໑. ອຠິຘມ຺ມຠາຊນີຍໍ

໒໑໙. ພາວີສຕິນ຺ທ຺ຣິຍານິ – ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ, ປຸຣິສິນ຺ທ຺ຣິຍໍ, ຊີວິຕິນ຺ທ຺ຣິຍໍ, ສຸຂິນ຺ທ຺ຣິຍໍ, ທຸກ຺ຂິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ໂທມນສ຺ສິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ [ວິຣິຍິນ຺ທ຺ຣິຍໍ (ສີ. ສ຺ຍາ.)], ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ, ອຎ຺ຎິນ຺ທ຺ຣິຍໍ, ອຎ຺ຎາຕາວິນ຺ທ຺ຣິຍໍ.

໒໒໐. ຕຕ຺ຖ ກຕມໍ ຈກ຺ຂຸນ຺ທ຺ຣິຍໍ? ຍໍ ຈກ຺ຂຸ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອິທໍ ວຸຈ຺ຈຕິ ‘‘ຈກ຺ຂຸນ຺ທ຺ຣິຍໍ’’.

ຕຕ຺ຖ ກຕມໍ ໂສຕິນ຺ທ຺ຣິຍໍ…ເປ… ຆານິນ຺ທ຺ຣິຍໍ…ເປ… ຊິວ຺ຫິນ຺ທ຺ຣິຍໍ…ເປ… ກາຍິນ຺ທ຺ຣິຍໍ? ໂຍ ກາໂຍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອິທໍ ວຸຈ຺ຈຕິ ‘‘ກາຍິນ຺ທ຺ຣິຍໍ’’.

ຕຕ຺ຖ ກຕມໍ ມນິນ຺ທ຺ຣິຍໍ? ເອກວິເຘນ ມນິນ຺ທ຺ຣິຍໍ – ຜສ຺ສສມ຺ປຍຸຕ຺ຕໍ. ທຸວິເຘນ ມນິນ຺ທ຺ຣິຍໍ – ອຕ຺ຖິ ສເຫຕຸກໍ, ອຕ຺ຖິ ອເຫຕຸກໍ. ຕິວິເຘນ ມນິນ຺ທ຺ຣິຍໍ – ອຕ຺ຖິ ກຸສລໍ, ອຕ຺ຖິ ອກຸສລໍ, ອຕ຺ຖິ ອພ຺ຍາກຕໍ. ຈຕຸພ຺ພິເຘນ ມນິນ຺ທ຺ຣິຍໍ – ອຕ຺ຖິ ກາມາວຈຣໍ, ອຕ຺ຖິ ຣູປາວຈຣໍ, ອຕ຺ຖິ ອຣູປາວຈຣໍ, ອຕ຺ຖິ ອປຣິຍາປນ຺ນໍ. ປຎ຺ຈວິເຘນ ມນິນ຺ທ຺ຣິຍໍ – ອຕ຺ຖິ ສຸຂິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ທຸກ຺ຂິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ໂສມນສ຺ສິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ໂທມນສ຺ສິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ອຸເປກ຺ຂິນ຺ທ຺ຣິຍສມ຺ປຍຸຕ຺ຕໍ. ຉພ຺ພິເຘນ ມນິນ຺ທ຺ຣິຍໍ – ຈກ຺ຂຸວິຎ຺ຎາຓໍ…ເປ… ມໂນວິຎ຺ຎາຓໍ. ເອວໍ ຉພ຺ພິເຘນ ມນິນ຺ທ຺ຣິຍໍ.

ສຕ຺ຕວິເຘນ ມນິນ຺ທ຺ຣິຍໍ – ຈກ຺ຂຸວິຎ຺ຎາຓໍ…ເປ… ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ. ເອວໍ ສຕ຺ຕວິເຘນ ມນິນ຺ທ຺ຣິຍໍ.

ອຏ຺ຐວິເຘນ ມນິນ຺ທ຺ຣິຍໍ – ຈກ຺ຂຸວິຎ຺ຎາຓໍ…ເປ… ກາຍວິຎ຺ຎາຓໍ ອຕ຺ຖິ ສຸຂສຫຄຕໍ, ອຕ຺ຖິ ທຸກ຺ຂສຫຄຕໍ, ມໂນຘາຕຸ, ມໂນວິຎ຺ຎາຓຘາຕຸ. ເອວໍ ອຏ຺ຐວິເຘນ ມນິນ຺ທ຺ຣິຍໍ.

ນວວິເຘນ ມນິນ຺ທ຺ຣິຍໍ – ຈກ຺ຂຸວິຎ຺ຎາຓໍ…ເປ… ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ ອຕ຺ຖິ ກຸສລາ, ອຕ຺ຖິ ອກຸສລາ, ອຕ຺ຖິ ອພ຺ຍາກຕາ. ເອວໍ ນວວິເຘນ ມນິນ຺ທ຺ຣິຍໍ.

ທສວິເຘນ ມນິນ຺ທ຺ຣິຍໍ – ຈກ຺ຂຸວິຎ຺ຎາຓໍ…ເປ… ກາຍວິຎ຺ຎາຓໍ ອຕ຺ຖິ ສຸຂສຫຄຕໍ, ອຕ຺ຖິ ທຸກ຺ຂສຫຄຕໍ, ມໂນຘາຕຸ, ມໂນວິຎ຺ຎາຓຘາຕຸ ອຕ຺ຖິ ກຸສລາ, ອຕ຺ຖິ ອກຸສລາ, ອຕ຺ຖິ ອພ຺ຍາກຕາ. ເອວໍ ທສວິເຘນ ມນິນ຺ທ຺ຣິຍໍ…ເປ… ເອວໍ ພຫຸວິເຘນ ມນິນ຺ທ຺ຣິຍໍ. ອິທໍ ວຸຈ຺ຈຕິ ‘‘ມນິນ຺ທ຺ຣິຍໍ’’.

ຕຕ຺ຖ ກຕມໍ ອິຕ຺ຖິນ຺ທ຺ຣິຍໍ? ຍໍ ອິຕ຺ຖິຍາ ອິຕ຺ຖິລິງ຺ຄໍ ອິຕ຺ຖິນິມິຕ຺ຕໍ ອິຕ຺ຖິກຸຕ຺ຕໍ ອິຕ຺ຖາກປ຺ໂປ ອິຕ຺ຖຕ຺ຕໍ ອິຕ຺ຖິຠາໂວ – ອິທໍ ວຸຈ຺ຈຕິ ‘‘ອິຕ຺ຖິນ຺ທ຺ຣິຍໍ’’.

ຕຕ຺ຖ ກຕມໍ ປຸຣິສິນ຺ທ຺ຣິຍໍ? ຍໍ ປຸຣິສສ຺ສ ປຸຣິສລິງ຺ຄໍ ປຸຣິສນິມິຕ຺ຕໍ ປຸຣິສກຸຕ຺ຕໍ ປຸຣິສາກປ຺ໂປ ປຸຣິສຕ຺ຕໍ ປຸຣິສຠາໂວ – ອິທໍ ວຸຈ຺ຈຕິ ‘‘ປຸຣິສິນ຺ທ຺ຣິຍໍ’’.

ຕຕ຺ຖ ກຕມໍ ຊີວິຕິນ຺ທ຺ຣິຍໍ? ຊີວິຕິນ຺ທ຺ຣິຍໍ ທຸວິເຘນ – ອຕ຺ຖິ ຣູປຊີວິຕິນ຺ທ຺ຣິຍໍ, ອຕ຺ຖິ ອຣູປຊີວິຕິນ຺ທ຺ຣິຍໍ.

ຕຕ຺ຖ ກຕມໍ ຣູປຊີວິຕິນ຺ທ຺ຣິຍໍ? ໂຍ ເຕສໍ ຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ວຸຈ຺ຈຕິ ‘‘ຣູປຊີວິຕິນ຺ທ຺ຣິຍໍ’’.

ຕຕ຺ຖ ກຕມໍ ອຣູປຊີວິຕິນ຺ທ຺ຣິຍໍ? ໂຍ ເຕສໍ ອຣູປີນໍ ຘມ຺ມານໍ ອາຍຸ ຐິຕິ ຍປນາ ຍາປນາ ອິຣິຍນາ ວຕ຺ຕນາ ປາລນາ ຊີວິຕໍ ຊີວິຕິນ຺ທ຺ຣິຍໍ – ອິທໍ ວຸຈ຺ຈຕິ ‘‘ອຣູປຊີວຕິນ຺ທ຺ຣິຍໍ’’. ອິທໍ ວຸຈ຺ຈຕິ ‘‘ຊີວິຕິນ຺ທ຺ຣິຍໍ’’.

ຕຕ຺ຖ ກຕມໍ ສຸຂິນ຺ທ຺ຣິຍໍ? ຍໍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອິທໍ ວຸຈ຺ຈຕິ ‘‘ສຸຂິນ຺ທ຺ຣິຍໍ’’.

ຕຕ຺ຖ ກຕມໍ ທຸກ຺ຂິນ຺ທ຺ຣິຍໍ? ຍໍ ກາຍິກໍ ອສາຕໍ ກາຍິກໍ ທຸກ຺ຂໍ ກາຍສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ກາຍສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ທຸກ຺ຂິນ຺ທ຺ຣິຍໍ’’.

ຕຕ຺ຖ ກຕມໍ ໂສມນສ຺ສິນ຺ທ຺ຣິຍໍ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອິທໍ ວຸຈ຺ຈຕິ ‘‘ໂສມນສ຺ສິນ຺ທ຺ຣິຍໍ’’.

ຕຕ຺ຖ ກຕມໍ ໂທມນສ຺ສິນ຺ທ຺ຣິຍໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສິນ຺ທ຺ຣິຍໍ’’.

ຕຕ຺ຖ ກຕມໍ ອຸເປກ຺ຂິນ຺ທ຺ຣິຍໍ? ຍໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອິທໍ ວຸຈ຺ຈຕິ ‘‘ອຸເປກ຺ຂິນ຺ທ຺ຣິຍໍ’’.

ຕຕ຺ຖ ກຕມໍ ສທ຺ຘິນ຺ທ຺ຣິຍໍ? ຍາ ສທ຺ຘາ ສທ຺ທຫນາ ໂອກປ຺ປນາ ອຠິປ຺ປສາໂທ ສທ຺ຘາ ສທ຺ຘິນ຺ທ຺ຣິຍໍ ສທ຺ຘາພລໍ – ອິທໍ ວຸຈ຺ຈຕິ ‘‘ສທ຺ຘິນ຺ທ຺ຣິຍໍ’’.

ຕຕ຺ຖ ກຕມໍ ວີຣິຍິນ຺ທ຺ຣິຍໍ? ໂຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຐິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ – ອິທໍ ວຸຈ຺ຈຕິ ‘‘ວີຣິຍິນ຺ທ຺ຣິຍໍ’’.

ຕຕ຺ຖ ກຕມໍ ສຕິນ຺ທ຺ຣິຍໍ? ຍາ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສ຺ສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອິທໍ ວຸຈ຺ຈຕິ ‘‘ສຕິນ຺ທ຺ຣິຍໍ’’.

ຕຕ຺ຖ ກຕມໍ ສມາຘິນ຺ທ຺ຣິຍໍ? ຍາ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອິທໍ ວຸຈ຺ຈຕິ ‘‘ສມາຘິນ຺ທ຺ຣິຍໍ’’.

ຕຕ຺ຖ ກຕມໍ ປຎ຺ຎິນ຺ທ຺ຣິຍໍ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ປຎ຺ຎິນ຺ທ຺ຣິຍໍ’’.

ຕຕ຺ຖ ກຕມໍ ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ? ຍາ ເຕສໍ ຘມ຺ມານໍ ອນຎ຺ຎາຕານໍ ອທິຏ຺ຐານໍ ອປ຺ປຕ຺ຕານໍ ອວິທິຕານໍ ອສຈ຺ຉິກຕານໍ ສຈ຺ຉິກິຣິຍາຍ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ’’.

ຕຕ຺ຖ ກຕມໍ ອຎ຺ຎິນ຺ທ຺ຣິຍໍ? ຍາ ເຕສໍ ຘມ຺ມານໍ ຎາຕານໍ ທິຏ຺ຐານໍ ປຕ຺ຕານໍ ວິທິຕານໍ ສຈ຺ຉິກຕານໍ ສຈ຺ຉິກິຣິຍາຍ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ອຎ຺ຎິນ຺ທ຺ຣິຍໍ.

ຕຕ຺ຖ ກຕມໍ ອຎ຺ຎາຕາວິນ຺ທ຺ຣິຍໍ? ຍາ ເຕສໍ ຘມ຺ມານໍ ອຎ຺ຎາຕາວີນໍ ທິຏ຺ຐານໍ ປຕ຺ຕານໍ ວິທິຕານໍ ສຈ຺ຉິກຕານໍ ສຈ຺ຉິກິຣິຍາຍ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ອຎ຺ຎາຕາວິນ຺ທ຺ຣິຍໍ’’.

ອຠິຘມ຺ມຠາຊນີຍໍ.