໔. ຈຕຸກ຺ກນິທ຺ເທໂສ

໗໙໓. (໑. ກ) ຕຕ຺ຖ ກຕມໍ ກມ຺ມສ຺ສກຕຎາຓໍ? ‘‘ອຕ຺ຖິ ທິນ຺ນໍ, ອຕ຺ຖິ ຍິຏ຺ຐໍ, ອຕ຺ຖິ ຫຸຕໍ, ອຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຕ຺ຖິ ອຍໍ ໂລໂກ, ອຕ຺ຖິ ປໂຣ ໂລໂກ, ອຕ຺ຖິ ມາຕາ, ອຕ຺ຖິ ປິຕາ, ອຕ຺ຖິ ສຕ຺ຕາ ໂອປປາຕິກາ, ອຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’’ຕິ – ຍາ ເອວຣູປາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ກມ຺ມສ຺ສກຕຎາຓໍ’’. ຐເປຕ຺ວາ ສຈ຺ຈານຸໂລມິກໍ ຎາຓໍ, ສພ຺ພາປິ ສາສວາ ກຸສລາ ປຎ຺ຎາ ກມ຺ມສ຺ສກຕຎາຓໍ.

(ຂ) ຕຕ຺ຖ ກຕມໍ ສຈ຺ຈານຸໂລມິກໍ ຎາຓໍ? ‘‘ຣູປໍ ອນິຈ຺ຈ’’ນ຺ຕິ ວາ ເວທນາ…ເປ… ສຎ຺ຎາ… ສງ຺ຂາຣາ… ‘‘ວິຎ຺ຎາຓໍ ອນິຈ຺ຈ’’ນ຺ຕິ ວາ ຍາ ເອວຣູປີ ອນຸໂລມິກາ ຂນ຺ຕິ ທິຏ຺ຐິ ຣຸຈິ ມຸທິ ເປກ຺ຂາ ຘມ຺ມນິຊ຺ຌານກ຺ຂນ຺ຕິ – ອິທໍ ວຸຈ຺ຈຕິ ‘‘ສຈ຺ຈານຸໂລມິກໍ ຎາຓໍ’’.

(ຄ) ຈຕູສຸ ມຄ຺ເຄສຸ ປຎ຺ຎາ ມຄ຺ຄສມງ຺ຄິສ຺ສ ຎາຓໍ.

(ຆ) ຈຕູສຸ ຜເລສຸ ປຎ຺ຎາ ຜລສມງ຺ຄິສ຺ສ ຎາຓໍ.

໗໙໔. (໒) ມຄ຺ຄສມງ຺ຄິສ຺ສ ຎາຓໍ ທຸກ຺ເຂເປຕໍ ຎາຓໍ, ທຸກ຺ຂສມຸທເຍເປຕໍ ຎາຓໍ, ທຸກ຺ຂນິໂຣເຘເປຕໍ ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍເປຕໍ ຎາຓໍ.

(ກ) ຕຕ຺ຖ ກຕມໍ ທຸກ຺ເຂ ຎາຓໍ? ທຸກ຺ຂໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ທຸກ຺ເຂ ຎາຓໍ’’.

(ຂ-ຆ) ທຸກ຺ຂສມຸທຍໍ ອາຣພ຺ຠ…ເປ… ທຸກ຺ຂນິໂຣຘໍ ອາຣພ຺ຠ…ເປ… ທຸກ຺ຂນິໂຣຘຄາມິນິໍ ປຏິປທໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ທຸກ຺ຂນິໂຣຘຄາມິນິຍາ ປຏິປທາຍ ຎາຓໍ’’.

໗໙໕. (໓) ກາມາວຈຣກຸສລາພ຺ຍາກເຕ ປຎ຺ຎາ ກາມາວຈຣາ ປຎ຺ຎາ, ຣູປາວຈຣກຸສລາພ຺ຍາກເຕ ປຎ຺ຎາ ຣູປາວຈຣາ ປຎ຺ຎາ, ອຣູປາວຈຣກຸສລາພ຺ຍາກເຕ ປຎ຺ຎາ ອຣູປາວຈຣາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອປຣິຍາປນ຺ນາ ປຎ຺ຎາ.

໗໙໖. (໔. ກ) ຕຕ຺ຖ ກຕມໍ ຘມ຺ເມ ຎາຓໍ? ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ຘມ຺ເມ ຎາຓໍ.

(ຂ) ໂສ ອິມິນາ ຘມ຺ເມນ ຎາເຕນ ທິຏ຺ເຐນ ປຕ຺ເຕນ ວິທິເຕນ ປຣິໂຍຄາຬ຺ເຫນ ອຕີຕານາຄເຕນ ນຍໍ ເນຕິ. ‘‘ເຍ ຫິ ເກຈິ ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ທຸກ຺ຂໍ ອພ຺ຠຎ຺ຎໍສຸ [ອພ຺ຠຎ຺ຎິໍສຸ (ສ຺ຍາ.) ເອວມຸປຣິປິ], ທຸກ຺ຂສມຸທຍໍ ອພ຺ຠຎ຺ຎໍສຸ, ທຸກ຺ຂນິໂຣຘໍ ອພ຺ຠຎ຺ຎໍສຸ, ທຸກ຺ຂນິໂຣຘຄາມິນິໍ ປຏິປທໍ ອພ຺ຠຎ຺ຎໍສຸ, ອິມຎ຺ເຎວ ເຕ ທຸກ຺ຂໍ ອພ຺ຠຎ຺ຎໍສຸ, ອິມຎ຺ເຎວ ເຕ ທຸກ຺ຂສມຸທຍໍ ອພ຺ຠຎ຺ຎໍສຸ, ອິມຎ຺ເຎວ ເຕ ທຸກ຺ຂນິໂຣຘໍ ອພ຺ຠຎ຺ຎໍສຸ, ອິມຎ຺ເຎວ ເຕ ທຸກ຺ຂນິໂຣຘຄາມິນິໍ ປຏິປທໍ ອພ຺ຠຎ຺ຎໍສຸ. ເຍ ຫິ ເກຈິ ອນາຄຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ທຸກ຺ຂໍ ອຠິຊານິສ຺ສນ຺ຕິ, ທຸກ຺ຂສມຸທຍໍ ອຠິຊານິສ຺ສນ຺ຕິ, ທຸກ຺ຂນິໂຣຘໍ ອຠິຊານິສ຺ສນ຺ຕິ, ທຸກ຺ຂນິໂຣຘຄາມິນິໍ ປຏິປທໍ ອຠິຊານິສ຺ສນ຺ຕິ, ອິມຎ຺ເຎວ ເຕ ທຸກ຺ຂໍ ອຠິຊານິສ຺ສນ຺ຕິ, ອິມຎ຺ເຎວ ເຕ ທຸກ຺ຂສມຸທຍໍ ອຠິຊານິສ຺ສນ຺ຕິ, ອິມຎ຺ເຎວ ເຕ ທຸກ຺ຂນິໂຣຘໍ ອຠິຊານິສ຺ສນ຺ຕິ, ອິມຎ຺ເຎວ ເຕ ທຸກ຺ຂນິໂຣຘຄາມິນິໍ ປຏິປທໍ ອຠິຊານິສ຺ສນ຺ຕີ’’ຕິ – ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ອນ຺ວເຍ ຎາຓໍ’’.

(ຄ) ຕຕ຺ຖ ກຕມໍ ປຣິເຍ ຎາຓໍ? ອິຘ ຠິກ຺ຂຸ ປຣສຕ຺ຕານໍ ປຣປຸຄ຺ຄລານໍ ເຈຕສາ ເຈໂຕ ປຣິຈ຺ຈ ປຊານາຕິ. ສຣາຄໍ ວາ ຈິຕ຺ຕໍ ‘‘ສຣາຄໍ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາ ຈິຕ຺ຕໍ ‘‘ວີຕຣາຄໍ ຈິຕ຺ຕ’’ນ຺ຕິ ປຊານາຕິ, ສໂທສໍ ວາ ຈິຕ຺ຕໍ ‘‘ສໂທສໍ ຈິຕ຺ຕ’’ນ຺ຕິ ປຊານາຕິ, ວີຕໂທສໍ ວາ ຈິຕ຺ຕໍ ‘‘ວີຕໂທສໍ ຈິຕ຺ຕ’’ນ຺ຕິ ປຊານາຕິ, ສໂມຫໍ ວາ ຈິຕ຺ຕໍ ‘‘ສໂມຫໍ ຈິຕ຺ຕ’’ນ຺ຕິ ປຊານາຕິ, ວີຕໂມຫໍ ວາ ຈິຕ຺ຕໍ ‘‘ວີຕໂມຫໍ ຈິຕ຺ຕ’’ນ຺ຕິ ປຊານາຕິ, ສໍຂິຕ຺ຕໍ ວາ ຈິຕ຺ຕໍ ‘‘ສໍຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ວິກ຺ຂິຕ຺ຕໍ ວາ ຈິຕ຺ຕໍ ‘‘ວິກ຺ຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ມຫຄ຺ຄຕໍ ວາ ຈິຕ຺ຕໍ ‘‘ມຫຄ຺ຄຕໍ ຈິຕ຺ຕ’’ນ຺ຕິ ປຊານາຕິ, ອມຫຄ຺ຄຕໍ ວາ ຈິຕ຺ຕໍ ‘‘ອມຫຄ຺ຄຕໍ ຈິຕ຺ຕ’’ນ຺ຕິ ປຊານາຕິ, ສອຸຕ຺ຕຣໍ ວາ ຈິຕ຺ຕໍ ‘‘ສອຸຕ຺ຕຣໍ ຈິຕ຺ຕ’’ນ຺ຕິ ປຊານາຕິ, ອນຸຕ຺ຕຣໍ ວາ ຈິຕ຺ຕໍ ‘‘ອນຸຕ຺ຕຣໍ ຈິຕ຺ຕ’’ນ຺ຕິ ປຊານາຕິ, ສມາຫິຕໍ ວາ ຈິຕ຺ຕໍ ‘‘ສມາຫິຕໍ ຈິຕ຺ຕ’’ນ຺ຕິ ປຊານາຕິ, ອສມາຫິຕໍ ວາ ຈິຕ຺ຕໍ ‘‘ອສມາຫິຕໍ ຈິຕ຺ຕ’’ນ຺ຕິ ປຊານາຕິ, ວິມຸຕ຺ຕໍ ວາ ຈິຕ຺ຕໍ ‘‘ວິມຸຕ຺ຕໍ ຈິຕ຺ຕ’’ນ຺ຕິ ປຊານາຕິ, ອວິມຸຕ຺ຕໍ ວາ ຈິຕ຺ຕໍ ‘‘ອວິມຸຕ຺ຕໍ ຈິຕ຺ຕ’’ນ຺ຕິ ປຊານາຕີຕິ – ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ປຣິເຍ ຎາຓໍ’’.

(ຆ) ຐເປຕ຺ວາ ຘມ຺ເມ ຎາຓໍ ອນ຺ວເຍ ຎາຓໍ ປຣິເຍ ຎາຓໍ, ອວເສສາ ປຎ຺ຎາ ສມ຺ມຸຕິຎາຓໍ.

໗໙໗. (໕. ກ) ຕຕ຺ຖ ກຕມາ ປຎ຺ຎາ ອາຈຍາຍ ໂນ ອປຈຍາຍ? ກາມາວຈຣກຸສເລ ປຎ຺ຎາ ອາຈຍາຍ ໂນ ອປຈຍາຍ.

(ຂ) ຈຕູສຸ ມຄ຺ເຄສຸ ປຎ຺ຎາ ອປຈຍາຍ ໂນ ອາຈຍາຍ.

(ຄ) ຣູປາວຈຣາຣູປາວຈຣກຸສເລ ປຎ຺ຎາ ອາຈຍາຍ ເຈວ ອປຈຍາຍ ຈ.

(ຆ) ອວເສສາ ປຎ຺ຎາ ເນວ ອາຈຍາຍ ໂນ ອປຈຍາຍ.

໗໙໘. (໖. ກ) ຕຕ຺ຖ ກຕມາ ປຎ຺ຎາ ນິພ຺ພິທາຍ ໂນ ປຏິເວຘາຍ? ຍາຍ ປຎ຺ຎາຍ ກາເມສຸ ວີຕຣາໂຄ ໂຫຕິ, ນ ຈ ອຠິຎ຺ຎາໂຍ ປຏິວິຊ຺ຌຕິ ນ ຈ ສຈ຺ຈານິ – ອຍໍ ວຸຈ຺ຈຕິ ‘‘ປຎ຺ຎາ ນິພ຺ພິທາຍ ໂນ ປຏິເວຘາຍ’’.

(ຂ) ສ຺ເວວ ປຎ຺ຎາຍ ກາເມສຸ ວີຕຣາໂຄ ສມາໂນ ອຠິຎ຺ຎາໂຍ ປຏິວິຊ຺ຌຕິ ນ ຈ ສຈ຺ຈານິ – ອຍໍ ວຸຈ຺ຈຕິ ‘‘ປຎ຺ຎາ ປຏິເວຘາຍ ໂນ ນິພ຺ພິທາຍ’’.

(ຄ) ຈຕູສຸ ມຄ຺ເຄສຸ ປຎ຺ຎາ ນິພ຺ພິທາຍ ເຈວ ປຏິເວຘາຍ ຈ.

(ຆ) ອວເສສາ ປຎ຺ຎາ ເນວ ນິພ຺ພິທາຍ ໂນ ປຏິເວຘາຍ.

໗໙໙. (໗. ກ) ຕຕ຺ຖ ກຕມາ ຫານຠາຄິນີ ປຎ຺ຎາ? ປຐມສ຺ສ ຌານສ຺ສ ລາຠິໍ ກາມສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ.

(ຂ) ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ.

(ຄ) ອວິຕກ຺ກສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ.

(ຆ) ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ທຸຕິຍສ຺ສ ຌານສ຺ສ ລາຠິໍ ວິຕກ຺ກສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ອຸເປກ຺ຂາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ຕຕິຍສ຺ສ ຌານສ຺ສ ລາຠິໍ ປີຕິສຸຂສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ອທຸກ຺ຂມສຸຂສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ຈຕຸຕ຺ຖສ຺ສ ຌານສ຺ສ ລາຠິໍ ອຸເປກ຺ຂາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ອາກາສານຎ຺ຈາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ອາກາສານຎ຺ຈາຍຕນສ຺ສ ລາຠິໍ ຣູປສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ວິຎ຺ຎາຓຎ຺ຈາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ວິຎ຺ຎາຓຎ຺ຈາຍຕນສ຺ສ ລາຠິໍ ອາກາສານຎ຺ຈາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ອາກິຎ຺ຈຎ຺ຎາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ. ອາກິຎ຺ຈຎ຺ຎາຍຕນສ຺ສ ລາຠິໍ ວິຎ຺ຎາຓຎ຺ຈາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ຫານຠາຄິນີ ປຎ຺ຎາ. ຕທນຸຘມ຺ມຕາ ສຕິ ສນ຺ຕິຏ຺ຐຕິ ຐິຕິຠາຄິນີ ປຎ຺ຎາ. ເນວສຎ຺ຎານາສຎ຺ຎາຍຕນສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິເສສຠາຄິນີ ປຎ຺ຎາ. ນິພ຺ພິທາສຫຄຕາ ສຎ຺ຎາມນສິກາຣາ ສມຸທາຈຣນ຺ຕິ ວິຣາຄູປສຎ຺ຫິຕາ ນິພ຺ເພຘຠາຄິນີ ປຎ຺ຎາ.

໘໐໐. (໘) ຕຕ຺ຖ ກຕມາ ຈຕສ຺ໂສ ປຏິສມ຺ຠິທາ? ອຕ຺ຖປຏິສມ຺ຠິທາ, ຘມ຺ມປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ. ອຕ຺ເຖ ຎາຓໍ ອຕ຺ຖປຏິສມ຺ຠິທາ, ຘມ຺ເມ ຎາຓໍ ຘມ຺ມປຏິສມ຺ຠິທາ, ຕຕ຺ຣ ຘມ຺ມນິຣຸຕ຺ຕາຠິລາເປ ຎາຓໍ ນິຣຸຕ຺ຕິປຏິສມ຺ຠິທາ, ຎາເຓສຸ ຎາຓໍ ປຏິຠານປຏິສມ຺ຠິທາ. ອິມາ ຈຕສ຺ໂສ ປຏິສມ຺ຠິທາ.

໘໐໑. (໙) ຕຕ຺ຖ ກຕມາ ຈຕສ຺ໂສ ປຏິປທາ? ທຸກ຺ຂປຏິປທາ ທນ຺ຘາຠິຎ຺ຎາ ປຎ຺ຎາ, ທຸກ຺ຂປຏິປທາ ຂິປ຺ປາຠິຎ຺ຎາ ປຎ຺ຎາ, ສຸຂປຏິປທາ ທນ຺ຘາຠິຎ຺ຎາ ປຎ຺ຎາ, ສຸຂປຏິປທາ ຂິປ຺ປາຠິຎ຺ຎາ ປຎ຺ຎາ.

(ກ) ຕຕ຺ຖ ກຕມາ ທຸກ຺ຂປຏິປທາ ທນ຺ຘາຠິຎ຺ຎາ ປຎ຺ຎາ? ກິຈ຺ເຉນ ກສິເຣນ ສມາຘິໍ ອຸປ຺ປາເທນ຺ຕສ຺ສ ທນ຺ຘໍ ຕຓ຺ຐານໍ ອຠິຊານນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ທຸກ຺ຂປຏິປທາ ທນ຺ຘາຠິຎ຺ຎາ ປຎ຺ຎາ’’.

(ຂ) ຕຕ຺ຖ ກຕມາ ທຸກ຺ຂປຏິປທາ ຂິປ຺ປາຠິຎ຺ຎາ ປຎ຺ຎາ? ກິຈ຺ເຉນ ກສິເຣນ ສມາຘິໍ ອຸປ຺ປາເທນ຺ຕສ຺ສ ຂິປ຺ປໍ ຕຓ຺ຐານໍ ອຠິຊານນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ທຸກ຺ຂປຏິປທາ ຂິປ຺ປາຠິຎ຺ຎາ ປຎ຺ຎາ’’.

(ຄ) ຕຕ຺ຖ ກຕມາ ສຸຂປຏິປທາ ທນ຺ຘາຠິຎ຺ຎາ ປຎ຺ຎາ? ອກິຈ຺ເຉນ ອກສິເຣນ ສມາຘິໍ ອຸປ຺ປາເທນ຺ຕສ຺ສ ທນ຺ຘໍ ຕຓ຺ຐານໍ ອຠິຊານນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ສຸຂປຏິປທາ ທນ຺ຘາຠິຎ຺ຎາ ປຎ຺ຎາ’’.

(ຆ) ຕຕ຺ຖ ກຕມາ ສຸຂປຏິປທາ ຂິປ຺ປາຠິຎ຺ຎາ ປຎ຺ຎາ? ອກິຈ຺ເຉນ ອກສິເຣນ ສມາຘິໍ ອຸປ຺ປາເທນ຺ຕສ຺ສ ຂິປ຺ປໍ ຕຓ຺ຐານໍ ອຠິຊານນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ສຸຂປຏິປທາ ຂິປ຺ປາຠິຎ຺ຎາ ປຎ຺ຎາ’’. ອິມາ ຈຕສ຺ໂສ ປຏິປທາ.

໘໐໒. (໑໐) ຕຕ຺ຖ ກຕມານິ ຈຕ຺ຕາຣິ ອາຣມ຺ມຓານິ? ປຣິຕ຺ຕາ ປຣິຕ຺ຕາຣມ຺ມຓາ ປຎ຺ຎາ, ປຣິຕ຺ຕາ ອປ຺ປມາຓາຣມ຺ມຓາ ປຎ຺ຎາ, ອປ຺ປມາຓາ ປຣິຕ຺ຕາຣມ຺ມຓາ ປຎ຺ຎາ, ອປ຺ປມາຓາ ອປ຺ປມາຓາຣມ຺ມຓາ ປຎ຺ຎາ.

(ກ) ຕຕ຺ຖ ກຕມາ ປຣິຕ຺ຕາ ປຣິຕ຺ຕາຣມ຺ມຓາ ປຎ຺ຎາ? ສມາຘິສ຺ສ ນ ນິກາມລາຠິສ຺ສ ອາຣມ຺ມຓໍ ໂຖກໍ ຜຣນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ປຣິຕ຺ຕາ ປຣິຕ຺ຕາຣມ຺ມຓາ ປຎ຺ຎາ’’.

(ຂ) ຕຕ຺ຖ ກຕມາ ປຣິຕ຺ຕາ ອປ຺ປມາຓາຣມ຺ມຓາ ປຎ຺ຎາ? ສມາຘິສ຺ສ ນ ນິກາມລາຠິສ຺ສ ອາຣມ຺ມຓໍ ວິປຸລໍ ຜຣນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ປຣິຕ຺ຕາ ອປ຺ປມາຓາຣມ຺ມຓາ ປຎ຺ຎາ’’.

(ຄ) ຕຕ຺ຖ ກຕມາ ອປ຺ປມາຓາ ປຣິຕ຺ຕາຣມ຺ມຓາ ປຎ຺ຎາ? ສມາຘິສ຺ສ ນິກາມລາຠິສ຺ສ ອາຣມ຺ມຓໍ ໂຖກໍ ຜຣນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອປ຺ປມາຓາ ປຣິຕ຺ຕາຣມ຺ມຓາ ປຎ຺ຎາ’’.

(ຆ) ຕຕ຺ຖ ກຕມາ ອປ຺ປມາຓາ ອປ຺ປມາຓາຣມ຺ມຓາ ປຎ຺ຎາ? ສມາຘິສ຺ສ ນິກາມລາຠິສ຺ສ ອາຣມ຺ມຓໍ ວິປຸລໍ ຜຣນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອປ຺ປມາຓາ ອປ຺ປມາຓາຣມ຺ມຓາ ປຎ຺ຎາ’’. ອິມານິ ຈຕ຺ຕາຣິ ອາຣມ຺ມຓານິ.

(໑໑) ມຄ຺ຄສມງ຺ຄິສ຺ສ ຎາຓໍ ຊຣາມຣເຓເປຕໍ ຎາຓໍ, ຊຣາມຣຓສມຸທເຍເປຕໍ ຎາຓໍ, ຊຣາມຣຓນິໂຣເຘເປຕໍ ຎາຓໍ, ຊຣາມຣຓນິໂຣຘຄາມິນິຍາ ປຏິປທາຍເປຕໍ ຎາຓໍ.

(ກ) ຕຕ຺ຖ ກຕມໍ ຊຣາມຣເຓ ຎາຓໍ? ຊຣາມຣຓໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ຊຣາມຣເຓ ຎາຓໍ’’.

(ຂ-ຆ) ຊຣາມຣຓສມຸທຍໍ ອາຣພ຺ຠ…ເປ… ຊຣາມຣຓນິໂຣຘໍ ອາຣພ຺ຠ…ເປ… ຊຣາມຣຓນິໂຣຘຄາມິນິໍ ປຏິປທໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ຊຣາມຣຓນິໂຣຘຄາມິນິຍາ ປຏິປທາຍ ຎາຓໍ’’.

໘໐໓. (໑໒-໒໑) ຘມ຺ມສມງ຺ຄິສ຺ສ ຎາຓໍ ຊາຕິຍາເປຕໍ ຎາຓໍ…ເປ… ຠເວເປຕໍ ຎາຓໍ…ເປ… ອຸປາທາເນເປຕໍ ຎາຓໍ…ເປ… ຕຓ຺ຫາຍເປຕໍ ຎາຓໍ…ເປ… ເວທນາຍເປຕໍ ຎາຓໍ…ເປ… ຜສ຺ເສເປຕໍ ຎາຓໍ…ເປ… ສຬາຍຕເນເປຕໍ ຎາຓໍ…ເປ… ນາມຣູເປເປຕໍ ຎາຓໍ…ເປ… ວິຎ຺ຎາເຓເປຕໍ ຎາຓໍ…ເປ… ສງ຺ຂາເຣສຸເປຕໍ ຎາຓໍ, ສງ຺ຂາຣສມຸທເຍເປຕໍ ຎາຓໍ, ສງ຺ຂາຣນິໂຣເຘເປຕໍ ຎາຓໍ, ສງ຺ຂາຣນິໂຣຘຄາມິນິຍາ ປຏິປທາຍເປຕໍ ຎາຓໍ.

ຕຕ຺ຖ ກຕມໍ ສງ຺ຂາເຣສຸ ຎາຓໍ? ສງ຺ຂາເຣ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ສງ຺ຂາເຣສຸ ຎາຓໍ’’.

ສງ຺ຂາຣສມຸທຍໍ ອາຣພ຺ຠ…ເປ… ສງ຺ຂາຣນິໂຣຘໍ ອາຣພ຺ຠ…ເປ… ສງ຺ຂາຣນິໂຣຘຄາມິນິໍ ປຏິປທໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ສງ຺ຂາຣນິໂຣຘຄາມິນິຍາ ປຏິປທາຍ ຎາຓໍ. ເອວໍ ຈຕຸພ຺ພິເຘນ ຎາຓວຕ຺ຖຸ.

ຈຕຸກ຺ກໍ.