໔. ສຈ຺ຈວິຠງ຺ໂຄ

໑. ສຸຕ຺ຕນ຺ຕຠາຊນີຍໍ

໑໘໙. ຈຕ຺ຕາຣິ ອຣິຍສຈ຺ຈານິ – ທຸກ຺ຂໍ ອຣິຍສຈ຺ຈໍ, ທຸກ຺ຂສມຸທຍໍ [ທຸກ຺ຂສມຸທໂຍ (ສ຺ຍາ.)] ອຣິຍສຈ຺ຈໍ, ທຸກ຺ຂນິໂຣຘໍ [ທຸກ຺ຂນິໂຣໂຘ (ສ຺ຍາ.)] ອຣິຍສຈ຺ຈໍ, ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈໍ.

໑. ທຸກ຺ຂສຈ຺ຈໍ

໑໙໐. ຕຕ຺ຖ ກຕມໍ ທຸກ຺ຂໍ ອຣິຍສຈ຺ຈໍ? ຊາຕິປິ ທຸກ຺ຂາ, ຊຣາປິ ທຸກ຺ຂາ, ມຣຓມ຺ປິ ທຸກ຺ຂໍ, ໂສກປຣິເທວທຸກ຺ຂໂທມນສ຺ສຸປາຍາສາປິ ທຸກ຺ຂາ, ອປ຺ປິເຍຫິ ສມ຺ປໂຍໂຄ ທຸກ຺ໂຂ, ປິເຍຫິ ວິປ຺ປໂຍໂຄ ທຸກ຺ໂຂ, ຍໍ ປິຈ຺ຉໍ ນ ລຠຕິ ຕມ຺ປິ ທຸກ຺ຂໍ, ສໍຂິຕ຺ເຕນ ປຎ຺ຈຸປາທານກ຺ຂນ຺ຘາ ທຸກ຺ຂາ.

໑໙໑. ຕຕ຺ຖ ກຕມາ ຊາຕິ? ຍາ ເຕສໍ ເຕສໍ ສຕ຺ຕານໍ ຕມ຺ຫິ ຕມ຺ຫິ ສຕ຺ຕນິກາເຍ ຊາຕິ ສຎ຺ຊາຕິ ໂອກ຺ກນ຺ຕິ ອຠິນິພ຺ພຕ຺ຕິ ຂນ຺ຘານໍ ປາຕຸຠາໂວ ອາຍຕນານໍ ປຏິລາໂຠ – ອຍໍ ວຸຈ຺ຈຕິ ‘‘ຊາຕິ’’.

໑໙໒. ຕຕ຺ຖ ກຕມາ ຊຣາ? ຍາ ເຕສໍ ເຕສໍ ສຕ຺ຕານໍ ຕມ຺ຫິ ຕມ຺ຫິ ສຕ຺ຕນິກາເຍ ຊຣາ ຊີຣຓຕາ ຂຓ຺ຑິຈ຺ຈໍ ປາລິຈ຺ຈໍ ວລິຕ຺ຕຈຕາ ອາຍຸໂນ ສໍຫານິ ອິນ຺ທ຺ຣິຍານໍ ປຣິປາໂກ – ອຍໍ ວຸຈ຺ຈຕິ ‘‘ຊຣາ’’.

໑໙໓. ຕຕ຺ຖ ກຕມໍ ມຣຓໍ? ຍາ ເຕສໍ ເຕສໍ ສຕ຺ຕານໍ ຕມ຺ຫາ ຕມ຺ຫາ ສຕ຺ຕນິກາຍາ ຈຸຕິ ຈວນຕາ ເຠໂທ ອນ຺ຕຣຘານໍ ມຈ຺ຈຸ ມຣຓໍ ກາລກິຣິຍາ ຂນ຺ຘານໍ ເຠໂທ ກເຬວຣສ຺ສ ນິກ຺ເຂໂປ ຊີວິຕິນ຺ທ຺ຣິຍສ຺ສຸປຈ຺ເຉໂທ – ອິທໍ ວຸຈ຺ຈຕິ ‘‘ມຣຓໍ’’.

໑໙໔. ຕຕ຺ຖ ກຕໂມ ໂສໂກ? ຎາຕິພ຺ຍສເນນ ວາ ຜຸຏ຺ຐສ຺ສ ໂຠຄພ຺ຍສເນນ ວາ ຜຸຏ຺ຐສ຺ສ ໂຣຄພ຺ຍສເນນ ວາ ຜຸຏ຺ຐສ຺ສ ສີລພ຺ຍສເນນ ວາ ຜຸຏ຺ຐສ຺ສ ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ໂສໂກ ໂສຈນາ ໂສຈິຕຕ຺ຕໍ ອນ຺ໂຕໂສໂກ ອນ຺ໂຕປຣິໂສໂກ ເຈຕໂສ ປຣິຊ຺ຌາຍນາ ໂທມນສ຺ສໍ ໂສກສລ຺ລໍ – ອຍໍ ວຸຈ຺ຈຕິ ‘‘ໂສໂກ’’.

໑໙໕. ຕຕ຺ຖ ກຕໂມ ປຣິເທໂວ? ຎາຕິພ຺ຍສເນນ ວາ ຜຸຏ຺ຐສ຺ສ ໂຠຄພ຺ຍສເນນ ວາ ຜຸຏ຺ຐສ຺ສ ໂຣຄພ຺ຍສເນນ ວາ ຜຸຏ຺ຐສ຺ສ ສີລພ຺ຍສເນນ ວາ ຜຸຏ຺ຐສ຺ສ ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາເທໂວ ປຣິເທໂວ ອາເທວນາ ປຣິເທວນາ ອາເທວິຕຕ຺ຕໍ ປຣິເທວິຕຕ຺ຕໍ ວາຈາ ປລາໂປ ວິປ຺ປລາໂປ ລາລປ຺ໂປ ລາລປ຺ປນາ ລາລປ຺ປິຕຕ຺ຕໍ [ລາລໂປ ລາລປນາ ລາລປິຕຕ຺ຕໍ (ສ຺ຍາ.)] – ອຍໍ ວຸຈ຺ຈຕິ ‘‘ປຣິເທໂວ’’.

໑໙໖. ຕຕ຺ຖ ກຕມໍ ທຸກ຺ຂໍ? ຍໍ ກາຍິກໍ ອສາຕໍ ກາຍິກໍ ທຸກ຺ຂໍ ກາຍສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ກາຍສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ທຸກ຺ຂໍ’’.

໑໙໗. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’.

໑໙໘. ຕຕ຺ຖ ກຕໂມ ອຸປາຍາໂສ? ຎາຕິພ຺ຍສເນນ ວາ ຜຸຏ຺ຐສ຺ສ ໂຠຄພ຺ຍສເນນ ວາ ຜຸຏ຺ຐສ຺ສ ໂຣຄພ຺ຍສເນນ ວາ ຜຸຏ຺ຐສ຺ສ ສີລພ຺ຍສເນນ ວາ ຜຸຏ຺ຐສ຺ສ ທິຏ຺ຐິພ຺ຍສເນນ ວາ ຜຸຏ຺ຐສ຺ສ ອຎ຺ຎຕຣຎ຺ຎຕເຣນ ພ຺ຍສເນນ ສມນ຺ນາຄຕສ຺ສ ອຎ຺ຎຕຣຎ຺ຎຕເຣນ ທຸກ຺ຂຘມ຺ເມນ ຜຸຏ຺ຐສ຺ສ ອາຍາໂສ ອຸປາຍາໂສ ອາຍາສິຕຕ຺ຕໍ ອຸປາຍາສິຕຕ຺ຕໍ – ອຍໍ ວຸຈ຺ຈຕິ ‘‘ອຸປາຍາໂສ’’.

໑໙໙. ຕຕ຺ຖ ກຕໂມ ອປ຺ປິເຍຫິ ສມ຺ປໂຍໂຄ ທຸກ຺ໂຂ? ອິຘ ຍສ຺ສ ເຕ ໂຫນ຺ຕິ ອນິຏ຺ຐາ ອກນ຺ຕາ ອມນາປາ ຣູປາ ສທ຺ທາ ຄນ຺ຘາ ຣສາ ໂຜຏ຺ຐພ຺ພາ, ເຍ ວາ ປນສ຺ສ ເຕ ໂຫນ຺ຕິ ອນຕ຺ຖກາມາ ອຫິຕກາມາ ອຜາສຸກກາມາ ອໂຍຄກ຺ເຂມກາມາ; ຍາ ເຕຫິ ສງ຺ຄຕິ ສມາຄໂມ ສໂມຘານໍ ມິສ຺ສີຠາໂວ – ອຍໍ ວຸຈ຺ຈຕິ ‘‘ອປ຺ປິເຍຫິ ສມ຺ປໂຍໂຄ ທຸກ຺ໂຂ’’.

໒໐໐. ຕຕ຺ຖ ກຕໂມ ປິເຍຫິ ວິປ຺ປໂຍໂຄ ທຸກ຺ໂຂ? ອິຘ ຍສ຺ສ ເຕ ໂຫນ຺ຕິ ອິຏ຺ຐາ ກນ຺ຕາ ມນາປາ ຣູປາ ສທ຺ທາ ຄນ຺ຘາ ຣສາ ໂຜຏ຺ຐພ຺ພາ, ເຍ ວາ ປນສ຺ສ ເຕ ໂຫນ຺ຕິ ອຕ຺ຖກາມາ ຫິຕກາມາ ຜາສຸກກາມາ ໂຍຄກ຺ເຂມກາມາ ມາຕາ ວາ ປິຕາ ວາ ຠາຕາ ວາ ຠຄິນີ ວາ ມິຕ຺ຕາ ວາ ອມຈ຺ຈາ ວາ ຎາຕີ ວາ ສາໂລຫິຕາ ວາ; ຍາ ເຕຫິ ອສງ຺ຄຕິ ອສມາຄໂມ ອສໂມຘານໍ ອມິສ຺ສີຠາໂວ – ອຍໍ ວຸຈ຺ຈຕິ ‘‘ປິເຍຫິ ວິປ຺ປໂຍໂຄ ທຸກ຺ໂຂ’’.

໒໐໑. ຕຕ຺ຖ ກຕມໍ ຍມ຺ປິຈ຺ຉໍ ນ ລຠຕິ ຕມ຺ປິ ທຸກ຺ຂໍ? ຊາຕິຘມ຺ມານໍ ສຕ຺ຕານໍ ເອວໍ ອິຈ຺ຉາ ອຸປ຺ປຊ຺ຊຕິ – ‘‘ອໂຫ ວຕ, ມຍໍ ນ ຊາຕິຘມ຺ມາ ອສ຺ສາມ; ນ ຈ, ວຕ, ໂນ ຊາຕິ ອາຄຈ຺ເຉຍ຺ຍາ’’ຕິ! ນ ໂຂ ປເນຕໍ ອິຈ຺ຉາຍ ປຕ຺ຕພ຺ພໍ. ອິທມ຺ປິ ‘‘ຍມ຺ປິຈ຺ຉໍ ນ ລຠຕິ ຕມ຺ປິ ທຸກ຺ຂໍ’’.

ຊຣາຘມ຺ມານໍ ສຕ຺ຕານໍ…ເປ… ພ຺ຍາຘິຘມ຺ມານໍ ສຕ຺ຕານໍ…ເປ… ມຣຓຘມ຺ມານໍ ສຕ຺ຕານໍ…ເປ… ໂສກປຣິເທວທຸກ຺ຂໂທມນສ຺ສຸປາຍາສຘມ຺ມານໍ ສຕ຺ຕານໍ ເອວໍ ອິຈ຺ຉາ ອຸປ຺ປຊ຺ຊຕິ – ‘‘ອໂຫ ວຕ, ມຍໍ ນ ໂສກປຣິເທວທຸກ຺ຂໂທມນສ຺ສຸປາຍາສຘມ຺ມາ ອສ຺ສາມ; ນ ຈ, ວຕ, ໂນ ໂສກປຣິເທວທຸກ຺ຂໂທມນສ຺ສຸປາຍາສາ ອາຄຈ຺ເຉຍ຺ຍຸ’’ນ຺ຕິ! ນ ໂຂ ປເນຕໍ ອິຈ຺ຉາຍ ປຕ຺ຕພ຺ພໍ. ອິທມ຺ປິ ‘‘ຍມ຺ປິຈ຺ຉໍ ນ ລຠຕິ ຕມ຺ປິ ທຸກ຺ຂໍ’’.

໒໐໒. ຕຕ຺ຖ ກຕເມ ສໍຂິຕ຺ເຕນ ປຎ຺ຈຸປາທານກ຺ຂນ຺ຘາ ທຸກ຺ຂາ? ເສຍ຺ຍຖິທໍ – ຣູປຸປາທານກ຺ຂນ຺ໂຘ, ເວທນຸປາທານກ຺ຂນ຺ໂຘ, ສຎ຺ຎຸປາທານກ຺ຂນ຺ໂຘ, ສງ຺ຂາຣຸປາທານກ຺ຂນ຺ໂຘ, ວິຎ຺ຎາຓຸປາທານກ຺ຂນ຺ໂຘ. ອິເມ ວຸຈ຺ຈນ຺ຕິ ‘‘ສໍຂິຕ຺ເຕນ ປຎ຺ຈຸປາທານກ຺ຂນ຺ຘາ ທຸກ຺ຂາ’’.

ອິທໍ ວຸຈ຺ຈຕິ ‘‘ທຸກ຺ຂໍ ອຣິຍສຈ຺ຈໍ’’.

໒. ສມຸທຍສຈ຺ຈໍ

໒໐໓. ຕຕ຺ຖ ກຕມໍ ທຸກ຺ຂສມຸທຍໍ ອຣິຍສຈ຺ຈໍ? ຍາຍໍ ຕຓ຺ຫາ ໂປໂນຠວິກາ [ໂປໂນພ຺ຠວິກາ (ສ຺ຍາ. ກ.)] ນນ຺ທິຣາຄສຫຄຕາ ຕຕ຺ຣຕຕ຺ຣາຠິນນ຺ທິນີ, ເສຍ຺ຍຖິທໍ – ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ.

ສາ ໂຂ ປເນສາ ຕຓ຺ຫາ ກຕ຺ຖ ອຸປ຺ປຊ຺ຊມານາ ອຸປ຺ປຊ຺ຊຕິ, ກຕ຺ຖ ນິວິສມານາ ນິວິສຕິ? ຍໍ ໂລເກ ປິຍຣູປໍ ສາຕຣູປໍ, ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ກິຎ຺ຈ ໂລເກ ປິຍຣູປໍ ສາຕຣູປໍ? ຈກ຺ຂຸໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂສຕໍ ໂລເກ…ເປ… ຆານໍ ໂລເກ… ຊິວ຺ຫາ ໂລເກ… ກາໂຍ ໂລເກ… ມໂນ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທາ ໂລເກ…ເປ… ຄນ຺ຘາ ໂລເກ… ຣສາ ໂລເກ… ໂຜຏ຺ຐພ຺ພາ ໂລເກ… ຘມ຺ມາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຈກ຺ຂຸວິຎ຺ຎາຓໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂສຕວິຎ຺ຎາຓໍ ໂລເກ…ເປ… ຆານວິຎ຺ຎາຓໍ ໂລເກ… ຊິວ຺ຫາວິຎ຺ຎາຓໍ ໂລເກ… ກາຍວິຎ຺ຎາຓໍ ໂລເກ… ມໂນວິຎ຺ຎາຓໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຈກ຺ຂຸສມ຺ຜສ຺ໂສ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂສຕສມ຺ຜສ຺ໂສ ໂລເກ…ເປ… ຆານສມ຺ຜສ຺ໂສ ໂລເກ… ຊິວ຺ຫາສມ຺ຜສ຺ໂສ ໂລເກ… ກາຍສມ຺ຜສ຺ໂສ ໂລເກ… ມໂນສມ຺ຜສ຺ໂສ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຈກ຺ຂຸສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂສຕສມ຺ຜສ຺ສຊາ ເວທນາ ໂລເກ…ເປ… ຆານສມ຺ຜສ຺ສຊາ ເວທນາ ໂລເກ… ຊິວ຺ຫາສມ຺ຜສ຺ສຊາ ເວທນາ ໂລເກ… ກາຍສມ຺ຜສ຺ສຊາ ເວທນາ ໂລເກ… ມໂນສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປສຎ຺ຎາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທສຎ຺ຎາ ໂລເກ…ເປ… ຄນ຺ຘສຎ຺ຎາ ໂລເກ… ຣສສຎ຺ຎາ ໂລເກ… ໂຜຏ຺ຐພ຺ພສຎ຺ຎາ ໂລເກ… ຘມ຺ມສຎ຺ຎາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປສຎ຺ເຈຕນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທສຎ຺ເຈຕນາ ໂລເກ…ເປ… ຄນ຺ຘສຎ຺ເຈຕນາ ໂລເກ… ຣສສຎ຺ເຈຕນາ ໂລເກ… ໂຜຏ຺ຐພ຺ພສຎ຺ເຈຕນາ ໂລເກ… ຘມ຺ມສຎ຺ເຈຕນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປຕຓ຺ຫາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທຕຓ຺ຫາ ໂລເກ…ເປ… ຄນ຺ຘຕຓ຺ຫາ ໂລເກ… ຣສຕຓ຺ຫາ ໂລເກ… ໂຜຏ຺ຐພ຺ພຕຓ຺ຫາ ໂລເກ… ຘມ຺ມຕຓ຺ຫາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປວິຕກ຺ໂກ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທວິຕກ຺ໂກ ໂລເກ…ເປ… ຄນ຺ຘວິຕກ຺ໂກ ໂລເກ… ຣສວິຕກ຺ໂກ ໂລເກ… ໂຜຏ຺ຐພ຺ພວິຕກ຺ໂກ ໂລເກ… ຘມ຺ມວິຕກ຺ໂກ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ຣູປວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ສທ຺ທວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ຄນ຺ຘວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ຣສວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂຜຏ຺ຐພ຺ພວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ຘມ຺ມວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ.

ອິທໍ ວຸຈ຺ຈຕິ ‘‘ທຸກ຺ຂສມຸທຍໍ ອຣິຍສຈ຺ຈໍ’’.

໓. ນິໂຣຘສຈ຺ຈໍ

໒໐໔. ຕຕ຺ຖ ກຕມໍ ທຸກ຺ຂນິໂຣຘໍ ອຣິຍສຈ຺ຈໍ? ໂຍ ຕສ຺ສາເຍວ ຕຓ຺ຫາຍ ອເສສວິຣາຄນິໂຣໂຘ ຈາໂຄ ປຏິນິສ຺ສຄ຺ໂຄ ມຸຕ຺ຕິ ອນາລໂຍ.

ສາ ໂຂ ປເນສາ ຕຓ຺ຫາ ກຕ຺ຖ ປຫີຍມານາ ປຫີຍຕິ, ກຕ຺ຖ ນິຣຸຊ຺ຌມານາ ນິຣຸຊ຺ຌຕິ? ຍໍ ໂລເກ ປິຍຣູປໍ ສາຕຣູປໍ, ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ກິຎ຺ຈ ໂລເກ ປິຍຣູປໍ ສາຕຣູປໍ? ຈກ຺ຂຸໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ. ໂສຕໍ ໂລເກ…ເປ… ຆານໍ ໂລເກ… ຊິວ຺ຫາ ໂລເກ… ກາໂຍ ໂລເກ… ມໂນ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ. ສທ຺ທາ ໂລເກ…ເປ… ຄນ຺ຘາ ໂລເກ… ຣສາ ໂລເກ… ໂຜຏ຺ຐພ຺ພາ ໂລເກ… ຘມ຺ມາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຈກ຺ຂຸວິຎ຺ຎາຓໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ. ໂສຕວິຎ຺ຎາຓໍ ໂລເກ…ເປ… ຆານວິຎ຺ຎາຓໍ ໂລເກ… ຊິວ຺ຫາວິຎ຺ຎາຓໍ ໂລເກ… ກາຍວິຎ຺ຎາຓໍ ໂລເກ… ມໂນວິຎ຺ຎາຓໍ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຈກ຺ຂຸສມ຺ຜສ຺ໂສ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ. ໂສຕສມ຺ຜສ຺ໂສ ໂລເກ…ເປ… ຆານສມ຺ຜສ຺ໂສ ໂລເກ… ຊິວ຺ຫາສມ຺ຜສ຺ໂສ ໂລເກ… ກາຍສມ຺ຜສ຺ໂສ ໂລເກ… ມໂນສມ຺ຜສ຺ໂສ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຈກ຺ຂຸສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ. ໂສຕສມ຺ຜສ຺ສຊາ ເວທນາ ໂລເກ…ເປ… ຆານສມ຺ຜສ຺ສຊາ ເວທນາ ໂລເກ… ຊິວ຺ຫາສມ຺ຜສ຺ສຊາ ເວທນາ ໂລເກ… ກາຍສມ຺ຜສ຺ສຊາ ເວທນາ ໂລເກ… ມໂນສມ຺ຜສ຺ສຊາ ເວທນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປສຎ຺ຎາ ໂລເກ… ສທ຺ທສຎ຺ຎາ ໂລເກ… ຄນ຺ຘສຎ຺ຎາ ໂລເກ… ຣສສຎ຺ຎາ ໂລເກ… ໂຜຏ຺ຐພ຺ພສຎ຺ຎາ ໂລເກ… ຘມ຺ມສຎ຺ຎາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປສຎ຺ເຈຕນາ ໂລເກ… ສທ຺ທສຎ຺ເຈຕນາ ໂລເກ… ຄນ຺ຘສຎ຺ເຈຕນາ ໂລເກ… ຣສສຎ຺ເຈຕນາ ໂລເກ… ໂຜຏ຺ຐພ຺ພສຎ຺ເຈຕນາ ໂລເກ… ຘມ຺ມສຎ຺ເຈຕນາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປຕຓ຺ຫາ ໂລເກ… ສທ຺ທຕຓ຺ຫາ ໂລເກ… ຄນ຺ຘຕຓ຺ຫາ ໂລເກ… ຣສຕຓ຺ຫາ ໂລເກ… ໂຜຏ຺ຐພ຺ພຕຓ຺ຫາ ໂລເກ… ຘມ຺ມຕຓ຺ຫາ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປວິຕກ຺ໂກ ໂລເກ… ສທ຺ທວິຕກ຺ໂກ ໂລເກ… ຄນ຺ຘວິຕກ຺ໂກ ໂລເກ… ຣສວິຕກ຺ໂກ ໂລເກ… ໂຜຏ຺ຐພ຺ພວິຕກ຺ໂກ ໂລເກ… ຘມ຺ມວິຕກ຺ໂກ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ຣູປວິຈາໂຣ ໂລເກ… ສທ຺ທວິຈາໂຣ ໂລເກ… ຄນ຺ຘວິຈາໂຣ ໂລເກ… ຣສວິຈາໂຣ ໂລເກ… ໂຜຏ຺ຐພ຺ພວິຈາໂຣ ໂລເກ… ຘມ຺ມວິຈາໂຣ ໂລເກ ປິຍຣູປໍ ສາຕຣູປໍ. ເອຕ຺ເຖສາ ຕຓ຺ຫາ ປຫີຍມານາ ປຫີຍຕິ, ເອຕ຺ຖ ນິຣຸຊ຺ຌມານາ ນິຣຸຊ຺ຌຕິ.

ອິທໍ ວຸຈ຺ຈຕິ ‘‘ທຸກ຺ຂນິໂຣຘໍ ອຣິຍສຈ຺ຈໍ’’.

໔. ມຄ຺ຄສຈ຺ຈໍ

໒໐໕. ຕຕ຺ຖ ກຕມໍ ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈໍ? ອຍເມວ ອຣິໂຍ ອຏ຺ຐງ຺ຄິໂກ ມຄ຺ໂຄ, ເສຍ຺ຍຖິທໍ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຈາ, ສມ຺ມາກມ຺ມນ຺ໂຕ, ສມ຺ມາອາຊີໂວ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ.

ຕຕ຺ຖ ກຕມາ ສມ຺ມາທິຏ຺ຐິ? ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ, ທຸກ຺ຂນິໂຣເຘ ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ – ອຍໍ ວຸຈ຺ຈຕິ ‘‘ສມ຺ມາທິຏ຺ຐິ’’.

ຕຕ຺ຖ ກຕໂມ ສມ຺ມາສງ຺ກປ຺ໂປ? ເນກ຺ຂມ຺ມສງ຺ກປ຺ໂປ, ອພ຺ຍາປາທສງ຺ກປ຺ໂປ, ອວິຫິໍສາສງ຺ກປ຺ໂປ – ອຍໍ ວຸຈ຺ຈຕິ ‘‘ສມ຺ມາສງ຺ກປ຺ໂປ’’.

ຕຕ຺ຖ ກຕມາ ສມ຺ມາວາຈາ? ມຸສາວາທາ ເວຣມຓີ, ປິສຸຓາຍ ວາຈາຍ ເວຣມຓີ, ຜຣຸສາຍ ວາຈາຍ ເວຣມຓີ, ສມ຺ຜປ຺ປລາປາ ເວຣມຓີ – ອຍໍ ວຸຈ຺ຈຕິ ‘‘ສມ຺ມາວາຈາ’’.

ຕຕ຺ຖ ກຕໂມ ສມ຺ມາກມ຺ມນ຺ໂຕ? ປາຓາຕິປາຕາ ເວຣມຓີ, ອທິນ຺ນາທານາ ເວຣມຓີ, ກາເມສຸມິຈ຺ຉາຈາຣາ ເວຣມຓີ – ອຍໍ ວຸຈ຺ຈຕິ ‘‘ສມ຺ມາກມ຺ມນ຺ໂຕ’’.

ຕຕ຺ຖ ກຕໂມ ສມ຺ມາອາຊີໂວ? ອິຘ ອຣິຍສາວໂກ ມິຈ຺ຉາອາຊີວໍ ປຫາຍ ສມ຺ມາອາຊີເວນ ຊີວິກໍ ກປ຺ເປຕິ – ອຍໍ ວຸຈ຺ຈຕິ ‘‘ສມ຺ມາອາຊີໂວ’’.

ຕຕ຺ຖ ກຕໂມ ສມ຺ມາວາຍາໂມ? ອິຘ ຠິກ຺ຂຸ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ, ວາຍມຕິ, ວີຣິຍໍ ອາຣຠຕິ, ຈິຕ຺ຕໍ ປຄ຺ຄຓ຺ຫາຕິ, ປທຫຕິ. ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ, ວາຍມຕິ, ວີຣິຍໍ ອາຣຠຕິ, ຈິຕ຺ຕໍ ປຄ຺ຄຓ຺ຫາຕິ, ປທຫຕິ. ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ, ວາຍມຕິ, ວີຣິຍໍ ອາຣຠຕິ, ຈິຕ຺ຕໍ ປຄ຺ຄຓ຺ຫາຕິ, ປທຫຕິ. ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ, ວາຍມຕິ, ວີຣິຍໍ ອາຣຠຕິ, ຈິຕ຺ຕໍ ປຄ຺ຄຓ຺ຫາຕິ, ປທຫຕິ. ອຍໍ ວຸຈ຺ຈຕິ ‘‘ສມ຺ມາວາຍາໂມ’’.

ຕຕ຺ຖ ກຕມາ ສມ຺ມາສຕິ? ອິຘ ຠິກ຺ຂຸ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ເວທນາສຸ…ເປ… ຈິຕ຺ເຕ…ເປ… ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ອຍໍ ວຸຈ຺ຈຕິ ‘‘ສມ຺ມາສຕິ’’.

ຕຕ຺ຖ ກຕໂມ ສມ຺ມາສມາຘິ? ອິຘ ຠິກ຺ຂຸ ວິວິຈ຺ເຈວ ກາເມຫິ, ວິວິຈ຺ຈ ອກຸສເລຫິ ຘມ຺ເມຫິ, ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫຣຕິ. ວິຕກ຺ກວິຈາຣານໍ ວູປສມາ, ອຊ຺ຌຕ຺ຕໍ ສມ຺ປສາທນໍ, ເຈຕໂສ ເອໂກທິຠາວໍ ອວິຕກ຺ກໍ ອວິຈາຣໍ ສມາຘິຊໍ ປີຕິສຸຂໍ ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ. ປີຕິຍາ ຈ ວິຣາຄາ, ອຸເປກ຺ຂໂກ ຈ ວິຫຣຕິ, ສໂຕ ຈ ສມ຺ປຊາໂນ, ສຸຂຎ຺ຈ ກາເຍນ ປຏິສໍເວເທຕິ, ຍໍ ຕໍ ອຣິຍາ ອາຈິກ຺ຂນ຺ຕິ – ‘‘ອຸເປກ຺ຂໂກ ສຕິມາ ສຸຂວິຫາຣີ’’ຕິ, ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ. ສຸຂສ຺ສ ຈ ປຫານາ, ທຸກ຺ຂສ຺ສ ຈ ປຫານາ, ປຸພ຺ເພວ ໂສມນສ຺ສໂທມນສ຺ສານໍ ອຕ຺ຖງ຺ຄມາ, ອທຸກ຺ຂມສຸຂໍ ອຸເປກ຺ຂາສຕິປາຣິສຸທ຺ຘິໍ ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ. ອຍໍ ວຸຈ຺ຈຕິ ‘‘ສມ຺ມາສມາຘິ’’.

ອິທໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈໍ’’.

ສຸຕ຺ຕນ຺ຕຠາຊນີຍໍ.

໒. ອຠິຘມ຺ມຠາຊນີຍໍ

໒໐໖. ຈຕ຺ຕາຣິ ສຈ຺ຈານິ – ທຸກ຺ຂໍ, ທຸກ຺ຂສມຸທໂຍ, ທຸກ຺ຂນິໂຣໂຘ, ທຸກ຺ຂນິໂຣຘຄາມິນີ ປຏິປທາ.

ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມໍ ທຸກ຺ຂໍ? ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ, ສາສວາ ຈ ກຸສລາກຸສລານໍ ຘມ຺ມານໍ ວິປາກາ, ເຍ ຈ ຘມ຺ມາ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ, ສພ຺ພຎ຺ຈ ຣູປໍ – ອິທໍ ວຸຈ຺ຈຕິ ‘‘ທຸກ຺ຂໍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ສມ຺ມາທິຏ຺ຐິ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາທິຏ຺ຐິ’’.

ຕຕ຺ຖ ກຕໂມ ສມ຺ມາສງ຺ກປ຺ໂປ? ໂຍ ຕກ຺ໂກ ວິຕກ຺ໂກ…ເປ… ສມ຺ມາສງ຺ກປ຺ໂປ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາສງ຺ກປ຺ໂປ’’.

ຕຕ຺ຖ ກຕມາ ສມ຺ມາວາຈາ? ຍາ ຈຕູຫິ ວຈີທຸຈ຺ຈຣິເຕຫິ ອາຣຕິ ວິຣຕິ ປຏິວິຣຕິ ເວຣມຓີ [ເວຣມຓິ (ກ.) ເອວມຸປຣິປິ] ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາວາຈາ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາວາຈາ’’.

ຕຕ຺ຖ ກຕໂມ ສມ຺ມາກມ຺ມນ຺ໂຕ? ຍາ ຕີຫິ ກາຍທຸຈ຺ຈຣິເຕຫິ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາກມ຺ມນ຺ໂຕ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາກມ຺ມນ຺ໂຕ’’.

ຕຕ຺ຖ ກຕໂມ ສມ຺ມາອາຊີໂວ? ຍາ ມິຈ຺ຉາ ອາຊີວາ ອາຣຕິ ວິຣຕິ ປຏິວິຣຕິ ເວຣມຓີ ອກິຣິຍາ ອກຣຓໍ ອນຊ຺ຌາປຕ຺ຕິ ເວລາອນຕິກ຺ກໂມ ເສຕຸຆາໂຕ ສມ຺ມາອາຊີໂວ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາອາຊີໂວ’’.

ຕຕ຺ຖ ກຕໂມ ສມ຺ມາວາຍາໂມ? ໂຍ ເຈຕສິໂກ ວີຣິຍາຣມ຺ໂຠ [ວິຣິຍາຣມ຺ໂຠ (ສີ. ສ຺ຍາ.)] …ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາວາຍາໂມ’’.

ຕຕ຺ຖ ກຕມາ ສມ຺ມາສຕິ? ຍາ ສຕິ ອນຸສ຺ສຕິ…ເປ… ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາສຕິ’’.

ຕຕ຺ຖ ກຕໂມ ສມ຺ມາສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາສມາຘິ’’. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໐໗. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ ອວເສສາ ຈ ກິເລສາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມໍ ທຸກ຺ຂໍ? ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ, ສາສວາ ຈ ກຸສລາກຸສລານໍ ຘມ຺ມານໍ ວິປາກາ, ເຍ ຈ ຘມ຺ມາ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ, ສພ຺ພຎ຺ຈ ຣູປໍ – ອິທໍ ວຸຈ຺ຈຕິ ‘‘ທຸກ຺ຂໍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ຈ, ອວເສສານຎ຺ຈ ກິເລສານໍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ, ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອຏ຺ຐງ຺ຄິໂກ ມຄ຺ໂຄ ໂຫຕິ – ສມ຺ມາທິຏ຺ຐິ…ເປ… ສມ຺ມາສມາຘິ. ອຍໍ ວຸຈ຺ຈຕິ – ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໐໘. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມໍ ທຸກ຺ຂໍ? ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ, ສາສວາ ຈ ກຸສລາກຸສລານໍ ຘມ຺ມານໍ ວິປາກາ, ເຍ ຈ ຘມ຺ມາ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ, ສພ຺ພຎ຺ຈ ຣູປໍ – ອິທໍ ວຸຈ຺ຈຕິ ‘‘ທຸກ຺ຂໍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ຈ, ອວເສສານຎ຺ຈ ກິເລສານໍ, ອວເສສານຎ຺ຈ ອກຸສລານໍ ຘມ຺ມານໍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອຏ຺ຐງ຺ຄິໂກ ມຄ຺ໂຄ ໂຫຕິ – ສມ຺ມາທິຏ຺ຐິ…ເປ… ສມ຺ມາສມາຘິ. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໐໙. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມໍ ທຸກ຺ຂໍ? ອວເສສາ ຈ ສາສວາ ກຸສລາ ຘມ຺ມາ, ສາສວາ ຈ ກຸສລາກຸສລານໍ ຘມ຺ມານໍ ວິປາກາ, ເຍ ຈ ຘມ຺ມາ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ, ສພ຺ພຎ຺ຈ ຣູປໍ – ອິທໍ ວຸຈ຺ຈຕິ ‘‘ທຸກ຺ຂໍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ຈ, ອວເສສານຎ຺ຈ ກິເລສານໍ, ອວເສສານຎ຺ຈ ອກຸສລານໍ ຘມ຺ມານໍ, ຕິຓ຺ຓຎ຺ຈ ກຸສລມູລານໍ ສາສວານໍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

໒໑໐. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ, ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມໍ ທຸກ຺ຂໍ? ສາສວາ ກຸສລາກຸສລານໍ ຘມ຺ມານໍ ວິປາກາ, ເຍ ຈ ຘມ຺ມາ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ, ສພ຺ພຎ຺ຈ ຣູປໍ – ອິທໍ ວຸຈ຺ຈຕິ ‘‘ທຸກ຺ຂໍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ຈ, ອວເສສານຎ຺ຈ ກິເລສານໍ, ອວເສສານຎ຺ຈ ອກຸສລານໍ ຘມ຺ມານໍ, ຕິຓ຺ຓຎ຺ຈ ກຸສລມູລານໍ ສາສວານໍ, ອວເສສານຎ຺ຈ ສາສວານໍ ກຸສລານໍ ຘມ຺ມານໍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ, ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອຏ຺ຐງ຺ຄິໂກ ມຄ຺ໂຄ ໂຫຕິ – ສມ຺ມາທິຏ຺ຐິ…ເປ… ສມ຺ມາສມາຘິ. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໑໑. ຈຕ຺ຕາຣິ ສຈ຺ຈານິ – ທຸກ຺ຂໍ, ທຸກ຺ຂສມຸທໂຍ, ທຸກ຺ຂນິໂຣໂຘ, ທຸກ຺ຂນິໂຣຘຄາມິນີ ປຏິປທາ.

ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ, ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ປຎ຺ຈງ຺ຄິໂກ ມຄ຺ໂຄ ໂຫຕິ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ.

ຕຕ຺ຖ ກຕໂມ ສມ຺ມາວາຍາໂມ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາວາຍາໂມ’’.

ຕຕ຺ຖ ກຕໂມ ສມ຺ມາສມາຘິ? ຍາ ຈິຕ຺ຕສ຺ສ ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມ຺ມາສມາຘິ’’. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໑໒. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ, ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ, ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ປຎ຺ຈງ຺ຄິໂກ ມຄ຺ໂຄ ໂຫຕິ – ສມ຺ມາທິຏ຺ຐິ, ສມ຺ມາສງ຺ກປ຺ໂປ, ສມ຺ມາວາຍາໂມ, ສມ຺ມາສຕິ, ສມ຺ມາສມາຘິ. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’. ອວເສສາ ຘມ຺ມາ ທຸກ຺ຂນິໂຣຘຄາມິນິຍາ ປຏິປທາຍ ສມ຺ປຍຸຕ຺ຕາ.

໒໑໓. ຈຕ຺ຕາຣິ ສຈ຺ຈານິ – ທຸກ຺ຂໍ, ທຸກ຺ຂສມຸທໂຍ, ທຸກ຺ຂນິໂຣໂຘ, ທຸກ຺ຂນິໂຣຘຄາມິນີ ປຏິປທາ.

ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕໂມ ທຸກ຺ຂນິໂຣໂຘ? ຕຓ຺ຫາຍ ປຫານໍ – ອຍໍ ວຸຈ຺ຈຕິ ‘‘ທຸກ຺ຂນິໂຣໂຘ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’.

໒໑໔. ຕຕ຺ຖ ກຕໂມ ທຸກ຺ຂສມຸທໂຍ? ຕຓ຺ຫາ ຈ, ອວເສສາ ຈ ກິເລສາ, ອວເສສາ ຈ ອກຸສລາ ຘມ຺ມາ, ຕີຓິ ຈ ກຸສລມູລານິ ສາສວານິ, ອວເສສາ ຈ ສາສວາ ກຸສລາ ຘມ຺ມາ – ອຍໍ ວຸຈ຺ຈຕິ ‘‘ທຸກ຺ຂສມຸທໂຍ’’.

ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອຍໍ ວຸຈ຺ຈຕິ ‘‘ທຸກ຺ຂນິໂຣຘຄາມິນີ ປຏິປທາ’’.

ອຠິຘມ຺ມຠາຊນີຍໍ.

໓. ປຎ຺ຫາປຸຈ຺ຉກໍ

໒໑໕. ຈຕ຺ຕາຣິ ອຣິຍສຈ຺ຈານິ – ທຸກ຺ຂໍ ອຣິຍສຈ຺ຈໍ, ທຸກ຺ຂສມຸທຍໍ ອຣິຍສຈ຺ຈໍ, ທຸກ຺ຂນິໂຣຘໍ ອຣິຍສຈ຺ຈໍ, ທຸກ຺ຂນິໂຣຘຄາມິນີ ປຏິປທາ ອຣິຍສຈ຺ຈໍ.

໒໑໖. ຈຕຸນ຺ນໍ ອຣິຍສຈ຺ຈານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໒໑໗. ສມຸທຍສຈ຺ຈໍ ອກຸສລໍ. ມຄ຺ຄສຈ຺ຈໍ ກຸສລໍ. ນິໂຣຘສຈ຺ຈໍ ອພ຺ຍາກຕໍ. ທຸກ຺ຂສຈ຺ຈໍ ສິຍາ ກຸສລໍ, ສິຍາ ອກຸສລໍ, ສິຍາ ອພ຺ຍາກຕໍ. ທ຺ເວ ສຈ຺ຈາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ. ທຸກ຺ຂສຈ຺ຈໍ ສິຍາ ສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕໍ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ນ ວຕ຺ຕພ຺ພໍ – ‘‘ສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ. ທ຺ເວ ສຈ຺ຈາ ວິປາກຘມ຺ມຘມ຺ມາ. ນິໂຣຘສຈ຺ຈໍ ເນວວິປາກນວິປາກຘມ຺ມຘມ຺ມໍ. ທຸກ຺ຂສຈ຺ຈໍ ສິຍາ ວິປາກໍ, ສິຍາ ວິປາກຘມ຺ມຘມ຺ມໍ, ສິຍາ ເນວວິປາກນວິປາກຘມ຺ມຘມ຺ມໍ. ສມຸທຍສຈ຺ຈໍ ອນຸປາທິນ຺ນຸປາທານິຍໍ. ທ຺ເວ ສຈ຺ຈາ ອນຸປາທິນ຺ນອນຸປາທານິຍາ. ທຸກ຺ຂສຈ຺ຈໍ ສິຍາ ອຸປາທິນ຺ນຸປາທານິຍໍ, ສິຍາ ອນຸປາທິນ຺ນຸປາທານິຍໍ.

ສມຸທຍສຈ຺ຈໍ ສໍກິລິຏ຺ຐສໍກິເລສິກໍ. ທ຺ເວ ສຈ຺ຈາ ອສໍກິລິຏ຺ຐອສໍກິເລສິກາ. ທຸກ຺ຂສຈ຺ຈໍ ສິຍາ ສໍກິລິຏ຺ຐສໍກິເລສິກໍ, ສິຍາ ອສໍກິລິຏ຺ຐສໍກິເລສິກໍ. ສມຸທຍສຈ຺ຈໍ ສວິຕກ຺ກສວິຈາຣໍ. ນິໂຣຘສຈ຺ຈໍ ອວິຕກ຺ກອວິຈາຣໍ. ມຄ຺ຄສຈ຺ຈໍ ສິຍາ ສວິຕກ຺ກສວິຈາຣໍ, ສິຍາ ອວິຕກ຺ກວິຈາຣມຕ຺ຕໍ, ສິຍາ ອວິຕກ຺ກອວິຈາຣໍ. ທຸກ຺ຂສຈ຺ຈໍ ສິຍາ ສວິຕກ຺ກສວິຈາຣໍ, ສິຍາ ອວິຕກ຺ກວິຈາຣມຕ຺ຕໍ, ສິຍາ ອວິຕກ຺ກອວິຈາຣໍ, ສິຍາ ນ ວຕ຺ຕພ຺ພໍ – ‘‘ສວິຕກ຺ກສວິຈາຣ’’ນ຺ຕິປິ, ‘‘ອວິຕກ຺ກວິຈາຣມຕ຺ຕ’’ນ຺ຕິປິ, ‘‘ອວິຕກ຺ກອວິຈາຣ’’ນ຺ຕິປິ. ທ຺ເວ ສຈ຺ຈາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ປີຕິສຫຄຕ’’ນ຺ຕິປິ, ‘‘ສຸຂສຫຄຕ’’ນ຺ຕິປິ, ‘‘ອຸເປກ຺ຂາສຫຄຕ’’ນ຺ຕິປິ. ທຸກ຺ຂສຈ຺ຈໍ ສິຍາ ປີຕິສຫຄຕໍ, ສິຍາ ສຸຂສຫຄຕໍ, ສິຍາ ອຸເປກ຺ຂາສຫຄຕໍ, ສິຍາ ນ ວຕ຺ຕພ຺ພໍ – ‘‘ປີຕິສຫຄຕ’’ນ຺ຕິປິ, ‘‘ສຸຂສຫຄຕ’’ນ຺ຕິປິ, ‘‘ອຸເປກ຺ຂາສຫຄຕ’’ນ຺ຕິປິ.

ທ຺ເວ ສຈ຺ຈາ ເນວ ທສ຺ສເນນ ນ ຠາວນາຍ ປຫາຕພ຺ພາ. ສມຸທຍສຈ຺ຈໍ ສິຍາ ທສ຺ສເນນ ປຫາຕພ຺ພໍ, ສິຍາ ຠາວນາຍ ປຫາຕພ຺ພໍ. ທຸກ຺ຂສຈ຺ຈໍ ສິຍາ ທສ຺ສເນນ ປຫາຕພ຺ພໍ, ສິຍາ ຠາວນາຍ ປຫາຕພ຺ພໍ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພໍ. ທ຺ເວ ສຈ຺ຈາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ສມຸທຍສຈ຺ຈໍ ສິຍາ ທສ຺ສເນນ ປຫາຕພ຺ພເຫຕຸກໍ, ສິຍາ ຠາວນາຍ ປຫາຕພ຺ພເຫຕຸກໍ. ທຸກ຺ຂສຈ຺ຈໍ ສິຍາ ທສ຺ສເນນ ປຫາຕພ຺ພເຫຕຸກໍ, ສິຍາ ຠາວນາຍ ປຫາຕພ຺ພເຫຕຸກໍ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກໍ. ສມຸທຍສຈ຺ຈໍ ອາຈຍຄາມິ. ມຄ຺ຄສຈ຺ຈໍ ອປຈຍຄາມິ. ນິໂຣຘສຈ຺ຈໍ ເນວາຈຍຄາມິນາປຈຍຄາມິ. ທຸກ຺ຂສຈ຺ຈໍ ສິຍາ ອາຈຍຄາມິ, ສິຍາ ເນວາຈຍຄາມິນາປຈຍຄາມິ. ມຄ຺ຄສຈ຺ຈໍ ເສກ຺ຂໍ. ຕີຓິ ສຈ຺ຈານິ ເນວເສກ຺ຂນາເສກ຺ຂາ. ສມຸທຍສຈ຺ຈໍ ປຣິຕ຺ຕໍ. ທ຺ເວ ສຈ຺ຈາ ອປ຺ປມາຓາ. ທຸກ຺ຂສຈ຺ຈໍ ສິຍາ ປຣິຕ຺ຕໍ, ສິຍາ ມຫຄ຺ຄຕໍ. ນິໂຣຘສຈ຺ຈໍ ອນາຣມ຺ມຓໍ. ມຄ຺ຄສຈ຺ຈໍ ອປ຺ປມາຓາຣມ຺ມຓໍ. ສມຸທຍສຈ຺ຈໍ ສິຍາ ປຣິຕ຺ຕາຣມ຺ມຓໍ, ສິຍາ ມຫຄ຺ຄຕາຣມ຺ມຓໍ ນ ອປ຺ປມາຓາຣມ຺ມຓໍ, ສິຍາ ນ ວຕ຺ຕພ຺ພໍ – ‘‘ປຣິຕ຺ຕາຣມ຺ມຓ’’ນ຺ຕິປິ, ‘‘ມຫຄ຺ຄຕາຣມ຺ມຓ’’ນ຺ຕິປິ. ທຸກ຺ຂສຈ຺ຈໍ ສິຍາ ປຣິຕ຺ຕາຣມ຺ມຓໍ, ສິຍາ ມຫຄ຺ຄຕາຣມ຺ມຓໍ, ສິຍາ ອປ຺ປມາຓາຣມ຺ມຓໍ, ສິຍາ ນ ວຕ຺ຕພ຺ພໍ – ‘‘ປຣິຕ຺ຕາຣມ຺ມຓ’’ນ຺ຕິປິ, ‘‘ມຫຄ຺ຄຕາຣມ຺ມຓ’’ນ຺ຕິປິ, ‘‘ອປ຺ປມາຓາຣມ຺ມຓ’’ນ຺ຕິປິ.

ສມຸທຍສຈ຺ຈໍ ຫີນໍ. ທ຺ເວ ສຈ຺ຈາ ປຓີຕາ. ທຸກ຺ຂສຈ຺ຈໍ ສິຍາ ຫີນໍ, ສິຍາ ມຊ຺ຌິມໍ. ນິໂຣຘສຈ຺ຈໍ ອນິຍຕໍ. ມຄ຺ຄສຈ຺ຈໍ ສມ຺ມຕ຺ຕນິຍຕໍ. ທ຺ເວ ສຈ຺ຈາ ສິຍາ ມິຈ຺ຉຕ຺ຕນິຍຕາ, ສິຍາ ອນິຍຕາ. ນິໂຣຘສຈ຺ຈໍ ອນາຣມ຺ມຓໍ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ມຄ຺ຄາຣມ຺ມຓ’’ນ຺ຕິປິ, ‘‘ມຄ຺ຄເຫຕຸກ’’ນ຺ຕິປິ, ‘‘ມຄ຺ຄາຘິປຕີ’’ຕິປິ. ມຄ຺ຄສຈ຺ຈໍ ນ ມຄ຺ຄາຣມ຺ມຓໍ ມຄ຺ຄເຫຕຸກໍ, ສິຍາ ມຄ຺ຄາຘິປຕິ, ສິຍາ ນ ວຕ຺ຕພ຺ພໍ – ‘‘ມຄ຺ຄາຘິປຕີ’’ຕິ. ທຸກ຺ຂສຈ຺ຈໍ ສິຍາ ມຄ຺ຄາຣມ຺ມຓໍ ນ ມຄ຺ຄເຫຕຸກໍ, ສິຍາ ມຄ຺ຄາຘິປຕິ, ສິຍາ ນ ວຕ຺ຕພ຺ພໍ – ‘‘ມຄ຺ຄາຣມ຺ມຓ’’ນ຺ຕິປິ, ‘‘ມຄ຺ຄາຘິປຕີ’’ຕິປິ. ທ຺ເວ ສຈ຺ຈາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ນ ວຕ຺ຕພ຺ພາ – ‘‘ອຸປ຺ປາທິໂນ’’ຕິ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ອຸປ຺ປນ຺ນ’’ນ຺ຕິປິ, ‘‘ອນຸປ຺ປນ຺ນ’’ນ຺ຕິປິ, ‘‘ອຸປ຺ປາທີ’’ຕິປິ. ທຸກ຺ຂສຈ຺ຈໍ ສິຍາ ອຸປ຺ປນ຺ນໍ, ສິຍາ ອນຸປ຺ປນ຺ນໍ, ສິຍາ ອຸປ຺ປາທິ. ຕີຓິ ສຈ຺ຈານິ ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ອຕີຕ’’ນ຺ຕິປິ, ‘‘ອນາຄຕ’’ນ຺ຕິປິ, ‘‘ປຈ຺ຈຸປ຺ປນ຺ນ’’ນ຺ຕິປິ. ນິໂຣຘສຈ຺ຈໍ ອນາຣມ຺ມຓໍ. ມຄ຺ຄສຈ຺ຈໍ ນ ວຕ຺ຕພ຺ພໍ – ‘‘ອຕີຕາຣມ຺ມຓ’’ນ຺ຕິປິ, ‘‘ອນາຄຕາຣມ຺ມຓ’’ນ຺ຕິປິ, ‘‘ປຈ຺ຈຸປ຺ປນ຺ນາຣມ຺ມຓ’’ນ຺ຕິປິ. ທ຺ເວ ສຈ຺ຈາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ. ນິໂຣຘສຈ຺ຈໍ ພຫິທ຺ຘາ. ຕີຓິ ສຈ຺ຈານິ ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ນິໂຣຘສຈ຺ຈໍ ອນາຣມ຺ມຓໍ. ມຄ຺ຄສຈ຺ຈໍ ພຫິທ຺ຘາຣມ຺ມຓໍ. ສມຸທຍສຈ຺ຈໍ ສິຍາ ອຊ຺ຌຕ຺ຕາຣມ຺ມຓໍ, ສິຍາ ພຫິທ຺ຘາຣມ຺ມຓໍ, ສິຍາ ອຊ຺ຌຕ຺ຕພຫິທ຺ຘາຣມ຺ມຓໍ. ທຸກ຺ຂສຈ຺ຈໍ ສິຍາ ອຊ຺ຌຕ຺ຕາຣມ຺ມຓໍ, ສິຍາ ພຫິທ຺ຘາຣມ຺ມຓໍ, ສິຍາ ອຊ຺ຌຕ຺ຕພຫິທ຺ຘາຣມ຺ມຓໍ, ສິຍາ ນ ວຕ຺ຕພ຺ພໍ – ‘‘ອຊ຺ຌຕ຺ຕາຣມ຺ມຓ’’ນ຺ຕິປິ, ‘‘ພຫິທ຺ຘາຣມ຺ມຓ’’ນ຺ຕິປິ, ‘‘ອຊ຺ຌຕ຺ຕພຫິທ຺ຘາຣມ຺ມຓ’’ນ຺ຕິປິ. ຕີຓິ ສຈ຺ຈານິ ອນິທສ຺ສນອປ຺ປຏິຆາ. ທຸກ຺ຂສຈ຺ຈໍ ສິຍາ ສນິທສ຺ສນສປ຺ປຏິຆໍ, ສິຍາ ອນິທສ຺ສນສປ຺ປຏິຆໍ, ສິຍາ ອນິທສ຺ສນອປ຺ປຏິຆໍ.

໒. ທຸກໍ

໒໑໘. ສມຸທຍສຈ຺ຈໍ ເຫຕຸ. ນິໂຣຘສຈ຺ຈໍ ນ ເຫຕຸ. ທ຺ເວ ສຈ຺ຈາ ສິຍາ ເຫຕູ, ສິຍາ ນ ເຫຕູ. ທ຺ເວ ສຈ຺ຈາ ສເຫຕຸກາ. ນິໂຣຘສຈ຺ຈໍ ອເຫຕຸກໍ. ທຸກ຺ຂສຈ຺ຈໍ ສິຍາ ສເຫຕຸກໍ, ສິຍາ ອເຫຕຸກໍ. ທ຺ເວ ສຈ຺ຈາ ເຫຕຸສມ຺ປຍຸຕ຺ຕາ. ນິໂຣຘສຈ຺ຈໍ ເຫຕຸວິປ຺ປຍຸຕ຺ຕໍ. ທຸກ຺ຂສຈ຺ຈໍ ສິຍາ ເຫຕຸສມ຺ປຍຸຕ຺ຕໍ, ສິຍາ ເຫຕຸວິປ຺ປຍຸຕ຺ຕໍ. ສມຸທຍສຈ຺ຈໍ ເຫຕຸ ເຈວ ສເຫຕຸກຎ຺ຈ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ເຫຕຸ ເຈວ ສເຫຕຸກຎ຺ຈາ’’ຕິປິ, ‘‘ສເຫຕຸກຎ຺ເຈວ ນ ຈ ເຫຕູ’’ຕິປິ. ມຄ຺ຄສຈ຺ຈໍ ສິຍາ ເຫຕຸ ເຈວ ສເຫຕຸກຎ຺ຈ, ສິຍາ ສເຫຕຸກຎ຺ເຈວ ນ ຈ ເຫຕຸ. ທຸກ຺ຂສຈ຺ຈໍ ສິຍາ ເຫຕຸ ເຈວ ສເຫຕຸກຎ຺ຈ, ສິຍາ ສເຫຕຸກຎ຺ເຈວ ນ ຈ ເຫຕຸ, ສິຍາ ນ ວຕ຺ຕພ຺ພໍ – ‘‘ເຫຕຸ ເຈວ ສເຫຕຸກຎ຺ຈາ’’ຕິປິ, ‘‘ສເຫຕຸກຎ຺ເຈວ ນ ຈ ເຫຕູ’’ຕິປິ. ສມຸທຍສຈ຺ຈໍ ເຫຕຸ ເຈວ ເຫຕຸສມ຺ປຍຸຕ຺ຕຎ຺ຈ. ນິໂຣຘສຈ຺ຈໍ ນ ວຕ຺ຕພ຺ພໍ – ‘‘ເຫຕຸ ເຈວ ເຫຕຸສມ຺ປຍຸຕ຺ຕຎ຺ຈາ’’ຕິປິ, ‘‘ເຫຕຸສມ຺ປຍຸຕ຺ຕຎ຺ເຈວ ນ ຈ ເຫຕູ’’ຕິປິ. ມຄ຺ຄສຈ຺ຈໍ ສິຍາ ເຫຕຸ ເຈວ ເຫຕຸສມ຺ປຍຸຕ຺ຕຎ຺ຈ, ສິຍາ ເຫຕຸສມ຺ປຍຸຕ຺ຕຎ຺ເຈວ ນ ຈ ເຫຕຸ. ທຸກ຺ຂສຈ຺ຈໍ ສິຍາ ເຫຕຸ ເຈວ ເຫຕຸສມ຺ປຍຸຕ຺ຕຎ຺ຈ, ສິຍາ ເຫຕຸສມ຺ປຍຸຕ຺ຕຎ຺ເຈວ ນ ຈ ເຫຕຸ, ສິຍາ ນ ວຕ຺ຕພ຺ພໍ – ‘‘ເຫຕຸ ເຈວ ເຫຕຸສມ຺ປຍຸຕ຺ຕຎ຺ຈາ’’ຕິປິ, ‘‘ເຫຕຸສມ຺ປຍຸຕ຺ຕຎ຺ເຈວ ນ ຈ ເຫຕູ’’ຕິປິ. ນິໂຣຘສຈ຺ຈໍ ນ ເຫຕຸອເຫຕຸກໍ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ນ ເຫຕຸສເຫຕຸກ’’ນ຺ຕິປິ, ‘‘ນ ເຫຕຸອເຫຕຸກ’’ນ຺ຕິປິ. ມຄ຺ຄສຈ຺ຈໍ ສິຍາ ນ ເຫຕຸສເຫຕຸກໍ, ສິຍາ ນ ວຕ຺ຕພ຺ພໍ – ‘‘ນ ເຫຕຸສເຫຕຸກ’’ນ຺ຕິປິ, ‘‘ນ ເຫຕຸອເຫຕຸກ’’ນ຺ຕິປິ. ທຸກ຺ຂສຈ຺ຈໍ ສິຍາ ນ ເຫຕຸສເຫຕຸກໍ, ສິຍາ ນ ເຫຕຸອເຫຕຸກໍ, ສິຍາ ນ ວຕ຺ຕພ຺ພໍ – ‘‘ນ ເຫຕຸສເຫຕຸກ’’ນ຺ຕິປິ, ‘‘ນ ເຫຕຸອເຫຕຸກ’’ນ຺ຕິປິ.

ຕີຓິ ສຈ຺ຈານິ ສປ຺ປຈ຺ຈຍາ. ນິໂຣຘສຈ຺ຈໍ ອປ຺ປຈ຺ຈຍໍ. ຕີຓິ ສຈ຺ຈານິ ສງ຺ຂຕາ. ນິໂຣຘສຈ຺ຈໍ ອສງ຺ຂຕໍ. ຕີຓິ ສຈ຺ຈານິ ອນິທສ຺ສນາ. ທຸກ຺ຂສຈ຺ຈໍ ສິຍາ ສນິທສ຺ສນໍ, ສິຍາ ອນິທສ຺ສນໍ. ຕີຓິ ສຈ຺ຈານິ ອປ຺ປຏິຆາ. ທຸກ຺ຂສຈ຺ຈໍ ສິຍາ ສປ຺ປຏິຆໍ, ສິຍາ ອປ຺ປຏິຆໍ. ຕີຓິ ສຈ຺ຈານິ ອຣູປານິ. ທຸກ຺ຂສຈ຺ຈໍ ສິຍາ ຣູປໍ, ສິຍາ ອຣູປໍ. ທ຺ເວ ສຈ຺ຈາ ໂລກິຍາ. ທ຺ເວ ສຈ຺ຈາ ໂລກຸຕ຺ຕຣາ; ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ສມຸທຍສຈ຺ຈໍ ອາສໂວ. ທ຺ເວ ສຈ຺ຈາ ໂນ ອາສວາ. ທຸກ຺ຂສຈ຺ຈໍ ສິຍາ ອາສໂວ, ສິຍາ ໂນ ອາສໂວ. ທ຺ເວ ສຈ຺ຈາ ສາສວາ. ທ຺ເວ ສຈ຺ຈາ ອນາສວາ. ສມຸທຍສຈ຺ຈໍ ອາສວສມ຺ປຍຸຕ຺ຕໍ. ທ຺ເວ ສຈ຺ຈາ ອາສວວິປ຺ປຍຸຕ຺ຕາ. ທຸກ຺ຂສຈ຺ຈໍ ສິຍາ ອາສວສມ຺ປຍຸຕ຺ຕໍ, ສິຍາ ອາສວວິປ຺ປຍຸຕ຺ຕໍ. ສມຸທຍສຈ຺ຈໍ ອາສໂວ ເຈວ ສາສວຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິປິ, ‘‘ສາສວາ ເຈວ ໂນ ຈ ອາສວາ’’ຕິປິ. ທຸກ຺ຂສຈ຺ຈໍ ສິຍາ ອາສໂວ ເຈວ ສາສວຎ຺ຈ, ສິຍາ ສາສວຎ຺ເຈວ ໂນ ຈ ອາສໂວ. ສມຸທຍສຈ຺ຈໍ ອາສໂວ ເຈວ ອາສວສມ຺ປຍຸຕ຺ຕຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ອາສວາ ເຈວ ອາສວສມ຺ປຍຸຕ຺ຕາ ຈາ’’ຕິປິ, ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສວາ’’ຕິປິ. ທຸກ຺ຂສຈ຺ຈໍ ສິຍາ ອາສໂວ ເຈວ ອາສວສມ຺ປຍຸຕ຺ຕຎ຺ຈ, ສິຍາ ອາສວສມ຺ປຍຸຕ຺ຕຎ຺ເຈວ ໂນ ຈ ອາສໂວ, ສິຍາ ນ ວຕ຺ຕພ຺ພໍ – ‘‘ອາສໂວ ເຈວ ອາສວສມ຺ປຍຸຕ຺ຕຎ຺ຈາ’’ຕິປິ, ‘‘ອາສວສມ຺ປຍຸຕ຺ຕຎ຺ເຈວ ໂນ ຈ ອາສໂວ’’ຕິປິ. ທ຺ເວ ສຈ຺ຈາ ອາສວວິປ຺ປຍຸຕ຺ຕອນາສວາ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ອາສວວິປ຺ປຍຸຕ຺ຕສາສວ’’ນ຺ຕິປິ, ‘‘ອາສວວິປ຺ປຍຸຕ຺ຕອນາສວ’’ນ຺ຕິປິ. ທຸກ຺ຂສຈ຺ຈໍ ສິຍາ ອາສວວິປ຺ປຍຸຕ຺ຕສາສວໍ, ສິຍາ ນ ວຕ຺ຕພ຺ພໍ – ‘‘ອາສວວິປ຺ປຍຸຕ຺ຕສາສວ’’ນ຺ຕິປິ, ‘‘ອາສວວິປ຺ປຍຸຕ຺ຕອນາສວ’’ນ຺ຕິປິ.

ສມຸທຍສຈ຺ຈໍ ສໍໂຍຊນໍ. ທ຺ເວ ສຈ຺ຈາ ໂນ ສໍໂຍຊນາ. ທຸກ຺ຂສຈ຺ຈໍ ສິຍາ ສໍໂຍຊນໍ, ສິຍາ ໂນ ສໍໂຍຊນໍ. ທ຺ເວ ສຈ຺ຈາ ສໍໂຍຊນິຍາ. ທ຺ເວ ສຈ຺ຈາ ອສໍໂຍຊນິຍາ. ສມຸທຍສຈ຺ຈໍ ສໍໂຍຊນສມ຺ປຍຸຕ຺ຕໍ. ທ຺ເວ ສຈ຺ຈາ ສໍໂຍຊນວິປ຺ປຍຸຕ຺ຕາ. ທຸກ຺ຂສຈ຺ຈໍ ສິຍາ ສໍໂຍຊນສມ຺ປຍຸຕ຺ຕໍ, ສິຍາ ສໍໂຍຊນວິປ຺ປຍຸຕ຺ຕໍ. ສມຸທຍສຈ຺ຈໍ ສໍໂຍຊນຎ຺ເຈວ ສໍໂຍຊນິຍຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິປິ, ‘‘ສໍໂຍຊນິຍາ ເຈວ ໂນ ຈ ສໍໂຍຊນາ’’ຕິປິ. ທຸກ຺ຂສຈ຺ຈໍ ສິຍາ ສໍໂຍຊນຎ຺ເຈວ ສໍໂຍຊນິຍຎ຺ຈ, ສິຍາ ສໍໂຍຊນິຍຎ຺ເຈວ ໂນ ຈ ສໍໂຍຊນໍ. ສມຸທຍສຈ຺ຈໍ ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນສມ຺ປຍຸຕ຺ຕາ ຈາ’’ຕິປິ, ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ’’ຕິປິ. ທຸກ຺ຂສຈ຺ຈໍ ສິຍາ ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕຎ຺ຈ, ສິຍາ ສໍໂຍຊນສມ຺ປຍຸຕ຺ຕຎ຺ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ພໍ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ຕຎ຺ຈາ’’ຕິປິ, ‘‘ສໍໂຍຊນສມ຺ປຍຸຕ຺ຕຎ຺ເຈວ ໂນ ຈ ສໍໂຍຊນ’’ນ຺ຕິປິ. ທ຺ເວ ສຈ຺ຈາ ສໍໂຍຊນວິປ຺ປຍຸຕ຺ຕອສໍໂຍຊນິຍາ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍ’’ນ຺ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍ’’ນ຺ຕິປິ. ທຸກ຺ຂສຈ຺ຈໍ ສິຍາ ສໍໂຍຊນວິປ຺ປຍຸຕ຺ຕສໍໂຍຊນິຍໍ, ສິຍາ ນ ວຕ຺ຕພ຺ພໍ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍ’’ນ຺ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍ’’ນ຺ຕິປິ.

ສມຸທຍສຈ຺ຈໍ ຄນ຺ໂຖ. ທ຺ເວ ສຈ຺ຈາ ໂນ ຄນ຺ຖາ. ທຸກ຺ຂສຈ຺ຈໍ ສິຍາ ຄນ຺ໂຖ, ສິຍາ ໂນ ຄນ຺ໂຖ. ທ຺ເວ ສຈ຺ຈາ ຄນ຺ຖນິຍາ. ທ຺ເວ ສຈ຺ຈາ ອຄນ຺ຖນິຍາ. ທ຺ເວ ສຈ຺ຈາ ຄນ຺ຖວິປ຺ປຍຸຕ຺ຕາ. ທ຺ເວ ສຈ຺ຈາ ສິຍາ ຄນ຺ຖສມ຺ປຍຸຕ຺ຕາ, ສິຍາ ຄນ຺ຖວິປ຺ປຍຸຕ຺ຕາ. ສມຸທຍສຈ຺ຈໍ ຄນ຺ໂຖ ເຈວ ຄນ຺ຖນິຍຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິປິ, ‘‘ຄນ຺ຖນິຍາ ເຈວ ໂນ ຈ ຄນ຺ຖາ’’ຕິປິ. ທຸກ຺ຂສຈ຺ຈໍ ສິຍາ ຄນ຺ໂຖ ເຈວ ຄນ຺ຖນິຍຎ຺ຈ, ສິຍາ ຄນ຺ຖນິຍຎ຺ເຈວ ໂນ ຈ ຄນ຺ໂຖ. ສມຸທຍສຈ຺ຈໍ ຄນ຺ໂຖ ເຈວ ຄນ຺ຖສມ຺ປຍຸຕ຺ຕຎ຺ຈ, ສິຍາ ນ ວຕ຺ຕພ຺ພໍ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ຕຎ຺ຈາ’’ຕິປິ, ‘‘ຄນ຺ຖສມ຺ປຍຸຕ຺ຕຎ຺ເຈວ ໂນ ຈ ຄນ຺ໂຖ’’ຕິປິ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖສມ຺ປຍຸຕ຺ຕາ ຈາ’’ຕິປິ, ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ’’ຕິປິ. ທຸກ຺ຂສຈ຺ຈໍ ສິຍາ ຄນ຺ໂຖ ເຈວ ຄນ຺ຖສມ຺ປຍຸຕ຺ຕຎ຺ຈ, ສິຍາ ຄນ຺ຖສມ຺ປຍຸຕ຺ຕຎ຺ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ພໍ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ຕຎ຺ຈາ’’ຕິປິ, ‘‘ຄນ຺ຖສມ຺ປຍຸຕ຺ຕຎ຺ເຈວ ໂນ ຈ ຄນ຺ໂຖ’’ຕິປິ. ທ຺ເວ ສຈ຺ຈາ ຄນ຺ຖວິປ຺ປຍຸຕ຺ຕອຄນ຺ຖນິຍາ. ທ຺ເວ ສຈ຺ຈາ ສິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ, ສິຍາ ນ ວຕ຺ຕພ຺ພາ – ‘‘ຄນ຺ຖວິປ຺ປຍຸຕ຺ຕຄນ຺ຖນິຍາ’’ຕິປິ, ‘‘ຄນ຺ຖວິປ຺ປຍຸຕ຺ຕອຄນ຺ຖນິຍາ’’ຕິປິ.

ສມຸທຍສຈ຺ຈໍ ໂອໂຆ…ເປ… ໂຍໂຄ…ເປ… ນີວຣຓໍ. ທ຺ເວ ສຈ຺ຈາ ໂນ ນີວຣຓາ. ທຸກ຺ຂສຈ຺ຈໍ ສິຍາ ນີວຣຓໍ, ສິຍາ ໂນ ນີວຣຓໍ. ທ຺ເວ ສຈ຺ຈາ ນີວຣຓິຍາ ທ຺ເວ ສຈ຺ຈາ ອນີວຣຓິຍາ. ສມຸທຍສຈ຺ຈໍ ນີວຣຓສມ຺ປຍຸຕ຺ຕໍ. ທ຺ເວ ສຈ຺ຈາ ນີວຣຓວິປ຺ປຍຸຕ຺ຕາ. ທຸກ຺ຂສຈ຺ຈໍ ສິຍາ ນີວຣຓສມ຺ປຍຸຕ຺ຕໍ, ສິຍາ ນີວຣຓວິປ຺ປຍຸຕ຺ຕໍ. ສມຸທຍສຈ຺ຈໍ ນີວຣຓຎ຺ເຈວ ນີວຣຓິຍຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິປິ, ‘‘ນີວຣຓິຍາ ເຈວ ໂນ ຈ ນີວຣຓາ’’ຕິປິ. ທຸກ຺ຂສຈ຺ຈໍ ສິຍາ ນີວຣຓຎ຺ເຈວ ນີວຣຓິຍຎ຺ຈ, ສິຍາ ນີວຣຓິຍຎ຺ເຈວ ໂນ ຈ ນີວຣຓໍ. ສມຸທຍສຈ຺ຈໍ ນີວຣຓຎ຺ເຈວ ນີວຣຓສມ຺ປຍຸຕ຺ຕຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓສມ຺ປຍຸຕ຺ຕາ ຈາ’’ຕິປິ, ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ’’ຕິປິ. ທຸກ຺ຂສຈ຺ຈໍ ສິຍາ ນີວຣຓຎ຺ເຈວ ນີວຣຓສມ຺ປຍຸຕ຺ຕຎ຺ຈ, ສິຍາ ນີວຣຓສມ຺ປຍຸຕ຺ຕຎ຺ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ພໍ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ຕຎ຺ຈາ’’ຕິປິ, ‘‘ນີວຣຓສມ຺ປຍຸຕ຺ຕຎ຺ເຈວ ໂນ ຈ ນີວຣຓ’’ນ຺ຕິປິ. ທ຺ເວ ສຈ຺ຈາ ນີວຣຓວິປ຺ປຍຸຕ຺ຕອນີວຣຓິຍາ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ນີວຣຓວິປ຺ປຍຸຕ຺ຕນີວຣຓິຍ’’ນ຺ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍ’’ນ຺ຕິປິ. ທຸກ຺ຂສຈ຺ຈໍ ສິຍາ ນີວຣຓວິປ຺ປຍຸຕ຺ຕນີວຣຓິຍໍ, ສິຍາ ນ ວຕ຺ຕພ຺ພໍ – ‘‘ນີວຣຓວິປ຺ປຍຸຕ຺ຕນີວຣຓິຍ’’ນ຺ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍ’’ນ຺ຕິປິ.

ຕີຓິ ສຈ຺ຈານິ ໂນ ປຣາມາສາ. ທຸກ຺ຂສຈ຺ຈໍ ສິຍາ ປຣາມາໂສ, ສິຍາ ໂນ ປຣາມາໂສ. ທ຺ເວ ສຈ຺ຈາ ປຣາມຏ຺ຐາ. ທ຺ເວ ສຈ຺ຈາ ອປຣາມຏ຺ຐາ. ທ຺ເວ ສຈ຺ຈາ ປຣາມາສວິປ຺ປຍຸຕ຺ຕາ. ສມຸທຍສຈ຺ຈໍ ສິຍາ ປຣາມາສສມ຺ປຍຸຕ຺ຕໍ, ສິຍາ ປຣາມາສວິປ຺ປຍຸຕ຺ຕໍ. ທຸກ຺ຂສຈ຺ຈໍ ສິຍາ ປຣາມາສສມ຺ປຍຸຕ຺ຕໍ, ສິຍາ ປຣາມາສວິປ຺ປຍຸຕ຺ຕໍ, ສິຍາ ນ ວຕ຺ຕພ຺ພໍ – ‘‘ປຣາມາສສມ຺ປຍຸຕ຺ຕ’’ນ຺ຕິປິ, ‘‘ປຣາມາສວິປ຺ປຍຸຕ຺ຕ’’ນ຺ຕິປິ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ປຣາມາໂສ ເຈວ ປຣາມຏ຺ຐຎ຺ຈາ’’ຕິ, ປຣາມຏ຺ຐຎ຺ເຈວ ໂນ ຈ ປຣາມາໂສ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາ’’ຕິປິ, ‘‘ປຣາມຏ຺ຐາ ເຈວ ໂນ ຈ ປຣາມາສາ’’ຕິປິ. ທຸກ຺ຂສຈ຺ຈໍ ສິຍາ ປຣາມາໂສ ເຈວ ປຣາມຏ຺ຐຎ຺ຈ, ສິຍາ ປຣາມຏ຺ຐຎ຺ເຈວ ໂນ ຈ ປຣາມາໂສ. ທ຺ເວ ສຈ຺ຈາ ປຣາມາສວິປ຺ປຍຸຕ຺ຕອປຣາມຏ຺ຐາ. ທ຺ເວ ສຈ຺ຈາ ສິຍາ ປຣາມາສວິປ຺ປຍຸຕ຺ຕປຣາມຏ຺ຐາ, ສິຍາ ນ ວຕ຺ຕພ຺ພາ – ‘‘ປຣາມາສວິປ຺ປຍຸຕ຺ຕປຣາມຏ຺ຐາ’’ຕິປິ, ‘‘ປຣາມາສວິປ຺ປຍຸຕ຺ຕອປຣາມຏ຺ຐາ’’ຕິປິ.

ທ຺ເວ ສຈ຺ຈາ ສາຣມ຺ມຓາ. ນິໂຣຘສຈ຺ຈໍ ອນາຣມ຺ມຓໍ. ທຸກ຺ຂສຈ຺ຈໍ ສິຍາ ສາຣມ຺ມຓໍ, ສິຍາ ອນາຣມ຺ມຓໍ. ຕີຓິ ສຈ຺ຈານິ ໂນ ຈິຕ຺ຕາ. ທຸກ຺ຂສຈ຺ຈໍ ສິຍາ ຈິຕ຺ຕໍ, ສິຍາ ໂນ ຈິຕ຺ຕໍ. ທ຺ເວ ສຈ຺ຈາ ເຈຕສິກາ. ນິໂຣຘສຈ຺ຈໍ ອເຈຕສິກໍ. ທຸກ຺ຂສຈ຺ຈໍ ສິຍາ ເຈຕສິກໍ, ສິຍາ ອເຈຕສິກໍ. ທ຺ເວ ສຈ຺ຈາ ຈິຕ຺ຕສມ຺ປຍຸຕ຺ຕາ. ນິໂຣຘສຈ຺ຈໍ ຈິຕ຺ຕວິປ຺ປຍຸຕ຺ຕໍ. ທຸກ຺ຂສຈ຺ຈໍ ສິຍາ ຈິຕ຺ຕສມ຺ປຍຸຕ຺ຕໍ, ສິຍາ ຈິຕ຺ຕວິປ຺ປຍຸຕ຺ຕໍ, ສິຍາ ນ ວຕ຺ຕພ຺ພໍ – ‘‘ຈິຕ຺ເຕນ ສມ຺ປຍຸຕ຺ຕ’’ນ຺ຕິປິ, ‘‘ຈິຕ຺ເຕນ ວິປ຺ປຍຸຕ຺ຕ’’ນ຺ຕິປິ. ທ຺ເວ ສຈ຺ຈາ ຈິຕ຺ຕສໍສຏ຺ຐາ. ນິໂຣຘສຈ຺ຈໍ ຈິຕ຺ຕວິສໍສຏ຺ຐໍ. ທຸກ຺ຂສຈ຺ຈໍ ສິຍາ ຈິຕ຺ຕສໍສຏ຺ຐໍ, ສິຍາ ຈິຕ຺ຕວິສໍສຏ຺ຐໍ, ສິຍາ ນ ວຕ຺ຕພ຺ພໍ – ‘‘ຈິຕ຺ເຕນ ສໍສຏ຺ຐ’’ນ຺ຕິປິ, ‘‘ຈິຕ຺ເຕນ ວິສໍສຏ຺ຐ’’ນ຺ຕິປິ. ທ຺ເວ ສຈ຺ຈາ ຈິຕ຺ຕສມຸຏ຺ຐານາ. ນິໂຣຘສຈ຺ຈໍ ໂນ ຈິຕ຺ຕສມຸຏ຺ຐານໍ. ທຸກ຺ຂສຈ຺ຈໍ ສິຍາ ຈິຕ຺ຕສມຸຏ຺ຐານໍ, ສິຍາ ໂນ ຈິຕ຺ຕສມຸຏ຺ຐານໍ. ທ຺ເວ ສຈ຺ຈາ ຈິຕ຺ຕສຫຠຸໂນ. ນິໂຣຘສຈ຺ຈໍ ໂນ ຈິຕ຺ຕສຫຠູ. ທຸກ຺ຂສຈ຺ຈໍ ສິຍາ ຈິຕ຺ຕສຫຠູ, ສິຍາ ໂນ ຈິຕ຺ຕສຫຠູ. ທ຺ເວ ສຈ຺ຈາ ຈິຕ຺ຕານຸປຣິວຕ຺ຕິໂນ. ນິໂຣຘສຈ຺ຈໍ ໂນ ຈິຕ຺ຕານຸປຣິວຕ຺ຕິ. ທຸກ຺ຂສຈ຺ຈໍ ສິຍາ ຈິຕ຺ຕານຸປຣິວຕ຺ຕິ, ສິຍາ ໂນ ຈິຕ຺ຕານຸປຣິວຕ຺ຕິ. ທ຺ເວ ສຈ຺ຈາ ຈິຕ຺ຕສໍສຏ຺ຐສມຸຏ຺ຐານາ. ນິໂຣຘສຈ຺ຈໍ ໂນ ຈິຕ຺ຕສໍສຏ຺ຐສມຸຏ຺ຐານໍ. ທຸກ຺ຂສຈ຺ຈໍ ສິຍາ ຈິຕ຺ຕສໍສຏ຺ຐສມຸຏ຺ຐານໍ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານໍ. ທ຺ເວ ສຈ຺ຈາ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ນິໂຣຘສຈ຺ຈໍ ໂນ ຈິຕ຺ຕສໍສຏ຺ຐສມຸຏ຺ຐານສຫຠູ. ທຸກ຺ຂສຈ຺ຈໍ ສິຍາ ຈິຕ຺ຕສໍສຏ຺ຐສມຸຏ຺ຐານສຫຠູ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານສຫຠູ. ທ຺ເວ ສຈ຺ຈາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ນິໂຣຘສຈ຺ຈໍ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິ. ທຸກ຺ຂສຈ຺ຈໍ ສິຍາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິ, ສິຍາ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິ. ຕີຓິ ສຈ຺ຈານິ ພາຫິຣາ. ທຸກ຺ຂສຈ຺ຈໍ ສິຍາ ອຊ຺ຌຕ຺ຕໍ, ສິຍາ ພາຫິຣໍ.

ຕີຓິ ສຈ຺ຈານິ ໂນ ອຸປາທາ. ທຸກ຺ຂສຈ຺ຈໍ ສິຍາ ອຸປາທາ, ສິຍາ ໂນ ອຸປາທາ. ຕີຓິ ສຈ຺ຈານິ ອນຸປາທິນ຺ນາ. ທຸກ຺ຂສຈ຺ຈໍ ສິຍາ ອຸປາທິນ຺ນໍ, ສິຍາ ອນຸປາທິນ຺ນໍ. ສມຸທຍສຈ຺ຈໍ ອຸປາທານໍ. ທ຺ເວ ສຈ຺ຈາ ໂນ ອຸປາທານາ. ທຸກ຺ຂສຈ຺ຈໍ ສິຍາ ອຸປາທານໍ, ສິຍາ ໂນ ອຸປາທານໍ. ທ຺ເວ ສຈ຺ຈາ ອຸປາທານິຍາ. ທ຺ເວ ສຈ຺ຈາ ອນຸປາທານິຍາ. ທ຺ເວ ສຈ຺ຈາ ອຸປາທານວິປ຺ປຍຸຕ຺ຕາ. ທ຺ເວ ສຈ຺ຈາ ສິຍາ ອຸປາທານສມ຺ປຍຸຕ຺ຕາ, ສິຍາ ອຸປາທານວິປ຺ປຍຸຕ຺ຕາ. ສມຸທຍສຈ຺ຈໍ ອຸປາທານຎ຺ເຈວ ອຸປາທານິຍຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານິຍາ ຈາ’’ຕິປິ, ‘‘ອຸປາທານິຍາ ເຈວ ໂນ ຈ ອຸປາທານາ’’ຕິປິ. ທຸກ຺ຂສຈ຺ຈໍ ສິຍາ ອຸປາທານຎ຺ເຈວ ອຸປາທານິຍຎ຺ຈ, ສິຍາ ອຸປາທານິຍຎ຺ເຈວ ໂນ ຈ ອຸປາທານໍ. ສມຸທຍສຈ຺ຈໍ ສິຍາ ອຸປາທານຎ຺ເຈວ ອຸປາທານສມ຺ປຍຸຕ຺ຕຎ຺ຈ, ສິຍາ ນ ວຕ຺ຕພ຺ພໍ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ຕຎ຺ຈາ’’ຕິປິ, ‘‘ອຸປາທານສມ຺ປຍຸຕ຺ຕຎ຺ເຈວ ໂນ ຈ ອຸປາທານ’’ນ຺ຕິປິ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານສມ຺ປຍຸຕ຺ຕາ ຈາ’’ຕິປິ, ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ’’ຕິປິ. ທຸກ຺ຂສຈ຺ຈໍ ສິຍາ ອຸປາທານຎ຺ເຈວ ອຸປາທານສມ຺ປຍຸຕ຺ຕຎ຺ຈ, ສິຍາ ອຸປາທານສມ຺ປຍຸຕ຺ຕຎ຺ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ພໍ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ຕຎ຺ຈາ’’ ຕິປິ, ‘‘ອຸປາທານສມ຺ປຍຸຕ຺ຕຎ຺ເຈວ ໂນ ຈ ອຸປາທານ’’ນ຺ຕິປິ. ທ຺ເວ ສຈ຺ຈາ ອຸປາທານວິປ຺ປຍຸຕ຺ຕອນຸປາທານິຍາ. ທ຺ເວ ສຈ຺ຈາ ສິຍາ ອຸປາທານວິປ຺ປຍຸຕ຺ຕອຸປາທານິຍາ, ສິຍາ ນ ວຕ຺ຕພ຺ພາ – ‘‘ອຸປາທານວິປ຺ປຍຸຕ຺ຕອຸປາທານິຍາ’’ຕິປິ, ‘‘ອຸປາທານວິປ຺ປຍຸຕ຺ຕອນຸປາທານິຍາ’’ຕິປິ.

ສມຸທຍສຈ຺ຈໍ ກິເລໂສ. ທ຺ເວ ສຈ຺ຈາ ໂນ ກິເລສາ. ທຸກ຺ຂສຈ຺ຈໍ ສິຍາ ກິເລໂສ, ສິຍາ ໂນ ກິເລໂສ. ທ຺ເວ ສຈ຺ຈາ ສໍກິເລສິກາ. ທ຺ເວ ສຈ຺ຈາ ອສໍກິເລສິກາ. ສມຸທຍສຈ຺ຈໍ ສໍກິລິຏ຺ຐໍ. ທ຺ເວ ສຈ຺ຈາ ອສໍກິລິຏ຺ຐາ. ທຸກ຺ຂສຈ຺ຈໍ ສິຍາ ສໍກິລິຏ຺ຐໍ, ສິຍາ ອສໍກິລິຏ຺ຐໍ. ສມຸທຍສຈ຺ຈໍ ກິເລສສມ຺ປຍຸຕ຺ຕໍ. ທ຺ເວ ສຈ຺ຈາ ກິເລສວິປ຺ປຍຸຕ຺ຕາ. ທຸກ຺ຂສຈ຺ຈໍ ສິຍາ ກິເລສສມ຺ປຍຸຕ຺ຕໍ, ສິຍາ ກິເລສວິປ຺ປຍຸຕ຺ຕໍ. ສມຸທຍສຈ຺ຈໍ ກິເລໂສ ເຈວ ສໍກິເລສິກຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິປິ, ‘‘ສໍກິເລສິກາ ເຈວ ໂນ ຈ ກິເລສາ’’ຕິປິ. ທຸກ຺ຂສຈ຺ຈໍ ສິຍາ ກິເລໂສ ເຈວ ສໍກິເລສິກຎ຺ຈ, ສິຍາ ສໍກິເລສິກຎ຺ເຈວ ໂນ ຈ ກິເລໂສ. ສມຸທຍສຈ຺ຈໍ ກິເລໂສ ເຈວ ສໍກິລິຏ຺ຐຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ກິເລສາ ເຈວ ສໍກິລິຏ຺ຐາ ຈາ’’ຕິປິ, ‘‘ສໍກິລິຏ຺ຐາ ເຈວ ໂນ ຈ ກິເລສາ’’ຕິປິ. ທຸກ຺ຂສຈ຺ຈໍ ສິຍາ ກິເລໂສ ເຈວ ສໍກິລິຏ຺ຐຎ຺ຈ, ສິຍາ ສໍກິລິຏ຺ຐຎ຺ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພໍ – ‘‘ກິເລໂສ ເຈວ ສໍກິລິຏ຺ຐຎ຺ຈາ’’ຕິປິ, ‘‘ສໍກິລິຏ຺ຐຎ຺ເຈວ ໂນ ຈ ກິເລໂສ’’ຕິປິ. ສມຸທຍສຈ຺ຈໍ ກິເລໂສ ເຈວ ກິເລສສມ຺ປຍຸຕ຺ຕຎ຺ຈ. ທ຺ເວ ສຈ຺ຈາ ນ ວຕ຺ຕພ຺ພາ – ‘‘ກິເລສາ ເຈວ ກິເລສສມ຺ປຍຸຕ຺ຕາ ຈາ’’ຕິປິ, ‘‘ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ’’ຕິປິ. ທຸກ຺ຂສຈ຺ຈໍ ສິຍາ ກິເລໂສ ເຈວ ກິເລສສມ຺ປຍຸຕ຺ຕຎ຺ຈ, ສິຍາ ກິເລສສມ຺ປຍຸຕ຺ຕຎ຺ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ພໍ – ‘‘ກິເລໂສ ເຈວ ກິເລສສມ຺ປຍຸຕ຺ຕຎ຺ຈາ’’ ຕິປິ, ‘‘ກິເລສສມ຺ປຍຸຕ຺ຕຎ຺ເຈວ ໂນ ຈ ກິເລໂສ’’ຕິປິ. ທ຺ເວ ສຈ຺ຈາ ກິເລສວິປ຺ປຍຸຕ຺ຕອສໍກິເລສິກາ. ສມຸທຍສຈ຺ຈໍ ນ ວຕ຺ຕພ຺ພໍ – ‘‘ກິເລສວິປ຺ປຍຸຕ຺ຕສໍກິເລສິກ’’ນ຺ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກ’’ນ຺ຕິປິ. ທຸກ຺ຂສຈ຺ຈໍ ສິຍາ ກິເລສວິປ຺ປຍຸຕ຺ຕສໍກິເລສິກໍ, ສິຍາ ນ ວຕ຺ຕພ຺ພໍ – ‘‘ກິເລສວິປ຺ປຍຸຕ຺ຕສໍກິເລສິກ’’ນ຺ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກ’’ນ຺ຕິປິ.

ທ຺ເວ ສຈ຺ຈາ ນ ທສ຺ສເນນ ປຫາຕພ຺ພາ. ທ຺ເວ ສຈ຺ຈາ ສິຍາ ທສ຺ສເນນ ປຫາຕພ຺ພາ, ສິຍາ ນ ທສ຺ສເນນ ປຫາຕພ຺ພາ. ທ຺ເວ ສຈ຺ຈາ ນ ຠາວນາຍ ປຫາຕພ຺ພາ. ທ຺ເວ ສຈ຺ຈາ ສິຍາ ຠາວນາຍ ປຫາຕພ຺ພາ, ສິຍາ ນ ຠາວນາຍ ປຫາຕພ຺ພາ. ທ຺ເວ ສຈ຺ຈາ ນ ທສ຺ສເນນ ປຫາຕພ຺ພເຫຕຸກາ. ທ຺ເວ ສຈ຺ຈາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ນ ທສ຺ສເນນ ປຫາຕພ຺ພເຫຕຸກາ. ທ຺ເວ ສຈ຺ຈາ ນ ຠາວນາຍ ປຫາຕພ຺ພເຫຕຸກາ. ທ຺ເວ ສຈ຺ຈາ ສິຍາ ຠາວນາຍ ປຫາຕພ຺ພເຫຕຸກາ, ສິຍາ ນ ຠາວນາຍ ປຫາຕພ຺ພເຫຕຸກາ. ສມຸທຍສຈ຺ຈໍ ສວິຕກ຺ກໍ. ນິໂຣຘສຈ຺ຈໍ ອວິຕກ຺ກໍ. ທ຺ເວ ສຈ຺ຈາ ສິຍາ ສວິຕກ຺ກາ, ສິຍາ ອວິຕກ຺ກາ. ສມຸທຍສຈ຺ຈໍ ສວິຈາຣໍ. ນິໂຣຘສຈ຺ຈໍ ອວິຈາຣໍ. ທ຺ເວ ສຈ຺ຈາ ສິຍາ ສວິຈາຣາ, ສິຍາ ອວິຈາຣາ. ນິໂຣຘສຈ຺ຈໍ ອປ຺ປີຕິກໍ. ຕີຓິ ສຈ຺ຈານິ ສິຍາ ສປ຺ປີຕິກາ, ສິຍາ ອປ຺ປີຕິກາ. ນິໂຣຘສຈ຺ຈໍ ນ ປີຕິສຫຄຕໍ. ຕີຓິ ສຈ຺ຈານິ ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ນິໂຣຘສຈ຺ຈໍ ນ ສຸຂສຫຄຕໍ. ຕີຓິ ສຈ຺ຈານິ ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ນິໂຣຘສຈ຺ຈໍ ນ ອຸເປກ຺ຂາສຫຄຕໍ. ຕີຓິ ສຈ຺ຈານິ ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ.

ສມຸທຍສຈ຺ຈໍ ກາມາວຈຣໍ. ທ຺ເວ ສຈ຺ຈາ ນ ກາມາວຈຣາ. ທຸກ຺ຂສຈ຺ຈໍ ສິຍາ ກາມາວຈຣໍ, ສິຍາ ນ ກາມາວຈຣໍ. ຕີຓິ ສຈ຺ຈານິ ນ ຣູປາວຈຣາ. ທຸກ຺ຂສຈ຺ຈໍ ສິຍາ ຣູປາວຈຣໍ, ສິຍາ ນ ຣູປາວຈຣໍ. ຕີຓິ ສຈ຺ຈານິ ນ ອຣູປາວຈຣາ. ທຸກ຺ຂສຈ຺ຈໍ ສິຍາ ອຣູປາວຈຣໍ, ສິຍາ ນ ອຣູປາວຈຣໍ. ທ຺ເວ ສຈ຺ຈາ ປຣິຍາປນ຺ນາ. ທ຺ເວ ສຈ຺ຈາ ອປຣິຍາປນ຺ນາ. ມຄ຺ຄສຈ຺ຈໍ ນິຍ຺ຍານິກໍ. ຕີຓິ ສຈ຺ຈານິ ອນິຍ຺ຍານິກາ. ມຄ຺ຄສຈ຺ຈໍ ນິຍຕໍ. ນິໂຣຘສຈ຺ຈໍ ອນິຍຕໍ. ທ຺ເວ ສຈ຺ຈາ ສິຍາ ນິຍຕາ, ສິຍາ ອນິຍຕາ. ທ຺ເວ ສຈ຺ຈາ ສອຸຕ຺ຕຣາ. ທ຺ເວ ສຈ຺ຈາ ອນຸຕ຺ຕຣາ. ສມຸທຍສຈ຺ຈໍ ສຣຓໍ. ທ຺ເວ ສຈ຺ຈາ ອຣຓາ. ທຸກ຺ຂສຈ຺ຈໍ ສິຍາ ສຣຓໍ, ສິຍາ ອຣຓນ຺ຕິ.

ປຎ຺ຫາປຸຈ຺ຉກໍ.

ສຈ຺ຈວິຠງ຺ໂຄ ນິຏ຺ຐິໂຕ.