາມນ຺ຕປຎ຺ໂຎ.

ປຎ຺ຎາປເຠທກຸສໂລ ປຠິນ຺ນຎາໂຓ…ເປ… ເຕ ປຎ຺ຫໍ ອຠິສງ຺ຂຣິຕ຺ວາ ອຠິສງ຺ຂຣິຕ຺ວາ ຕຖາຄຕໍ ອຸປສງ຺ກມິຕ຺ວາ ປຸຈ຺ຉນ຺ຕິ ຄູຬ຺ຫານິ ຈ ປຏິຈ຺ຉນ຺ນານິ ຈ, ກຖິຕາ ວິສຊ຺ຊິຕາ ຈ ເຕ ປຎ຺ຫາ ຠຄວຕາ ໂຫນ຺ຕິ ນິທ຺ທິຏ຺ຐກາຣຓາ, ອຸປກ຺ຂິຕ຺ຕກາ ຈ ເຕ ຠຄວຕາ ສມ຺ປຊ຺ຊນ຺ຕິ. ອຖ ໂຂ ຠຄວາ ຕຕ຺ຖ ອຕິໂຣຈຕິ ຍທິທໍ ປຎ຺ຎາຍາຕິ ອຄ຺ໂຄ ອສາມນ຺ຕປຎ຺ໂຎ, ອສາມນ຺ຕປຎ຺ຎຕາຍ ສໍວຕ຺ຕນ຺ຕີຕິ ອຍໍ ອສາມນ຺ຕປຎ຺ຎາ.

ຠູຣິປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ຠູຣິປຎ຺ຎາ? ຣາຄໍ ອຠິຠຸຍ຺ຍຕີຕິ ຠູຣິປຎ຺ຎາ, ອຠິຠວິຕາຕິ ຠູຣິປຎ຺ຎາ. ໂທສໍ, ໂມຫໍ, ໂກຘໍ, ອຸປນາຫໍ, ມກ຺ຂໍ, ປລາສໍ, ອິສ຺ສໍ, ມຈ຺ຉຣິຍໍ, ມາຍໍ, ສາເຐຍ຺ຍໍ, ຖມ຺ຠໍ, ສາຣມ຺ຠໍ, ມານໍ, ອຕິມານໍ, ມທໍ, ປມາທໍ, ສພ຺ເພ ກິເລເສ, ສພ຺ເພ ທຸຈ຺ຈຣິເຕ, ສພ຺ເພ ອຠິສງ຺ຂາເຣ, ສພ຺ເພ ຠວຄາມິກມ຺ເມ ອຠິຠຸຍ຺ຍຕີຕິ ຠູຣິປຎ຺ຎາ, ອຠິຠວິຕາຕິ ຠູຣິປຎ຺ຎາ. ຣາໂຄ ອຣິ, ຕໍ ອຣິໍ ມທ຺ທນິປຎ຺ຎາຕິ ຠູຣິປຎ຺ຎາ, ໂທໂສ, ໂມໂຫ…ເປ… ສພ຺ເພ ຠວຄາມິກມ຺ມາ ອຣິ, ຕໍ ອຣິໍ ມທ຺ທນິປຎ຺ຎາຕິ ຠູຣິປຎ຺ຎາ. ຠູຣິ ວຸຈ຺ຈຕິ ປຖວີ, ຕາຍ ປຖວິສມາຍ ວິຕ຺ຖຕາຍ ວິປຸລາຍ ປຎ຺ຎາຍ ສມນ຺ນາຄໂຕຕິ ຠູຣິປຎ຺ໂຎ. ອປິຈ ປຎ຺ຎາຍ ເອຕໍ ອຘິວຈນໍ ຠູຣິ ເມຘາ ປຣິຓາຍິກາຕິ, ຠູຣິປຎ຺ຎຕາຍ ສໍວຕ຺ຕນ຺ຕີຕິ ອຍໍ ຠູຣິປຎ຺ຎາ.

ປຎ຺ຎາພາຫຸລ຺ລາຍ ສໍວຕ຺ຕນ຺ຕີຕິ. ‘‘ກຕມໍ ປຎ຺ຎາພາຫຸລ຺ລໍ? ອິເຘກຈ຺ໂຈ ປຎ຺ຎາຄຣຸໂກ ໂຫຕິ ປຎ຺ຎາຈຣິໂຕ ປຎ຺ຎາສໂຍ ປຎ຺ຎາຘິມຸຕ຺ໂຕ ປຎ຺ຎາຘໂຊ ປຎ຺ຎາເກຕຸ ປຎ຺ຎາຘິປເຕຍ຺ໂຍ ວິຈຍພຫຸໂລ ປວິຈຍພຫຸໂລ ໂອກ຺ຂາຍນພຫຸໂລ ສໂມກ຺ຂາຍນພຫຸໂລ ສມ຺ເປກ຺ຂາຍນຘມ຺ໂມ ວິຠູຕວິຫາຣີ ຕຈ຺ຈຣິໂຕ ຕຄ຺ຄຣຸໂກ ຕພ຺ພຫຸໂລ ຕນ຺ນິນ຺ໂນ ຕປ຺ໂປໂຓ ຕປ຺ປພ຺ຠາໂຣ ຕທຘິມຸຕ຺ໂຕ ຕທາຘິປເຕຍ຺ໂຍ, ຍຖາ ຄຓຄຣຸໂກ ວຸຈ຺ຈຕິ ຄຓພາຫຸລິໂກຕິ, ຈີວຣຄຣຸໂກ ປຕ຺ຕຄຣຸໂກ ເສນາສນຄຣຸໂກ ວຸຈ຺ຈຕິ ເສນາສນພາຫຸລິໂກຕິ, ເອວເມວໍ ອິເຘກຈ຺ໂຈ ປຎ຺ຎາຄຣຸໂກ ໂຫຕິ ປຎ຺ຎາຈຣິໂຕ…ເປ… ຕທາຘິປເຕຍ຺ໂຍ, ປຎ຺ຎາພາຫຸລ຺ລາຍ ສໍວຕ຺ຕນ຺ຕີຕິ ອິທໍ ປຎ຺ຎາພາຫຸລ຺ລໍ.

ສີຆປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ສີຆປຎ຺ຎາ? ສີຆໍ ສີຆໍ ສີລານິ ປຣິປູເຣຕີຕິ ສີຆປຎ຺ຎາ. ສີຆໍ ສີຆໍ ອິນ຺ທ຺ຣິຍສໍວຣໍ, ໂຠຊເນ ມຕ຺ຕຎ຺ຎຸຕໍ, ຊາຄຣິຍານຸໂຍຄໍ, ສີລກ຺ຂນ຺ຘໍ, ສມາຘິ-ປຎ຺ຎາ-ວິມຸຕ຺ຕິ-ວິມຸຕ຺ຕິຎາຓທສ຺ສນກ຺ຂນ຺ຘໍ ປຣິປູເຣຕີຕິ ສີຆປຎ຺ຎາ. ສີຆໍ ສີຆໍ ຐານາຏ຺ຐານານິ ປຏິວິຊ຺ຌຕິ. ວິຫາຣສມາປຕ຺ຕິໂຍ ປຣິປູເຣຕິ. ອຣິຍສຈ຺ຈານິ ປຏິວິຊ຺ຌຕິ. ສຕິປຏ຺ຐາເນ ຠາເວຕິ. ສມ຺ມປ຺ປຘາເນ ອິທ຺ຘິປາເທ ອິນ຺ທ຺ຣິຍານິ ພລານິ ໂພຊ຺ຌງ຺ເຄ ອຣິຍມຄ຺ຄໍ ຠາເວຕີຕິ ສີຆປຎ຺ຎາ. ສີຆໍ ສີຆໍ ສາມຎ຺ຎຜລານິ ສຈ຺ຉິກໂຣຕີຕິ ສີຆປຎ຺ຎາ. ສີຆໍ ສີຆໍ ອຠິຎ຺ຎາໂຍ ປຏິວິຊ຺ຌຕີຕິ ສີຆປຎ຺ຎາ. ສີຆໍ ສີຆໍ ປຣມຕ຺ຖໍ ນິພ຺ພານໍ ສຈ຺ຉິກໂຣຕີຕິ ສີຆປຎ຺ຎາ, ສີຆປຎ຺ຎຕາຍ ສໍວຕ຺ຕນ຺ຕີຕິ ອຍໍ ສີຆປຎ຺ຎາ.

ລຫຸປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ລຫຸປຎ຺ຎາ? ລຫຸໍ ລຫຸໍ ສີລານິ ປຣິປູເຣຕີຕິ ລຫຸປຎ຺ຎາ…ເປ… ລຫຸປຎ຺ຎຕາຍ ສໍວຕ຺ຕນ຺ຕີຕິ ອຍໍ ລຫຸປຎ຺ຎາ.

ຫາສປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ຫາສປຎ຺ຎາ? ອິເຘກຈ຺ໂຈ ເວທພຫຸໂລ ຕຸຏ຺ຐິພຫຸໂລ ຫາສພຫຸໂລ ປາໂມຊ຺ຊພຫຸໂລ ສີລານິ ປຣິປູເຣຕີຕິ ຫາສປຎ຺ຎາ…ເປ… ປຣມຕ຺ຖໍ ນິພ຺ພານໍ ສຈ຺ຉິກໂຣຕີຕິ ຫາສປຎ຺ຎາ, ຫາສປຎ຺ຎຕາຍ ສໍວຕ຺ຕນ຺ຕີຕິ ອຍໍ ຫາສປຎ຺ຎາ.

ຊວນປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ຊວນປຎ຺ຎາ? ຍໍ ກິຎ຺ຈິ ຣູປໍ ອຕີຕານາຄຕປຈ຺ຈຸປ຺ປນ຺ນໍ, ຍາ ກາຈິ ເວທນາ, ຍາ ກາຈິ ສຎ຺ຎາ, ເຍ ເກຈິ ສງ຺ຂາຣາ, ຍໍກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ສພ຺ພໍ ວິຎ຺ຎາຓໍ ອນິຈ຺ຈໂຕ ຂິປ຺ປໍ ຊວຕີຕິ ຊວນປຎ຺ຎາ, ທຸກ຺ຂໂຕ, ອນຕ຺ຕໂຕ ຂິປ຺ປໍ ຊວຕີຕິ ຊວນປຎ຺ຎາ. ຈກ຺ຂຸໍ…ເປ… ຊຣາມຣຓໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໂຕ, ທຸກ຺ຂໂຕ, ອນຕ຺ຕໂຕ ຂິປ຺ປໍ ຊວຕີຕິ ຊວນປຎ຺ຎາ. ຣູປໍ ອຕີຕານາຄຕປຈ຺ຈຸປ຺ປນ຺ນໍ ອນິຈ຺ຈໍ ຂຍຏ຺ເຐນ, ທຸກ຺ຂໍ ຠຍຏ຺ເຐນ, ອນຕ຺ຕາ ອສາຣກຏ຺ເຐນາຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຣູປນິໂຣເຘ ນິພ຺ພາເນ ຂິປ຺ປໍ ຊວຕີຕິ ຊວນປຎ຺ຎາ…ເປ… ຊຣາມຣຓນິໂຣເຘ ນິພ຺ພາເນ ຂິປ຺ປໍ ຊວຕີຕິ ຊວນປຎ຺ຎາ. ຣູປໍ…ເປ… ຊຣາມຣຓໍ ອຕີຕານາຄຕປຈ຺ຈຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມນ຺ຕິ ຕຸລຍິຕ຺ວາ ຕີຣຍິຕ຺ວາ ວິຠາວຍິຕ຺ວາ ວິຠູຕໍ ກຕ຺ວາ ຊຣາມຣຓນິໂຣເຘ ນິພ຺ພາເນ ຂິປ຺ປໍ ຊວຕີຕິ ຊວນປຎ຺ຎາ, ຊວນປຎ຺ຎຕາຍ ສໍວຕ຺ຕນ຺ຕີຕິ ອຍໍ ຊວນປຎ຺ຎາ.

ຕິກ຺ຂປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ຕິກ຺ຂປຎ຺ຎາ? ຂິປ຺ປໍ ກິເລເສ ຉິນ຺ທຕີຕິ ຕິກ຺ຂປຎ຺ຎາ. ອຸປ຺ປນ຺ນໍ ກາມວິຕກ຺ກໍ, ວ຺ຍາປາທວິຕກ຺ກໍ, ວິຫິໍສາວິຕກ຺ກໍ ອຸປ຺ປນ຺ນຸປ຺ປນ຺ເນ ປາປເກ ອກຸສເລ ຘມ຺ເມ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ ຕິກ຺ຂປຎ຺ຎາ. ອຸປ຺ປນ຺ນໍ ຣາຄໍ, ໂທສໍ, ໂມຫໍ…ເປ… ສພ຺ເພ ຠວຄາມິກມ຺ເມ ນາຘິວາເສຕິ ປຊຫຕິ ວິໂນເທຕິ ພ຺ຍນ຺ຕີກໂຣຕິ ອນຠາວໍ ຄເມຕີຕິ ຕິກ຺ຂປຎ຺ຎາ. ເອກສ຺ມິໍ ອາສເນ ຈຕ຺ຕາໂຣ ອຣິຍມຄ຺ຄາ ຈຕ຺ຕາຣິ ສາມຎ຺ຎຜລານິ ຈຕສ຺ໂສ ປຏິສມ຺ຠິທາໂຍ ຉ ອຠິຎ຺ຎາໂຍ ອຘິຄຕາ ໂຫນ຺ຕິ ສຈ຺ຉິກຕາ ຜສ຺ສິຕາ ປຎ຺ຎາຍາຕິ ຕິກ຺ຂປຎ຺ຎາ, ຕິກ຺ຂປຎ຺ຎຕາຍ ສໍວຕ຺ຕນ຺ຕີຕິ ອຍໍ ຕິກ຺ຂປຎ຺ຎາ.

ນິພ຺ເພຘິກປຎ຺ຎຕາຍ ສໍວຕ຺ຕນ຺ຕີຕິ. ‘‘ກຕມາ ນິພ຺ເພຘິກປຎ຺ຎາ? ອິເຘກຈ຺ໂຈ ສພ຺ພສງ຺ຂາເຣສຸ ອຸພ຺ເພຄພຫຸໂລ ໂຫຕິ ອຸຕ຺ຕາສພຫຸໂລ ອຸກ຺ກຓ຺ຐນພຫຸໂລ ອຣຕິພຫຸໂລ ອນຠິຣຕິພຫຸໂລ ພຫິມຸໂຂ ນ ຣມຕິ ສພ຺ພສງ຺ຂາເຣສຸ, ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂລຠກ຺ຂນ຺ຘໍ ນິພ຺ພິຊ຺ຌຕິ ປທາເລຕີຕິ ນິພ຺ເພຘິກປຎ຺ຎາ, ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂທສກ຺ຂນ຺ຘໍ, ໂມຫກ຺ຂນ຺ຘໍ, ໂກຘໍ, ອຸປນາຫໍ…ເປ… ສພ຺ເພ ຠວຄາມິກມ຺ເມ ນິພ຺ພິຊ຺ຌຕິ ປທາເລຕີຕິ ນິພ຺ເພຘິກປຎ຺ຎາ, ນິພ຺ເພຘິກປຎ຺ຎຕາຍ ສໍວຕ຺ຕນ຺ຕີຕິ ອຍໍ ນິພ຺ເພຘິກປຎ຺ຎາ’’.

ເອວໍ ປຏິສມ຺ຠິທາມຄ຺ເຄ ວຸຕ຺ຕນເຍເນເວຕ຺ຖ ອຕ຺ໂຖ ເວທິຕພ຺ໂພ. ເກວລຎ຺ຫິ ຕຕ຺ຖ ພຫຸວຈນໍ, ອິຘ ເອກວຈນນ຺ຕິ ອຍເມວ ວິເສໂສ. ເສສໍ ຕາທິສເມວາຕິ. ອິມາ ຈ ປນ ໂສຬສ ມຫາປຎ຺ຎາ ໂລກິຍໂລກຸຕ຺ຕຣມິສ຺ສກາວ ກຖິຕາ.

ກາຍຄຕາສຕິວຄ຺ຄວຓ຺ຓນາ.