(໔) ປຈ຺ຈຸປ຺ປນ຺ນາຕີຕວາໂຣ

(ກ) ອນຸໂລມປຸຄ຺ຄໂລ

໔໙. (ກ) ຍສ຺ສ ກາຍສງ຺ຂາໂຣ ອຸປ຺ປຊ຺ຊຕິ ຕສ຺ສ ວຈີສງ຺ຂາໂຣ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ວຈີສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ກາຍສງ຺ຂາໂຣ ອຸປ຺ປຊ຺ຊຕີຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ນິໂຣຘສມາປນ຺ນານໍ ອສຎ຺ຎສຕ຺ຕານໍ ເຕສໍ ວຈີສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ກາຍສງ຺ຂາໂຣ ອຸປ຺ປຊ຺ຊຕິ. ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ວຈີສງ຺ຂາໂຣ ຈ ອຸປ຺ປຊ຺ຊິຕ຺ຖ ກາຍສງ຺ຂາໂຣ ຈ ອຸປ຺ປຊ຺ຊຕິ.

(ກ) ຍສ຺ສ ກາຍສງ຺ຂາໂຣ ອຸປ຺ປຊ຺ຊຕິ ຕສ຺ສ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ກາຍສງ຺ຂາໂຣ ອຸປ຺ປຊ຺ຊຕີຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ນິໂຣຘສມາປນ຺ນານໍ ອສຎ຺ຎສຕ຺ຕານໍ ເຕສໍ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ກາຍສງ຺ຂາໂຣ ອຸປ຺ປຊ຺ຊຕິ. ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຈິຕ຺ຕສງ຺ຂາໂຣ ຈ ອຸປ຺ປຊ຺ຊິຕ຺ຖ ກາຍສງ຺ຂາໂຣ ຈ ອຸປ຺ປຊ຺ຊຕິ.

໕໐. (ກ) ຍສ຺ສ ວຈີສງ຺ຂາໂຣ ອຸປ຺ປຊ຺ຊຕິ ຕສ຺ສ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ວຈີສງ຺ຂາໂຣ ອຸປ຺ປຊ຺ຊຕີຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ວິຕກ຺ກວິຈາເຣຫິ ຈິຕ຺ຕສ຺ສ ອຸປ຺ປາທກ຺ຂເຓ ນິໂຣຘສມາປນ຺ນານໍ ອສຎ຺ຎສຕ຺ຕານໍ ເຕສໍ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ວຈີສງ຺ຂາໂຣ ອຸປ຺ປຊ຺ຊຕິ. ວິຕກ຺ກວິຈາຣານໍ ອຸປ຺ປາທກ຺ຂເຓ ເຕສໍ ຈິຕ຺ຕສງ຺ຂາໂຣ ຈ ອຸປ຺ປຊ຺ຊິຕ຺ຖ ວຈີສງ຺ຂາໂຣ ຈ ອຸປ຺ປຊ຺ຊຕິ.

(ຂ) ອນຸໂລມໂອກາໂສ

໕໑. ຍຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ…ເປ….

(ຄ) ອນຸໂລມປຸຄ຺ຄໂລກາສາ

໕໒. (ກ) ຍສ຺ສ ຍຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ ຕສ຺ສ ຕຕ຺ຖ ວຈີສງ຺ຂາໂຣ ອຸປ຺ປຊ຺ຊິຕ຺ຖາຕິ?

ທຸຕິຍຊ຺ຌານໍ ຕຕິຍຊ຺ຌານໍ ສມາປນ຺ນານໍ ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຕຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ, ໂນ ຈ ເຕສໍ ຕຕ຺ຖ ວຈີສງ຺ຂາໂຣ ອຸປ຺ປຊ຺ຊິຕ຺ຖ. ປຐມຊ຺ຌານໍ ສມາປນ຺ນານໍ ກາມາວຈຣານໍ ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຕຕ຺ຖ ກາຍສງ຺ຂາໂຣ ຈ ອຸປ຺ປຊ຺ຊຕິ ວຈີສງ຺ຂາໂຣ ຈ ອຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຍຕ຺ຖ ວຈີສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ຕຕ຺ຖ ກາຍສງ຺ຂາໂຣ ອຸປ຺ປຊ຺ຊຕີຕິ?

ປຐມຊ຺ຌານໍ ສມາປນ຺ນານໍ ກາມາວຈຣານໍ ອສ຺ສາສປສ຺ສາສານໍ ຠງ຺ຄກ຺ຂເຓ ເຕສໍເຍວ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ຣູປາວຈຣານໍ ອຣູປາວຈຣານໍ ເຕສໍ ຕຕ຺ຖ ວຈີສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ຕຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ. ປຐມຊ຺ຌານໍ ສມາປນ຺ນານໍ ກາມາວຈຣານໍ ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຕຕ຺ຖ ວຈີສງ຺ຂາໂຣ ຈ ອຸປ຺ປຊ຺ຊິຕ຺ຖ ກາຍສງ຺ຂາໂຣ ຈ ອຸປ຺ປຊ຺ຊຕິ.

(ກ) ຍສ຺ສ ຍຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ ຕສ຺ສ ຕຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ຍຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ຕຕ຺ຖ ກາຍສງ຺ຂາໂຣ ອຸປ຺ປຊ຺ຊຕີຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຕຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ຕຕ຺ຖ ກາຍສງ຺ຂາໂຣ ອຸປ຺ປຊ຺ຊຕິ. ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຕຕ຺ຖ ຈິຕ຺ຕສງ຺ຂາໂຣ ຈ ອຸປ຺ປຊ຺ຊິຕ຺ຖ ກາຍສງ຺ຂາໂຣ ຈ ອຸປ຺ປຊ຺ຊຕິ.

໕໓. (ກ) ຍສ຺ສ ຍຕ຺ຖ ວຈີສງ຺ຂາໂຣ ອຸປ຺ປຊ຺ຊຕິ ຕສ຺ສ ຕຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ຍຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ ຕສ຺ສ ຕຕ຺ຖ ວຈີສງ຺ຂາໂຣ ອຸປ຺ປຊ຺ຊຕີຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ວິຕກ຺ກວິຈາເຣຫິ ຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຕຕ຺ຖ ຈິຕ຺ຕສງ຺ຂາໂຣ ອຸປ຺ປຊ຺ຊິຕ຺ຖ, ໂນ ຈ ເຕສໍ ຕຕ຺ຖ ວຈີສງ຺ຂາໂຣ ອຸປ຺ປຊ຺ຊຕິ. ວິຕກ຺ກວິຈາຣານໍ ອຸປ຺ປາທກ຺ຂເຓ ເຕສໍ ຕຕ຺ຖ ຈິຕ຺ຕສງ຺ຂາໂຣ ຈ ອຸປ຺ປຊ຺ຊິຕ຺ຖ ວຈີສງ຺ຂາໂຣ ຈ ອຸປ຺ປຊ຺ຊຕິ.

(ຆ) ປຈ຺ຈນີກປຸຄ຺ຄໂລ

໕໔. (ກ) ຍສ຺ສ ກາຍສງ຺ຂາໂຣ ນຸປ຺ປຊ຺ຊຕິ ຕສ຺ສ ວຈີສງ຺ຂາໂຣ ນຸປ຺ປຊ຺ຊິຕ຺ຖາຕິ? ອຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ວຈີສງ຺ຂາໂຣ ນຸປ຺ປຊ຺ຊິຕ຺ຖ ຕສ຺ສ ກາຍສງ຺ຂາໂຣ ນຸປ຺ປຊ຺ຊຕີຕິ? ນຕ຺ຖິ.

(ກ) ຍສ຺ສ ກາຍສງ຺ຂາໂຣ ນຸປ຺ປຊ຺ຊຕິ ຕສ຺ສ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖາຕິ? ອຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖ ຕສ຺ສ ກາຍສງ຺ຂາໂຣ ນຸປ຺ປຊ຺ຊຕີຕິ? ນຕ຺ຖິ.

໕໕. (ກ) ຍສ຺ສ ວຈີສງ຺ຂາໂຣ ນຸປ຺ປຊ຺ຊຕິ ຕສ຺ສ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖາຕິ? ອຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ…ເປ…? ນຕ຺ຖິ.

(ງ) ປຈ຺ຈນີກໂອກາໂສ

໕໖. ຍຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ…ເປ….

(ຈ) ປຈ຺ຈນີກປຸຄ຺ຄໂລກາສາ

໕໗. (ກ) ຍສ຺ສ ຍຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ ຕສ຺ສ ຕຕ຺ຖ ວຈີສງ຺ຂາໂຣ ນຸປ຺ປຊ຺ຊິຕ຺ຖາຕິ?

ປຐມຊ຺ຌານໍ ສມາປນ຺ນານໍ ກາມາວຈຣານໍ ອສ຺ສາສປສ຺ສາສານໍ ຠງ຺ຄກ຺ຂເຓ ເຕສໍເຍວ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ຣູປາວຈຣານໍ ອຣູປາວຈຣານໍ ເຕສໍ ຕຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ, ໂນ ຈ ເຕສໍ ຕຕ຺ຖ ວຈີສງ຺ຂາໂຣ ນຸປ຺ປຊ຺ຊິຕ຺ຖ. ທຸຕິຍຊ຺ຌານໍ ຕຕິຍຊ຺ຌານໍ ສມາປນ຺ນານໍ ອສ຺ສາສປສ຺ສາສານໍ ຠງ຺ຄກ຺ຂເຓ ເຕສໍເຍວ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ຈຕຸຕ຺ຖຊ຺ຌານໍ ສມາປນ຺ນານໍ ສຸທ຺ຘາວາສານໍ ທຸຕິເຍ ຈິຕ຺ເຕ ວຕ຺ຕມາເນ ອສຎ຺ຎສຕ຺ຕານໍ ເຕສໍ ຕຕ຺ຖ ກາຍສງ຺ຂາໂຣ ຈ ນຸປ຺ປຊ຺ຊຕິ ວຈີສງ຺ຂາໂຣ ຈ ນຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຍຕ຺ຖ ວຈີສງ຺ຂາໂຣ ນຸປ຺ປຊ຺ຊິຕ຺ຖ ຕສ຺ສ ຕຕ຺ຖ ກາຍສງ຺ຂາໂຣ ນຸປ຺ປຊ຺ຊຕີຕິ?

ທຸຕິຍຊ຺ຌານໍ ຕຕິຍຊ຺ຌານໍ ສມາປນ຺ນານໍ ອສ຺ສາສປສ຺ສາສານໍ ອຸປ຺ປາທກ຺ຂເຓ ເຕສໍ ຕຕ຺ຖ ວຈີສງ຺ຂາໂຣ ນຸປ຺ປຊ຺ຊິຕ຺ຖ, ໂນ ຈ ເຕສໍ ຕຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ. ທຸຕິຍຊ຺ຌານໍ ຕຕິຍຊ຺ຌານໍ ສມາປນ຺ນານໍ ອສ຺ສາສປສ຺ສາສານໍ ຠງ຺ຄກ຺ຂເຓ ເຕສໍເຍວ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ຈຕຸຕ຺ຖຊ຺ຌານໍ ສມາປນ຺ນານໍ ສຸທ຺ຘາວາສານໍ ທຸຕິເຍ ຈິຕ຺ເຕ ວຕ຺ຕມາເນ ອສຎ຺ຎສຕ຺ຕານໍ ເຕສໍ ຕຕ຺ຖ ວຈີສງ຺ຂາໂຣ ຈ ນຸປ຺ປຊ຺ຊິຕ຺ຖ ກາຍສງ຺ຂາໂຣ ຈ ນຸປ຺ປຊ຺ຊຕິ.

(ກ) ຍສ຺ສ ຍຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ ຕສ຺ສ ຕຕ຺ຖ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖາຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ອສ຺ສາສປສ຺ສາເສຫິ ຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຕຕ຺ຖ ກາຍສງ຺ຂາໂຣ ນຸປ຺ປຊ຺ຊຕິ, ໂນ ຈ ເຕສໍ ຕຕ຺ຖ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖ. ສຸທ຺ຘາວາສໍ ອຸປປຊ຺ຊນ຺ຕານໍ ອສຎ຺ຎສຕ຺ຕານໍ ເຕສໍ ຕຕ຺ຖ ກາຍສງ຺ຂາໂຣ ຈ ນຸປ຺ປຊ຺ຊຕິ ຈິຕ຺ຕສງ຺ຂາໂຣ ຈ ນຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຍຕ຺ຖ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖ ຕສ຺ສ ຕຕ຺ຖ ກາຍສງ຺ຂາໂຣ ນຸປ຺ປຊ຺ຊຕີຕິ? ອາມນ຺ຕາ.

໕໘. (ກ) ຍສ຺ສ ຍຕ຺ຖ ວຈີສງ຺ຂາໂຣ ນຸປ຺ປຊ຺ຊຕິ ຕສ຺ສ ຕຕ຺ຖ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖາຕິ?

ສພ຺ເພສໍ ຈິຕ຺ຕສ຺ສ ຠງ຺ຄກ຺ຂເຓ ວິນາ ວິຕກ຺ກວິຈາເຣຫິ ຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຕຕ຺ຖ ວຈີສງ຺ຂາໂຣ ນຸປ຺ປຊ຺ຊຕິ, ໂນ ຈ ເຕສໍ ຕຕ຺ຖ ຈິຕ຺ຕສງ຺ຂາໂຣ ນຸປ຺ປຊ຺ຊິຕ຺ຖ. ສຸທ຺ຘາວາສໍ ອຸປປຊ຺ຊນ຺ຕານໍ ອສຎ຺ຎສຕ຺ຕານໍ ເຕສໍ ຕຕ຺ຖ ວຈີສງ຺ຂາໂຣ ຈ ນຸປ຺ປຊ຺ຊຕິ ຈິຕ຺ຕສງ຺ຂາໂຣ ຈ ນຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຍຕ຺ຖ…ເປ…? ອາມນ຺ຕາ.