໒. ປຎ຺ຫາປຸຈ຺ຉກໍ

໒໒໑. ພາວີສຕິນ຺ທ຺ຣິຍານິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ, ປຸຣິສິນ຺ທ຺ຣິຍໍ, ຊີວິຕິນ຺ທ຺ຣິຍໍ, ສຸຂິນ຺ທ຺ຣິຍໍ, ທຸກ຺ຂິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ໂທມນສ຺ສິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ, ອຎ຺ຎິນ຺ທ຺ຣິຍໍ, ອຎ຺ຎາຕາວິນ຺ທ຺ຣິຍໍ.

໒໒໒. ພາວີສຕີນໍ ອິນ຺ທ຺ຣິຍານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໒໒໓. ທສິນ຺ທ຺ຣິຍາ ອພ຺ຍາກຕາ. ໂທມນສ຺ສິນ຺ທ຺ຣິຍໍ ອກຸສລໍ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ກຸສລໍ. ຈຕ຺ຕາຣິນ຺ທ຺ຣິຍາ ສິຍາ ກຸສລາ, ສິຍາ ອພ຺ຍາກຕາ. ຉ ອິນ຺ທ຺ຣິຍາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ.

ທ຺ວາທສິນ຺ທ຺ຣິຍາ ນ ວຕ຺ຕພ຺ພາ – ‘‘ສຸຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ’’ຕິປິ. ຉ ອິນ຺ທ຺ຣິຍາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ຕີຓິນ຺ທ຺ຣິຍາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ຊີວິຕິນ຺ທ຺ຣິຍໍ ສິຍາ ສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕໍ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ນ ວຕ຺ຕພ຺ພໍ – ‘‘ສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ.

ສຕ຺ຕິນ຺ທ຺ຣິຍາ ເນວວິປາກນວິປາກຘມ຺ມຘມ຺ມາ. ຕີຓິນ຺ທ຺ຣິຍາ ວິປາກາ. ທ຺ວິນ຺ທ຺ຣິຍາ ວິປາກຘມ຺ມຘມ຺ມາ. ອຎ຺ຎິນ຺ທ຺ຣິຍໍ ສິຍາ ວິປາກໍ, ສິຍາ ວິປາກຘມ຺ມຘມ຺ມໍ. ນວິນ຺ທ຺ຣິຍາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ນວິນ຺ທ຺ຣິຍາ ອຸປາທິນ຺ນຸປາທານິຍາ. ໂທມນສ຺ສິນ຺ທ຺ຣິຍໍ ອນຸປາທິນ຺ນຸປາທານິຍໍ. ຕີຓິນ຺ທ຺ຣິຍາ ອນຸປາທິນ຺ນອນຸປາທານິຍາ. ນວິນ຺ທ຺ຣິຍາ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ.

ນວິນ຺ທ຺ຣິຍາ ອສໍກິລິຏ຺ຐສໍກິເລສິກາ. ໂທມນສ຺ສິນ຺ທ຺ຣິຍໍ ສໍກິລິຏ຺ຐສໍກິເລສິກໍ. ຕີຓິນ຺ທ຺ຣິຍາ ອສໍກິລິຏ຺ຐອສໍກິເລສິກາ. ຕີຓິນ຺ທ຺ຣິຍາ ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ຉ ອິນ຺ທ຺ຣິຍາ ສິຍາ ສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ນວິນ຺ທ຺ຣິຍາ ອວິຕກ຺ກອວິຈາຣາ. ໂທມນສ຺ສິນ຺ທ຺ຣິຍໍ ສວິຕກ຺ກສວິຈາຣໍ. ອຸເປກ຺ຂິນ຺ທ຺ຣິຍໍ ສິຍາ ສວິຕກ຺ກສວິຈາຣໍ, ສິຍາ ອວິຕກ຺ກອວິຈາຣໍ. ເອກາທສິນ຺ທ຺ຣິຍາ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ.

ເອກາທສິນ຺ທ຺ຣິຍາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ. ໂສມນສ຺ສິນ຺ທ຺ຣິຍໍ ສິຍາ ປີຕິສຫຄຕໍ ນ ສຸຂສຫຄຕໍ ນ ອຸເປກ຺ຂາສຫຄຕໍ, ສິຍາ ນ ວຕ຺ຕພ຺ພໍ – ‘‘ປີຕິສຫຄຕ’’ນ຺ຕິ. ຉ ອິນ຺ທ຺ຣິຍາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ. ຈຕ຺ຕາຣິນ຺ທ຺ຣິຍາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ.

ປນ຺ນຣສິນ຺ທ຺ຣິຍາ ເນວ ທສ຺ສເນນ ນ ຠາວນາຍ ປຫາຕພ຺ພາ. ໂທມນສ຺ສິນ຺ທ຺ຣິຍໍ ສິຍາ ທສ຺ສເນນ ປຫາຕພ຺ພໍ, ສິຍາ ຠາວນາຍ ປຫາຕພ຺ພໍ. ຉ ອິນ຺ທ຺ຣິຍາ ສິຍາ ທສ຺ສເນນ ປຫາຕພ຺ພາ, ສິຍາ ຠາວນາຍ ປຫາຕພ຺ພາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພາ. ປນ຺ນຣສິນ຺ທ຺ຣິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ໂທມນສ຺ສິນ຺ທ຺ຣິຍໍ ສິຍາ ທສ຺ສເນນ ປຫາຕພ຺ພເຫຕຸກໍ, ສິຍາ ຠາວນາຍ ປຫາຕພ຺ພເຫຕຸກໍ. ຉ ອິນ຺ທ຺ຣິຍາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ຠາວນາຍ ປຫາຕພ຺ພເຫຕຸກາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ.

ທສິນ຺ທ຺ຣິຍາ ເນວາຈຍຄາມິນາປຈຍຄາມິໂນ. ໂທມນສ຺ສິນ຺ທ຺ຣິຍໍ ອາຈຍຄາມິ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ອປຈຍຄາມິ. ອຎ຺ຎິນ຺ທ຺ຣິຍໍ ສິຍາ ອປຈຍຄາມິ, ສິຍາ ເນວາຈຍຄາມິນາປຈຍຄາມິ. ນວິນ຺ທ຺ຣິຍາ ສິຍາ ອາຈຍຄາມິໂນ, ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ທສິນ຺ທ຺ຣິຍາ ເນວເສກ຺ຂນາເສກ຺ຂາ. ທ຺ວິນ຺ທ຺ຣິຍາ ເສກ຺ຂາ. ອຎ຺ຎາຕາວິນ຺ທ຺ຣິຍໍ ອເສກ຺ຂໍ. ນວິນ຺ທ຺ຣິຍາ ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ.

ທສິນ຺ທ຺ຣິຍາ ປຣິຕ຺ຕາ. ຕີຓິນ຺ທ຺ຣິຍາ ອປ຺ປມາຓາ. ນວິນ຺ທ຺ຣິຍາ ສິຍາ ປຣິຕ຺ຕາ, ສິຍາ ມຫຄ຺ຄຕາ, ສິຍາ ອປ຺ປມາຓາ. ສຕ຺ຕິນ຺ທ຺ຣິຍາ ອນາຣມ຺ມຓາ. ທ຺ວິນ຺ທ຺ຣິຍາ ປຣິຕ຺ຕາຣມ຺ມຓາ. ຕີຓິນ຺ທ຺ຣິຍາ ອປ຺ປມາຓາຣມ຺ມຓາ. ໂທມນສ຺ສິນ຺ທ຺ຣິຍໍ ສິຍາ ປຣິຕ຺ຕາຣມ຺ມຓໍ ສິຍາ ມຫຄ຺ຄຕາຣມ຺ມຓໍ, ນ ອປ຺ປມາຓາຣມ຺ມຓໍ, ສິຍາ ນ ວຕ຺ຕພ຺ພໍ – ‘‘ປຣິຕ຺ຕາຣມ຺ມຓ’’ນ຺ຕິປິ, ‘‘ມຫຄ຺ຄຕາຣມ຺ມຓ’’ນ຺ຕິ ປິ. ນວິນ຺ທ຺ຣິຍາ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ, ສິຍາ ນ ວຕ຺ຕພ຺ພາ – ‘‘ປຣິຕ຺ຕາຣມ຺ມຓາ’’ຕິປິ, ‘‘ມຫຄ຺ຄຕາຣມ຺ມຓາ’’ຕິປິ, ‘‘ອປ຺ປມາຓາຣມ຺ມຓາ’’ຕິປິ.

ນວິນ຺ທ຺ຣິຍາ ມຊ຺ຌິມາ. ໂທມນສ຺ສິນ຺ທ຺ຣິຍໍ ຫີນໍ. ຕີຓິນ຺ທ຺ຣິຍາ ປຓີຕາ. ຕີຓິນ຺ທ຺ຣິຍາ ສິຍາ ມຊ຺ຌິມາ, ສິຍາ ປຓີຕາ. ຉ ອິນ຺ທ຺ຣິຍາ ສິຍາ ຫີນາ, ສິຍາ ມຊ຺ຌິມາ, ສິຍາ ປຓີຕາ. ທສິນ຺ທ຺ຣິຍາ ອນິຍຕາ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ສມ຺ມຕ຺ຕນິຍຕໍ. ຈຕ຺ຕາຣິນ຺ທ຺ຣິຍາ ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ໂທມນສ຺ສິນ຺ທ຺ຣິຍໍ ສິຍາ ມິຈ຺ຉຕ຺ຕນິຍຕໍ, ສິຍາ ອນິຍຕໍ. ຉ ອິນ຺ທ຺ຣິຍາ ສິຍາ ມິຈ຺ຉຕ຺ຕນິຍຕາ, ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ສຕ຺ຕິນ຺ທ຺ຣິຍາ ອນາຣມ຺ມຓາ. ຈຕ຺ຕາຣິນ຺ທ຺ຣິຍາ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ນ ມຄ຺ຄາຣມ຺ມຓໍ, ສິຍາ ມຄ຺ຄເຫຕຸກໍ, ສິຍາ ມຄ຺ຄາຘິປຕິ, ສິຍາ ນ ວຕ຺ຕພ຺ພໍ – ‘‘ມຄ຺ຄເຫຕຸກ’’ນ຺ຕິປິ, ‘‘ມຄ຺ຄາຘິປຕີ’’ຕິປິ. ອຎ຺ຎິນ຺ທ຺ຣິຍໍ ນ ມຄ຺ຄາຣມ຺ມຓໍ, ສິຍາ ມຄ຺ຄເຫຕຸກໍ, ສິຍາ ມຄ຺ຄາຘິປຕິ, ສິຍາ ນ ວຕ຺ຕພ຺ພໍ – ‘‘ມຄ຺ຄເຫຕຸກ’’ນ຺ຕິປິ, ‘‘ມຄ຺ຄາຘິປຕີ’’ຕິປິ. ນວິນ຺ທ຺ຣິຍາ ສິຍາ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ.

ທສິນ຺ທ຺ຣິຍາ ສິຍາ ອຸປ຺ປນ຺ນາ, ສິຍາ ອຸປ຺ປາທິໂນ, ນ ວຕ຺ຕພ຺ພາ – ‘‘ອນຸປ຺ປນ຺ນາ’’ຕິ. ທ຺ວິນ຺ທ຺ຣິຍາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ນ ວຕ຺ຕພ຺ພາ – ‘‘ອຸປ຺ປາທິໂນ’’ຕິ. ທສິນ຺ທ຺ຣິຍາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ; ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ສຕ຺ຕິນ຺ທ຺ຣິຍາ ອນາຣມ຺ມຓາ. ທ຺ວິນ຺ທ຺ຣິຍາ ປຈ຺ຈຸປ຺ປນ຺ນາຣມ຺ມຓາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ. ທສິນ຺ທ຺ຣິຍາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ; ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ສຕ຺ຕິນ຺ທ຺ຣິຍາ ອນາຣມ຺ມຓາ. ຕີຓິນ຺ທ຺ຣິຍາ ພຫິທ຺ຘາຣມ຺ມຓາ. ຈຕ຺ຕາຣິນ຺ທ຺ຣິຍາ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ, ອຏ຺ຐິນ຺ທ຺ຣິຍາ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຊ຺ຌຕ຺ຕາຣມ຺ມຓາ’’ຕິປິ, ‘‘ພຫິທ຺ຘາຣມ຺ມຓາ’’ຕິປິ, ‘‘ອຊ຺ຌຕ຺ຕພຫິທ຺ຘາຣມ຺ມຓາ’’ຕິປິ. ປຎ຺ຈິນ຺ທ຺ຣິຍາ ອນິທສ຺ສນສປ຺ປຏິຆາ. ສຕ຺ຕຣສິນ຺ທ຺ຣິຍາ ອນິທສ຺ສນອປ຺ປຏິຆາ.

໒. ທຸກໍ

໒໒໔. ຈຕ຺ຕາຣິນ຺ທ຺ຣິຍາ ເຫຕູ. ອຏ຺ຐາຣສິນ຺ທ຺ຣິຍາ ນ ເຫຕູ. ສຕ຺ຕິນ຺ທ຺ຣິຍາ ສເຫຕຸກາ. ນວິນ຺ທ຺ຣິຍາ ອເຫຕຸກາ. ຉ ອິນ຺ທ຺ຣິຍາ ສິຍາ ສເຫຕຸກາ, ສິຍາ ອເຫຕຸກາ. ສຕ຺ຕິນ຺ທ຺ຣິຍາ ເຫຕຸສມ຺ປຍຸຕ຺ຕາ. ນວິນ຺ທ຺ຣິຍາ ເຫຕຸວິປ຺ປຍຸຕ຺ຕາ. ຉ ອິນ຺ທ຺ຣິຍາ ສິຍາ ເຫຕຸສມ຺ປຍຸຕ຺ຕາ, ສິຍາ ເຫຕຸວິປ຺ປຍຸຕ຺ຕາ. ຈຕ຺ຕາຣິນ຺ທ຺ຣິຍາ ເຫຕູ ເຈວ ສເຫຕຸກາ ຈ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ສເຫຕຸກາ ຈາ’’ຕິປິ, ‘‘ສເຫຕຸກາ ເຈວ ນ ຈ ເຫຕູ’’ຕິປິ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ສເຫຕຸກາ ຈາ’’ຕິ. ສເຫຕຸກາ ເຈວ ນ ຈ ເຫຕູ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ສເຫຕຸກາ ຈາ’’ຕິ, ສິຍາ ສເຫຕຸກາ ເຈວ ນ ຈ ເຫຕູ, ສິຍາ ນ ວຕ຺ຕພ຺ພາ – ‘‘ສເຫຕຸກາ ເຈວ ນ ຈ ເຫຕູ’’ຕິ.

ຈຕ຺ຕາຣິນ຺ທ຺ຣິຍາ ເຫຕູ ເຈວ ເຫຕຸສມ຺ປຍຸຕ຺ຕາ ຈ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິປິ, ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິປິ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິ, ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິ, ສິຍາ ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ, ສິຍາ ນ ວຕ຺ຕພ຺ພາ – ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິ.

ນວິນ຺ທ຺ຣິຍາ ນ ເຫຕູ ອເຫຕຸກາ. ຕີຓິນ຺ທ຺ຣິຍາ ນ ເຫຕູ ສເຫຕຸກາ. ຈຕ຺ຕາຣິນ຺ທ຺ຣິຍາ ນ ວຕ຺ຕພ຺ພາ – ‘‘ນ ເຫຕູ ສເຫຕຸກາ’’ຕິປິ, ‘‘ນ ເຫຕູ ອເຫຕຸກາ’’ຕິປິ. ຉ ອິນ຺ທ຺ຣິຍາ ສິຍາ ນ ເຫຕູ ສເຫຕຸກາ, ສິຍາ ນ ເຫຕູ ອເຫຕຸກາ.

ສປ຺ປຈ຺ຈຍາ. ສງ຺ຂຕາ. ອນິທສ຺ສນາ. ປຎ຺ຈິນ຺ທ຺ຣິຍາ ສປ຺ປຏິຆາ. ສຕ຺ຕຣສິນ຺ທ຺ຣິຍາ ອປ຺ປຏິຆາ. ສຕ຺ຕິນ຺ທ຺ຣິຍາ ຣູປາ. ຈຸທ຺ທສິນ຺ທ຺ຣິຍາ ອຣູປາ. ຊີວິຕິນ຺ທ຺ຣິຍໍ ສິຍາ ຣູປໍ, ສິຍາ ອຣູປໍ. ທສິນ຺ທ຺ຣິຍາ ໂລກິຍາ. ຕີຓິນ຺ທ຺ຣິຍາ ໂລກຸຕ຺ຕຣາ. ນວິນ຺ທ຺ຣິຍາ ສິຍາ ໂລກິຍາ, ສິຍາ ໂລກຸຕ຺ຕຣາ; ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ໂນ ອາສວາ. ທສິນ຺ທ຺ຣິຍາ ສາສວາ. ຕີຓິນ຺ທ຺ຣິຍາ ອນາສວາ. ນວິນ຺ທ຺ຣິຍາ ສິຍາ ສາສວາ, ສິຍາ ອນາສວາ. ປນ຺ນຣສິນ຺ທ຺ຣິຍາ ອາສວວິປ຺ປຍຸຕ຺ຕາ. ໂທມນສ຺ສິນ຺ທ຺ຣິຍໍ ອາສວສມ຺ປຍຸຕ຺ຕໍ. ຉ ອິນ຺ທ຺ຣິຍາ ສິຍາ ອາສວສມ຺ປຍຸຕ຺ຕາ, ສິຍາ ອາສວວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິ, ‘‘ສາສວາ ເຈວ ໂນ ຈ ອາສວາ’’. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິປິ, ‘‘ສາສວາ ເຈວ ໂນ ຈ ອາສວາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິ, ສິຍາ ສາສວາ ເຈວ ໂນ ຈ ອາສວາ, ສິຍາ ນ ວຕ຺ຕພ຺ພາ – ‘‘ສາສວາ ເຈວ ໂນ ຈ ອາສວາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ອາສວາ ເຈວ ອາສວສມ຺ປຍຸຕ຺ຕາ ຈາ’’ຕິປິ, ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສວາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ອາສໂວ ເຈວ ອາສວສມ຺ປຍຸຕ຺ຕຎ຺ຈາ’’ຕິ, ‘‘ອາສວສມ຺ປຍຸຕ຺ຕຎ຺ເຈວ ໂນ ຈ ອາສໂວ’’. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ອາສວາ ເຈວ ອາສວສມ຺ປຍຸຕ຺ຕາ ຈາ’’ຕິ, ສິຍາ ອາສວສມ຺ປຍຸຕ຺ຕາ ເຈວ ໂນ ຈ ອາສວາ, ສິຍາ ນ ວຕ຺ຕພ຺ພາ – ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສວາ’’ຕິ. ນວິນ຺ທ຺ຣິຍາ ອາສວວິປ຺ປຍຸຕ຺ຕສາສວາ. ຕີຓິນ຺ທ຺ຣິຍາ ອາສວວິປ຺ປຍຸຕ຺ຕອນາສວາ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ອາສວວິປ຺ປຍຸຕ຺ຕສາສວ’’ນ຺ຕິປິ, ‘‘ອາສວວິປ຺ປຍຸຕ຺ຕອນາສວ’’ນ຺ຕິປິ. ຕີຓິນ຺ທ຺ຣິຍາ ສິຍາ ອາສວວິປ຺ປຍຸຕ຺ຕສາສວາ, ສິຍາ ອາສວວິປ຺ປຍຸຕ຺ຕອນາສວາ. ຉ ອິນ຺ທ຺ຣິຍາ ສິຍາ ອາສວວິປ຺ປຍຸຕ຺ຕສາສວາ, ສິຍາ ອາສວວິປ຺ປຍຸຕ຺ຕອນາສວາ, ສິຍາ ນ ວຕ຺ຕພ຺ພາ – ‘‘ອາສວວິປ຺ປຍຸຕ຺ຕສາສວາ’’ຕິປິ, ‘‘ອາສວວິປ຺ປຍຸຕ຺ຕອນາສວາ’’ຕິປິ.

ໂນ ສໍໂຍຊນາ. ທສິນ຺ທ຺ຣິຍາ ສໍໂຍຊນິຍາ. ຕີຓິນ຺ທ຺ຣິຍາ ອສໍໂຍຊນິຍາ. ນວິນ຺ທ຺ຣິຍາ ສິຍາ ສໍໂຍຊນິຍາ, ສິຍາ ອສໍໂຍຊນິຍາ. ປນ຺ນຣສິນ຺ທ຺ຣິຍາ ສໍໂຍຊນວິປ຺ປຍຸຕ຺ຕາ. ໂທມນສ຺ສິນ຺ທ຺ຣິຍໍ ສໍໂຍຊນສມ຺ປຍຸຕ຺ຕໍ. ຉ ອິນ຺ທ຺ຣິຍາ ສິຍາ ສໍໂຍຊນສມ຺ປຍຸຕ຺ຕາ, ສິຍາ ສໍໂຍຊນວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິ, ສໍໂຍຊນິຍາ ເຈວ ໂນ ຈ ສໍໂຍຊນາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິປິ, ‘‘ສໍໂຍຊນິຍາ ເຈວ ໂນ ຈ ສໍໂຍຊນາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິ, ສິຍາ ສໍໂຍຊນິຍາ ເຈວ ໂນ ຈ ສໍໂຍຊນາ, ສິຍາ ນ ວຕ຺ຕພ຺ພາ – ‘‘ສໍໂຍຊນິຍາ ເຈວ ໂນ ຈ ສໍໂຍຊນາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນສມ຺ປຍຸຕ຺ຕາ ຈາ’’ຕິປິ, ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕຎ຺ຈາ’’ຕິ, ສໍໂຍຊນສມ຺ປຍຸຕ຺ຕຎ຺ເຈວ ໂນ ຈ ສໍໂຍຊນໍ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນສມ຺ປຍຸຕ຺ຕາ ຈາ’’ຕິ, ສິຍາ ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ, ສິຍາ ນ ວຕ຺ຕພ຺ພາ – ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ’’ຕິ.

ນວິນ຺ທ຺ຣິຍາ ສໍໂຍຊນວິປ຺ປຍຸຕ຺ຕສໍໂຍຊນິຍາ. ຕີຓິນ຺ທ຺ຣິຍາ ສໍໂຍຊນວິປ຺ປຍຸຕ຺ຕອສໍໂຍຊນິຍາ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍ’’ນ຺ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍ’’ນ຺ຕິປິ. ຕີຓິນ຺ທ຺ຣິຍາ ສິຍາ ສໍໂຍຊນວິປ຺ປຍຸຕ຺ຕສໍໂຍຊນິຍາ, ສິຍາ ສໍໂຍຊນວິປ຺ປຍຸຕ຺ຕອສໍໂຍຊນິຍາ. ຉ ອິນ຺ທ຺ຣິຍາ ສິຍາ ສໍໂຍຊນວິປ຺ປຍຸຕ຺ຕສໍໂຍຊນິຍາ, ສິຍາ ສໍໂຍຊນວິປ຺ປຍຸຕ຺ຕອສໍໂຍຊນິຍາ, ສິຍາ ນ ວຕ຺ຕພ຺ພາ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍາ’’ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍາ’’ຕິປິ.

ໂນ ຄນ຺ຖາ. ທສິນ຺ທ຺ຣິຍາ ຄນ຺ຖນິຍາ. ຕີຓິນ຺ທ຺ຣິຍາ ອຄນ຺ຖນິຍາ. ນວິນ຺ທ຺ຣິຍາ ສິຍາ ຄນ຺ຖນິຍາ, ສິຍາ ອຄນ຺ຖນິຍາ. ປນ຺ນຣສິນ຺ທ຺ຣິຍາ ຄນ຺ຖວິປ຺ປຍຸຕ຺ຕາ. ໂທມນສ຺ສິນ຺ທ຺ຣິຍໍ ຄນ຺ຖສມ຺ປຍຸຕ຺ຕໍ. ຉ ອິນ຺ທ຺ຣິຍາ ສິຍາ ຄນ຺ຖສມ຺ປຍຸຕ຺ຕາ, ສິຍາ ຄນ຺ຖວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິ, ຄນ຺ຖນິຍາ ເຈວ ໂນ ຈ ຄນ຺ຖາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິປິ, ‘‘ຄນ຺ຖນິຍາ ເຈວ ໂນ ຈ ຄນ຺ຖາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິ, ສິຍາ ຄນ຺ຖນິຍາ ເຈວ ໂນ ຈ ຄນ຺ຖາ, ສິຍາ ນ ວຕ຺ຕພ຺ພາ – ‘‘ຄນ຺ຖນິຍາ ເຈວ ໂນ ຈ ຄນ຺ຖາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖສມ຺ປຍຸຕ຺ຕາ ຈາ’’ຕິປິ, ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ຕ’’ຎ຺ຈາຕິ, ຄນ຺ຖສມ຺ປຍຸຕ຺ຕຎ຺ເຈວ ໂນ ຈ ຄນ຺ໂຖ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖສມ຺ປຍຸຕ຺ຕາ ຈາ’’ຕິ, ສິຍາ ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ, ສິຍາ ນ ວຕ຺ຕພ຺ພາ – ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ’’ຕິ.

ນວິນ຺ທ຺ຣິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ. ຕີຓິນ຺ທ຺ຣິຍາ ຄນ຺ຖວິປ຺ປຍຸຕ຺ຕອຄນ຺ຖນິຍາ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ຄນ຺ຖວິປ຺ປຍຸຕ຺ຕຄນ຺ຖນິຍ’’ນ຺ຕິປິ, ‘‘ຄນ຺ຖວິປ຺ປຍຸຕ຺ຕອຄນ຺ຖນິຍ’’ນ຺ຕິປິ. ຕີຓິນ຺ທ຺ຣິຍາ ສິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ, ສິຍາ ຄນ຺ຖວິປ຺ປຍຸຕ຺ຕອຄນ຺ຖນິຍາ. ຉ ອິນ຺ທ຺ຣິຍາ ສິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ, ສິຍາ ຄນ຺ຖວິປ຺ປຍຸຕ຺ຕອຄນ຺ຖນິຍາ, ສິຍາ ນ ວຕ຺ຕພ຺ພາ – ‘‘ຄນ຺ຖວິປ຺ປຍຸຕ຺ຕຄນ຺ຖນິຍາ’’ຕິປິ, ‘‘ຄນ຺ຖວິປ຺ປຍຸຕ຺ຕອຄນ຺ຖນິຍາ’’ຕິປິ.

ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ. ທສິນ຺ທ຺ຣິຍາ ນີວຣຓິຍາ. ຕີຓິນ຺ທ຺ຣິຍາ ອນີວຣຓິຍາ. ນວິນ຺ທ຺ຣິຍາ ສິຍາ ນີວຣຓິຍາ, ສິຍາ ອນີວຣຓິຍາ. ປນ຺ນຣສິນ຺ທ຺ຣິຍາ ນີວຣຓວິປ຺ປຍຸຕ຺ຕາ. ໂທມນສ຺ສິນ຺ທ຺ຣິຍໍ ນີວຣຓສມ຺ປຍຸຕ຺ຕໍ. ຉ ອິນ຺ທ຺ຣິຍາ ສິຍາ ນີວຣຓສມ຺ປຍຸຕ຺ຕາ, ສິຍາ ນີວຣຓວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິ, ນີວຣຓິຍາ ເຈວ ໂນ ຈ ນີວຣຓາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິປິ, ‘‘ນີວຣຓິຍາ ເຈວ ໂນ ຈ ນີວຣຓາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິ, ສິຍາ ນີວຣຓິຍາ ເຈວ ໂນ ຈ ນີວຣຓາ, ສິຍາ ນ ວຕ຺ຕພ຺ພາ – ‘‘ນີວຣຓິຍາ ເຈວ ໂນ ຈ ນີວຣຓາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓສມ຺ປຍຸຕ຺ຕາ ຈາ’’ຕິປິ, ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ຕຎ຺ຈາ’’ຕິ, ນີວຣຓສມ຺ປຍຸຕ຺ຕຎ຺ເຈວ ໂນ ຈ ນີວຣຓໍ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓສມ຺ປຍຸຕ຺ຕາ ຈາ’’ຕິ, ສິຍາ ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ, ສິຍາ ນ ວຕ຺ຕພ຺ພາ – ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ’’ຕິ.

ນວິນ຺ທ຺ຣິຍາ ນີວຣຓວິປ຺ປຍຸຕ຺ຕນີວຣຓິຍາ. ຕີຓິນ຺ທ຺ຣິຍາ ນີວຣຓວິປ຺ປຍຸຕ຺ຕອນີວຣຓິຍາ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ນີວຣຓວິປ຺ປຍຸຕ຺ຕນີວຣຓິຍ’’ນ຺ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍ’’ນ຺ຕິປິ. ຕີຓິນ຺ທ຺ຣິຍາ ສິຍາ ນີວຣຓວິປ຺ປຍຸຕ຺ຕນີວຣຓິຍາ, ສິຍາ ນີວຣຓວິປ຺ປຍຸຕ຺ຕອນີວຣຓິຍາ. ຉ ອິນ຺ທ຺ຣິຍາ ສິຍາ ນີວຣຓວິປ຺ປຍຸຕ຺ຕນີວຣຓິຍາ, ສິຍາ ນີວຣຓວິປ຺ປຍຸຕ຺ຕອນີວຣຓິຍາ, ສິຍາ ນ ວຕ຺ຕພ຺ພາ – ‘‘ນີວຣຓວິປ຺ປຍຸຕ຺ຕນີວຣຓິຍາ’’ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍາ’’ຕິປິ.

ໂນ ປຣາມາສາ. ທສິນ຺ທ຺ຣິຍາ ປຣາມຏ຺ຐາ. ຕີຓິນ຺ທ຺ຣິຍາ ອປຣາມຏ຺ຐາ. ນວິນ຺ທ຺ຣິຍາ ສິຍາ ປຣາມຏ຺ຐາ, ສິຍາ ອປຣາມຏ຺ຐາ. ໂສຬສິນ຺ທ຺ຣິຍາ ປຣາມາສວິປ຺ປຍຸຕ຺ຕາ. ຉ ອິນ຺ທ຺ຣິຍາ ສິຍາ ປຣາມາສສມ຺ປຍຸຕ຺ຕາ, ສິຍາ ປຣາມາສວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາ’’ຕິ, ປຣາມຏ຺ຐາ ເຈວ ໂນ ຈ ປຣາມາສາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາ’’ຕິປິ, ‘‘ປຣາມຏ຺ຐາ ເຈວ ໂນ ຈ ປຣາມາສາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາ’’ຕິ, ສິຍາ ປຣາມຏ຺ຐາ ເຈວ ໂນ ຈ ປຣາມາສາ, ສິຍາ ນ ວຕ຺ຕພ຺ພາ – ‘‘ປຣາມຏ຺ຐາ ເຈວ ໂນ ຈ ປຣາມາສາ’’ຕິ. ທສິນ຺ທ຺ຣິຍາ ປຣາມາສວິປ຺ປຍຸຕ຺ຕປຣາມຏ຺ຐາ. ຕີຓິນ຺ທ຺ຣິຍາ ປຣາມາສວິປ຺ປຍຸຕ຺ຕອປຣາມຏ຺ຐາ. ຕີຓິນ຺ທ຺ຣິຍາ ສິຍາ ປຣາມາສວິປ຺ປຍຸຕ຺ຕປຣາມຏ຺ຐາ, ສິຍາ ປຣາມາສວິປ຺ປຍຸຕ຺ຕອປຣາມຏ຺ຐາ. ຉ ອິນ຺ທ຺ຣິຍາ ສິຍາ ປຣາມາສວິປ຺ປຍຸຕ຺ຕປຣາມຏ຺ຐາ, ສິຍາ ປຣາມາສວິປ຺ປຍຸຕ຺ຕອປຣາມຏ຺ຐາ, ສິຍາ ນ ວຕ຺ຕພ຺ພາ – ‘‘ປຣາມາສວິປ຺ປຍຸຕ຺ຕປຣາມຏ຺ຐາ’’ຕິປິ, ‘‘ປຣາມາສວິປ຺ປຍຸຕ຺ຕອປຣາມຏ຺ຐາ’’ຕິປິ.

ສຕ຺ຕິນ຺ທ຺ຣິຍາ ອນາຣມ຺ມຓາ. ຈຸທ຺ທສິນ຺ທ຺ຣິຍາ ສາຣມ຺ມຓາ. ຊີວິຕິນ຺ທ຺ຣິຍໍ ສິຍາ ສາຣມ຺ມຓໍ, ສິຍາ ອນາຣມ຺ມຓໍ. ເອກວີສຕິນ຺ທ຺ຣິຍາ ໂນ ຈິຕ຺ຕາ. ມນິນ຺ທ຺ຣິຍໍ ຈິຕ຺ຕໍ. ເຕຣສິນ຺ທ຺ຣິຍາ ເຈຕສິກາ. ອຏ຺ຐິນ຺ທ຺ຣິຍາ ອເຈຕສິກາ. ຊີວິຕິນ຺ທ຺ຣິຍໍ ສິຍາ ເຈຕສິກໍ, ສິຍາ ອເຈຕສິກໍ. ເຕຣສິນ຺ທ຺ຣິຍາ ຈິຕ຺ຕສມ຺ປຍຸຕ຺ຕາ. ສຕ຺ຕິນ຺ທ຺ຣິຍາ ຈິຕ຺ຕວິປ຺ປຍຸຕ຺ຕາ. ຊີວິຕິນ຺ທ຺ຣິຍໍ ສິຍາ ຈິຕ຺ຕສມ຺ປຍຸຕ຺ຕໍ, ສິຍາ ຈິຕ຺ຕວິປ຺ປຍຸຕ຺ຕໍ. ມນິນ຺ທ຺ຣິຍໍ ນ ວຕ຺ຕພ຺ພໍ – ‘‘ຈິຕ຺ເຕນ ສມ຺ປຍຸຕ຺ຕ’’ນ຺ຕິປິ, ‘‘ຈິຕ຺ເຕນ ວິປ຺ປຍຸຕ຺ຕ’’ນ຺ຕິປິ.

ເຕຣສິນ຺ທ຺ຣິຍາ ຈິຕ຺ຕສໍສຏ຺ຐາ. ສຕ຺ຕິນ຺ທ຺ຣິຍາ ຈິຕ຺ຕວິສໍສຏ຺ຐາ. ຊີວິຕິນ຺ທ຺ຣິຍໍ ສິຍາ ຈິຕ຺ຕສໍສຏ຺ຐໍ, ສິຍາ ຈິຕ຺ຕວິສໍສຏ຺ຐໍ. ມນິນ຺ທ຺ຣິຍໍ ນ ວຕ຺ຕພ຺ພໍ – ‘‘ຈິຕ຺ເຕນ ສໍສຏ຺ຐ’’ນ຺ຕິປິ, ‘‘ຈິຕ຺ເຕນ ວິສໍສຏ຺ຐ’’ນ຺ຕິປິ. ເຕຣສິນ຺ທ຺ຣິຍາ ຈິຕ຺ຕສມຸຏ຺ຐານາ. ອຏ຺ຐິນ຺ທ຺ຣິຍາ ໂນ ຈິຕ຺ຕສມຸຏ຺ຐານາ. ຊີວິຕິນ຺ທ຺ຣິຍໍ ສິຍາ ຈິຕ຺ຕສມຸຏ຺ຐານໍ, ສິຍາ ໂນ ຈິຕ຺ຕສມຸຏ຺ຐານໍ.

ເຕຣສິນ຺ທ຺ຣິຍາ ຈິຕ຺ຕສຫຠຸໂນ. ອຏ຺ຐິນ຺ທ຺ຣິຍາ ໂນ ຈິຕ຺ຕສຫຠຸໂນ. ຊີວິຕິນ຺ທ຺ຣິຍໍ ສິຍາ ຈິຕ຺ຕສຫຠູ, ສິຍາ ໂນ ຈິຕ຺ຕສຫຠູ. ເຕຣສິນ຺ທ຺ຣິຍາ ຈິຕ຺ຕານຸປຣິວຕ຺ຕິໂນ. ອຏ຺ຐິນ຺ທ຺ຣິຍາ ໂນ ຈິຕ຺ຕານຸປຣິວຕ຺ຕິໂນ. ຊີວິຕິນ຺ທ຺ຣິຍໍ ສິຍາ ຈິຕ຺ຕານຸປຣິວຕ຺ຕິ, ສິຍາ ໂນ ຈິຕ຺ຕານຸປຣິວຕ຺ຕິ.

ເຕຣສິນ຺ທ຺ຣິຍາ ຈິຕ຺ຕສໍສຏ຺ຐສມຸຏ຺ຐານາ. ອຏ຺ຐິນ຺ທ຺ຣິຍາ ໂນ ຈິຕ຺ຕສໍສຏ຺ຐສມຸຏ຺ຐານາ. ຊີວິຕິນ຺ທ຺ຣິຍໍ ສິຍາ ຈິຕ຺ຕສໍສຏ຺ຐສມຸຏ຺ຐານໍ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານໍ. ເຕຣສິນ຺ທ຺ຣິຍາ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ອຏ຺ຐິນ຺ທ຺ຣິຍາ ໂນ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ຊີວິຕິນ຺ທ຺ຣິຍໍ ສິຍາ ຈິຕ຺ຕສໍສຏ຺ຐສມຸຏ຺ຐານສຫຠູ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານສຫຠູ. ເຕຣສິນ຺ທ຺ຣິຍາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ອຏ຺ຐິນ຺ທ຺ຣິຍາ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ຊີວິຕິນ຺ທ຺ຣິຍໍ ສິຍາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິ. ຉ ອິນ຺ທ຺ຣິຍາ ອຊ຺ຌຕ຺ຕິກາ. ໂສຬສິນ຺ທ຺ຣິຍາ ພາຫິຣາ.

ສຕ຺ຕິນ຺ທ຺ຣິຍາ ອຸປາທາ. ຈຸທ຺ທສິນ຺ທ຺ຣິຍາ ໂນ ອຸປາທາ. ຊີວິຕິນ຺ທ຺ຣິຍໍ ສິຍາ ອຸປາທາ, ສິຍາ ໂນ ອຸປາທາ. ນວິນ຺ທ຺ຣິຍາ ອຸປາທິນ຺ນາ. ຈຕ຺ຕາຣິນ຺ທ຺ຣິຍາ ອນຸປາທິນ຺ນາ. ນວິນ຺ທ຺ຣິຍາ ສິຍາ ອຸປາທິນ຺ນາ, ສິຍາ ອນຸປາທິນ຺ນາ. ໂນ ອຸປາທານາ. ທສິນ຺ທ຺ຣິຍາ ອຸປາທານິຍາ. ຕີຓິນ຺ທ຺ຣິຍາ ອນຸປາທານິຍາ. ນວິນ຺ທ຺ຣິຍາ ສິຍາ ອຸປາທານິຍາ, ສິຍາ ອນຸປາທານິຍາ. ໂສຬສິນ຺ທ຺ຣິຍາ ອຸປາທານວິປ຺ປຍຸຕ຺ຕາ. ຉ ອິນ຺ທ຺ຣິຍາ ສິຍາ ອຸປາທານສມ຺ປຍຸຕ຺ຕາ, ສິຍາ ອຸປາທານວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານິຍາ ຈາ’’ຕິ, ອຸປາທານິຍາ ເຈວ ໂນ ຈ ອຸປາທານາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານິຍາ ຈາ’’ຕິປິ, ‘‘ອຸປາທານິຍາ ເຈວ ໂນ ຈ ອຸປາທານາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານິຍາ ຈາ’’ຕິ, ສິຍາ ອຸປາທານິຍາ ເຈວ ໂນ ຈ ອຸປາທານາ. ທສິນ຺ທ຺ຣິຍາ ສິຍາ ອຸປາທານິຍາ ເຈວ ໂນ ຈ ອຸປາທານາ, ສິຍາ ນ ວຕ຺ຕພ຺ພາ – ‘‘ອຸປາທານິຍາ ເຈວ ໂນ ຈ ອຸປາທານາ’’ຕິ.

ໂສຬສິນ຺ທ຺ຣິຍາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານສມ຺ປຍຸຕ຺ຕາ ຈາ’’ຕິປິ, ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ’’ຕິປິ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານສມ຺ປຍຸຕ຺ຕາ ຈາ’’ຕິ, ສິຍາ ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ, ສິຍາ ນ ວຕ຺ຕພ຺ພາ – ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ’’ຕິ. ທສິນ຺ທ຺ຣິຍາ ອຸປາທານວິປ຺ປຍຸຕ຺ຕອຸປາທານິຍາ. ຕີຓິນ຺ທ຺ຣິຍາ ອຸປາທານວິປ຺ປຍຸຕ຺ຕອນຸປາທານິຍາ. ຕີຓິນ຺ທ຺ຣິຍາ ສິຍາ ອຸປາທານວິປ຺ປຍຸຕ຺ຕອຸປາທານິຍາ, ສິຍາ ອຸປາທານວິປ຺ປຍຸຕ຺ຕອນຸປາທານິຍາ. ຉ ອິນ຺ທ຺ຣິຍາ ສິຍາ ອຸປາທານວິປ຺ປຍຸຕ຺ຕອຸປາທານິຍາ, ສິຍາ ອຸປາທານວິປ຺ປຍຸຕ຺ຕອນຸປາທານິຍາ, ສິຍາ ນ ວຕ຺ຕພ຺ພາ – ‘‘ອຸປາທານວິປ຺ປຍຸຕ຺ຕອຸປາທານິຍາ’’ຕິປິ, ‘‘ອຸປາທານວິປ຺ປຍຸຕ຺ຕອນຸປາທານິຍາ’’ຕິປິ.

ໂນ ກິເລສາ. ທສິນ຺ທ຺ຣິຍາ ສໍກິເລສິກາ. ຕີຓິນ຺ທ຺ຣິຍາ ອສໍກິເລສິກາ. ນວິນ຺ທ຺ຣິຍາ ສິຍາ ສໍກິເລສິກາ, ສິຍາ ອສໍກິເລສິກາ. ປນ຺ນຣສິນ຺ທ຺ຣິຍາ ອສໍກິລິຏ຺ຐາ. ໂທມນສ຺ສິນ຺ທ຺ຣິຍໍ ສໍກິລິຏ຺ຐໍ. ຉ ອິນ຺ທ຺ຣິຍາ ສິຍາ ສໍກິລິຏ຺ຐາ, ສິຍາ ອສໍກິລິຏ຺ຐາ. ປນ຺ນຣສິນ຺ທ຺ຣິຍາ ກິເລສວິປ຺ປຍຸຕ຺ຕາ. ໂທມນສ຺ສິນ຺ທ຺ຣິຍໍ ກິເລສສມ຺ປຍຸຕ຺ຕໍ. ຉ ອິນ຺ທ຺ຣິຍາ ສິຍາ ກິເລສສມ຺ປຍຸຕ຺ຕາ, ສິຍາ ກິເລສວິປ຺ປຍຸຕ຺ຕາ. ທສິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິ, ສໍກິເລສິກາ ເຈວ ໂນ ຈ ກິເລສາ. ຕີຓິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິປິ, ‘‘ສໍກິເລສິກາ ເຈວ ໂນ ຈ ກິເລສາ’’ຕິປິ. ນວິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິ, ສິຍາ ສໍກິເລສິກາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ‘‘ສໍກິເລສິກາ ເຈວ ໂນ ຈ ກິເລສາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ສໍກິລິຏ຺ຐາ ຈາ’’ຕິປິ, ‘‘ສໍກິລິຏ຺ຐາ ເຈວ ໂນ ຈ ກິເລສາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ກິເລໂສ ເຈວ ສໍກິລິຏ຺ຐຎ຺ຈາ’’ຕິ, ສໍກິລິຏ຺ຐຎ຺ເຈວ ໂນ ຈ ກິເລໂສ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ສໍກິລິຏ຺ຐາ ຈາ’’ຕິ, ສິຍາ ສໍກິລິຏ຺ຐາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ‘‘ສໍກິລິຏ຺ຐາ ເຈວ ໂນ ຈ ກິເລສາ’’ຕິ.

ປນ຺ນຣສິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ກິເລສສມ຺ປຍຸຕ຺ຕາ ຈາ’’ຕິປິ, ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ’’ຕິປິ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ກິເລໂສ ເຈວ ກິເລສສມ຺ປຍຸຕ຺ຕຎ຺ຈາ’’ຕິ, ກິເລສສມ຺ປຍຸຕ຺ຕຎ຺ເຈວ ໂນ ຈ ກິເລໂສ. ຉ ອິນ຺ທ຺ຣິຍາ ນ ວຕ຺ຕພ຺ພາ – ‘‘ກິເລສາ ເຈວ ກິເລສສມ຺ປຍຸຕ຺ຕາ ຈາ’’ຕິ, ສິຍາ ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ’’ຕິ. ນວິນ຺ທ຺ຣິຍາ ກິເລສວິປ຺ປຍຸຕ຺ຕສໍກິເລສິກາ. ຕີຓິນ຺ທ຺ຣິຍາ ກິເລສວິປ຺ປຍຸຕ຺ຕອສໍກິເລສິກາ. ໂທມນສ຺ສິນ຺ທ຺ຣິຍໍ ນ ວຕ຺ຕພ຺ພໍ – ‘‘ກິເລສວິປ຺ປຍຸຕ຺ຕສໍກິເລສິກ’’ນ຺ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກ’’ນ຺ຕິປິ. ຕີຓິນ຺ທ຺ຣິຍາ ສິຍາ ກິເລສວິປ຺ປຍຸຕ຺ຕສໍກິເລສິກາ, ສິຍາ ກິເລສວິປ຺ປຍຸຕ຺ຕອສໍກິເລສິກາ. ຉ ອິນ຺ທ຺ຣິຍາ ສິຍາ ກິເລສວິປ຺ປຍຸຕ຺ຕສໍກິເລສິກາ, ສິຍາ ກິເລສວິປ຺ປຍຸຕ຺ຕອສໍກິເລສິກາ, ສິຍາ ນ ວຕ຺ຕພ຺ພາ – ‘‘ກິເລສວິປ຺ປຍຸຕ຺ຕສໍກິເລສິກາ’’ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກາ’’ຕິປິ.

ປນ຺ນຣສິນ຺ທ຺ຣິຍາ ນ ທສ຺ສເນນ ປຫາຕພ຺ພາ. ສຕ຺ຕິນ຺ທ຺ຣິຍາ ສິຍາ ທສ຺ສເນນ ປຫາຕພ຺ພາ, ສິຍາ ນ ທສ຺ສເນນ ປຫາຕພ຺ພາ. ປນ຺ນຣສິນ຺ທ຺ຣິຍາ ນ ຠາວນາຍ ປຫາຕພ຺ພາ. ສຕ຺ຕິນ຺ທ຺ຣິຍາ ສິຍາ ຠາວນາຍ ປຫາຕພ຺ພາ, ສິຍາ ນ ຠາວນາຍ ປຫາຕພ຺ພາ. ປນ຺ນຣສິນ຺ທ຺ຣິຍາ ນ ທສ຺ສເນນ ປຫາຕພ຺ພເຫຕຸກາ. ສຕ຺ຕິນ຺ທ຺ຣິຍາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ນ ທສ຺ສເນນ ປຫາຕພ຺ພເຫຕຸກາ. ປນ຺ນຣສິນ຺ທ຺ຣິຍາ ນ ຠາວນາຍ ປຫາຕພ຺ພເຫຕຸກາ. ສຕ຺ຕິນ຺ທ຺ຣິຍາ ສິຍາ ຠາວນາຍ ປຫາຕພ຺ພເຫຕຸກາ, ສິຍາ ນ ຠາວນາຍ ປຫາຕພ຺ພເຫຕຸກາ.

ນວິນ຺ທ຺ຣິຍາ ອວິຕກ຺ກາ. ໂທມນສ຺ສິນ຺ທ຺ຣິຍໍ ສວິຕກ຺ກໍ. ທ຺ວາທສິນ຺ທ຺ຣິຍາ ສິຍາ ສວິຕກ຺ກາ, ສິຍາ ອວິຕກ຺ກາ. ນວິນ຺ທ຺ຣິຍາ ອວິຈາຣາ. ໂທມນສ຺ສິນ຺ທ຺ຣິຍໍ ສວິຈາຣໍ. ທ຺ວາທສິນ຺ທ຺ຣິຍາ ສິຍາ ສວິຈາຣາ, ສິຍາ ອວິຈາຣາ. ເອກາທສິນ຺ທ຺ຣິຍາ ອປ຺ປີຕິກາ. ເອກາທສິນ຺ທ຺ຣິຍາ ສິຍາ ສປ຺ປີຕິກາ, ສິຍາ ອປ຺ປີຕິກາ. ເອກາທສິນ຺ທ຺ຣິຍາ ນ ປີຕິສຫຄຕາ. ເອກາທສິນ຺ທ຺ຣິຍາ ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ທ຺ວາທສິນ຺ທ຺ຣິຍາ ນ ສຸຂສຫຄຕາ. ທສິນ຺ທ຺ຣິຍາ ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ທ຺ວາທສິນ຺ທ຺ຣິຍາ ນ ອຸເປກ຺ຂາສຫຄຕາ. ທສິນ຺ທ຺ຣິຍາ ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ.

ທສິນ຺ທ຺ຣິຍາ ກາມາວຈຣາ. ຕີຓິນ຺ທ຺ຣິຍາ ນ ກາມາວຈຣາ. ນວິນ຺ທ຺ຣິຍາ ສິຍາ ກາມາວຈຣາ, ສິຍາ ນ ກາມາວຈຣາ. ເຕຣສິນ຺ທ຺ຣິຍາ ນ ຣູປາວຈຣາ. ນວິນ຺ທ຺ຣິຍາ ສິຍາ ຣູປາວຈຣາ, ສິຍາ ນ ຣູປາວຈຣາ. ຈຸທ຺ທສິນ຺ທ຺ຣິຍາ ນ ອຣູປາວຈຣາ. ອຏ຺ຐິນ຺ທ຺ຣິຍາ ສິຍາ ອຣູປາວຈຣາ, ສິຍາ ນ ອຣູປາວຈຣາ. ທສິນ຺ທ຺ຣິຍາ ປຣິຍາປນ຺ນາ. ຕີຓິນ຺ທ຺ຣິຍາ ອປຣິຍາປນ຺ນາ. ນວິນ຺ທ຺ຣິຍາ ສິຍາ ປຣິຍາປນ຺ນາ, ສິຍາ ອປຣິຍາປນ຺ນາ. ເອກາທສິນ຺ທ຺ຣິຍາ ອນິຍ຺ຍານິກາ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ນິຍ຺ຍານິກໍ. ທສິນ຺ທ຺ຣິຍາ ສິຍາ ນິຍ຺ຍານິກາ, ສິຍາ ອນິຍ຺ຍານິກາ. ທສິນ຺ທ຺ຣິຍາ ອນິຍຕາ. ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ ນິຍຕໍ. ເອກາທສິນ຺ທ຺ຣິຍາ ສິຍາ ນິຍຕາ, ສິຍາ ອນິຍຕາ. ທສິນ຺ທ຺ຣິຍາ ສອຸຕ຺ຕຣາ. ຕີຓິນ຺ທ຺ຣິຍາ ອນຸຕ຺ຕຣາ. ນວິນ຺ທ຺ຣິຍາ ສິຍາ ສອຸຕ຺ຕຣາ, ສິຍາ ອນຸຕ຺ຕຣາ. ປນ຺ນຣສິນ຺ທ຺ຣິຍາ ອຣຓາ. ໂທມນສ຺ສິນ຺ທ຺ຣິຍໍ ສຣຓໍ. ຉ ອິນ຺ທ຺ຣິຍາ ສິຍາ ສຣຓາ, ສິຍາ ອຣຓາຕິ.

ປຎ຺ຫາປຸຈ຺ຉກໍ.

ອິນ຺ທ຺ຣິຍວິຠງ຺ໂຄ ນິຏ຺ຐິໂຕ.