(໑໕) ປຎ຺ຈ ທິຏ຺ຐຘມ຺ມນິພ຺ພານວາທາ

໙໔໓. ຕຕ຺ຖ ກຕເມ ປຎ຺ຈ ທິຏ຺ຐຘມ຺ມນິພ຺ພານວາທາ?

(ກ) ອິເຘກຈ຺ໂຈ ສມໂຓ ວາ ພ຺ຣາຫ຺ມໂຓ ວາ ເອວໍວາທີ ໂຫຕິ ເອວໍທິຏ຺ຐິ [ເອວໍທິຏ຺ຐິ (ສ຺ຍາ.)] – ‘‘ຍໂຕ ໂຂ, ໂຠ, ອຍໍ ອຕ຺ຕາ ປຎ຺ຈຫິ ກາມຄຸເຓຫິ ສມປ຺ປິໂຕ ສມງ຺ຄີຠູໂຕ ປຣິຈາເຣຕິ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ປຣມທິຏ຺ຐຘມ຺ມນິພ຺ພານໍ ປຎ຺ຎເປນ຺ຕິ.

(ຂ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ ເນໂສ ນຕ຺ຖີຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕິ. ຕໍ ກິສ຺ສ ເຫຕຸ? ກາມາ ຫິ, ໂຠ, ອນິຈ຺ຈາ ທຸກ຺ຂາ ວິປຣິຓາມຘມ຺ມາ. ເຕສໍ ວິປຣິຓາມຎ຺ຎຖາຠາວາ ອຸປ຺ປຊ຺ຊນ຺ຕິ ໂສກປຣິເທວທຸກ຺ຂໂທມນສ຺ສຸປາຍາສາ. ຍໂຕ ໂຂ, ໂຠ, ອຍໍ ອຕ຺ຕາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ປຣມທິຏ຺ຐຘມ຺ມນິພ຺ພານໍ ປຎ຺ຎເປນ຺ຕິ.

(ຄ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ເນໂສ ນຕ຺ຖີຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕິ. ຕໍ ກິສ຺ສ ເຫຕຸ? ຍເທວ ຕຕ຺ຖ ວິຕກ຺ກິຕໍ ວິຈາຣິຕໍ ເອເຕນ ເອຕໍ ໂອຬາຣິກໍ ອກ຺ຂາຍຕິ. ຍໂຕ ໂຂ, ໂຠ, ອຍໍ ອຕ຺ຕາ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ ອຸປສມ຺ປຊ຺ຊ ວິຫຣຕິ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ປຣມທິຏ຺ຐຘມ຺ມນິພ຺ພານໍ ປຎ຺ຎເປນ຺ຕິ.

(ຆ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ເນໂສ ນຕ຺ຖີຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕິ. ຕໍ ກິສ຺ສ ເຫຕຸ? ຍເທວ ຕຕ຺ຖ ປີຕິຄຕໍ ເຈຕໂສ ອຸປ຺ປິລາວິຕໍ, ເອເຕນ ເອຕໍ ໂອຬາຣິກໍ ອກ຺ຂາຍຕິ. ຍໂຕ ໂຂ, ໂຠ, ອຍໍ ອຕ຺ຕາ ປີຕິຍາ ຈ ວິຣາຄາ…ເປ… ຕຕິຍໍ ຌານໍ ອຸປສມ຺ປຊ຺ຊ ວິຫຣຕິ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ປຣມທິຏ຺ຐຘມ຺ມນິພ຺ພານໍ ປຎ຺ຎເປນ຺ຕິ.

(ງ) ຕມຎ຺ໂຎ ເອວມາຫ – ‘‘ອຕ຺ຖິ ໂຂ, ໂຠ, ເອໂສ ອຕ຺ຕາ ຍໍ ຕ຺ວໍ ວເທສິ. ເນໂສ ນຕ຺ຖີຕິ ວທາມິ. ໂນ ຈ ໂຂ, ໂຠ, ອຍໍ ອຕ຺ຕາ ເອຕ຺ຕາວຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕິ. ຕໍ ກິສ຺ສ ເຫຕຸ? ຍເທວ ຕຕ຺ຖ ສຸຂປີຕິ ເຈຕໂສ ອາໂຠໂຄ, ເອເຕນ ເອຕໍ ໂອຬາຣິກໍ ອກ຺ຂາຍຕິ. ຍໂຕ ໂຂ, ໂຠ, ອຍໍ ອຕ຺ຕາ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ເອຕ຺ຕາວຕາ ໂຂ, ໂຠ, ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕີ’’ຕິ. ອິຕ຺ເຖເກ ສໂຕ ສຕ຺ຕສ຺ສ ປຣມທິຏ຺ຐຘມ຺ມນິພ຺ພານໍ ປຎ຺ຎເປນ຺ຕິ. ອິເມ ປຎ຺ຈ ທິຏ຺ຐຘມ຺ມນິພ຺ພານວາທາ.

ປຎ຺ຈກໍ.