໕. ປຎ຺ຈກນິທ຺ເທໂສ

໘໐໔. (໑) ຕຕ຺ຖ ກຕໂມ ປຎ຺ຈງ຺ຄິໂກ ສມ຺ມາສມາຘິ? ປີຕິຜຣຓຕາ, ສຸຂຜຣຓຕາ, ເຈໂຕຜຣຓຕາ, ອາໂລກຜຣຓຕາ, ປຈ຺ຈເວກ຺ຂຓານິມິຕ຺ຕໍ. ທ຺ວີສຸ ຌາເນສຸ ປຎ຺ຎາ ປີຕິຜຣຓຕາ. ຕີສຸ ຌາເນສຸ ປຎ຺ຎາ ສຸຂຜຣຓຕາ. ປຣຈິຕ຺ເຕ ຎາຓໍ ເຈໂຕຜຣຓຕາ. ທິພ຺ພຈກ຺ຂຸ ອາໂລກຜຣຓຕາ. ຕມ຺ຫາ ຕມ຺ຫາ ສມາຘິມ຺ຫາ ວຸຏ຺ຐິຕສ຺ສ ປຈ຺ຈເວກ຺ຂຓາຎາຓໍ ປຈ຺ຈເວກ຺ຂຓານິມິຕ຺ຕໍ. ອຍໍ ວຸຈ຺ຈຕິ ປຎ຺ຈງ຺ຄິໂກ ສມ຺ມາສມາຘິ.

(໒) ຕຕ຺ຖ ກຕໂມ ປຎ຺ຈຎາຓິໂກ ສມ຺ມາສມາຘິ? ‘‘ອຍໍ ສມາຘິ ປຈ຺ຈຸປ຺ປນ຺ນສຸໂຂ ເຈວ ອາຍຕິຎ຺ຈ ສຸຂວິປາໂກ’’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ. ‘‘ອຍໍ ສມາຘິ ອຣິໂຍ ນິຣາມິໂສ’’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ. ‘‘ອຍໍ ສມາຘິ ອກາປຸຣິສເສວິໂຕ’’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ. ‘‘ອຍໍ ສມາຘິ ສນ຺ໂຕ ປຓີໂຕ ປຏິປ຺ປສ຺ສທ຺ຘລທ຺ໂຘ ເອໂກທິຠາວາຘິຄໂຕ ນ ສສງ຺ຂາຣນິຄ຺ຄຍ຺ຫວາຣິຕຄໂຕ’’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ. ໂສ ໂຂ ປນາຫໍ ອິມໍ ສມາຘິໍ ສໂຕ ສມາປຊ຺ຊາມິ ສໂຕ ວຸຏ຺ຐຫາມີ’’ຕິ ປຈ຺ຈຕ຺ຕຎ຺ເຎວ ຎາຓໍ ອຸປ຺ປຊ຺ຊຕິ. ອຍໍ ປຎ຺ຈຎາຓິໂກ ສມ຺ມາສມາຘິ. ເອວໍ ປຎ຺ຈວິເຘນ ຎາຓວຕ຺ຖຸ.

ປຎ຺ຈກໍ.