໑. ສພ຺ພສງ຺ຄາຫິກວາໂຣ

໙໗໘. ກຕິ ຂນ຺ຘາ, ກຕິ ອາຍຕນານິ, ກຕິ ຘາຕຸໂຍ, ກຕິ ສຈ຺ຈານິ, ກຕິ ອິນ຺ທ຺ຣິຍານິ, ກຕິ ເຫຕູ, ກຕິ ອາຫາຣາ, ກຕິ ຜສ຺ສາ, ກຕິ ເວທນາ, ກຕິ ສຎ຺ຎາ, ກຕິ ເຈຕນາ, ກຕິ ຈິຕ຺ຕານິ?

ປຎ຺ຈກ຺ຂນ຺ຘາ, ທ຺ວາທສາຍຕນານິ, ອຏ຺ຐາຣສ ຘາຕຸໂຍ, ຈຕ຺ຕາຣິ ສຈ຺ຈານິ, ພາວີສຕິນ຺ທ຺ຣິຍານິ, ນວ ເຫຕູ, ຈຕ຺ຕາໂຣ ອາຫາຣາ, ສຕ຺ຕ ຜສ຺ສາ, ສຕ຺ຕ ເວທນາ, ສຕ຺ຕ ສຎ຺ຎາ, ສຕ຺ຕ ເຈຕນາ, ສຕ຺ຕ ຈິຕ຺ຕານິ.

໙໗໙. ຕຕ຺ຖ ກຕເມ ປຎ຺ຈກ຺ຂນ຺ຘາ? ຣູປກ຺ຂນ຺ໂຘ, ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ – ອິເມ ວຸຈ຺ຈນ຺ຕິ ‘‘ປຎ຺ຈກ຺ຂນ຺ຘາ’’.

໙໘໐. ຕຕ຺ຖ ກຕມານິ ທ຺ວາທສາຍຕນານິ? ຈກ຺ຂາຍຕນໍ, ຣູປາຍຕນໍ, ໂສຕາຍຕນໍ, ສທ຺ທາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ – ອິມານິ ວຸຈ຺ຈນ຺ຕິ ‘‘ທ຺ວາທສາຍຕນານິ’’.

໙໘໑. ຕຕ຺ຖ ກຕມາ ອຏ຺ຐາຣສ ຘາຕຸໂຍ? ຈກ຺ຂຸຘາຕຸ, ຣູປຘາຕຸ, ຈກ຺ຂຸວິຎ຺ຎາຓຘາຕຸ, ໂສຕຘາຕຸ, ສທ຺ທຘາຕຸ, ໂສຕວິຎ຺ຎາຓຘາຕຸ, ຆານຘາຕຸ, ຄນ຺ຘຘາຕຸ, ຆານວິຎ຺ຎາຓຘາຕຸ, ຊິວ຺ຫາຘາຕຸ, ຣສຘາຕຸ, ຊິວ຺ຫາວິຎ຺ຎາຓຘາຕຸ, ກາຍຘາຕຸ, ໂຜຏ຺ຐພ຺ພຘາຕຸ, ກາຍວິຎ຺ຎາຓຘາຕຸ, ມໂນຘາຕຸ, ຘມ຺ມຘາຕຸ, ມໂນວິຎ຺ຎາຓຘາຕຸ – ອິມາ ວຸຈ຺ຈນ຺ຕິ ‘‘ອຏ຺ຐາຣສ ຘາຕຸໂຍ’’.

໙໘໒. ຕຕ຺ຖ ກຕມານິ ຈຕ຺ຕາຣິ ສຈ຺ຈານິ? ທຸກ຺ຂສຈ຺ຈໍ, ສມຸທຍສຈ຺ຈໍ, ນິໂຣຘສຈ຺ຈໍ, ມຄ຺ຄສຈ຺ຈໍ – ອິມານິ ວຸຈ຺ຈນ຺ຕິ ‘‘ຈຕ຺ຕາຣິ ສຈ຺ຈານິ’’.

໙໘໓. ຕຕ຺ຖ ກຕມານິ ພາວີສຕິນ຺ທ຺ຣິຍານິ? ຈກ຺ຂຸນ຺ທ຺ຣິຍໍ, ໂສຕິນ຺ທ຺ຣິຍໍ, ຆານິນ຺ທ຺ຣິຍໍ, ຊິວ຺ຫິນ຺ທ຺ຣິຍໍ, ກາຍິນ຺ທ຺ຣິຍໍ, ມນິນ຺ທ຺ຣິຍໍ, ອິຕ຺ຖິນ຺ທ຺ຣິຍໍ, ປຸຣິສິນ຺ທ຺ຣິຍໍ, ຊີວິຕິນ຺ທ຺ຣິຍໍ, ສຸຂິນ຺ທ຺ຣິຍໍ, ທຸກ຺ຂິນ຺ທ຺ຣິຍໍ, ໂສມນສ຺ສິນ຺ທ຺ຣິຍໍ, ໂທມນສ຺ສິນ຺ທ຺ຣິຍໍ, ອຸເປກ຺ຂິນ຺ທ຺ຣິຍໍ, ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ, ອນຎ຺ຎາຕຎ຺ຎສ຺ສາມີຕິນ຺ທ຺ຣິຍໍ, ອຎ຺ຎິນ຺ທ຺ຣິຍໍ, ອຎ຺ຎາຕາວິນ຺ທ຺ຣິຍໍ – ອິມານິ ວຸຈ຺ຈນ຺ຕິ ‘‘ພາວີສຕິນ຺ທ຺ຣິຍານິ’’.

໙໘໔. ຕຕ຺ຖ ກຕເມ ນວ ເຫຕູ? ຕໂຍ ກຸສລເຫຕູ, ຕໂຍ ອກຸສລເຫຕູ, ຕໂຍ ອພ຺ຍາກຕເຫຕູ.

ຕຕ຺ຖ ກຕເມ ຕໂຍ ກຸສລເຫຕູ? ອໂລໂຠ ກຸສລເຫຕຸ, ອໂທໂສ ກຸສລເຫຕຸ, ອໂມໂຫ ກຸສລເຫຕຸ – ອິເມ ຕໂຍ ກຸສລເຫຕູ.

ຕຕ຺ຖ ກຕເມ ຕໂຍ ອກຸສລເຫຕູ? ໂລໂຠ ອກຸສລເຫຕຸ, ໂທໂສ ອກຸສລເຫຕຸ, ໂມໂຫ ອກຸສລເຫຕຸ – ອິເມ ຕໂຍ ອກຸສລເຫຕູ.

ຕຕ຺ຖ ກຕເມ ຕໂຍ ອພ຺ຍາກຕເຫຕູ? ກຸສລານໍ ວາ ຘມ຺ມານໍ ວິປາກໂຕ ກິຣິຍາພ຺ຍາກເຕສຸ ວາ ຘມ຺ເມສຸ ອໂລໂຠ, ອໂທໂສ, ອໂມໂຫ – ອິເມ ຕໂຍ ອພ຺ຍາກຕເຫຕູ. ອິເມ ວຸຈ຺ຈນ຺ຕິ ‘‘ນວ ເຫຕູ’’.

໙໘໕. ຕຕ຺ຖ ກຕເມ ຈຕ຺ຕາໂຣ ອາຫາຣາ? ກພຬີກາຣາຫາໂຣ [ກພຬິໍກາໂຣ ອາຫາໂຣ (ສີ. ສ຺ຍາ.)], ຜສ຺ສາຫາໂຣ, ມໂນສຎ຺ເຈຕນາຫາໂຣ, ວິຎ຺ຎາຓາຫາໂຣ – ອິເມ ວຸຈ຺ຈນ຺ຕິ ‘‘ຈຕ຺ຕາໂຣ ອາຫາຣາ’’.

໙໘໖. ຕຕ຺ຖ ກຕເມ ສຕ຺ຕ ຜສ຺ສາ? ຈກ຺ຂຸສມ຺ຜສ຺ໂສ, ໂສຕສມ຺ຜສ຺ໂສ, ຆານສມ຺ຜສ຺ໂສ, ຊິວ຺ຫາສມ຺ຜສ຺ໂສ, ກາຍສມ຺ຜສ຺ໂສ, ມໂນຘາຕຸສມ຺ຜສ຺ໂສ, ມໂນວິຎ຺ຎາຓຘາຕຸສມ຺ຜສ຺ໂສ – ອິເມ ວຸຈ຺ຈນ຺ຕິ ‘‘ສຕ຺ຕ ຜສ຺ສາ’’.

໙໘໗. ຕຕ຺ຖ ກຕມາ ສຕ຺ຕ ເວທນາ? ຈກ຺ຂຸສມ຺ຜສ຺ສຊາ ເວທນາ, ໂສຕສມ຺ຜສ຺ສຊາ ເວທນາ, ຆານສມ຺ຜສ຺ສຊາ ເວທນາ, ຊິວ຺ຫາສມ຺ຜສ຺ສຊາ ເວທນາ, ກາຍສມ຺ຜສ຺ສຊາ ເວທນາ, ມໂນຘາຕຸສມ຺ຜສ຺ສຊາ ເວທນາ, ມໂນວິຎ຺ຎາຓຘາຕຸສມ຺ຜສ຺ສຊາ ເວທນາ – ອິມາ ວຸຈ຺ຈນ຺ຕິ ‘‘ສຕ຺ຕ ເວທນາ’’.

໙໘໘. ຕຕ຺ຖ ກຕມາ ສຕ຺ຕ ສຎ຺ຎາ? ຈກ຺ຂຸສມ຺ຜສ຺ສຊາ ສຎ຺ຎາ, ໂສຕສມ຺ຜສ຺ສຊາ ສຎ຺ຎາ, ຆານສມ຺ຜສ຺ສຊາ ສຎ຺ຎາ, ຊິວ຺ຫາສມ຺ຜສ຺ສຊາ ສຎ຺ຎາ, ກາຍສມ຺ຜສ຺ສຊາ ສຎ຺ຎາ, ມໂນຘາຕຸສມ຺ຜສ຺ສຊາ ສຎ຺ຎາ, ມໂນວິຎ຺ຎາຓຘາຕຸສມ຺ຜສ຺ສຊາ ສຎ຺ຎາ – ອິມາ ວຸຈ຺ຈນ຺ຕິ ‘‘ສຕ຺ຕ ສຎ຺ຎາ’’.

໙໘໙. ຕຕ຺ຖ ກຕມາ ສຕ຺ຕ ເຈຕນາ? ຈກ຺ຂຸສມ຺ຜສ຺ສຊາ ເຈຕນາ, ໂສຕສມ຺ຜສ຺ສຊາ ເຈຕນາ, ຆານສມ຺ຜສ຺ສຊາ ເຈຕນາ, ຊິວ຺ຫາສມ຺ຜສ຺ສຊາ ເຈຕນາ, ກາຍສມ຺ຜສ຺ສຊາ ເຈຕນາ, ມໂນຘາຕຸສມ຺ຜສ຺ສຊາ ເຈຕນາ, ມໂນວິຎ຺ຎາຓຘາຕຸສມ຺ຜສ຺ສຊາ ເຈຕນາ – ອິມາ ວຸຈ຺ຈນ຺ຕິ ‘‘ສຕ຺ຕ ເຈຕນາ’’.

໙໙໐. ຕຕ຺ຖ ກຕມານິ ສຕ຺ຕ ຈິຕ຺ຕານິ? ຈກ຺ຂຸວິຎ຺ຎາຓໍ, ໂສຕວິຎ຺ຎາຓໍ, ຆານວິຎ຺ຎາຓໍ, ຊິວ຺ຫາວິຎ຺ຎາຓໍ, ກາຍວິຎ຺ຎາຓໍ, ມໂນຘາຕຸ, ມໂນວິຎ຺ຎາຓຘາຕຸ – ອິມານິ ວຸຈ຺ຈນ຺ຕິ ‘‘ສຕ຺ຕ ຈິຕ຺ຕານິ’’.