໑. ກາມຘາຕຸ

໙໙໑. ກາມຘາຕຸຍາ ກຕິ ຂນ຺ຘາ, ກຕິ ອາຍຕນານິ, ກຕິ ຘາຕຸໂຍ, ກຕິ ສຈ຺ຈານິ, ກຕິ ອິນ຺ທ຺ຣິຍານິ, ກຕິ ເຫຕູ, ກຕິ ອາຫາຣາ, ກຕິ ຜສ຺ສາ, ກຕິ ເວທນາ, ກຕິ ສຎ຺ຎາ, ກຕິ ເຈຕນາ, ກຕິ ຈິຕ຺ຕານິ?

ກາມຘາຕຸຍາ ປຎ຺ຈກ຺ຂນ຺ຘາ, ທ຺ວາທສາຍຕນານິ, ອຏ຺ຐາຣສ ຘາຕຸໂຍ, ຕີຓິ ສຈ຺ຈານິ, ພາວີສຕິນ຺ທ຺ຣິຍານິ, ນວ ເຫຕູ, ຈຕ຺ຕາໂຣ ອາຫາຣາ, ສຕ຺ຕ ຜສ຺ສາ, ສຕ຺ຕ ເວທນາ, ສຕ຺ຕ ສຎ຺ຎາ, ສຕ຺ຕ ເຈຕນາ, ສຕ຺ຕ ຈິຕ຺ຕານິ.

໙໙໒. ຕຕ຺ຖ ກຕເມ ກາມຘາຕຸຍາ ປຎ຺ຈກ຺ຂນ຺ຘາ? ຣູປກ຺ຂນ຺ໂຘ, ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ວຸຈ຺ຈນ຺ຕິ ‘‘ກາມຘາຕຸຍາ ປຎ຺ຈກ຺ຂນ຺ຘາ’’.

ຕຕ຺ຖ ກຕມານິ ກາມຘາຕຸຍາ ທ຺ວາທສາຍຕນານິ? ຈກ຺ຂາຍຕນໍ, ຣູປາຍຕນໍ, ໂສຕາຍຕນໍ, ສທ຺ທາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ – ອິມານິ ວຸຈ຺ຈນ຺ຕິ ‘‘ກາມຘາຕຸຍາ ທ຺ວາທສາຍຕນານິ’’.

ຕຕ຺ຖ ກຕມາ ກາມຘາຕຸຍາ ອຏ຺ຐາຣສ ຘາຕຸໂຍ? ຈກ຺ຂຸຘາຕຸ, ຣູປຘາຕຸ, ຈກ຺ຂຸວິຎ຺ຎາຓຘາຕຸ, ໂສຕຘາຕຸ, ສທ຺ທຘາຕຸ, ໂສຕວິຎ຺ຎາຓຘາຕຸ, ຆານຘາຕຸ, ຄນ຺ຘຘາຕຸ, ຆານວິຎ຺ຎາຓຘາຕຸ, ຊິວ຺ຫາຘາຕຸ, ຣສຘາຕຸ, ຊິວ຺ຫາວິຎ຺ຎາຓຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ກາຍວິຎ຺ຎາຓຘາຕຸ, ມໂນຘາຕຸ, ຘມ຺ມຘາຕຸ, ມໂນວິຎ຺ຎາຓຘາຕຸ – ອິມາ ວຸຈ຺ຈນ຺ຕິ ‘‘ກາມຘາຕຸຍາ ອຏ຺ຐາຣສ ຘາຕຸໂຍ’’.

ຕຕ຺ຖ ກຕມານິ ກາມຘາຕຸຍາ ຕີຓິ ສຈ຺ຈານິ? ທຸກ຺ຂສຈ຺ຈໍ, ສມຸທຍສຈ຺ຈໍ, ມຄ຺ຄສຈ຺ຈໍ – ອິມານິ ວຸຈ຺ຈນ຺ຕິ ‘‘ກາມຘາຕຸຍາ ຕີຓິ ສຈ຺ຈານິ’’.

ຕຕ຺ຖ ກຕມານິ ກາມຘາຕຸຍາ ພາວີສຕິນ຺ທ຺ຣິຍານິ? ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ…ເປ… ອຎ຺ຎາຕາວິນ຺ທ຺ຣິຍໍ – ອິມານິ ວຸຈ຺ຈນ຺ຕິ ‘‘ກາມຘາຕຸຍາ ພາວີສຕິນ຺ທ຺ຣິຍານິ’’.

ຕຕ຺ຖ ກຕເມ ກາມຘາຕຸຍາ ນວ ເຫຕູ? ຕໂຍ ກຸສລເຫຕູ, ຕໂຍ ອກຸສລເຫຕູ, ຕໂຍ ອພ຺ຍາກຕເຫຕູ…ເປ… ອິເມ ວຸຈ຺ຈນ຺ຕິ ‘‘ກາມຘາຕຸຍາ ນວ ເຫຕູ’’.

ຕຕ຺ຖ ກຕເມ ກາມຘາຕຸຍາ ຈຕ຺ຕາໂຣ ອາຫາຣາ? ກພຬີກາຣາຫາໂຣ, ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ອິເມ ວຸຈ຺ຈນ຺ຕິ ‘‘ກາມຘາຕຸຍາ ຈຕ຺ຕາໂຣ ອາຫາຣາ’’.

ຕຕ຺ຖ ກຕເມ ກາມຘາຕຸຍາ ສຕ຺ຕ ຜສ຺ສາ? ຈກ຺ຂຸສມ຺ຜສ຺ໂສ ໂສຕສມ຺ຜສ຺ໂສ, ຆານສມ຺ຜສ຺ໂສ, ຊິວ຺ຫາສມ຺ຜສ຺ໂສ, ກາຍສມ຺ຜສ຺ໂສ, ມໂນຘາຕຸສມ຺ຜສ຺ໂສ, ມໂນວິຎ຺ຎາຓຘາຕຸສມ຺ຜສ຺ໂສ – ອິເມ ວຸຈ຺ຈນ຺ຕິ ‘‘ກາມຘາຕຸຍາ ສຕ຺ຕ ຜສ຺ສາ’’.

ຕຕ຺ຖ ກຕມາ ກາມຘາຕຸຍາ ສຕ຺ຕ ເວທນາ? ຈກ຺ຂຸສມ຺ຜສ຺ສຊາ ເວທນາ, ໂສຕສມ຺ຜສ຺ສຊາ ເວທນາ, ຆານສມ຺ຜສ຺ສຊາ ເວທນາ, ຊິວ຺ຫາສມ຺ຜສ຺ສຊາ ເວທນາ, ກາຍສມ຺ຜສ຺ສຊາ ເວທນາ, ມໂນຘາຕຸສມ຺ຜສ຺ສຊາ ເວທນາ, ມໂນວິຎ຺ຎາຓຘາຕຸສມ຺ຜສ຺ສຊາ ເວທນາ – ອິມາ ວຸຈ຺ຈຕ຺ຕິ ‘‘ກາມຘາຕຸຍາ ສຕ຺ຕ ເວທນາ’’.

ຕຕ຺ຖ ກຕມາ ກາມຘາຕຸຍາ ສຕ຺ຕ ສຎ຺ຎາ? ຈກ຺ຂຸສມ຺ຜສ຺ສຊາ ສຎ຺ຎາ, ໂສຕສມ຺ຜສ຺ສຊາ ສຎ຺ຎາ, ຆານສມ຺ຜສ຺ສຊາ ສຎ຺ຎາ, ຊິວ຺ຫາສມ຺ຜສ຺ສຊາ ສຎ຺ຎາ, ກາຍສມ຺ຜສ຺ສຊາ ສຎ຺ຎາ, ມໂນຘາຕຸສມ຺ຜສ຺ສຊາ ສຎ຺ຎາ, ມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ – ອິມາ ວຸຈ຺ຈນ຺ຕິ ‘‘ກາມຘາຕຸຍາ ສຕ຺ຕ ສຎ຺ຎາ’’.

ຕຕ຺ຖ ກຕມາ ກາມຘາຕຸຍາ ສຕ຺ຕ ເຈຕນາ? ຈກ຺ຂຸສມ຺ຜສ຺ສຊາ ເຈຕນາ, ໂສຕສມ຺ຜສ຺ສຊາ ເຈຕນາ, ຆານສມ຺ຜສ຺ສຊາ ເຈຕນາ, ຊິວ຺ຫາສມ຺ຜສ຺ສຊາ ເຈຕນາ, ກາຍສມ຺ຜສ຺ສຊາ ເຈຕນາ, ມໂນຘາຕຸສມ຺ຜສ຺ສຊາ ເຈຕນາ, ມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ – ອິມາ ວຸຈ຺ຈນ຺ຕິ ‘‘ກາມຘາຕຸຍາ ສຕ຺ຕ ເຈຕນາ’’.

ຕຕ຺ຖ ກຕມານິ ກາມຘາຕຸຍາ ສຕ຺ຕ ຈິຕ຺ຕານິ? ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ – ອິມານິ ວຸຈ຺ຈນ຺ຕິ ‘‘ກາມຘາຕຸຍາ ສຕ຺ຕ ຈິຕ຺ຕານິ’’.