໑. ສຸຕ຺ຕນ຺ຕຠາຊນີຍໍ

໑໗໒. ຉ ຘາຕຸໂຍ – ປຖວີຘາຕຸ [ປຐວີຘາຕຸ (ສີ. ສ຺ຍາ.) ເອວມຸປຣິປິ], ອາໂປຘາຕຸ, ເຕໂຊຘາຕຸ, ວາໂຍຘາຕຸ, ອາກາສຘາຕຸ, ວິຎ຺ຎາຓຘາຕຸ.

໑໗໓. ຕຕ຺ຖ ກຕມາ ປຖວີຘາຕຸ? ປຖວີຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ປຖວີຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ [ນຫາຣຸ (ສີ.)] ອຏ຺ຐິ ອຏ຺ຐິມິຎ຺ຊໍ [ອຏ຺ຐິມິຎ຺ຊາ (ສີ.)] ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ປຖວີຘາຕຸ’.

ຕຕ຺ຖ ກຕມາ ພາຫິຣາ ປຖວີຘາຕຸ? ຍໍ ພາຫິຣໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ອໂຍ ໂລຫໍ ຕິປຸ ສີສໍ ສຊ຺ຌໍ [ສຊ຺ຌຸ (ສ຺ຍາ.)] ມຸຕ຺ຕາ ມຓິ ເວຬຸຣິໂຍ ສງ຺ໂຂ ສິລາ ປວາຬໍ ຣຊຕໍ ຊາຕຣູປໍ ໂລຫິຕງ຺ໂກ [ໂລຫິຕງ຺ໂຄ (ສ຺ຍາ. ກ.), ໂລຫິຕໂກ (?)] ມສາຣຄລ຺ລໍ ຕິຓໍ ກຏ຺ຐໍ ສກ຺ຂຣາ ກຐລໍ [ກຖລໍ (ກ.)] ຠູມິ ປາສາໂຓ ປພ຺ພໂຕ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ປຖວີຘາຕຸ’. ຍາ ຈ ອຊ຺ຌຕ຺ຕິກາ ປຖວີຘາຕຸ ຍາ ຈ ພາຫິຣາ ປຖວີຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ປຖວີຘາຕຸ’’.

໑໗໔. ຕຕ຺ຖ ກຕມາ ອາໂປຘາຕຸ? ອາໂປຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ອາໂປຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ສິເນໂຫ ສິເນຫຄຕໍ [ສ຺ເນໂຫ ສ຺ເນຫຄຕໍ (ສ຺ຍາ.)] ພນ຺ຘນຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕໍ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ອາໂປຘາຕຸ’.

ຕຕ຺ຖ ກຕມາ ພາຫິຣາ ອາໂປຘາຕຸ? ຍໍ ພາຫິຣໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ມູລຣໂສ ຂນ຺ຘຣໂສ ຕຈຣໂສ ປຕ຺ຕຣໂສ ປຸປ຺ຜຣໂສ ຜລຣໂສ ຂີຣໍ ທຘິ ສປ຺ປິ ນວນີຕໍ ເຕລໍ ມຘຸ ຜາຓິຕໍ ຠຸມ຺ມານິ ວາ ອຸທການິ ອນ຺ຕລິກ຺ຂານິ ວາ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ອາໂປຘາຕຸ’. ຍາ ຈ ອຊ຺ຌຕ຺ຕິກາ ອາໂປຘາຕຸ ຍາ ຈ ພາຫິຣາ ອາໂປຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ອາໂປຘາຕຸ’’.

໑໗໕. ຕຕ຺ຖ ກຕມາ ເຕໂຊຘາຕຸ? ເຕໂຊຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ເຕໂຊຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ເຍນ ຈ ສນ຺ຕປ຺ປຕິ ເຍນ ຈ ຊີຣີຍຕິ ເຍນ ຈ ປຣິຑຍ຺ຫຕິ ເຍນ ຈ ອສິຕປີຕຂາຍິຕສາຍິຕໍ ສມ຺ມາ ປຣິຓາມໍ ຄຈ຺ຉຕິ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ເຕໂຊຘາຕຸ’.

ຕຕ຺ຖ ກຕມາ ພາຫິຣາ ເຕໂຊຘາຕຸ? ຍໍ ພາຫິຣໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ກຏ຺ຐຄ຺ຄິ ປລາລຄ຺ຄິ [ສກລິກຄ຺ຄິ (ສພ຺ພຕ຺ຖ)] ຕິຓຄ຺ຄິ ໂຄມຍຄ຺ຄິ ຖຸສຄ຺ຄິ ສງ຺ກາຣຄ຺ຄິ ອິນ຺ທຄ຺ຄິ ອຄ຺ຄິສນ຺ຕາໂປ ສູຣິຍສນ຺ຕາໂປ ກຏ຺ຐສນ຺ນິຈຍສນ຺ຕາໂປ ຕິຓສນ຺ນິຈຍສນ຺ຕາໂປ ຘຎ຺ຎສນ຺ນິຈຍສນ຺ຕາໂປ ຠຓ຺ຑສນ຺ນິຈຍສນ຺ຕາໂປ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ເຕໂຊຘາຕຸ’. ຍາ ຈ ອຊ຺ຌຕ຺ຕິກາ ເຕໂຊຘາຕຸ ຍາ ຈ ພາຫິຣາ ເຕໂຊຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ເຕໂຊຘາຕຸ’’.

໑໗໖. ຕຕ຺ຖ ກຕມາ ວາໂຍຘາຕຸ? ວາໂຍຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ວາໂຍຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ອຸທ຺ຘງ຺ຄມາ ວາຕາ ອໂຘຄມາ ວາຕາ ກຸຈ຺ຉິສຍາ ວາຕາ ໂກຏ຺ຐາສຍາ [ໂກຏ຺ຐສຍາ (ສີ. ສ຺ຍາ.)] ວາຕາ ອງ຺ຄມງ຺ຄານຸສາຣິໂນ ວາຕາ ສຕ຺ຖກວາຕາ ຂຸຣກວາຕາ ອຸປ຺ປລກວາຕາ ອສ຺ສາໂສ ປສ຺ສາໂສ ອິຕິ ວາ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ວາໂຍຘາຕຸ’.

ຕຕ຺ຖ ກຕມາ ພາຫິຣາ ວາໂຍຘາຕຸ? ຍໍ ພາຫິຣໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ປຸຣຕ຺ຖິມາ ວາຕາ ປຈ຺ຉິມາ ວາຕາ ອຸຕ຺ຕຣາ ວາຕາ ທກ຺ຂິຓາ ວາຕາ ສຣຊາ ວາຕາ ອຣຊາ ວາຕາ ສີຕາ ວາຕາ ອຸຓ຺ຫາ ວາຕາ ປຣິຕ຺ຕາ ວາຕາ ອຘິມຕ຺ຕາ ວາຕາ ກາຬວາຕາ ເວຣມ຺ຠວາຕາ ປກ຺ຂວາຕາ ສຸປຓ຺ຓວາຕາ ຕາລວຓ຺ຏວາຕາ ວິຘູປນວາຕາ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ວາໂຍຘາຕຸ’. ຍາ ຈ ອຊ຺ຌຕ຺ຕິກາ ວາໂຍຘາຕຸ ຍາ ຈ ພາຫິຣາ ວາໂຍຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ວາໂຍຘາຕຸ’’.

໑໗໗. ຕຕ຺ຖ ກຕມາ ອາກາສຘາຕຸ? ອາກາສຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ອາກາສຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ມໍສໂລຫິເຕຫິ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ກຓ຺ຓຈ຺ຉິທ຺ທໍ ນາສຈ຺ຉິທ຺ທໍ ມຸຂທ຺ວາຣໍ, ເຍນ ຈ ອສິຕປີຕຂາຍິຕສາຍິຕໍ ອຊ຺ໂຌຫຣຕິ, ຍຕ຺ຖ ຈ ອສິຕປີຕຂາຍິຕສາຍິຕໍ ສນ຺ຕິຏ຺ຐຕິ, ເຍນ ຈ ອສິຕປີຕຂາຍິຕສາຍິຕໍ ອໂຘຠາຄໍ ນິກ຺ຂມຕິ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ມໍສໂລຫິເຕຫິ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ອາກາສຘາຕຸ’.

ຕຕ຺ຖ ກຕມາ ພາຫິຣາ ອາກາສຘາຕຸ? ຍໍ ພາຫິຣໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ຈຕູຫິ ມຫາຠູເຕຫິ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ອາກາສຘາຕຸ’. ຍາ ຈ ອຊ຺ຌຕ຺ຕິກາ ອາກາສຘາຕຸ ຍາ ຈ ພາຫິຣາ ອາກາສຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ອາກາສຘາຕຸ’’.

໑໗໘. ຕຕ຺ຖ ກຕມາ ວິຎ຺ຎາຓຘາຕຸ? ຈກ຺ຂຸວິຎ຺ຎາຓຘາຕຸ, ໂສຕວິຎ຺ຎາຓຘາຕຸ, ຆານວິຎ຺ຎາຓຘາຕຸ, ຊິວ຺ຫາວິຎ຺ຎາຓຘາຕຸ, ກາຍວິຎ຺ຎາຓຘາຕຸ, ມໂນວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ວິຎ຺ຎາຓຘາຕຸ’’.

ອິມາ ຉ ຘາຕຸໂຍ.

໑໗໙. ອປຣາປິ ຉ ຘາຕຸໂຍ – ສຸຂຘາຕຸ, ທຸກ຺ຂຘາຕຸ, ໂສມນສ຺ສຘາຕຸ, ໂທມນສ຺ສຘາຕຸ, ອຸເປກ຺ຂາຘາຕຸ, ອວິຊ຺ຊາຘາຕຸ.

໑໘໐. ຕຕ຺ຖ ກຕມາ ສຸຂຘາຕຸ? ຍໍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ສຸຂຘາຕຸ’’.

ຕຕ຺ຖ ກຕມາ ທຸກ຺ຂຘາຕຸ? ຍໍ ກາຍິກໍ ອສາຕໍ ກາຍິກໍ ທຸກ຺ຂໍ ກາຍສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ກາຍສມ຺ຜສ຺ສຊາ ອສາຕາ ທຸກ຺ຂາ ເວທນາ – ອຍໍ ວຸຈ຺ຈຕິ ‘‘ທຸກ຺ຂຘາຕຸ’’.

ຕຕ຺ຖ ກຕມາ ໂສມນສ຺ສຘາຕຸ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ໂສມນສ຺ສຘາຕຸ’’.

ຕຕ຺ຖ ກຕມາ ໂທມນສ຺ສຘາຕຸ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອຍໍ ວຸຈ຺ຈຕິ ‘‘ໂທມນສ຺ສຘາຕຸ’’.

ຕຕ຺ຖ ກຕມາ ອຸເປກ຺ຂາຘາຕຸ? ຍໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ວຸຈ຺ຈຕິ ‘‘ອຸເປກ຺ຂາຘາຕຸ’’.

ຕຕ຺ຖ ກຕມາ ອວິຊ຺ຊາຘາຕຸ? ຍໍ ອຎ຺ຎາຓໍ ອທສ຺ສນໍ ອນຠິສມໂຍ ອນນຸໂພໂຘ ອສມ຺ໂພໂຘ ອປ຺ປຏິເວໂຘ ອສງ຺ຄາຫຓາ ອປຣິໂຍຄາຫຓາ ອສມເປກ຺ຂນາ ອປຈ຺ຈເວກ຺ຂຓາ ອປຈ຺ຈກ຺ຂກມ຺ມໍ ທຸມ຺ເມຊ຺ຌໍ ພາລ຺ຍໍ ອສມ຺ປຊຎ຺ຎໍ ໂມໂຫ ປໂມໂຫ ສມ຺ໂມໂຫ ອວິຊ຺ຊາ ອວິຊ຺ໂຊໂຆ ອວິຊ຺ຊາໂຍໂຄ ອວິຊ຺ຊານຸສໂຍ ອວິຊ຺ຊາປຣິຍຸຏ຺ຐານໍ ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາຘາຕຸ’’.

ອິມາ ຉ ຘາຕຸໂຍ.

໑໘໑. ອປຣາປິ ຉ ຘາຕຸໂຍ – ກາມຘາຕຸ, ພ຺ຍາປາທຘາຕຸ, ວິຫິໍສາຘາຕຸ, ເນກ຺ຂມ຺ມຘາຕຸ, ອພ຺ຍາປາທຘາຕຸ, ອວິຫິໍສາຘາຕຸ.

໑໘໒. ຕຕ຺ຖ ກຕມາ ກາມຘາຕຸ? ກາມປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ກາມຘາຕຸ. ເຫຏ຺ຐໂຕ ອວີຈິນິຣຍໍ ປຣິຍນ຺ຕໍ ກຣິຕ຺ວາ ອຸປຣິໂຕ ປຣນິມ຺ມິຕວສວຕ຺ຕີ ເທເວ ອນ຺ໂຕ ກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ ຣູປາ [ຣູປໍ (ສ຺ຍາ.)] ເວທນາ ສຎ຺ຎາ ສງ຺ຂາຣາ ວິຎ຺ຎາຓໍ – ອຍໍ ວຸຈ຺ຈຕິ ‘‘ກາມຘາຕຸ’’.

ຕຕ຺ຖ ກຕມາ ພ຺ຍາປາທຘາຕຸ? ພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ພ຺ຍາປາທຘາຕຸ’’. ທສສຸ ວາ ອາຆາຕວຕ຺ຖູສຸ ຈິຕ຺ຕສ຺ສ ອາຆາໂຕ ປຏິຆາໂຕ ປຏິຆໍ ປຏິວິໂຣໂຘ ໂກໂປ ປໂກໂປ ສມ຺ປໂກໂປ ໂທໂສ ປໂທໂສ ສມ຺ປໂທໂສ ຈິຕ຺ຕສ຺ສ ພ຺ຍາປຕ຺ຕິ ມໂນປໂທໂສ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ພ຺ຍາປາທຘາຕຸ’’.

ຕຕ຺ຖ ກຕມາ ວິຫິໍສາຘາຕຸ? ວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ວິຫິໍສາຘາຕຸ’’. ອິເຘກຈ຺ໂຈ ປາຓິນາ ວາ ເລຑ຺ຑຸນາ ວາ ທຓ຺ເຑນ ວາ ສຕ຺ເຖນ ວາ ຣຊ຺ຊຸຍາ ວາ ອຎ຺ຎຕຣຎ຺ຎຕເຣນ ສຕ຺ເຕ ວິເຫເຐຕິ, ຍາ ເອວຣູປາ ເຫຐນາ ວິເຫຐນາ ຫິໍສນາ ວິຫິໍສນາ ໂຣສນາ ວິໂຣສນາ ປຣູປຆາໂຕ – ອຍໍ ວຸຈ຺ຈຕິ ‘‘ວິຫິໍສາຘາຕຸ’’.

ຕຕ຺ຖ ກຕມາ ເນກ຺ຂມ຺ມຘາຕຸ? ເນກ຺ຂມ຺ມປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ເນກ຺ຂມ຺ມຘາຕຸ’’. ສພ຺ເພປິ ກຸສລາ ຘມ຺ມາ ‘‘ເນກ຺ຂມ຺ມຘາຕຸ’’.

ຕຕ຺ຖ ກຕມາ ອພ຺ຍາປາທຘາຕຸ? ອພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ອພ຺ຍາປາທຘາຕຸ’’. ຍາ ສຕ຺ເຕສຸ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອພ຺ຍາປາທຘາຕຸ’’.

ຕຕ຺ຖ ກຕມາ ອວິຫິໍສາຘາຕຸ? ອວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ອວິຫິໍສາຘາຕຸ’’. ຍາ ສຕ຺ເຕສຸ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອວິຫິໍສາຘາຕຸ’’.

ອິມາ ຉ ຘາຕຸໂຍ.

ອິຕິ ອິມານິ ຕີຓິ ຉກ຺ການິ ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ ອຏ຺ຐາຣສ ຘາຕຸໂຍ ໂຫນ຺ຕິ.

ສຸຕ຺ຕນ຺ຕຠາຊນີຍໍ.