໑. ຕິກໍ

໑໗໐. ທສາຍຕນາ ອພ຺ຍາກຕາ. ທ຺ວາຍຕນາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ທສາຍຕນາ ນ ວຕ຺ຕພ຺ພາ – ‘‘ສຸຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ’’ຕິປິ. ມນາຍຕນໍ ສິຍາ ສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕໍ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ. ຘມ຺ມາຍຕນໍ ສິຍາ ສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕໍ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ, ສິຍາ ນ ວຕ຺ຕພ຺ພໍ – ‘‘ສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕ’’ນ຺ຕິປິ. ທສາຍຕນາ ເນວວິປາກນວິປາກຘມ຺ມຘມ຺ມາ. ທ຺ວາຍຕນາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ.

ປຎ຺ຈາຍຕນາ ອຸປາທິນ຺ນຸປາທານິຍາ. ສທ຺ທາຍຕນໍ ອນຸປາທິນ຺ນຸປາທານິຍໍ. ຈຕ຺ຕາໂຣ ອາຍຕນາ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທານິຍາ. ທ຺ວາຍຕນາ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ. ທສາຍຕນາ ອສໍກິລິຏ຺ຐສໍກິເລສິກາ. ທ຺ວາຍຕນາ ສິຍາ ສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ທສາຍຕນາ ອວິຕກ຺ກອວິຈາຣາ. ມນາຍຕນໍ ສິຍາ ສວິຕກ຺ກສວິຈາຣໍ, ສິຍາ ອວິຕກ຺ກວິຈາຣມຕ຺ຕໍ, ສິຍາ ອວິຕກ຺ກອວິຈາຣໍ. ຘມ຺ມາຍຕນໍ ສິຍາ ສວິຕກ຺ກສວິຈາຣໍ, ສິຍາ ອວິຕກ຺ກວິຈາຣມຕ຺ຕໍ, ສິຍາ ອວິຕກ຺ກອວິຈາຣໍ, ສິຍາ ນ ວຕ຺ຕພ຺ພໍ – ‘‘ສວິຕກ຺ກສວິຈາຣ’’ນ຺ຕິປິ, ‘‘ອວິຕກ຺ກວິຈາຣມຕ຺ຕ’’ນ຺ຕິປິ, ‘‘ອວິຕກ຺ກອວິຈາຣ’’ນ຺ຕິປິ. ທສາຍຕນາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ. ທ຺ວາຍຕນາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ.

ທສາຍຕນາ ເນວ ທສ຺ສເນນ ນ ຠາວນາຍ ປຫາຕພ຺ພາ. ທ຺ວາຍຕນາ ສິຍາ ທສ຺ສເນນ ປຫາຕພ຺ພາ, ສິຍາ ຠາວນາຍ ປຫາຕພ຺ພາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພາ. ທສາຍຕນາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ທ຺ວາຍຕນາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ຠາວນາຍ ປຫາຕພ຺ພເຫຕຸກາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ທສາຍຕນາ ເນວາຈຍຄາມິນາປຈຍຄາມິໂນ. ທ຺ວາຍຕນາ ສິຍາ ອາຈຍຄາມິໂນ, ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ທສາຍຕນາ ເນວເສກ຺ຂນາເສກ຺ຂາ. ທ຺ວາຍຕນາ ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ. ທສາຍຕນາ ປຣິຕ຺ຕາ. ທ຺ວາຍຕນາ ສິຍາ ປຣິຕ຺ຕາ, ສິຍາ ມຫຄ຺ຄຕາ, ສິຍາ ອປ຺ປມາຓາ. ທສາຍຕນາ ອນາຣມ຺ມຓາ. ທ຺ວາຍຕນາ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ, ສິຍາ ນ ວຕ຺ຕພ຺ພາ – ‘‘ປຣິຕ຺ຕາຣມ຺ມຓາ’’ຕິປິ, ‘‘ມຫຄ຺ຄຕາຣມ຺ມຓາ’’ຕິປິ, ‘‘ອປ຺ປມາຓາຣມ຺ມຓາ’’ຕິປິ. ທສາຍຕນາ ມຊ຺ຌິມາ. ທ຺ວາຍຕນາ ສິຍາ ຫີນາ, ສິຍາ ມຊ຺ຌິມາ, ສິຍາ ປຓີຕາ. ທສາຍຕນາ ອນິຍຕາ. ທ຺ວາຍຕນາ ສິຍາ ມິຈ຺ຉຕ຺ຕນິຍຕາ, ສິຍາ ສມ຺ມຕ຺ຕນິຍຕາ, ສິຍາ ອນິຍຕາ.

ທສາຍຕນາ ອນາຣມ຺ມຓາ. ທ຺ວາຍຕນາ ສິຍາ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ. ປຎ຺ຈາຍຕນາ ສິຍາ ອຸປ຺ປນ຺ນາ, ສິຍາ ອຸປ຺ປາທິໂນ, ນ ວຕ຺ຕພ຺ພາ – ‘‘ອນຸປ຺ປນ຺ນາ’’ຕິ. ສທ຺ທາຍຕນໍ ສິຍາ ອຸປ຺ປນ຺ນໍ, ສິຍາ ອນຸປ຺ປນ຺ນໍ, ນ ວຕ຺ຕພ຺ພໍ – ‘‘ອຸປ຺ປາທີ’’ຕິ. ປຎ຺ຈາຍຕນາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ຘມ຺ມາຍຕນໍ ສິຍາ ອຸປ຺ປນ຺ນໍ, ສິຍາ ອນຸປ຺ປນ຺ນໍ, ສິຍາ ອຸປ຺ປາທິ, ສິຍາ ນ ວຕ຺ຕພ຺ພໍ – ‘‘ອຸປ຺ປນ຺ນ’’ນ຺ຕິປິ, ‘‘ອນຸປ຺ປນ຺ນ’’ນ຺ຕິປິ, ‘‘ອຸປ຺ປາທີ’’ຕິປິ. ເອກາທສາຍຕນາ ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ຘມ຺ມາຍຕນໍ ສິຍາ ອຕີຕໍ, ສິຍາ ອນາຄຕໍ, ສິຍາ ປຈ຺ຈຸປ຺ປນ຺ນໍ, ສິຍາ ນ ວຕ຺ຕພ຺ພໍ – ‘‘ອຕີຕ’’ນ຺ຕິປິ, ‘‘ອນາຄຕ’’ນ຺ຕິປິ, ‘‘ປຈ຺ຈຸປ຺ປນ຺ນ’’ນ຺ຕິປິ. ທສາຍຕນາ ອນາຣມ຺ມຓາ. ທ຺ວາຍຕນາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ; ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ທສາຍຕນາ ອນາຣມ຺ມຓາ. ທ຺ວາຍຕນາ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຊ຺ຌຕ຺ຕາຣມ຺ມຓາ’’ຕິປິ, ‘‘ພຫິທ຺ຘາຣມ຺ມຓາ’’ຕິປິ, ‘‘ອຊ຺ຌຕ຺ຕພຫິທ຺ຘາຣມ຺ມຓາ’’ຕິປິ. ຣູປາຍຕນໍ ສນິທສ຺ສນສປ຺ປຏິຆໍ. ນວາຍຕນາ ອນິທສ຺ສນສປ຺ປຏິຆາ. ທ຺ວາຍຕນາ ອນິທສ຺ສນອປ຺ປຏິຆາ.