໒. ອຠິຘມ຺ມຠາຊນີຍໍ

໑໕໕. ທ຺ວາທສາຍຕນານິ – ຈກ຺ຂາຍຕນໍ, ໂສຕາຍຕນໍ, ຆານາຍຕນໍ, ຊິວ຺ຫາຍຕນໍ, ກາຍາຍຕນໍ, ມນາຍຕນໍ, ຣູປາຍຕນໍ, ສທ຺ທາຍຕນໍ, ຄນ຺ຘາຍຕນໍ, ຣສາຍຕນໍ, ໂຜຏ຺ຐພ຺ພາຍຕນໍ, ຘມ຺ມາຍຕນໍ.

໑໕໖. ຕຕ຺ຖ ກຕມໍ ຈກ຺ຂາຍຕນໍ? ຍໍ ຈກ຺ຂຸ [ຈກ຺ຂຸໍ (ສີ. ສ຺ຍາ. ກ.) ຘ. ສ. ໕໙໖-໕໙໙] ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ອຕ຺ຕຠາວປຣິຍາປນ຺ໂນ ອນິທສ຺ສໂນ ສປ຺ປຏິໂຆ, ເຍນ ຈກ຺ຂຸນາ ອນິທສ຺ສເນນ ສປ຺ປຏິເຆນ ຣູປໍ ສນິທສ຺ສນໍ ສປ຺ປຏິຆໍ ປສ຺ສິ ວາ ປສ຺ສຕິ ວາ ປສ຺ສິສ຺ສຕິ ວາ ປສ຺ເສ ວາ, ຈກ຺ຂຸມ຺ເປຕໍ ຈກ຺ຂາຍຕນມ຺ເປຕໍ ຈກ຺ຂຸຘາຕຸເປສາ ຈກ຺ຂຸນ຺ທ຺ຣິຍມ຺ເປຕໍ ໂລໂກເປໂສ ທ຺ວາຣາເປສາ ສມຸທ຺ໂທເປໂສ ປຓ຺ຑຣມ຺ເປຕໍ ເຂຕ຺ຕມ຺ເປຕໍ ວຕ຺ຖຸມ຺ເປຕໍ ເນຕ຺ຕມ຺ເປຕໍ ນຍນມ຺ເປຕໍ ໂອຣິມໍ ຕີຣມ຺ເປຕໍ ສຸຎ຺ໂຎ ຄາໂມເປໂສ. ອິທໍ ວຸຈ຺ຈຕິ ‘‘ຈກ຺ຂາຍຕນໍ’’.

໑໕໗. ຕຕ຺ຖ ກຕມໍ ໂສຕາຍຕນໍ? ຍໍ ໂສຕໍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ອຕ຺ຕຠາວປຣິຍາປນ຺ໂນ ອນິທສ຺ສໂນ ສປ຺ປຏິໂຆ, ເຍນ ໂສເຕນ ອນິທສ຺ສເນນ ສປ຺ປຏິເຆນ ສທ຺ທໍ ອນິທສ຺ສນໍ ສປ຺ປຏິຆໍ ສຸຓິ ວາ ສຸຓາຕິ ວາ ສຸຓິສ຺ສຕິ ວາ ສຸເຓ ວາ, ໂສຕມ຺ເປຕໍ ໂສຕາຍຕນມ຺ເປຕໍ ໂສຕຘາຕຸເປສາ ໂສຕິນ຺ທ຺ຣິຍມ຺ເປຕໍ ໂລໂກເປໂສ ທ຺ວາຣາເປສາ ສມຸທ຺ໂທເປໂສ ປຓ຺ຑຣມ຺ເປຕໍ ເຂຕ຺ຕມ຺ເປຕໍ ວຕ຺ຖຸມ຺ເປຕໍ ໂອຣິມໍ ຕີຣມ຺ເປຕໍ ສຸຎ຺ໂຎ ຄາໂມເປໂສ. ອິທໍ ວຸຈ຺ຈຕິ ‘‘ໂສຕາຍຕນໍ’’.

໑໕໘. ຕຕ຺ຖ ກຕມໍ ຆານາຍຕນໍ? ຍໍ ຆານໍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ອຕ຺ຕຠາວປຣິຍາປນ຺ໂນ ອນິທສ຺ສໂນ ສປ຺ປຏິໂຆ, ເຍນ ຆາເນນ ອນິທສ຺ສເນນ ສປ຺ປຏິເຆນ ຄນ຺ຘໍ ອນິທສ຺ສນໍ ສປ຺ປຏິຆໍ ຆາຍິ ວາ ຆາຍຕິ ວາ ຆາຍິສ຺ສຕິ ວາ ຆາເຍ ວາ, ຆານມ຺ເປຕໍ ຆານາຍຕນມ຺ເປຕໍ ຆານຘາຕຸເປສາ ຆານິນ຺ທ຺ຣິຍມ຺ເປຕໍ ໂລໂກເປໂສ ທ຺ວາຣາເປສາ ສມຸທ຺ໂທເປໂສ ປຓ຺ຑຣມ຺ເປຕໍ ເຂຕ຺ຕມ຺ເປຕໍ ວຕ຺ຖຸມ຺ເປຕໍ ໂອຣິມໍ ຕີຣມ຺ເປຕໍ ສຸຎ຺ໂຎ ຄາໂມເປໂສ. ອິທໍ ວຸຈ຺ຈຕິ ‘‘ຆານາຍຕນໍ’’.

໑໕໙. ຕຕ຺ຖ ກຕມໍ ຊິວ຺ຫາຍຕນໍ? ຍາ ຊິວ຺ຫາ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ອຕ຺ຕຠາວປຣິຍາປນ຺ໂນ ອນິທສ຺ສໂນ ສປ຺ປຏິໂຆ, ຍາຍ ຊິວ຺ຫາຍ ອນິທສ຺ສນາຍ ສປ຺ປຏິຆາຍ ຣສໍ ອນິທສ຺ສນໍ ສປ຺ປຏິຆໍ ສາຍິ ວາ ສາຍຕິ ວາ ສາຍິສ຺ສຕິ ວາ ສາເຍ ວາ, ຊິວ຺ຫາເປສາ ຊິວ຺ຫາຍຕນມ຺ເປຕໍ ຊິວ຺ຫາຘາຕຸເປສາ ຊີວ຺ຫິນ຺ທ຺ຣິຍມ຺ເປຕໍ ໂລໂກເປໂສ ທ຺ວາຣາເປສາ ສມຸທ຺ໂທເປໂສ ປຓ຺ຑຣມ຺ເປຕໍ ເຂຕ຺ຕມ຺ເປຕໍ ວຕ຺ຖຸມ຺ເປຕໍ ໂອຣິມໍ ຕີຣມ຺ເປຕໍ ສຸຎ຺ໂຎ ຄາໂມເປໂສ. ອິທໍ ວຸຈ຺ຈຕິ ‘‘ຊິວ຺ຫາຍຕນໍ’’.

໑໖໐. ຕຕ຺ຖ ກຕມໍ ກາຍາຍຕນໍ? ໂຍ ກາໂຍ ຈຕຸນ຺ນໍ ມຫາຠູຕານໍ ອຸປາທາຍ ປສາໂທ ອຕ຺ຕຠາວປຣິຍາປນ຺ໂນ ອນິທສ຺ສໂນ ສປ຺ປຏິໂຆ, ເຍນ ກາເຍນ ອນິທສ຺ສເນນ ສປ຺ປຏິເຆນ ໂຜຏ຺ຐພ຺ພໍ ອນິທສ຺ສນໍ ສປ຺ປຏິຆໍ ຜຸສິ ວາ ຜຸສຕິ ວາ ຜຸສິສ຺ສຕິ ວາ ຜຸເສ ວາ, ກາໂຍເປໂສ ກາຍາຍຕນມ຺ເປຕໍ ກາຍຘາຕຸເປສາ ກາຍິນ຺ທ຺ຣິຍມ຺ເປຕໍ ໂລໂກເປໂສ ທ຺ວາຣາເປສາ ສມຸທ຺ໂທເປໂສ ປຓ຺ຑຣມ຺ເປຕໍ ເຂຕ຺ຕມ຺ເປຕໍ ວຕ຺ຖຸມ຺ເປຕໍ ໂອຣິມໍ ຕີຣມ຺ເປຕໍ ສຸຎ຺ໂຎ ຄາໂມເປໂສ. ອິທໍ ວຸຈ຺ຈຕິ ‘‘ກາຍາຍຕນໍ’’.

໑໖໑. ຕຕ຺ຖ ກຕມໍ ມນາຍຕນໍ? ເອກວິເຘນ ມນາຍຕນໍ – ຜສ຺ສສມ຺ປຍຸຕ຺ຕໍ.

ທຸວິເຘນ ມນາຍຕນໍ – ອຕ຺ຖິ ສເຫຕຸກໍ, ອຕ຺ຖິ ອເຫຕຸກໍ.

ຕິວິເຘນ ມນາຍຕນໍ – ອຕ຺ຖິ ກຸສລໍ, ອຕ຺ຖິ ອກຸສລໍ, ອຕ຺ຖິ ອພ຺ຍາກຕໍ.

ຈຕຸພ຺ພິເຘນ ມນາຍຕນໍ – ອຕ຺ຖິ ກາມາວຈຣໍ, ອຕ຺ຖິ ຣູປາວຈຣໍ, ອຕ຺ຖິ ອຣູປາວຈຣໍ, ອຕ຺ຖິ ອປຣິຍາປນ຺ນໍ.

ປຎ຺ຈວິເຘນ ມນາຍຕນໍ – ອຕ຺ຖິ ສຸຂິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ທຸກ຺ຂິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ໂສມນສ຺ສິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ໂທມນສ຺ສິນ຺ທ຺ຣິຍສມ຺ປຍຸຕ຺ຕໍ, ອຕ຺ຖິ ອຸເປກ຺ຂິນ຺ທ຺ຣິຍສມ຺ປຍຸຕ຺ຕໍ.

ຉພ຺ພິເຘນ ມນາຍຕນໍ – ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນວິຎ຺ຎາຓໍ. ເອວໍ ຉພ຺ພິເຘນ ມນາຍຕນໍ.

ສຕ຺ຕວິເຘນ ມນາຍຕນໍ – ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ. ເອວໍ ສຕ຺ຕວິເຘນ ມນາຍຕນໍ.

ອຏ຺ຐວິເຘນ ມນາຍຕນໍ – ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ ອຕ຺ຖິ ສຸຂສຫຄຕໍ, ອຕ຺ຖິ ທຸກ຺ຂສຫຄຕໍ, ມໂນຘາຕຸ, ມໂນວິຎ຺ຎາຓຘາຕຸ. ເອວໍ ອຏ຺ຐວິເຘນ ມນາຍຕນໍ.

ນວວິເຘນ ມນາຍຕນໍ – ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ ອຕ຺ຖິ ກຸສລໍ, ອຕ຺ຖິ ອກຸສລໍ, ອຕ຺ຖິ ອພ຺ຍາກຕໍ. ເອວໍ ນວວິເຘນ ມນາຍຕນໍ.

ທສວິເຘນ ມນາຍຕນໍ – ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ ອຕ຺ຖິ ສຸຂສຫຄຕໍ, ອຕ຺ຖິ ທຸກ຺ຂສຫຄຕໍ, ມໂນຘາຕຸ, ມໂນວິຎ຺ຎາຓຘາຕຸ ອຕ຺ຖິ ກຸສລໍ, ອຕ຺ຖິ ອກຸສລໍ, ອຕ຺ຖິ ອພ຺ຍາກຕໍ. ເອວໍ ທສວິເຘນ ມນາຍຕນໍ.

ເອກວິເຘນ ມນາຍຕນໍ – ຜສ຺ສສມ຺ປຍຸຕ຺ຕໍ.

ທຸວິເຘນ ມນາຍຕນໍ – ອຕ຺ຖິ ສເຫຕຸກໍ, ອຕ຺ຖິ ອເຫຕຸກໍ.

ຕິວິເຘນ ມນາຍຕນໍ – ອຕ຺ຖິ ສຸຂາຍ ເວທນາຍ ສມ຺ປຍຸຕ຺ຕໍ, ອຕ຺ຖິ ທຸກ຺ຂາຍ ເວທນາຍ ສມ຺ປຍຸຕ຺ຕໍ, ອຕ຺ຖິ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ…ເປ…. ເອວໍ ພຫຸວິເຘນ ມນາຍຕນໍ. ອິທໍ ວຸຈ຺ຈຕິ ‘‘ມນາຍຕນໍ’’.

໑໖໒. ຕຕ຺ຖ ກຕມໍ ຣູປາຍຕນໍ? ຍໍ ຣູປໍ ຈຕຸນ຺ນໍ ມຫາຠູຕານໍ ອຸປາທາຍ ວຓ຺ຓນິຠາ ສນິທສ຺ສນໍ ສປ຺ປຏິຆໍ ນີລໍ ປີຕກໍ ໂລຫິຕກໍ [ປີຕໍ ໂລຫິຕໍ (ສີ.)] ໂອທາຕໍ ກາຬກໍ ມຎ຺ຊິຏ຺ຐກໍ [ມຎ຺ເຊຏ຺ຐກໍ (ສີ. ສ຺ຍາ.)] ຫຣິ ຫຣິວຓ຺ຓໍ ອມ຺ພງ຺ກຸຣວຓ຺ຓໍ ທີຆໍ ຣສ຺ສໍ ອຓຸໍ ຖູລໍ ວຏ຺ຏໍ ປຣິມຓ຺ຑລໍ ຈຕຸຣສ຺ສໍ ຉຬໍສໍ ອຏ຺ຐໍສໍ ໂສຬສໍສໍ ນິນ຺ນໍ ຖລໍ ຉາຍາ ອາຕໂປ ອາໂລໂກ ອນ຺ຘກາໂຣ ອພ຺ຠາ ມຫິກາ ຘູໂມ ຣໂຊ ຈນ຺ທມຓ຺ຑລສ຺ສ ວຓ຺ຓນິຠາ ສູຣິຍມຓ຺ຑລສ຺ສ [ສຸຣິຍມຓ຺ຑລສ຺ສ (ສີ. ສ຺ຍາ. ກໍ.)] ວຓ຺ຓນິຠາ ຕາຣກຣູປານໍ ວຓ຺ຓນິຠາ ອາທາສມຓ຺ຑລສ຺ສ ວຓ຺ຓນິຠາ ມຓິສງ຺ຂມຸຕ຺ຕເວຬຸຣິຍສ຺ສ ວຓ຺ຓນິຠາ ຊາຕຣູປຣຊຕສ຺ສ ວຓ຺ຓນິຠາ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ຈຕຸນ຺ນໍ ມຫາຠູຕານໍ ອຸປາທາຍ ວຓ຺ຓນິຠາ ສນິທສ຺ສນໍ ສປ຺ປຏິຆໍ, ຍໍ ຣູປໍ ສນິທສ຺ສນໍ ສປ຺ປຏິຆໍ ຈກ຺ຂຸນາ ອນິທສ຺ສເນນ ສປ຺ປຏິເຆນ ປສ຺ສິ ວາ ປສ຺ສຕິ ວາ ປສ຺ສິສ຺ສຕິ ວາ ປສ຺ເສ ວາ, ຣູປມ຺ເປຕໍ ຣູປາຍຕນມ຺ເປຕໍ ຣູປຘາຕຸເປສາ. ອິທໍ ວຸຈ຺ຈຕິ ‘‘ຣູປາຍຕນໍ’’.

໑໖໓. ຕຕ຺ຖ ກຕມໍ ສທ຺ທາຍຕນໍ? ໂຍ ສທ຺ໂທ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ ເຠຣິສທ຺ໂທ ມຸທິງ຺ຄສທ຺ໂທ [ມຸຕິງ຺ຄສທ຺ໂຘ (ສີ.)] ສງ຺ຂສທ຺ໂທ ປຓວສທ຺ໂທ ຄີຕສທ຺ໂທ ວາທິຕສທ຺ໂທ ສມ຺ມສທ຺ໂທ ປາຓິສທ຺ໂທ ສຕ຺ຕານໍ ນິຄ຺ໂຆສສທ຺ໂທ ຘາຕູນໍ ສນ຺ນິຆາຕສທ຺ໂທ ວາຕສທ຺ໂທ ອຸທກສທ຺ໂທ ມນຸສ຺ສສທ຺ໂທ ອມນຸສ຺ສສທ຺ໂທ, ໂຍ ວາ ປນຎ຺ໂຎປິ ອຕ຺ຖິ ສທ຺ໂທ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ, ຍໍ ສທ຺ທໍ ອນິທສ຺ສນໍ ສປ຺ປຏິຆໍ ໂສເຕນ ອນິທສ຺ສເນນ ສປ຺ປຏິເຆນ ສຸຓິ ວາ ສຸຓາຕິ ວາ ສຸຓິສ຺ສຕິ ວາ ສຸເຓ ວາ, ສທ຺ໂທເປໂສ ສທ຺ທາຍຕນມ຺ເປຕໍ ສທ຺ທຘາຕຸເປສາ. ອິທໍ ວຸຈ຺ຈຕິ ‘‘ສທ຺ທາຍຕນໍ’’.

໑໖໔. ຕຕ຺ຖ ກຕມໍ ຄນ຺ຘາຍຕນໍ? ໂຍ ຄນ຺ໂຘ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ ມູລຄນ຺ໂຘ ສາຣຄນ຺ໂຘ ຕຈຄນ຺ໂຘ ປຕ຺ຕຄນ຺ໂຘ ປຸປ຺ຜຄນ຺ໂຘ ຜລຄນ຺ໂຘ ອາມຄນ຺ໂຘ ວິສ຺ສຄນ຺ໂຘ ສຸຄນ຺ໂຘ ທຸຄ຺ຄນ຺ໂຘ, ໂຍ ວາ ປນຎ຺ໂຎປິ ອຕ຺ຖິ ຄນ຺ໂຘ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ, ຍໍ ຄນ຺ຘໍ ອນິທສ຺ສນໍ ສປ຺ປຏິຆໍ ຆາເນນ ອນິທສ຺ສເນນ ສປ຺ປຏິເຆນ ຆາຍິ ວາ ຆາຍຕິ ວາ ຆາຍິສ຺ສຕິ ວາ ຆາເຍ ວາ, ຄນ຺ໂຘເປໂສ ຄນ຺ຘາຍຕນມ຺ເປຕໍ ຄນ຺ຘຘາຕຸເປສາ. ອິທໍ ວຸຈ຺ຈຕິ ‘‘ຄນ຺ຘາຍຕນໍ’’.

໑໖໕. ຕຕ຺ຖ ກຕມໍ ຣສາຍຕນໍ? ໂຍ ຣໂສ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ ມູລຣໂສ ຂນ຺ຘຣໂສ ຕຈຣໂສ ປຕ຺ຕຣໂສ ປຸປ຺ຜຣໂສ ຜລຣໂສ ອມ຺ພິລໍ ມຘຸຣໍ ຕິຕ຺ຕກໍ ກຏຸກໍ ໂລຓິກໍ [ລປິລກໍ (ສີ.), ລມ຺ປິກໍ (ກ. ສີ.)] ຂາຣິກໍ ລມ຺ພິກໍ ກສາໂວ ສາທຸ ອສາທຸ, ໂຍ ວາ ປນຎ຺ໂຎປິ ອຕ຺ຖິ ຣໂສ ຈຕຸນ຺ນໍ ມຫາຠູຕານໍ ອຸປາທາຍ ອນິທສ຺ສໂນ ສປ຺ປຏິໂຆ, ຍໍ ຣສໍ ອນິທສ຺ສນໍ ສປ຺ປຏິຆໍ ຊິວ຺ຫາຍ ອນິທສ຺ສນາຍ ສປ຺ປຏິຆາຍ ສາຍິ ວາ ສາຍຕິ ວາ ສາຍິສ຺ສຕິ ວາ ສາເຍ ວາ, ຣໂສເປໂສ ຣສາຍຕນມ຺ເປຕໍ ຣສຘາຕຸເປສາ. ອິທໍ ວຸຈ຺ຈຕິ ‘‘ຣສາຍຕນໍ’’.

໑໖໖. ຕຕ຺ຖ ກຕມໍ ໂຜຏ຺ຐພ຺ພາຍຕນໍ? ປຖວີຘາຕຸ ເຕໂຊຘາຕຸ ວາໂຍຘາຕຸ ກກ຺ຂຬໍ ມຸທຸກໍ ສຓ຺ຫໍ ຜຣຸສໍ ສຸຂສມ຺ຜສ຺ສໍ ທຸກ຺ຂສມ຺ຜສ຺ສໍ ຄຣຸກໍ ລຫຸກໍ, ຍໍ ໂຜຏ຺ຐພ຺ພໍ ອນິທສ຺ສນໍ ສປ຺ປຏິຆໍ ກາເຍນ ອນິທສ຺ສເນນ ສປ຺ປຏິເຆນ ຜຸສິ ວາ ຜຸສຕິ ວາ ຜຸສິສ຺ສຕິ ວາ ຜຸເສ ວາ, ໂຜຏ຺ຐພ຺ໂພເປໂສ ໂຜຏ຺ຐພ຺ພາຍຕນມ຺ເປຕໍ ໂຜຏ຺ຐພ຺ພຘາຕຸເປສາ. ອິທໍ ວຸຈ຺ຈຕິ ‘‘ໂຜຏ຺ຐພ຺ພາຍຕນໍ’’.

໑໖໗. ຕຕ຺ຖ ກຕມໍ ຘມ຺ມາຍຕນໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ຍຎ຺ຈ ຣູປໍ ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ, ອສງ຺ຂຕາ ຈ ຘາຕຸ.

ຕຕ຺ຖ ກຕໂມ ເວທນາກ຺ຂນ຺ໂຘ? ເອກວິເຘນ ເວທນາກ຺ຂນ຺ໂຘ – ຜສ຺ສສມ຺ປຍຸຕ຺ໂຕ. ທຸວິເຘນ ເວທນາກ຺ຂນ຺ໂຘ – ອຕ຺ຖິ ສເຫຕຸໂກ, ອຕ຺ຖິ ອເຫຕຸໂກ. ຕິວິເຘນ ເວທນາກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ເວທນາກ຺ຂນ຺ໂຘ…ເປ… ເອວໍ ພຫຸວິເຘນ ເວທນາກ຺ຂນ຺ໂຘ. ອຍໍ ວຸຈ຺ຈຕິ ‘‘ເວທນາກ຺ຂນ຺ໂຘ’’.

ຕຕ຺ຖ ກຕໂມ ສຎ຺ຎາກ຺ຂນ຺ໂຘ? ເອກວິເຘນ ສຎ຺ຎາກ຺ຂນ຺ໂຘ – ຜສ຺ສສມ຺ປຍຸຕ຺ໂຕ. ທຸວິເຘນ ສຎ຺ຎາກ຺ຂນ຺ໂຘ – ອຕ຺ຖິ ສເຫຕຸໂກ, ອຕ຺ຖິ ອເຫຕຸໂກ. ຕິວິເຘນ ສຎ຺ຎາກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ສຎ຺ຎາກ຺ຂນ຺ໂຘ…ເປ… ເອວໍ ພຫຸວິເຘນ ສຎ຺ຎາກ຺ຂນ຺ໂຘ. ອຍໍ ວຸຈ຺ຈຕິ ‘‘ສຎ຺ຎາກ຺ຂນ຺ໂຘ’’.

ຕຕ຺ຖ ກຕໂມ ສງ຺ຂາຣກ຺ຂນ຺ໂຘ? ເອກວິເຘນ ສງ຺ຂາຣກ຺ຂນ຺ໂຘ – ຈິຕ຺ຕສມ຺ປຍຸຕ຺ໂຕ. ທຸວິເຘນ ສງ຺ຂາຣກ຺ຂນ຺ໂຘ – ອຕ຺ຖິ ເຫຕຸ, ອຕ຺ຖິ ນ ເຫຕຸ. ຕິວິເຘນ ສງ຺ຂາຣກ຺ຂນ຺ໂຘ – ອຕ຺ຖິ ກຸສໂລ, ອຕ຺ຖິ ອກຸສໂລ, ອຕ຺ຖິ ອພ຺ຍາກໂຕ…ເປ… ເອວໍ ທສວິເຘນ ສງ຺ຂາຣກ຺ຂນ຺ໂຘ…ເປ… ເອວໍ ພຫຸວິເຘນ ສງ຺ຂາຣກ຺ຂນ຺ໂຘ. ອຍໍ ວຸຈ຺ຈຕິ ‘‘ສງ຺ຂາຣກ຺ຂນ຺ໂຘ’’.

ຕຕ຺ຖ ກຕມໍ ຣູປໍ ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ? ອິຕ຺ຖິນ຺ທ຺ຣິຍໍ ປຸຣິສິນ຺ທ຺ຣິຍໍ…ເປ… ກພຬີກາໂຣ ອາຫາໂຣ. ອິທໍ ວຸຈ຺ຈຕິ ຣູປໍ ‘‘ອນິທສ຺ສນອປ຺ປຏິຆໍ ຘມ຺ມາຍຕນປຣິຍາປນ຺ນໍ’’.

ຕຕ຺ຖ ກຕມາ ອສງ຺ຂຕາ ຘາຕຸ? ຣາຄກ຺ຂໂຍ, ໂທສກ຺ຂໂຍ, ໂມຫກ຺ຂໂຍ – ອຍໍ ວຸຈ຺ຈຕິ ‘‘ອສງ຺ຂຕາ ຘາຕຸ’’.

ອິທໍ ວຸຈ຺ຈຕິ ຘມ຺ມາຍຕນໍ.

ອຠິຘມ຺ມຠາຊນີຍໍ.