໑. ກາມຘາຕຸ

໙໙໙. ປຎ຺ຈນ຺ນໍ ຂນ຺ຘານໍ ກຕິ ກາມຘາຕຸປຣິຍາປນ຺ນາ, ກຕິ ນ ກາມຘາຕຸປຣິຍາປນ຺ນາ…ເປ… ສຕ຺ຕນ຺ນໍ ຈິຕ຺ຕານໍ ກຕິ ກາມຘາຕຸປຣິຍາປນ຺ນາ, ກຕິ ນ ກາມຘາຕຸປຣິຍາປນ຺ນາ?

໑໐໐໐. ຣູປກ຺ຂນ຺ໂຘ ກາມຘາຕຸປຣິຍາປນ຺ໂນ; ຈຕ຺ຕາໂຣ ຂນ຺ຘາ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ທສາຍຕນາ ກາມຘາຕຸປຣິຍາປນ຺ນາ; ທ຺ເວ ອາຍຕນາ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ໂສຬສ ຘາຕຸໂຍ ກາມຘາຕຸປຣິຍາປນ຺ນາ; ທ຺ເວ ຘາຕຸໂຍ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ສມຸທຍສຈ຺ຈໍ ກາມຘາຕຸປຣິຍາປນ຺ນໍ; ທ຺ເວ ສຈ຺ຈາ ນ ກາມຘາຕຸປຣິຍາປນ຺ນາ; ທຸກ຺ຂສຈ຺ຈໍ ສິຍາ ກາມຘາຕຸປຣິຍາປນ຺ນໍ, ສິຍາ ນ ກາມຘາຕຸປຣິຍາປນ຺ນໍ.

ທສິນ຺ທ຺ຣິຍາ ກາມຘາຕຸປຣິຍາປນ຺ນາ; ຕີຓິນ຺ທ຺ຣິຍາ ນ ກາມຘາຕຸປຣິຍາປນ຺ນາ; ນວິນ຺ທ຺ຣິຍາ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ຕໂຍ ອກຸສລເຫຕູ ກາມຘາຕຸປຣິຍາປນ຺ນາ; ຉ ເຫຕູ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ກພຬີກາໂຣ ອາຫາໂຣ ກາມຘາຕຸປຣິຍາປນ຺ໂນ; ຕໂຍ ອາຫາຣາ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.

ຉ ຜສ຺ສາ ກາມຘາຕຸປຣິຍາປນ຺ນາ; ມໂນວິຎ຺ຎາຓຘາຕຸສມ຺ຜສ຺ໂສ ສິຍາ ກາມຘາຕຸ ປຣິຍາປນ຺ໂນ, ສິຍາ ນ ກາມຘາຕຸປຣິຍາປນ຺ໂນ.

ຉ ເວທນາ…ເປ… ຉ ສຎ຺ຎາ… ຉ ເຈຕນາ… ຉ ຈິຕ຺ຕາ ກາມຘາຕຸປຣິຍາປນ຺ນາ; ມໂນວິຎ຺ຎາຓຘາຕຸ ສິຍາ ກາມຘາຕຸປຣິຍາປນ຺ນາ, ສິຍາ ນ ກາມຘາຕຸປຣິຍາປນ຺ນາ.