໑໔. ອກຸສລມູລກວິປາກນິທ຺ເທໂສ

໓໕໐. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ຈກ຺ຂຸວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຣູປາຣມ຺ມຓໍ, ຕສ຺ມິໍ ສມເຍ ອກຸສລມູລປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໓໕໑. ຕຕ຺ຖ ກຕໂມ ອກຸສລມູລປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອກຸສລມູລປຈ຺ຈຍາ ສງ຺ຂາໂຣ’’…ເປ… ເຕນ ວຸຈ຺ຈຕິ ‘‘ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

໓໕໒. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກໍ ໂສຕວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ສທ຺ທາຣມ຺ມຓໍ…ເປ… ຆານວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຄນ຺ຘາຣມ຺ມຓໍ…ເປ… ຊິວ຺ຫາວິຎ຺ຎາຓໍ ອຸປ຺ປນ຺ນໍ ໂຫຕິ ອຸເປກ຺ຂາສຫຄຕໍ ຣສາຣມ຺ມຓໍ…ເປ… ກາຍວິຎ຺ຎາຓໍ ອຸປ຺ປນ຺ນໍ ໂຫຕິ ທຸກ຺ຂສຫຄຕໍ ໂຜຏ຺ຐພ຺ພາຣມ຺ມຓໍ…ເປ… ມໂນຘາຕຸ ອຸປ຺ປນ຺ນາ ໂຫຕິ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ໂຜຏ຺ຐພ຺ພາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ອກຸສລມູລປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ອຘິໂມກ຺ໂຂ, ອຘິໂມກ຺ຂປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໓໕໓. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ວິປາກາ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ອກຸສລມູລປຈ຺ຈຍາ ສງ຺ຂາໂຣ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມໍ, ນາມປຈ຺ຈຍາ ຉຏ຺ຐາຍຕນໍ, ຉຏ຺ຐາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ອຘິໂມກ຺ໂຂ, ອຘິໂມກ຺ຂປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

໓໕໔. ຕຕ຺ຖ ກຕໂມ ອກຸສລມູລປຈ຺ຈຍາ ສງ຺ຂາໂຣ? ຍາ ເຈຕນາ ສຎ຺ເຈຕນາ ສຎ຺ເຈຕຍິຕຕ຺ຕໍ – ອຍໍ ວຸຈ຺ຈຕິ ‘‘ອກຸສລມູລປຈ຺ຈຍາ ສງ຺ຂາໂຣ’’.

ຕຕ຺ຖ ກຕມໍ ສງ຺ຂາຣປຈ຺ຈຍາ ວິຎ຺ຎາຓໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ສງ຺ຂາຣປຈ຺ຈຍາ ວິຎ຺ຎາຓໍ’’.

ຕຕ຺ຖ ກຕມໍ ວິຎ຺ຎາຓປຈ຺ຈຍາ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ – ອິທໍ ວຸຈ຺ຈຕິ ‘‘ວິຎ຺ຎາຓປຈ຺ຈຍາ ນາມໍ’’.

ຕຕ຺ຖ ກຕມໍ ນາມປຈ຺ຈຍາ ຉຏ຺ຐາຍຕນໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ນາມປຈ຺ຈຍາ ຉຏ຺ຐາຍຕນໍ’’.

ຕຕ຺ຖ ກຕໂມ ຉຏ຺ຐາຍຕນປຈ຺ຈຍາ ຜສ຺ໂສ? ໂຍ ຜສ຺ໂສ ຜຸສນາ ສມ຺ຜຸສນາ ສມ຺ຜຸສິຕຕ຺ຕໍ – ອຍໍ ວຸຈ຺ຈຕິ ‘‘ຉຏ຺ຐາຍຕນປຈ຺ຈຍາ ຜສ຺ໂສ’’.

ຕຕ຺ຖ ກຕມາ ຜສ຺ສປຈ຺ຈຍາ ເວທນາ? ຍໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ວຸຈ຺ຈຕິ ‘‘ຜສ຺ສປຈ຺ຈຍາ ເວທນາ’’.

ຕຕ຺ຖ ກຕໂມ ເວທນາປຈ຺ຈຍາ ອຘິໂມກ຺ໂຂ? ໂຍ ຈິຕ຺ຕສ຺ສ ອຘິໂມກ຺ໂຂ ອຘິມຸຈ຺ຈນາ ຕທຘິມຸຕ຺ຕຕາ – ອຍໍ ວຸຈ຺ຈຕິ ‘‘ເວທນາປຈ຺ຈຍາ ອຘິໂມກ຺ໂຂ’’.

ຕຕ຺ຖ ກຕໂມ ອຘິໂມກ຺ຂປຈ຺ຈຍາ ຠໂວ? ຐເປຕ຺ວາ ອຘິໂມກ຺ຂໍ, ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ສງ຺ຂາຣກ຺ຂນ຺ໂຘ ວິຎ຺ຎາຓກ຺ຂນ຺ໂຘ – ອຍໍ ວຸຈ຺ຈຕິ ‘‘ອຘິໂມກ຺ຂປຈ຺ຈຍາ ຠໂວ’’.

ຕຕ຺ຖ ກຕມາ ຠວປຈ຺ຈຍາ ຊາຕິ? ຍາ ເຕສໍ ເຕສໍ ຘມ຺ມານໍ ຊາຕິ ສຎ຺ຊາຕິ ນິພ຺ພຕ຺ຕິ ອຠິນິພ຺ພຕ຺ຕິ ປາຕຸຠາໂວ – ອຍໍ ວຸຈ຺ຈຕິ ‘‘ຠວປຈ຺ຈຍາ ຊາຕິ’’.

ຕຕ຺ຖ ກຕມໍ ຊາຕິປຈ຺ຈຍາ ຊຣາມຣຓໍ? ອຕ຺ຖິ ຊຣາ, ອຕ຺ຖິ ມຣຓໍ. ຕຕ຺ຖ ກຕມາ ຊຣາ? ຍາ ເຕສໍ ເຕສໍ ຘມ຺ມານໍ ຊຣາ ຊີຣຓຕາ ອາຍຸໂນ ສໍຫານິ – ອຍໍ ວຸຈ຺ຈຕິ ຊຣາ. ຕຕ຺ຖ ກຕມໍ ມຣຓໍ? ໂຍ ເຕສໍ ເຕສໍ ຘມ຺ມານໍ ຂໂຍ ວໂຍ ເຠໂທ ປຣິເຠໂທ ອນິຈ຺ຈຕາ ອນ຺ຕຣຘານໍ – ອິທໍ ວຸຈ຺ຈຕິ ‘‘ມຣຓໍ’’. ອິຕິ ອຍຎ຺ຈ ຊຣາ, ອິທຎ຺ຈ ມຣຓໍ. ອິທໍ ວຸຈ຺ຈຕິ ‘‘ຊາຕິປຈ຺ຈຍາ ຊຣາມຣຓໍ’’.

ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສງ຺ຄຕິ ໂຫຕິ, ສມາຄໂມ ໂຫຕິ, ສໂມຘານໍ ໂຫຕິ, ປາຕຸຠາໂວ ໂຫຕິ. ເຕນ ວຸຈ຺ຈຕິ ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີ’’ຕິ.

ອກຸສລມູລກວິປາກນິທ຺ເທໂສ.

ອຠິຘມ຺ມຠາຊນີຍໍ.

ປຏິຈ຺ຈສມຸປ຺ປາທວິຠງ຺ໂຄ [ປຈ຺ຈຍາກາຣວິຠງ຺ໂຄ (ສີ. ສ຺ຍາ.)] ນິຏ຺ຐິໂຕ.