໓. ຘາຕຸວິຠງ຺ໂຄ

໑. ສຸຕ຺ຕນ຺ຕຠາຊນີຍໍ

໑໗໒. ຉ ຘາຕຸໂຍ – ປຖວີຘາຕຸ [ປຐວີຘາຕຸ (ສີ. ສ຺ຍາ.) ເອວມຸປຣິປິ], ອາໂປຘາຕຸ, ເຕໂຊຘາຕຸ, ວາໂຍຘາຕຸ, ອາກາສຘາຕຸ, ວິຎ຺ຎາຓຘາຕຸ.

໑໗໓. ຕຕ຺ຖ ກຕມາ ປຖວີຘາຕຸ? ປຖວີຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ປຖວີຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ [ນຫາຣຸ (ສີ.)] ອຏ຺ຐິ ອຏ຺ຐິມິຎ຺ຊໍ [ອຏ຺ຐິມິຎ຺ຊາ (ສີ.)] ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ປຖວີຘາຕຸ’.

ຕຕ຺ຖ ກຕມາ ພາຫິຣາ ປຖວີຘາຕຸ? ຍໍ ພາຫິຣໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ອໂຍ ໂລຫໍ ຕິປຸ ສີສໍ ສຊ຺ຌໍ [ສຊ຺ຌຸ (ສ຺ຍາ.)] ມຸຕ຺ຕາ ມຓິ ເວຬຸຣິໂຍ ສງ຺ໂຂ ສິລາ ປວາຬໍ ຣຊຕໍ ຊາຕຣູປໍ ໂລຫິຕງ຺ໂກ [ໂລຫິຕງ຺ໂຄ (ສ຺ຍາ. ກ.), ໂລຫິຕໂກ (?)] ມສາຣຄລ຺ລໍ ຕິຓໍ ກຏ຺ຐໍ ສກ຺ຂຣາ ກຐລໍ [ກຖລໍ (ກ.)] ຠູມິ ປາສາໂຓ ປພ຺ພໂຕ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ກກ຺ຂຬໍ ຂຣິຄຕໍ ກກ຺ຂຬຕ຺ຕໍ ກກ຺ຂຬຠາໂວ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ປຖວີຘາຕຸ’. ຍາ ຈ ອຊ຺ຌຕ຺ຕິກາ ປຖວີຘາຕຸ ຍາ ຈ ພາຫິຣາ ປຖວີຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ປຖວີຘາຕຸ’’.

໑໗໔. ຕຕ຺ຖ ກຕມາ ອາໂປຘາຕຸ? ອາໂປຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ອາໂປຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ສິເນໂຫ ສິເນຫຄຕໍ [ສ຺ເນໂຫ ສ຺ເນຫຄຕໍ (ສ຺ຍາ.)] ພນ຺ຘນຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕໍ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ອາໂປຘາຕຸ’.

ຕຕ຺ຖ ກຕມາ ພາຫິຣາ ອາໂປຘາຕຸ? ຍໍ ພາຫິຣໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ມູລຣໂສ ຂນ຺ຘຣໂສ ຕຈຣໂສ ປຕ຺ຕຣໂສ ປຸປ຺ຜຣໂສ ຜລຣໂສ ຂີຣໍ ທຘິ ສປ຺ປິ ນວນີຕໍ ເຕລໍ ມຘຸ ຜາຓິຕໍ ຠຸມ຺ມານິ ວາ ອຸທການິ ອນ຺ຕລິກ຺ຂານິ ວາ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ອາໂປ ອາໂປຄຕໍ ສິເນໂຫ ສິເນຫຄຕໍ ພນ຺ຘນຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ອາໂປຘາຕຸ’. ຍາ ຈ ອຊ຺ຌຕ຺ຕິກາ ອາໂປຘາຕຸ ຍາ ຈ ພາຫິຣາ ອາໂປຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ອາໂປຘາຕຸ’’.

໑໗໕. ຕຕ຺ຖ ກຕມາ ເຕໂຊຘາຕຸ? ເຕໂຊຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ເຕໂຊຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ເຍນ ຈ ສນ຺ຕປ຺ປຕິ ເຍນ ຈ ຊີຣີຍຕິ ເຍນ ຈ ປຣິຑຍ຺ຫຕິ ເຍນ ຈ ອສິຕປີຕຂາຍິຕສາຍິຕໍ ສມ຺ມາ ປຣິຓາມໍ ຄຈ຺ຉຕິ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ເຕໂຊຘາຕຸ’.

ຕຕ຺ຖ ກຕມາ ພາຫິຣາ ເຕໂຊຘາຕຸ? ຍໍ ພາຫິຣໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ກຏ຺ຐຄ຺ຄິ ປລາລຄ຺ຄິ [ສກລິກຄ຺ຄິ (ສພ຺ພຕ຺ຖ)] ຕິຓຄ຺ຄິ ໂຄມຍຄ຺ຄິ ຖຸສຄ຺ຄິ ສງ຺ກາຣຄ຺ຄິ ອິນ຺ທຄ຺ຄິ ອຄ຺ຄິສນ຺ຕາໂປ ສູຣິຍສນ຺ຕາໂປ ກຏ຺ຐສນ຺ນິຈຍສນ຺ຕາໂປ ຕິຓສນ຺ນິຈຍສນ຺ຕາໂປ ຘຎ຺ຎສນ຺ນິຈຍສນ຺ຕາໂປ ຠຓ຺ຑສນ຺ນິຈຍສນ຺ຕາໂປ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ເຕໂຊ ເຕໂຊຄຕໍ ອຸສ຺ມາ ອຸສ຺ມາຄຕໍ ອຸສຸມໍ ອຸສຸມຄຕໍ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ເຕໂຊຘາຕຸ’. ຍາ ຈ ອຊ຺ຌຕ຺ຕິກາ ເຕໂຊຘາຕຸ ຍາ ຈ ພາຫິຣາ ເຕໂຊຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ເຕໂຊຘາຕຸ’’.

໑໗໖. ຕຕ຺ຖ ກຕມາ ວາໂຍຘາຕຸ? ວາໂຍຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ວາໂຍຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ອຸທ຺ຘງ຺ຄມາ ວາຕາ ອໂຘຄມາ ວາຕາ ກຸຈ຺ຉິສຍາ ວາຕາ ໂກຏ຺ຐາສຍາ [ໂກຏ຺ຐສຍາ (ສີ. ສ຺ຍາ.)] ວາຕາ ອງ຺ຄມງ຺ຄານຸສາຣິໂນ ວາຕາ ສຕ຺ຖກວາຕາ ຂຸຣກວາຕາ ອຸປ຺ປລກວາຕາ ອສ຺ສາໂສ ປສ຺ສາໂສ ອິຕິ ວາ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ວາໂຍຘາຕຸ’.

ຕຕ຺ຖ ກຕມາ ພາຫິຣາ ວາໂຍຘາຕຸ? ຍໍ ພາຫິຣໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ, ເສຍ຺ຍຖິທໍ – ປຸຣຕ຺ຖິມາ ວາຕາ ປຈ຺ຉິມາ ວາຕາ ອຸຕ຺ຕຣາ ວາຕາ ທກ຺ຂິຓາ ວາຕາ ສຣຊາ ວາຕາ ອຣຊາ ວາຕາ ສີຕາ ວາຕາ ອຸຓ຺ຫາ ວາຕາ ປຣິຕ຺ຕາ ວາຕາ ອຘິມຕ຺ຕາ ວາຕາ ກາຬວາຕາ ເວຣມ຺ຠວາຕາ ປກ຺ຂວາຕາ ສຸປຓ຺ຓວາຕາ ຕາລວຓ຺ຏວາຕາ ວິຘູປນວາຕາ, ຍໍ ວາ ປນຎ຺ຎມ຺ປິ ອຕ຺ຖິ ພາຫິຣໍ ວາໂຍ ວາໂຍຄຕໍ ຖມ຺ຠິຕຕ຺ຕໍ ຣູປສ຺ສ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ວາໂຍຘາຕຸ’. ຍາ ຈ ອຊ຺ຌຕ຺ຕິກາ ວາໂຍຘາຕຸ ຍາ ຈ ພາຫິຣາ ວາໂຍຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ວາໂຍຘາຕຸ’’.

໑໗໗. ຕຕ຺ຖ ກຕມາ ອາກາສຘາຕຸ? ອາກາສຘາຕຸທ຺ວຍໍ – ອຕ຺ຖິ ອຊ຺ຌຕ຺ຕິກາ, ອຕ຺ຖິ ພາຫິຣາ. ຕຕ຺ຖ ກຕມາ ອຊ຺ຌຕ຺ຕິກາ ອາກາສຘາຕຸ? ຍໍ ອຊ຺ຌຕ຺ຕໍ ປຈ຺ຈຕ຺ຕໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ມໍສໂລຫິເຕຫິ ອຊ຺ຌຕ຺ຕໍ ອຸປາທິນ຺ນໍ, ເສຍ຺ຍຖິທໍ – ກຓ຺ຓຈ຺ຉິທ຺ທໍ ນາສຈ຺ຉິທ຺ທໍ ມຸຂທ຺ວາຣໍ, ເຍນ ຈ ອສິຕປີຕຂາຍິຕສາຍິຕໍ ອຊ຺ໂຌຫຣຕິ, ຍຕ຺ຖ ຈ ອສິຕປີຕຂາຍິຕສາຍິຕໍ ສນ຺ຕິຏ຺ຐຕິ, ເຍນ ຈ ອສິຕປີຕຂາຍິຕສາຍິຕໍ ອໂຘຠາຄໍ ນິກ຺ຂມຕິ, ຍໍ ວາ ປນຎ຺ຎມ຺ປິ ອຕ຺ຖິ ອຊ຺ຌຕ຺ຕໍ ປຈ຺ຈຕ຺ຕໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ມໍສໂລຫິເຕຫິ ອຊ຺ຌຕ຺ຕໍ ອຸປາທິນ຺ນໍ – ອຍໍ ວຸຈ຺ຈຕິ ‘ອຊ຺ຌຕ຺ຕິກາ ອາກາສຘາຕຸ’.

ຕຕ຺ຖ ກຕມາ ພາຫິຣາ ອາກາສຘາຕຸ? ຍໍ ພາຫິຣໍ ອາກາໂສ ອາກາສຄຕໍ ອຆໍ ອຆຄຕໍ ວິວໂຣ ວິວຣຄຕໍ ອສມ຺ຜຸຏ຺ຐໍ ຈຕູຫິ ມຫາຠູເຕຫິ ພຫິທ຺ຘາ ອນຸປາທິນ຺ນໍ – ອຍໍ ວຸຈ຺ຈຕິ ‘ພາຫິຣາ ອາກາສຘາຕຸ’. ຍາ ຈ ອຊ຺ຌຕ຺ຕິກາ ອາກາສຘາຕຸ ຍາ ຈ ພາຫິຣາ ອາກາສຘາຕຸ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ‘‘ອາກາສຘາຕຸ’’.

໑໗໘. ຕຕ຺ຖ ກຕມາ ວິຎ຺ຎາຓຘາຕຸ? ຈກ຺ຂຸວິຎ຺ຎາຓຘາຕຸ, ໂສຕວິຎ຺ຎາຓຘາຕຸ, ຆານວິຎ຺ຎາຓຘາຕຸ, ຊິວ຺ຫາວິຎ຺ຎາຓຘາຕຸ, ກາຍວິຎ຺ຎາຓຘາຕຸ, ມໂນວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ວິຎ຺ຎາຓຘາຕຸ’’.

ອິມາ ຉ ຘາຕຸໂຍ.

໑໗໙. ອປຣາປິ ຉ ຘາຕຸໂຍ – ສຸຂຘາຕຸ, ທຸກ຺ຂຘາຕຸ, ໂສມນສ຺ສຘາຕຸ, ໂທມນສ຺ສຘາຕຸ, ອຸເປກ຺ຂາຘາຕຸ, ອວິຊ຺ຊາຘາຕຸ.

໑໘໐. ຕຕ຺ຖ ກຕມາ ສຸຂຘາຕຸ? ຍໍ ກາຍິກໍ ສາຕໍ ກາຍິກໍ ສຸຂໍ ກາຍສມ຺ຜສ຺ສຊໍ ສາຕໍ ສຸຂໍ ເວທຍິຕໍ ກາຍສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ສຸຂຘາຕຸ’’.

ຕຕ຺ຖ ກຕມາ ທຸກ຺ຂຘາຕຸ? ຍໍ ກາຍິກໍ ອສາຕໍ ກາຍິກໍ ທຸກ຺ຂໍ ກາຍສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ກາຍສມ຺ຜສ຺ສຊາ ອສາຕາ ທຸກ຺ຂາ ເວທນາ – ອຍໍ ວຸຈ຺ຈຕິ ‘‘ທຸກ຺ຂຘາຕຸ’’.

ຕຕ຺ຖ ກຕມາ ໂສມນສ຺ສຘາຕຸ? ຍໍ ເຈຕສິກໍ ສາຕໍ ເຈຕສິກໍ ສຸຂໍ ເຈໂຕສມ຺ຜສ຺ສຊໍ ສາຕໍ ສຸຂໍ ເວທຍິຕໍ ເຈໂຕສມ຺ຜສ຺ສຊາ ສາຕາ ສຸຂາ ເວທນາ – ອຍໍ ວຸຈ຺ຈຕິ ‘‘ໂສມນສ຺ສຘາຕຸ’’.

ຕຕ຺ຖ ກຕມາ ໂທມນສ຺ສຘາຕຸ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອຍໍ ວຸຈ຺ຈຕິ ‘‘ໂທມນສ຺ສຘາຕຸ’’.

ຕຕ຺ຖ ກຕມາ ອຸເປກ຺ຂາຘາຕຸ? ຍໍ ເຈຕສິກໍ ເນວ ສາຕໍ ນາສາຕໍ ເຈໂຕສມ຺ຜສ຺ສຊໍ ອທຸກ຺ຂມສຸຂໍ ເວທຍິຕໍ ເຈໂຕສມ຺ຜສ຺ສຊາ ອທຸກ຺ຂມສຸຂາ ເວທນາ – ອຍໍ ວຸຈ຺ຈຕິ ‘‘ອຸເປກ຺ຂາຘາຕຸ’’.

ຕຕ຺ຖ ກຕມາ ອວິຊ຺ຊາຘາຕຸ? ຍໍ ອຎ຺ຎາຓໍ ອທສ຺ສນໍ ອນຠິສມໂຍ ອນນຸໂພໂຘ ອສມ຺ໂພໂຘ ອປ຺ປຏິເວໂຘ ອສງ຺ຄາຫຓາ ອປຣິໂຍຄາຫຓາ ອສມເປກ຺ຂນາ ອປຈ຺ຈເວກ຺ຂຓາ ອປຈ຺ຈກ຺ຂກມ຺ມໍ ທຸມ຺ເມຊ຺ຌໍ ພາລ຺ຍໍ ອສມ຺ປຊຎ຺ຎໍ ໂມໂຫ ປໂມໂຫ ສມ຺ໂມໂຫ ອວິຊ຺ຊາ ອວິຊ຺ໂຊໂຆ ອວິຊ຺ຊາໂຍໂຄ ອວິຊ຺ຊານຸສໂຍ ອວິຊ຺ຊາປຣິຍຸຏ຺ຐານໍ ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ‘‘ອວິຊ຺ຊາຘາຕຸ’’.

ອິມາ ຉ ຘາຕຸໂຍ.

໑໘໑. ອປຣາປິ ຉ ຘາຕຸໂຍ – ກາມຘາຕຸ, ພ຺ຍາປາທຘາຕຸ, ວິຫິໍສາຘາຕຸ, ເນກ຺ຂມ຺ມຘາຕຸ, ອພ຺ຍາປາທຘາຕຸ, ອວິຫິໍສາຘາຕຸ.

໑໘໒. ຕຕ຺ຖ ກຕມາ ກາມຘາຕຸ? ກາມປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ກາມຘາຕຸ. ເຫຏ຺ຐໂຕ ອວີຈິນິຣຍໍ ປຣິຍນ຺ຕໍ ກຣິຕ຺ວາ ອຸປຣິໂຕ ປຣນິມ຺ມິຕວສວຕ຺ຕີ ເທເວ ອນ຺ໂຕ ກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ ຣູປາ [ຣູປໍ (ສ຺ຍາ.)] ເວທນາ ສຎ຺ຎາ ສງ຺ຂາຣາ ວິຎ຺ຎາຓໍ – ອຍໍ ວຸຈ຺ຈຕິ ‘‘ກາມຘາຕຸ’’.

ຕຕ຺ຖ ກຕມາ ພ຺ຍາປາທຘາຕຸ? ພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ພ຺ຍາປາທຘາຕຸ’’. ທສສຸ ວາ ອາຆາຕວຕ຺ຖູສຸ ຈິຕ຺ຕສ຺ສ ອາຆາໂຕ ປຏິຆາໂຕ ປຏິຆໍ ປຏິວິໂຣໂຘ ໂກໂປ ປໂກໂປ ສມ຺ປໂກໂປ ໂທໂສ ປໂທໂສ ສມ຺ປໂທໂສ ຈິຕ຺ຕສ຺ສ ພ຺ຍາປຕ຺ຕິ ມໂນປໂທໂສ ໂກໂຘ ກຸຊ຺ຌນາ ກຸຊ຺ຌິຕຕ຺ຕໍ ໂທໂສ ທຸສ຺ສນາ ທຸສ຺ສິຕຕ຺ຕໍ ພ຺ຍາປຕ຺ຕິ ພ຺ຍາປຊ຺ຊນາ ວິໂຣໂຘ ປຏິວິໂຣໂຘ ຈຓ຺ຑິກ຺ກໍ ອສຸໂຣໂປ ອນຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ‘‘ພ຺ຍາປາທຘາຕຸ’’.

ຕຕ຺ຖ ກຕມາ ວິຫິໍສາຘາຕຸ? ວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ມິຈ຺ຉາສງ຺ກປ຺ໂປ – ອຍໍ ວຸຈ຺ຈຕິ ‘‘ວິຫິໍສາຘາຕຸ’’. ອິເຘກຈ຺ໂຈ ປາຓິນາ ວາ ເລຑ຺ຑຸນາ ວາ ທຓ຺ເຑນ ວາ ສຕ຺ເຖນ ວາ ຣຊ຺ຊຸຍາ ວາ ອຎ຺ຎຕຣຎ຺ຎຕເຣນ ສຕ຺ເຕ ວິເຫເຐຕິ, ຍາ ເອວຣູປາ ເຫຐນາ ວິເຫຐນາ ຫິໍສນາ ວິຫິໍສນາ ໂຣສນາ ວິໂຣສນາ ປຣູປຆາໂຕ – ອຍໍ ວຸຈ຺ຈຕິ ‘‘ວິຫິໍສາຘາຕຸ’’.

ຕຕ຺ຖ ກຕມາ ເນກ຺ຂມ຺ມຘາຕຸ? ເນກ຺ຂມ຺ມປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ເນກ຺ຂມ຺ມຘາຕຸ’’. ສພ຺ເພປິ ກຸສລາ ຘມ຺ມາ ‘‘ເນກ຺ຂມ຺ມຘາຕຸ’’.

ຕຕ຺ຖ ກຕມາ ອພ຺ຍາປາທຘາຕຸ? ອພ຺ຍາປາທປຏິສໍຍຸຕ຺ໂຕ ຕກ຺ໂກ ວິຕກ຺ໂກ…ເປ… ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ອພ຺ຍາປາທຘາຕຸ’’. ຍາ ສຕ຺ເຕສຸ ເມຕ຺ຕິ ເມຕ຺ຕາຍນາ ເມຕ຺ຕາຍິຕຕ຺ຕໍ ເມຕ຺ຕາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອພ຺ຍາປາທຘາຕຸ’’.

ຕຕ຺ຖ ກຕມາ ອວິຫິໍສາຘາຕຸ? ອວິຫິໍສາປຏິສໍຍຸຕ຺ໂຕ ຕກ຺ໂກ ວິຕກ຺ໂກ ສງ຺ກປ຺ໂປ ອປ຺ປນາ ພ຺ຍປ຺ປນາ ເຈຕໂສ ອຠິນິໂຣປນາ ສມ຺ມາສງ຺ກປ຺ໂປ – ອຍໍ ວຸຈ຺ຈຕິ ‘‘ອວິຫິໍສາຘາຕຸ’’. ຍາ ສຕ຺ເຕສຸ ກຣຸຓາ ກຣຸຓາຍນາ ກຣຸຓາຍິຕຕ຺ຕໍ ກຣຸຓາເຈໂຕວິມຸຕ຺ຕິ – ອຍໍ ວຸຈ຺ຈຕິ ‘‘ອວິຫິໍສາຘາຕຸ’’.

ອິມາ ຉ ຘາຕຸໂຍ.

ອິຕິ ອິມານິ ຕີຓິ ຉກ຺ການິ ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ ອຏ຺ຐາຣສ ຘາຕຸໂຍ ໂຫນ຺ຕິ.

ສຸຕ຺ຕນ຺ຕຠາຊນີຍໍ.

໒. ອຠິຘມ຺ມຠາຊນີຍໍ

໑໘໓. ອຏ຺ຐາຣສ ຘາຕຸໂຍ – ຈກ຺ຂຸຘາຕຸ, ຣູປຘາຕຸ, ຈກ຺ຂຸວິຎ຺ຎາຓຘາຕຸ, ໂສຕຘາຕຸ, ສທ຺ທຘາຕຸ, ໂສຕວິຎ຺ຎາຓຘາຕຸ, ຆານຘາຕຸ, ຄນ຺ຘຘາຕຸ, ຆານວິຎ຺ຎາຓຘາຕຸ, ຊິວ຺ຫາຘາຕຸ, ຣສຘາຕຸ, ຊິວ຺ຫາວິຎ຺ຎາຓຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ກາຍວິຎ຺ຎາຓຘາຕຸ, ມໂນຘາຕຸ, ຘມ຺ມຘາຕຸ, ມໂນວິຎ຺ຎາຓຘາຕຸ.

໑໘໔. ຕຕ຺ຖ ກຕມາ ຈກ຺ຂຸຘາຕຸ? ຍໍ ຈກ຺ຂຸ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອຍໍ ວຸຈ຺ຈຕິ ‘‘ຈກ຺ຂຸຘາຕຸ’’.

ຕຕ຺ຖ ກຕມາ ຣູປຘາຕຸ? ຍໍ ຣູປໍ ຈຕຸນ຺ນໍ ມຫາຠູຕານໍ ອຸປາທາຍ ວຓ຺ຓນິຠາ…ເປ… ຣູປຘາຕຸເປສາ – ອຍໍ ວຸຈ຺ຈຕິ ‘‘ຣູປຘາຕຸ’’.

ຕຕ຺ຖ ກຕມາ ຈກ຺ຂຸວິຎ຺ຎາຓຘາຕຸ? ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາຈກ຺ຂຸວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ຈກ຺ຂຸວິຎ຺ຎາຓຘາຕຸ’’.

ຕຕ຺ຖ ກຕມາ ໂສຕຘາຕຸ? ຍໍ ໂສຕໍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອຍໍ ວຸຈ຺ຈຕິ ‘‘ໂສຕຘາຕຸ’’.

ຕຕ຺ຖ ກຕມາ ສທ຺ທຘາຕຸ? ໂຍ ສທ຺ໂທ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ…ເປ… ສທ຺ທຘາຕຸເປສາ – ອຍໍ ວຸຈ຺ຈຕິ ‘‘ສທ຺ທຘາຕຸ’’.

ຕຕ຺ຖ ກຕມາ ໂສຕວິຎ຺ຎາຓຘາຕຸ? ໂສຕຎ຺ຈ ປຏິຈ຺ຈ ສທ຺ເທ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາໂສຕວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ໂສຕວິຎ຺ຎາຓຘາຕຸ’’.

ຕຕ຺ຖ ກຕມາ ຆານຘາຕຸ? ຍໍ ຆານໍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອຍໍ ວຸຈ຺ຈຕິ ‘‘ຆານຘາຕຸ’’.

ຕຕ຺ຖ ກຕມາ ຄນ຺ຘຘາຕຸ? ໂຍ ຄນ຺ໂຘ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ…ເປ… ຄນ຺ຘຘາຕຸເປສາ – ອຍໍ ວຸຈ຺ຈຕິ ‘‘ຄນ຺ຘຘາຕຸ’’.

ຕຕ຺ຖ ກຕມາ ຆານວິຎ຺ຎາຓຘາຕຸ? ຆານຎ຺ຈ ປຏິຈ຺ຈ ຄນ຺ເຘ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາຆານວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ຆານວິຎ຺ຎາຓຘາຕຸ’’.

ຕຕ຺ຖ ກຕມາ ຊິວ຺ຫາຘາຕຸ? ຍາ ຊິວ຺ຫາ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອຍໍ ວຸຈ຺ຈຕິ ‘‘ຊິວ຺ຫາຘາຕຸ’’.

ຕຕ຺ຖ ກຕມາ ຣສຘາຕຸ? ໂຍ ຣໂສ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ…ເປ… ຣສຘາຕຸເປສາ – ອຍໍ ວຸຈ຺ຈຕິ ‘‘ຣສຘາຕຸ’’.

ຕຕ຺ຖ ກຕມາ ຊິວ຺ຫາວິຎ຺ຎາຓຘາຕຸ? ຊິວ຺ຫຎ຺ຈ ປຏິຈ຺ຈ ຣເສ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາຊິວ຺ຫາວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ຊິວ຺ຫາວິຎ຺ຎາຓຘາຕຸ’’.

ຕຕ຺ຖ ກຕມາ ກາຍຘາຕຸ? ໂຍ ກາໂຍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ…ເປ… ສຸຎ຺ໂຎ ຄາໂມເປໂສ – ອຍໍ ວຸຈ຺ຈຕິ ‘‘ກາຍຘາຕຸ’’.

ຕຕ຺ຖ ກຕມາ ໂຜຏ຺ຐພ຺ພຘາຕຸ? ປຖວີຘາຕຸ…ເປ… ໂຜຏ຺ຐພ຺ພຘາຕຸເປສາ – ອຍໍ ວຸຈ຺ຈຕິ ‘‘ໂຜຏ຺ຐພ຺ພຘາຕຸ’’.

ຕຕ຺ຖ ກຕມາ ກາຍວິຎ຺ຎາຓຘາຕຸ? ກາຍຎ຺ຈ ປຏິຈ຺ຈ ໂຜຏ຺ຐພ຺ເພ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາກາຍວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ກາຍວິຎ຺ຎາຓຘາຕຸ’’.

ຕຕ຺ຖ ກຕມາ ມໂນຘາຕຸ? ຈກ຺ຂຸວິຎ຺ຎາຓຘາຕຸຍາ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນຘາຕຸ; ໂສຕວິຎ຺ຎາຓຘາຕຸຍາ…ເປ… ຆານວິຎ຺ຎາຓຘາຕຸຍາ…ເປ… ຊິວ຺ຫາວິຎ຺ຎາຓຘາຕຸຍາ…ເປ… ກາຍວິຎ຺ຎາຓຘາຕຸຍາ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນຘາຕຸ ສພ຺ພຘມ຺ເມສຸ ວາ ປນ ປຐມສມນ຺ນາຫາໂຣ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນຘາຕຸ – ອຍໍ ວຸຈ຺ຈຕິ ‘‘ມໂນຘາຕຸ’’.

ຕຕ຺ຖ ກຕມາ ຘມ຺ມຘາຕຸ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ຍຎ຺ຈ ຣູປໍ ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ, ອສງ຺ຂຕາ ຈ ຘາຕຸ.

ຕຕ຺ຖ ກຕໂມ ເວທນາກ຺ຂນ຺ໂຘ? ເອກວິເຘນ ເວທນາກ຺ຂນ຺ໂຘ – ຜສ຺ສສມ຺ປຍຸຕ຺ໂຕ. ທຸວິເຘນ ເວທນາກ຺ຂນ຺ໂຘ – ອຕ຺ຖິ ສເຫຕຸໂກ, ອຕ຺ຖິ ອເຫຕຸໂກ. ຕິວິເຘນ ເວທນາກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ເວທນາກ຺ຂນ຺ໂຘ…ເປ… ເອວໍ ພຫຸວິເຘນ ເວທນາກ຺ຂນ຺ໂຘ. ອຍໍ ວຸຈ຺ຈຕິ ‘‘ເວທນາກ຺ຂນ຺ໂຘ’’.

ຕຕ຺ຖ ກຕໂມ ສຎ຺ຎາກ຺ຂນ຺ໂຘ? ເອກວິເຘນ ສຎ຺ຎາກ຺ຂນ຺ໂຘ – ຜສ຺ສສມ຺ປຍຸຕ຺ໂຕ. ທຸວິເຘນ ສຎ຺ຎາກ຺ຂນ຺ໂຘ – ອຕ຺ຖິ ສເຫຕຸໂກ, ອຕ຺ຖິ ອເຫຕຸໂກ. ຕິວິເຘນ ສຎ຺ຎາກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ສຎ຺ຎາກ຺ຂນ຺ໂຘ…ເປ… ເອວໍ ພຫຸວິເຘນ ສຎ຺ຎາກ຺ຂນ຺ໂຘ. ອຍໍ ວຸຈ຺ຈຕິ ‘‘ສຎ຺ຎາກ຺ຂນ຺ໂຘ’’.

ຕຕ຺ຖ ກຕໂມ ສງ຺ຂາຣກ຺ຂນ຺ໂຘ? ເອກວິເຘນ ສງ຺ຂາຣກ຺ຂນ຺ໂຘ – ຈິຕ຺ຕສມ຺ປຍຸຕ຺ໂຕ. ທຸວິເຘນ ສງ຺ຂາຣກ຺ຂນ຺ໂຘ – ອຕ຺ຖິ ເຫຕຸ, ອຕ຺ຖິ ອເຫຕຸ. ຕິວິເຘນ ສງ຺ຂາຣກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ສງ຺ຂາຣກ຺ຂນ຺ໂຘ…ເປ… ເອວໍ ພຫຸວິເຘນ ສງ຺ຂາຣກ຺ຂນ຺ໂຘ – ອຍໍ ວຸຈ຺ຈຕິ ‘‘ສງ຺ຂາຣກ຺ຂນ຺ໂຘ’’.

ຕຕ຺ຖ ກຕມໍ ຣູປໍ ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ? ອິຕ຺ຖິນ຺ທ຺ຣິຍໍ…ເປ… ກພຬີກາໂຣ ອາຫາໂຣ – ອິທໍ ວຸຈ຺ຈຕິ ຣູປໍ ‘‘ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ’’.

ຕຕ຺ຖ ກຕມາ ອສງ຺ຂຕາ ຘາຕຸ? ຣາຄກ຺ຂໂຍ, ໂທສກ຺ຂໂຍ, ໂມຫກ຺ຂໂຍ – ອຍໍ ວຸຈ຺ຈຕິ ‘‘ອສງ຺ຂຕາ ຘາຕຸ’’. ອຍໍ ວຸຈ຺ຈຕິ ‘‘ຘມ຺ມຘາຕຸ’’.

ຕຕ຺ຖ ກຕມາ ມໂນວິຎ຺ຎາຓຘາຕຸ? ຈກ຺ຂຸວິຎ຺ຎາຓຘາຕຸຍາ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ມໂນຘາຕຸ, ມໂນຘາຕຸຍາ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ; ໂສຕວິຎ຺ຎາຓຘາຕຸຍາ…ເປ… ຆານວິຎ຺ຎາຓຘາຕຸຍາ …ເປ… ຊິວ຺ຫາວິຎ຺ຎາຓຘາຕຸຍາ…ເປ… ກາຍວິຎ຺ຎາຓຘາຕຸຍາ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ມໂນຘາຕຸ, ມໂນຘາຕຸຍາປິ ອຸປ຺ປຊ຺ຊິຕ຺ວາ ນິຣຸທ຺ຘສມນນ຺ຕຣາ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ ມນຎ຺ຈ ປຏິຈ຺ຈ ຘມ຺ເມ ຈ ອຸປ຺ປຊ຺ຊຕິ ຈິຕ຺ຕໍ ມໂນ ມານສໍ ຫທຍໍ ປຓ຺ຑຣໍ ມໂນ ມນາຍຕນໍ ມນິນ຺ທ຺ຣິຍໍ ວິຎ຺ຎາຓໍ ວິຎ຺ຎາຓກ຺ຂນ຺ໂຘ ຕຊ຺ຊາມໂນວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ມໂນວິຎ຺ຎາຓຘາຕຸ’’.

ອຠິຘມ຺ມຠາຊນີຍໍ.

໓. ປຎ຺ຫາປຸຈ຺ຉກໍ

ອຏ຺ຐາຣສ ຘາຕຸໂຍ – ຈກ຺ຂຸຘາຕຸ, ຣູປຘາຕຸ, ຈກ຺ຂຸວິຎ຺ຎາຓຘາຕຸ, ໂສຕຘາຕຸ, ສທ຺ທຘາຕຸ, ໂສຕວິຎ຺ຎາຓຘາຕຸ, ຆານຘາຕຸ, ຄນ຺ຘຘາຕຸ, ຆານວິຎ຺ຎາຓຘາຕຸ, ຊິວ຺ຫາຘາຕຸ, ຣສຘາຕຸ, ຊິວ຺ຫາວິຎ຺ຎາຓຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ກາຍວິຎ຺ຎາຓຘາຕຸ, ມໂນຘາຕຸ, ຘມ຺ມຘາຕຸ, ມໂນວິຎ຺ຎາຓຘາຕຸ.

໑໘໖. ອຏ຺ຐາຣສນ຺ນໍ ຘາຕູນໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໑໘໗. ໂສຬສ ຘາຕຸໂຍ ອພ຺ຍາກຕາ. ທ຺ເວ ຘາຕຸໂຍ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ທສ ຘາຕຸໂຍ ນ ວຕ຺ຕພ຺ພາ – ‘‘ສຸຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ’’ຕິປິ. ປຎ຺ຈ ຘາຕຸໂຍ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ກາຍວິຎ຺ຎາຓຘາຕຸ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕາ. ມໂນວິຎ຺ຎາຓຘາຕຸ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ຘມ຺ມຘາຕຸ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ, ສິຍາ ນ ວຕ຺ຕພ຺ພາ – ‘‘ສຸຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ’’ຕິປິ.

ທສ ຘາຕຸໂຍ ເນວວິປາກນວິປາກຘມ຺ມຘມ຺ມາ. ປຎ຺ຈ ຘາຕຸໂຍ ວິປາກາ. ມໂນຘາຕຸ ສິຍາ ວິປາກາ, ສິຍາ ເນວວິປາກນວິປາກຘມ຺ມຘມ຺ມາ. ທ຺ເວ ຘາຕຸໂຍ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ທສ ຘາຕຸໂຍ ອຸປາທິນ຺ນຸປາທານິຍາ. ສທ຺ທຘາຕຸ ອນຸປາທິນ຺ນຸປາທານິຍາ. ປຎ຺ຈ ຘາຕຸໂຍ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ. ທ຺ເວ ຘາຕຸໂຍ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ.

ໂສຬສ ຘາຕຸໂຍ ອສໍກິລິຏ຺ຐສໍກິເລສິກາ. ທ຺ເວ ຘາຕຸໂຍ ສິຍາ ສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ປນ຺ນຣສ ຘາຕຸໂຍ ອວິຕກ຺ກອວິຈາຣາ. ມໂນຘາຕຸ ສວິຕກ຺ກສວິຈາຣາ. ມໂນວິຎ຺ຎາຓຘາຕຸ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ. ຘມ຺ມຘາຕຸ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ, ສິຍາ ນ ວຕ຺ຕພ຺ພາ – ‘‘ສວິຕກ຺ກສວິຈາຣາ’’ຕິປິ, ‘‘ອວິຕກ຺ກວິຈາຣມຕ຺ຕາ’’ຕິປິ, ‘‘ອວິຕກ຺ກອວິຈາຣາ’’ຕິປິ. ທສ ຘາຕຸໂຍ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ. ປຎ຺ຈ ຘາຕຸໂຍ ອຸເປກ຺ຂາສຫຄຕາ. ກາຍວິຎ຺ຎາຓຘາຕຸ ນ ປີຕິສຫຄຕາ, ສິຍາ ສຸຂສຫຄຕາ, ນ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ – ‘‘ສຸຂສຫຄຕາ’’ຕິ. ທ຺ເວ ຘາຕຸໂຍ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ.

ໂສຬສ ຘາຕຸໂຍ ເນວ ທສ຺ສເນນ ນ ຠາວນາຍ ປຫາຕພ຺ພາ. ທ຺ເວ ຘາຕຸໂຍ ສິຍາ ທສ຺ສເນນ ປຫາຕພ຺ພາ, ສິຍາ ຠາວນາຍ ປຫາຕພ຺ພາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພາ. ໂສຬສ ຘາຕຸໂຍ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ທ຺ເວ ຘາຕຸໂຍ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ຠາວນາຍ ປຫາຕພ຺ພເຫຕຸກາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ໂສຬສ ຘາຕຸໂຍ ເນວາຈຍຄາມິນາປຈຍຄາມິໂນ. ທ຺ເວ ຘາຕຸໂຍ ສິຍາ ອາຈຍຄາມິໂນ, ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ໂສຬສ ຘາຕຸໂຍ ເນວເສກ຺ຂນາເສກ຺ຂາ. ທ຺ເວ ຘາຕຸໂຍ ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ.

ໂສຬສ ຘາຕຸໂຍ ປຣິຕ຺ຕາ. ທ຺ເວ ຘາຕຸໂຍ ສິຍາ ປຣິຕ຺ຕາ, ສິຍາ ມຫຄ຺ຄຕາ, ສິຍາ ອປ຺ປມາຓາ. ທສ ຘາຕຸໂຍ ອນາຣມ຺ມຓາ. ຉ ຘາຕຸໂຍ ປຣິຕ຺ຕາຣມ຺ມຓາ. ທ຺ເວ ຘາຕຸໂຍ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ, ສິຍາ ນ ວຕ຺ຕພ຺ພາ – ‘‘ປຣິຕ຺ຕາຣມ຺ມຓາ’’ຕິປິ, ‘‘ມຫຄ຺ຄຕາຣມ຺ມຓາ’’ຕິປິ, ‘‘ອປ຺ປມາຓາຣມ຺ມຓາ’’ຕິປິ. ໂສຬສ ຘາຕຸໂຍ ມຊ຺ຌິມາ. ທ຺ເວ ຘາຕຸໂຍ ສິຍາ ຫີນາ, ສິຍາ ມຊ຺ຌິມາ, ສິຍາ ປຓີຕາ. ໂສຬສ ຘາຕຸໂຍ ອນິຍຕາ. ທ຺ເວ ຘາຕຸໂຍ ສິຍາ ມິຈ຺ຉຕ຺ຕນິຍຕາ, ສິຍາ ສມ຺ມຕ຺ຕນິຍຕາ, ສິຍາ ອນິຍຕາ.

ທສ ຘາຕຸໂຍ ອນາຣມ຺ມຓາ. ຉ ຘາຕຸໂຍ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ. ທ຺ເວ ຘາຕຸໂຍ ສິຍາ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ. ທສ ຘາຕຸໂຍ ສິຍາ ອຸປ຺ປນ຺ນາ, ສິຍາ ອຸປ຺ປາທິໂນ, ສິຍາ ນ ວຕ຺ຕພ຺ພາ – ‘‘ອນຸປ຺ປນ຺ນາ’’ຕິ. ສທ຺ທຘາຕຸ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ນ ວຕ຺ຕພ຺ພາ – ‘‘ອຸປ຺ປາທິນີ’’ຕິ. ຉ ຘາຕຸໂຍ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ຘມ຺ມຘາຕຸ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິນີ, ສິຍາ ນ ວຕ຺ຕພ຺ພາ – ‘‘ອຸປ຺ປນ຺ນາ’’ຕິປິ, ‘‘ອນຸປ຺ປນ຺ນາ’’ຕິປິ, ‘‘ອຸປ຺ປາທິນີ’’ຕິປິ.

ສຕ຺ຕຣສ ຘາຕຸໂຍ ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ຘມ຺ມຘາຕຸ ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ, ສິຍາ ນ ວຕ຺ຕພ຺ພາ – ‘‘ອຕີຕາ’’ຕິປິ, ‘‘ອນາຄຕາ’’ຕິປິ, ‘‘ປຈ຺ຈຸປ຺ປນ຺ນາ’’ຕິປິ. ທສ ຘາຕຸໂຍ ອນາຣມ຺ມຓາ. ຉ ຘາຕຸໂຍ ປຈ຺ຈຸປ຺ປນ຺ນາຣມ຺ມຓາ. ທ຺ເວ ຘາຕຸໂຍ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ; ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ.

ທສ ຘາຕຸໂຍ ອນາຣມ຺ມຓາ. ຉ ຘາຕຸໂຍ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ. ທ຺ເວ ຘາຕຸໂຍ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຊ຺ຌຕ຺ຕາຣມ຺ມຓາ’’ຕິປິ, ‘‘ພຫິທ຺ຘາຣມ຺ມຓາ’’ຕິປິ, ‘‘ອຊ຺ຌຕ຺ຕພຫິທ຺ຘາຣມ຺ມຓາ’’ຕິປິ. ຣູປຘາຕຸ ສນິທສ຺ສນສປ຺ປຏິຆາ. ນວ ຘາຕຸໂຍ ອນິທສ຺ສນອປ຺ປຏິຆາ. ອຏ຺ຐ ຘາຕຸໂຍ ອນິທສ຺ສນອປ຺ປຏິຆາ.

໒. ທຸກໍ

໑໘໘. ສຕ຺ຕຣສ ຘາຕຸໂຍ ນ ເຫຕູ. ຘມ຺ມຘາຕຸ ສິຍາ ເຫຕຸ, ສິຍາ ນ ເຫຕຸ. ໂສຬສ ຘາຕຸໂຍ ອເຫຕຸກາ. ທ຺ເວ ຘາຕຸໂຍ ສິຍາ ສເຫຕຸກາ, ສິຍາ ອເຫຕຸກາ. ໂສຬສ ຘາຕຸໂຍ ອເຫຕຸກາ. ທ຺ເວ ຘາຕຸໂຍ ສິຍາ ສເຫຕຸກາ, ສິຍາ ອເຫຕຸກາ. ໂສຬສ ຘາຕຸໂຍ ເຫຕຸວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ເຫຕຸສມ຺ປຍຸຕ຺ຕາ, ສິຍາ ເຫຕຸວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ເຫຕຸ ເຈວ ສເຫຕຸກາ ຈາ’’ຕິປິ, ‘‘ສເຫຕຸກາ ເຈວ ນ ຈ ເຫຕູ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ເຫຕຸ ເຈວ ສເຫຕຸກາ ຈາ’’ຕິ, ສິຍາ ສເຫຕຸກາ ເຈວ ນ ຈ ເຫຕຸ, ສິຍາ ນ ວຕ຺ຕພ຺ພາ – ‘‘ສເຫຕຸກາ ເຈວ ນ ຈ ເຫຕູ’’ຕິ. ຘມ຺ມຘາຕຸ ສິຍາ ເຫຕຸ ເຈວ ສເຫຕຸກາ ຈ, ສິຍາ ສເຫຕຸກາ ເຈວ ນ ຈ ເຫຕຸ, ສິຍາ ນ ວຕ຺ຕພ຺ພາ – ‘‘ເຫຕຸ ເຈວ ສເຫຕຸກາ ຈາ’’ຕິປິ, ‘‘ສເຫຕຸກາ ເຈວ ນ ຈ ເຫຕູ’’ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິປິ, ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ເຫຕຸ ເຈວ ເຫຕຸສມ຺ປຍຸຕ຺ຕາ ຈາ’’ຕິ, ສິຍາ ເຫຕຸສມ຺ປຍຸຕ຺ຕາ ເຈວ ນ ຈ ເຫຕຸ, ສິຍາ ນ ວຕ຺ຕພ຺ພາ – ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິ. ຘມ຺ມຘາຕຸ ສິຍາ ເຫຕຸ ເຈວ ເຫຕຸສມ຺ປຍຸຕ຺ຕາ ຈ, ສິຍາ ເຫຕຸສມ຺ປຍຸຕ຺ຕາ ເຈວ ນ ຈ ເຫຕຸ, ສິຍາ ນ ວຕ຺ຕພ຺ພາ – ‘‘ເຫຕຸ ເຈວ ເຫຕຸສມ຺ປຍຸຕ຺ຕາ ຈາ’’ຕິປິ, ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິປິ. ໂສຬສ ຘາຕຸໂຍ ນ ເຫຕຸອເຫຕຸກາ. ມໂນວິຎ຺ຎາຓຘາຕຸ ສິຍາ ນ ເຫຕຸສເຫຕຸກາ, ສິຍາ ນ ເຫຕຸອເຫຕຸກາ. ຘມ຺ມຘາຕຸ ສິຍາ ນ ເຫຕຸສເຫຕຸກາ, ສິຍາ ນ ເຫຕຸອເຫຕຸກາ, ສິຍາ ນ ວຕ຺ຕພ຺ພາ – ‘‘ນ ເຫຕຸສເຫຕຸກາ’’ຕິປິ, ‘‘ນ ເຫຕຸອເຫຕຸກາ’’ຕິປິ.

ສຕ຺ຕຣສ ຘາຕຸໂຍ ສປ຺ປຈ຺ຈຍາ. ຘມ຺ມຘາຕຸ ສິຍາ ສປ຺ປຈ຺ຈຍາ, ສິຍາ ອປ຺ປຈ຺ຈຍາ. ສຕ຺ຕຣສ ຘາຕຸໂຍ ສງ຺ຂຕາ. ຘມ຺ມຘາຕຸ ສິຍາ ສງ຺ຂຕາ, ສິຍາ ອສງ຺ຂຕາ. ຣູປຘາຕຸ ສນິທສ຺ສນາ. ສຕ຺ຕຣສ ຘາຕຸໂຍ ອນິທສ຺ສນາ. ທສ ຘາຕຸໂຍ ສປ຺ປຏິຆາ. ອຏ຺ຐ ຘາຕຸໂຍ ອປ຺ປຏິຆາ. ທສ ຘາຕຸໂຍ ຣູປາ. ສຕ຺ຕ ຘາຕຸໂຍ ອຣູປາ. ຘມ຺ມຘາຕຸ ສິຍາ ຣູປາ, ສິຍາ ອຣູປາ. ໂສຬສ ຘາຕຸໂຍ ໂລກິຍາ. ທ຺ເວ ຘາຕຸໂຍ ສິຍາ ໂລກິຍາ, ສິຍາ ໂລກຸຕ຺ຕຣາ; ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ສຕ຺ຕຣສ ຘາຕຸໂຍ ໂນ ອາສວາ. ຘມ຺ມຘາຕຸ ສິຍາ ອາສວາ, ສິຍາ ໂນ ອາສວາ. ໂສຬສ ຘາຕຸໂຍ ສາສວາ. ທ຺ເວ ຘາຕຸໂຍ ສິຍາ ສາສວາ, ສິຍາ ອນາສວາ. ໂສຬສ ຘາຕຸໂຍ ອາສວວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ອາສວສມ຺ປຍຸຕ຺ຕາ, ສິຍາ ອາສວວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິ, ‘‘ສາສວາ ເຈວ ໂນ ຈ ອາສວາ’’. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ອາສໂວ ເຈວ ສາສວາ ຈາ’’ຕິ, ສິຍາ ສາສວາ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ພາ – ‘‘ສາສວາ ເຈວ ໂນ ຈ ອາສໂວ’’ຕິ. ຘມ຺ມຘາຕຸ ສິຍາ ອາສໂວ ເຈວ ສາສວາ ຈ, ສິຍາ ສາສວາ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ພາ – ‘‘ອາສໂວ ເຈວ ສາສວາ ຈາ’’ຕິປິ, ‘‘ສາສວາ ເຈວ ໂນ ຈ ອາສໂວ’’ຕິປິ.

ໂສຬສ ຘາຕຸໂຍ ນ ວຕ຺ຕພ຺ພາ – ‘‘ອາສວາ ເຈວ ອາສວສມ຺ປຍຸຕ຺ຕາ ຈາ’’ຕິປິ, ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສວາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ອາສໂວ ເຈວ ອາສວສມ຺ປຍຸຕ຺ຕາ ຈາ’’ຕິ, ສິຍາ ອາສວສມ຺ປຍຸຕ຺ຕາ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ພາ – ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສໂວ’’ຕິ. ຘມ຺ມຘາຕຸ ສິຍາ ອາສໂວ ເຈວ ອາສວສມ຺ປຍຸຕ຺ຕາ ຈ, ສິຍາ ອາສວສມ຺ປຍຸຕ຺ຕາ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ພາ – ‘‘ອາສໂວ ເຈວ ອາສວສມ຺ປຍຸຕ຺ຕາ ຈາ’’ຕິປິ, ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສໂວ’’ຕິປິ. ໂສຬສ ຘາຕຸໂຍ ອາສວວິປ຺ປຍຸຕ຺ຕສາສວາ. ທ຺ເວ ຘາຕຸໂຍ ສິຍາ ອາສວວິປ຺ປຍຸຕ຺ຕສາສວາ, ສິຍາ ອາສວວິປ຺ປຍຸຕ຺ຕອນາສວາ, ສິຍາ ນ ວຕ຺ຕພ຺ພາ – ‘‘ອາສວວິປ຺ປຍຸຕ຺ຕສາສວາ’’ຕິປິ, ‘‘ອາສວວິປ຺ປຍຸຕ຺ຕອນາສວາ’’ຕິປິ.

ສຕ຺ຕຣສ ຘາຕຸໂຍ ໂນ ສໍໂຍຊນາ. ຘມ຺ມຘາຕຸ ສິຍາ ສໍໂຍຊນໍ, ສິຍາ ໂນ ສໍໂຍຊນໍ. ໂສຬສ ຘາຕຸໂຍ ສໍໂຍຊນິຍາ. ທ຺ເວ ຘາຕຸໂຍ ສິຍາ ສໍໂຍຊນິຍາ, ສິຍາ ອສໍໂຍຊນິຍາ. ໂສຬສ ຘາຕຸໂຍ ສໍໂຍຊນວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ສໍໂຍຊນສມ຺ປຍຸຕ຺ຕາ, ສິຍາ ສໍໂຍຊນວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິ, ສໍໂຍຊນິຍາ ເຈວ ໂນ ຈ ສໍໂຍຊນາ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ສໍໂຍຊນຎ຺ເຈວ ສໍໂຍຊນິຍາ ຈາ’’ຕິ, ສິຍາ ສໍໂຍຊນິຍາ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ພາ – ‘‘ສໍໂຍຊນິຍາ ເຈວ ໂນ ຈ ສໍໂຍຊນ’’ນ຺ຕິ. ຘມ຺ມຘາຕຸ ສິຍາ ສໍໂຍຊນຎ຺ເຈວ ສໍໂຍຊນິຍາ ຈ, ສິຍາ ສໍໂຍຊນິຍາ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ພາ – ‘‘ສໍໂຍຊນຎ຺ເຈວ ສໍໂຍຊນິຍາ ຈາ’’ຕິປິ, ‘‘ສໍໂຍຊນິຍາ ເຈວ ໂນ ຈ ສໍໂຍຊນ’’ນ຺ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນສມ຺ປຍຸຕ຺ຕາ ຈາ’’ຕິປິ, ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕາ ຈາ’’ຕິ, ສິຍາ ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ພາ – ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນ’’ນ຺ຕິ. ຘມ຺ມຘາຕຸ ສິຍາ ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕາ ຈ, ສິຍາ ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ພາ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕາ ຈາ’’ຕິປິ, ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນ’’ນ຺ຕິປິ. ໂສຬສ ຘາຕຸໂຍ ສໍໂຍຊນວິປ຺ປຍຸຕ຺ຕສໍໂຍຊນິຍາ. ທ຺ເວ ຘາຕຸໂຍ ສິຍາ ສໍໂຍຊນວິປ຺ປຍຸຕ຺ຕສໍໂຍຊນິຍາ, ສິຍາ ສໍໂຍຊນວິປ຺ປຍຸຕ຺ຕອສໍໂຍຊນິຍາ, ສິຍາ ນ ວຕ຺ຕພ຺ພາ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍາ’’ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍາ’’ຕິປິ.

ສຕ຺ຕຣສ ຘາຕຸໂຍ ໂນ ຄນ຺ຖາ. ຘມ຺ມຘາຕຸ ສິຍາ ຄນ຺ໂຖ, ສິຍາ ໂນ ຄນ຺ໂຖ. ໂສຬສ ຘາຕຸໂຍ ຄນ຺ຖນິຍາ. ທ຺ເວ ຘາຕຸໂຍ ສິຍາ ຄນ຺ຖນິຍາ, ສິຍາ ອຄນ຺ຖນິຍາ. ໂສຬສ ຘາຕຸໂຍ ຄນ຺ຖວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ຄນ຺ຖສມ຺ປຍຸຕ຺ຕາ, ສິຍາ ຄນ຺ຖວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິ, ຄນ຺ຖນິຍາ ເຈວ ໂນ ຈ ຄນ຺ຖາ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ຄນ຺ໂຖ ເຈວ ຄນ຺ຖນິຍາ ຈາ’’ຕິ, ສິຍາ ຄນ຺ຖນິຍາ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ພາ – ‘‘ຄນ຺ຖນິຍາ ເຈວ ໂນ ຈ ຄນ຺ໂຖ’’ຕິ. ຘມ຺ມຘາຕຸ ສິຍາ ຄນ຺ໂຖ ເຈວ ຄນ຺ຖນິຍາ ຈ, ສິຍາ ຄນ຺ຖນິຍາ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ພາ – ‘‘ຄນ຺ໂຖ ເຈວ ຄນ຺ຖນິຍາ ຈາ’’ຕິປິ, ‘‘ຄນ຺ຖນິຍາ ເຈວ ໂນ ຈ ຄນ຺ໂຖ’’ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖສມ຺ປຍຸຕ຺ຕາ ຈາ’’ຕິປິ, ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ຕາ ຈາ’’ຕິ, ສິຍາ ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ພາ – ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ໂຖ’’ຕິ. ຘມ຺ມຘາຕຸ ສິຍາ ຄນ຺ໂຖ ເຈວ ຄນ຺ຖສມ຺ປຍຸຕ຺ຕາ ຈ, ສິຍາ ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ພາ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ຕາ ຈາ’’ຕິປິ, ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ໂຖ’’ຕິປິ. ໂສຬສ ຘາຕຸໂຍ ຄນ຺ຖວິປ຺ປຍຸຕ຺ຕຄນ຺ຖນິຍາ. ທ຺ເວ ຘາຕຸໂຍ ສິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ, ສິຍາ ຄນ຺ຖວິປ຺ປຍຸຕ຺ຕອຄນ຺ຖນິຍາ, ສິຍາ ນ ວຕ຺ຕພ຺ພາ – ‘‘ຄນ຺ຖວິປ຺ປຍຸຕ຺ຕຄນ຺ຖນິຍາ’’ຕິປິ, ‘‘ຄນ຺ຖວິປ຺ປຍຸຕ຺ຕອຄນ຺ຖນິຍາ’’ຕິປິ.

ສຕ຺ຕຣສ ຘາຕຸໂຍ ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ. ຘມ຺ມຘາຕຸ ສິຍາ ນີວຣຓໍ, ສິຍາ ໂນ ນີວຣຓໍ. ໂສຬສ ຘາຕຸໂຍ ນີວຣຓິຍາ. ທ຺ເວ ຘາຕຸໂຍ ສິຍາ ນີວຣຓິຍາ, ສິຍາ ອນີວຣຓິຍາ. ໂສຬສ ຘາຕຸໂຍ ນີວຣຓວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ນີວຣຓສມ຺ປຍຸຕ຺ຕາ, ສິຍາ ນີວຣຓວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິ, ນີວຣຓິຍາ ເຈວ ໂນ ຈ ນີວຣຓາ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ນີວຣຓຎ຺ເຈວ ນີວຣຓິຍາ ຈາ’’ຕິ, ສິຍາ ນີວຣຓິຍາ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ພາ – ‘‘ນີວຣຓິຍາ ເຈວ ໂນ ຈ ນີວຣຓ’’ນ຺ຕິ. ຘມ຺ມຘາຕຸ ສິຍາ ນີວຣຓຎ຺ເຈວ ນີວຣຓິຍາ ຈ, ສິຍາ ນີວຣຓິຍາ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ພາ – ‘‘ນີວຣຓຎ຺ເຈວ ນີວຣຓິຍາ ຈາ’’ຕິປິ, ‘‘ນີວຣຓິຍາ ເຈວ ໂນ ຈ ນີວຣຓ’’ນ຺ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓສມ຺ປຍຸຕ຺ຕາ ຈາ’’ຕິປິ, ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ຕາ ຈາ’’ຕິ, ສິຍາ ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ພາ – ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓ’’ນ຺ຕິ. ຘມ຺ມຘາຕຸ ສິຍາ ນີວຣຓຎ຺ເຈວ ນີວຣຓສມ຺ປຍຸຕ຺ຕາ ຈ, ສິຍາ ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ພາ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ຕາ ຈາ’’ຕິປິ, ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓ’’ນ຺ຕິປິ. ໂສຬສ ຘາຕຸໂຍ ນີວຣຓວິປ຺ປຍຸຕ຺ຕນີວຣຓິຍາ. ທ຺ເວ ຘາຕຸໂຍ ສິຍາ ນີວຣຓວິປ຺ປຍຸຕ຺ຕນີວຣຓິຍາ, ສິຍາ ນີວຣຓວິປ຺ປຍຸຕ຺ຕອນີວຣຓິຍາ, ສິຍາ ນ ວຕ຺ຕພ຺ພາ – ‘‘ນີວຣຓວິປ຺ປຍຸຕ຺ຕນີວຣຓິຍາ’’ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍາ’’ຕິປິ.

ສຕ຺ຕຣສ ຘາຕຸໂຍ ໂນ ປຣາມາສາ. ຘມ຺ມຘາຕຸ ສິຍາ ປຣາມາໂສ, ສິຍາ ໂນ ປຣາມາໂສ. ໂສຬສ ຘາຕຸໂຍ ປຣາມຏ຺ຐາ. ທ຺ເວ ຘາຕຸໂຍ ສິຍາ ປຣາມຏ຺ຐາ, ສິຍາ ອປຣາມຏ຺ຐາ. ໂສຬສ ຘາຕຸໂຍ ປຣາມາສວິປ຺ປຍຸຕ຺ຕາ. ມໂນວິຎ຺ຎາຓຘາຕຸ ສິຍາ ປຣາມາສສມ຺ປຍຸຕ຺ຕາ, ສິຍາ ປຣາມາສວິປ຺ປຍຸຕ຺ຕາ. ຘມ຺ມຘາຕຸ ສິຍາ ປຣາມາສສມ຺ປຍຸຕ຺ຕາ, ສິຍາ ປຣາມາສວິປ຺ປຍຸຕ຺ຕາ, ສິຍາ ນ ວຕ຺ຕພ຺ພາ – ‘‘ປຣາມາສສມ຺ປຍຸຕ຺ຕາ’’ຕິປິ, ‘‘ປຣາມາສວິປ຺ປຍຸຕ຺ຕາ’’ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາຕິ ປຣາມຏ຺ຐາ ເຈວ ໂນ ຈ ປຣາມາສາ’’. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ປຣາມາໂສ ເຈວ ປຣາມຏ຺ຐາ ຈາ’’ຕິ, ສິຍາ ປຣາມຏ຺ຐາ ເຈວ ໂນ ຈ ປຣາມາໂສ, ສິຍາ ນ ວຕ຺ຕພ຺ພາ – ‘‘ປຣາມຏ຺ຐາ ເຈວ ໂນ ຈ ປຣາມາໂສ’’ຕິ. ຘມ຺ມຘາຕຸ ສິຍາ ປຣາມາໂສ ເຈວ ປຣາມຏ຺ຐາ ຈ, ສິຍາ ປຣາມຏ຺ຐາ ເຈວ ໂນ ຈ ປຣາມາໂສ, ສິຍາ ນ ວຕ຺ຕພ຺ພາ – ‘‘ປຣາມາໂສ ເຈວ ປຣາມຏ຺ຐາ ຈາ’’ຕິປິ, ‘‘ປຣາມຏ຺ຐາ ເຈວ ໂນ ຈ ປຣາມາໂສ’’ຕິປິ. ໂສຬສ ຘາຕຸໂຍ ປຣາມາສວິປ຺ປຍຸຕ຺ຕປຣາມຏ຺ຐາ. ທ຺ເວ ຘາຕຸໂຍ ສິຍາ ປຣາມາສວິປ຺ປຍຸຕ຺ຕປຣາມຏ຺ຐາ, ສິຍາ ປຣາມາສວິປ຺ປຍຸຕ຺ຕອປຣາມຏ຺ຐາ, ສິຍາ ນ ວຕ຺ຕພ຺ພາ – ‘‘ປຣາມາສວິປ຺ປຍຸຕ຺ຕປຣາມຏ຺ຐາ’’ຕິປິ, ‘‘ປຣາມາສວິປ຺ປຍຸຕ຺ຕອປຣາມຏ຺ຐາ’’ຕິປິ.

ທສ ຘາຕຸໂຍ ອນາຣມ຺ມຓາ. ສຕ຺ຕ ຘາຕຸໂຍ ສາຣມ຺ມຓາ. ຘມ຺ມຘາຕຸ ສິຍາ ສາຣມ຺ມຓາ, ສິຍາ ອນາຣມ຺ມຓາ. ສຕ຺ຕ ຘາຕຸໂຍ ຈິຕ຺ຕາ. ເອກາທສ ຘາຕຸໂຍ ໂນ ຈິຕ຺ຕາ. ສຕ຺ຕຣສ ຘາຕຸໂຍ ອເຈຕສິກາ. ຘມ຺ມຘາຕຸ ສິຍາ ເຈຕສິກາ, ສິຍາ ອເຈຕສິກາ. ທສ ຘາຕຸໂຍ ຈິຕ຺ຕວິປ຺ປຍຸຕ຺ຕາ. ຘມ຺ມຘາຕຸ ສິຍາ ຈິຕ຺ຕສມ຺ປຍຸຕ຺ຕາ, ສິຍາ ຈິຕ຺ຕວິປ຺ປຍຸຕ຺ຕາ. ສຕ຺ຕ ຘາຕຸໂຍ ນ ວຕ຺ຕພ຺ພາ – ‘‘ຈິຕ຺ເຕນ ສມ຺ປຍຸຕ຺ຕາ’’ຕິປິ, ‘‘ຈິຕ຺ເຕນ ວິປ຺ປຍຸຕ຺ຕາ’’ຕິປິ. ທສ ຘາຕຸໂຍ ຈິຕ຺ຕວິສໍສຏ຺ຐາ. ຘມ຺ມຘາຕຸ ສິຍາ ຈິຕ຺ຕສໍສຏ຺ຐາ, ສິຍາ ຈິຕ຺ຕວິສໍສຏ຺ຐາ. ສຕ຺ຕ ຘາຕຸໂຍ ນ ວຕ຺ຕພ຺ພາ – ‘‘ຈິຕ຺ເຕນ ສໍສຏ຺ຐາ’’ຕິປິ, ‘‘ຈິຕ຺ເຕນ ວິສໍສຏ຺ຐາ’’ຕິປິ.

ທ຺ວາທສ ຘາຕຸໂຍ ໂນ ຈິຕ຺ຕສມຸຏ຺ຐານາ. ຉ ຘາຕຸໂຍ ສິຍາ ຈິຕ຺ຕສມຸຏ຺ຐານາ, ສິຍາ ໂນ ຈິຕ຺ຕສມຸຏ຺ຐານາ. ສຕ຺ຕຣສ ຘາຕຸໂຍ ໂນ ຈິຕ຺ຕສຫຠຸໂນ. ຘມ຺ມຘາຕຸ ສິຍາ ຈິຕ຺ຕສຫຠູ, ສິຍາ ໂນ ຈິຕ຺ຕສຫຠູ. ສຕ຺ຕຣສ ຘາຕຸໂຍ ໂນ ຈິຕ຺ຕານຸປຣິວຕ຺ຕິໂນ. ຘມ຺ມຘາຕຸ ສິຍາ ຈິຕ຺ຕານຸປຣິວຕ຺ຕີ, ສິຍາ ໂນ ຈິຕ຺ຕານຸປຣິວຕ຺ຕີ. ສຕ຺ຕຣສ ຘາຕຸໂຍ ໂນ ຈິຕ຺ຕສໍສຏ຺ຐສມຸຏ຺ຐານາ. ຘມ຺ມຘາຕຸ ສິຍາ ຈິຕ຺ຕສໍສຏ຺ຐສມຸຏ຺ຐານາ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານາ. ສຕ຺ຕຣສ ຘາຕຸໂຍ ໂນ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ຘມ຺ມຘາຕຸ ສິຍາ ຈິຕ຺ຕສໍສຏ຺ຐສມຸຏ຺ຐານສຫຠູ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານສຫຠູ. ສຕ຺ຕຣສ ຘາຕຸໂຍ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ຘມ຺ມຘາຕຸ ສິຍາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕີ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕີ. ທ຺ວາທສ ຘາຕຸໂຍ ອຊ຺ຌຕ຺ຕິກາ. ຉ ຘາຕຸໂຍ ພາຫິຣາ.

ນວ ຘາຕຸໂຍ ອຸປາທາ. ອຏ຺ຐ ຘາຕຸໂຍ ໂນ ອຸປາທາ. ຘມ຺ມຘາຕຸ ສິຍາ ອຸປາທາ, ສິຍາ ໂນ ອຸປາທາ. ທສ ຘາຕຸໂຍ ອຸປາທິນ຺ນາ. ສທ຺ທຘາຕຸ ອນຸປາທິນ຺ນາ. ສຕ຺ຕຘາຕຸໂຍ ສິຍາ ອຸປາທິນ຺ນາ, ສິຍາ ອນຸປາທິນ຺ນາ. ສຕ຺ຕຣສ ຘາຕຸໂຍ ໂນ ອຸປາທານາ. ຘມ຺ມຘາຕຸ ສິຍາ ອຸປາທານໍ, ສິຍາ ໂນ ອຸປາທານໍ. ໂສຬສ ຘາຕຸໂຍ ອຸປາທານິຍາ. ທ຺ເວ ຘາຕຸໂຍ ສິຍາ ອຸປາທານິຍາ, ສິຍາ ອນຸປາທານິຍາ. ໂສຬສ ຘາຕຸໂຍ ອຸປາທານວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ອຸປາທານສມ຺ປຍຸຕ຺ຕາ, ສິຍາ ອຸປາທານວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານິຍາ ຈາ’’ຕິ, ‘‘ອຸປາທານິຍາ ເຈວ ໂນ ຈ ອຸປາທານາ’’. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ອຸປາທານຎ຺ເຈວ ອຸປາທານິຍາ ຈາ’’ຕິ, ສິຍາ ອຸປາທານິຍາ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ພາ – ‘‘ອຸປາທານິຍາ ເຈວ ໂນ ຈ ອຸປາທານ’’ນ຺ຕິ. ຘມ຺ມຘາຕຸ ສິຍາ ອຸປາທານຎ຺ເຈວ ອຸປາທານິຍາ ຈ, ສິຍາ ອຸປາທານິຍາ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ພາ – ‘‘ອຸປາທານຎ຺ເຈວ ອຸປາທານິຍາ ຈາ’’ຕິປິ, ‘‘ອຸປາທານິຍາ ເຈວ ໂນ ຈ ອຸປາທານ’’ນ຺ຕິປິ.

ໂສຬສ ຘາຕຸໂຍ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານສມ຺ປຍຸຕ຺ຕາ ຈາ’’ຕິປິ, ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ຕາ ຈາ’’ຕິ, ສິຍາ ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ພາ – ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານ’’ນ຺ຕິ. ຘມ຺ມຘາຕຸ ສິຍາ ອຸປາທານຎ຺ເຈວ ອຸປາທານສມ຺ປຍຸຕ຺ຕາ ຈ, ສິຍາ ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ພາ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ຕາ ຈາ’’ຕິປິ, ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານ’’ນ຺ຕິປິ. ໂສຬສ ຘາຕຸໂຍ ອຸປາທານວິປ຺ປຍຸຕ຺ຕອຸປາທານິຍາ. ທ຺ເວ ຘາຕຸໂຍ ສິຍາ ອຸປາທານວິປ຺ປຍຸຕ຺ຕອຸປາທານິຍາ, ສິຍາ ອຸປາທານວິປ຺ປຍຸຕ຺ຕອນຸປາທານິຍາ, ສິຍາ ນ ວຕ຺ຕພ຺ພາ – ‘‘ອຸປາທານວິປ຺ປຍຸຕ຺ຕອຸປາທານິຍາ’’ຕິປິ, ‘‘ອຸປາທານວິປ຺ປຍຸຕ຺ຕອນຸປາທານິຍາ’’ຕິປິ.

ສຕ຺ຕຣສ ຘາຕຸໂຍ ໂນ ກິເລສາ. ຘມ຺ມຘາຕຸ ສິຍາ ກິເລສາ, ສິຍາ ໂນ ກິເລສາ. ໂສຬສ ຘາຕຸໂຍ ສໍກິເລສິກາ. ທ຺ເວ ຘາຕຸໂຍ ສິຍາ ສໍກິເລສິກາ, ສິຍາ ອສໍກິເລສິກາ. ໂສຬສ ຘາຕຸໂຍ ອສໍກິລິຏ຺ຐາ. ທ຺ເວ ຘາຕຸໂຍ ສິຍາ ສໍກິລິຏ຺ຐາ, ສິຍາ ອສໍກິລິຏ຺ຐາ. ໂສຬສ ຘາຕຸໂຍ ກິເລສວິປ຺ປຍຸຕ຺ຕາ. ທ຺ເວ ຘາຕຸໂຍ ສິຍາ ກິເລສສມ຺ປຍຸຕ຺ຕາ, ສິຍາ ກິເລສວິປ຺ປຍຸຕ຺ຕາ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິ, ສໍກິເລສິກາ ເຈວ ໂນ ຈ ກິເລສາ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ກິເລໂສ ເຈວ ສໍກິເລສິກາ ຈາ’’ຕິ, ສິຍາ ສໍກິເລສິກາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ສໍກິເລສິກາ ເຈວ ໂນ ຈ ກິເລໂສ’’ຕິ. ຘມ຺ມຘາຕຸ ສິຍາ ກິເລໂສ ເຈວ ສໍກິເລສິກາ ຈ, ສິຍາ ສໍກິເລສິກາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ກິເລໂສ ເຈວ ສໍກິເລສິກາ ຈາ’’ຕິປິ, ‘‘ສໍກິເລສິກາ ເຈວ ໂນ ຈ ກິເລໂສ’’ຕິປິ.

ໂສຬສ ຘາຕຸໂຍ ນ ວຕ຺ຕພ຺ພາ – ‘‘ກິເລສາ ເຈວ ສໍກິລິຏ຺ຐາ ຈາ’’ຕິປິ, ‘‘ສໍກິລິຏ຺ຐາ ເຈວ ໂນ ຈ ກິເລສາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ກິເລໂສ ເຈວ ສໍກິລິຏ຺ຐາ ຈາ’’ຕິ, ສິຍາ ສໍກິລິຏ຺ຐາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ສໍກິລິຏ຺ຐາ ເຈວ ໂນ ຈ ກິເລໂສ’’ຕິ. ຘມ຺ມຘາຕຸ ສິຍາ ກິເລໂສ ເຈວ ສໍກິລິຏ຺ຐາ ຈ, ສິຍາ ສໍກິລິຏ຺ຐາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ກິເລໂສ ເຈວ ສໍກິລິຏ຺ຐາ ຈາ’’ຕິປິ, ‘‘ສໍກິລິຏ຺ຐາ ເຈວ ໂນ ຈ ກິເລໂສ’’ຕິປິ. ໂສຬສ ຘາຕຸໂຍ ນ ວຕ຺ຕພ຺ພາ – ‘‘ກິເລສາ ເຈວ ກິເລສສມ຺ປຍຸຕ຺ຕາ ຈາ’’ຕິປິ, ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ’’ຕິປິ. ມໂນວິຎ຺ຎາຓຘາຕຸ ນ ວຕ຺ຕພ຺ພາ – ‘‘ກິເລໂສ ເຈວ ກິເລສສມ຺ປຍຸຕ຺ຕາ ຈາ’’ຕິ, ສິຍາ ກິເລສສມ຺ປຍຸຕ຺ຕາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລໂສ’’ຕິ. ຘມ຺ມຘາຕຸ ສິຍາ ກິເລໂສ ເຈວ ກິເລສສມ຺ປຍຸຕ຺ຕາ ຈ, ສິຍາ ກິເລສສມ຺ປຍຸຕ຺ຕາ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພາ – ‘‘ກິເລໂສ ເຈວ ກິເລສສມ຺ປຍຸຕ຺ຕາ ຈາ’’ຕິປິ, ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລໂສ’’ຕິປິ. ໂສຬສ ຘາຕຸໂຍ ກິເລສວິປ຺ປຍຸຕ຺ຕສໍກິເລສິກາ. ທ຺ເວ ຘາຕຸໂຍ ສິຍາ ກິເລສວິປ຺ປຍຸຕ຺ຕສໍກິເລສິກາ, ສິຍາ ກິເລສວິປ຺ປຍຸຕ຺ຕອສໍກິເລສິກາ, ສິຍາ ນ ວຕ຺ຕພ຺ພາ – ‘‘ກິເລສວິປ຺ປຍຸຕ຺ຕສໍກິເລສິກາ’’ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກາ’’ຕິປິ.

ໂສຬສ ຘາຕຸໂຍ ນ ທສ຺ສເນນ ປຫາຕພ຺ພາ. ທ຺ເວ ຘາຕຸໂຍ ສິຍາ ທສ຺ສເນນ ປຫາຕພ຺ພາ, ສິຍາ ນ ທສ຺ສເນນ ປຫາຕພ຺ພາ. ໂສຬສ ຘາຕຸໂຍ ນ ຠາວນາຍ ປຫາຕພ຺ພາ. ທ຺ເວ ຘາຕຸໂຍ ສິຍາ ຠາວນາຍ ປຫາຕພ຺ພາ, ສິຍາ ນ ຠາວນາຍ ປຫາຕພ຺ພາ. ໂສຬສ ຘາຕຸໂຍ ນ ທສ຺ສເນນ ປຫາຕພ຺ພເຫຕຸກາ. ທ຺ເວ ຘາຕຸໂຍ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ນ ທສ຺ສເນນ ປຫາຕພ຺ພເຫຕຸກາ. ໂສຬສ ຘາຕຸໂຍ ນ ຠາວນາຍ ປຫາຕພ຺ພເຫຕຸກາ. ທ຺ເວ ຘາຕຸໂຍ ສິຍາ ຠາວນາຍ ປຫາຕພ຺ພເຫຕຸກາ, ສິຍາ ນ ຠາວນາຍ ປຫາຕພ຺ພເຫຕຸກາ.

ປນ຺ນຣສ ຘາຕຸໂຍ ອວິຕກ຺ກາ. ມໂນຘາຕຸ ສວິຕກ຺ກາ. ທ຺ເວ ຘາຕຸໂຍ ສິຍາ ສວິຕກ຺ກາ, ສິຍາ ອວິຕກ຺ກາ. ປນ຺ນຣສ ຘາຕຸໂຍ ອວິຈາຣາ. ມໂນຘາຕຸ ສວິຈາຣາ. ທ຺ເວ ຘາຕຸໂຍ ສິຍາ ສວິຈາຣາ, ສິຍາ ອວິຈາຣາ. ໂສຬສ ຘາຕຸໂຍ ອປ຺ປີຕິກາ. ທ຺ເວ ຘາຕຸໂຍ ສິຍາ ສປ຺ປີຕິກາ, ສິຍາ ອປ຺ປີຕິກາ. ໂສຬສ ຘາຕຸໂຍ ນ ປີຕິສຫຄຕາ. ທ຺ເວ ຘາຕຸໂຍ ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ປນ຺ນຣສ ຘາຕຸໂຍ ນ ສຸຂສຫຄຕາ. ຕິສ຺ໂສ ຘາຕຸໂຍ ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ເອກາທສ ຘາຕຸໂຍ ນ ອຸເປກ຺ຂາສຫຄຕາ. ປຎ຺ຈ ຘາຕຸໂຍ ອຸເປກ຺ຂາສຫຄຕາ. ທ຺ເວ ຘາຕຸໂຍ ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ.

ໂສຬສ ຘາຕຸໂຍ ກາມາວຈຣາ. ທ຺ເວ ຘາຕຸໂຍ ສິຍາ ກາມາວຈຣາ, ສິຍາ ນ ກາມາວຈຣາ. ໂສຬສ ຘາຕຸໂຍ ນ ຣູປາວຈຣາ. ທ຺ເວ ຘາຕຸໂຍ ສິຍາ ຣູປາວຈຣາ, ສິຍາ ນ ຣູປາວຈຣາ. ໂສຬສ ຘາຕຸໂຍ ນ ອຣູປາວຈຣາ. ທ຺ເວ ຘາຕຸໂຍ ສິຍາ ອຣູປາວຈຣາ, ສິຍາ ນ ອຣູປາວຈຣາ. ໂສຬສ ຘາຕຸໂຍ ປຣິຍາປນ຺ນາ. ທ຺ເວ ຘາຕຸໂຍ ສິຍາ ປຣິຍາປນ຺ນາ, ສິຍາ ອປຣິຍາປນ຺ນາ. ໂສຬສ ຘາຕຸໂຍ ອນິຍ຺ຍານິກາ. ທ຺ເວ ຘາຕຸໂຍ ສິຍາ ນິຍ຺ຍານິກາ, ສິຍາ ອນິຍ຺ຍານິກາ. ໂສຬສ ຘາຕຸໂຍ ອນິຍຕາ. ທ຺ເວ ຘາຕຸໂຍ ສິຍາ ນິຍຕາ, ສິຍາ ອນິຍຕາ. ໂສຬສ ຘາຕຸໂຍ ສອຸຕ຺ຕຣາ. ທ຺ເວ ຘາຕຸໂຍ ສິຍາ ສອຸຕ຺ຕຣາ, ສິຍາ ອນຸຕ຺ຕຣາ. ໂສຬສ ຘາຕຸໂຍ ອຣຓາ. ທ຺ເວ ຘາຕຸໂຍ ສິຍາ ສຣຓາ, ສິຍາ ອຣຓາຕິ.

ປຎ຺ຫາປຸຈ຺ຉກໍ.

ຘາຕຸວິຠງ຺ໂຄ ນິຏ຺ຐິໂຕ.