໓. ຕິກນິທ຺ເທໂສ

໗໖໘. (໑. ກ) ຕຕ຺ຖ ກຕມາ ຈິນ຺ຕາມຍາ ປຎ຺ຎາ?

ໂຍຄວິຫິເຕສຸ ວາ ກມ຺ມາຍຕເນສຸ ໂຍຄວິຫິເຕສຸ ວາ ສິປ຺ປາຍຕເນສຸ ໂຍຄວິຫິເຕສຸ ວາ ວິຊ຺ຊາຏ຺ຐາເນສຸ ກມ຺ມສ຺ສກຕໍ ວາ ສຈ຺ຈານຸໂລມິກໍ ວາ ຣູປໍ ອນິຈ຺ຈນ຺ຕິ ວາ ເວທນາ…ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ ອນິຈ຺ຈນ຺ຕິ ວາ, ຍໍ ເອວຣູປິໍ ອນຸໂລມິກໍ ຂນ຺ຕິໍ ທິຏ຺ຐິໍ ຣຸຈິໍ ມຸທິໍ ເປກ຺ຂໍ ຘມ຺ມນິຊ຺ຌານກ຺ຂນ຺ຕິໍ ປຣໂຕ ອສ຺ສຸຕ຺ວາ ປຏິລຠຕິ – ອຍໍ ວຸຈ຺ຈຕິ ‘‘ຈິນ຺ຕາມຍາ ປຎ຺ຎາ’’.

(ຂ) ຕຕ຺ຖ ກຕມາ ສຸຕມຍາ ປຎ຺ຎາ? ໂຍຄວິຫິເຕສຸ ວາ ກມ຺ມາຍຕເນສຸ ໂຍຄວິຫິເຕສຸ ວາ ສິປ຺ປາຍຕເນສຸ ໂຍຄວິຫິເຕສຸ ວາ ວິຊ຺ຊາຏ຺ຐາເນສຸ ກມ຺ມສ຺ສກຕໍ ວາ ສຈ຺ຈານຸໂລມິກໍ ວາ ຣູປໍ ອນິຈ຺ຈນ຺ຕິ ວາ ເວທນາ…ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ ອນິຈ຺ຈນ຺ຕິ ວາ, ຍໍ ເອວຣູປິໍ ອນຸໂລມິກໍ ຂນ຺ຕິໍ ທິຏ຺ຐິໍ ຣຸຈິໍ ມຸທິໍ ເປກ຺ຂໍ ຘມ຺ມນິຊ຺ຌານກ຺ຂນ຺ຕິໍ ປຣໂຕ ສຸຕ຺ວາ ປຏິລຠຕິ – ອຍໍ ວຸຈ຺ຈຕິ ‘‘ສຸຕມຍາ ປຎ຺ຎາ’’.

(ຄ) ສພ຺ພາປິ ສມາປນ຺ນສ຺ສ ປຎ຺ຎາ ຠາວນາມຍາ ປຎ຺ຎາ.

໗໖໙. (໒. ກ) ຕຕ຺ຖ ກຕມາ ທານມຍາ ປຎ຺ຎາ? ທານໍ ອາຣພ຺ຠ ທານາຘິຄຈ຺ຉ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ທານມຍາ ປຎ຺ຎາ’’.

(ຂ) ຕຕ຺ຖ ກຕມາ ສີລມຍາ ປຎ຺ຎາ? ສີລໍ ອາຣພ຺ຠ ສີລາຘິຄຈ຺ຉ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ສີລມຍາ ປຎ຺ຎາ’’.

(ຄ) ສພ຺ພາປິ ສມາປນ຺ນສ຺ສ ປຎ຺ຎາ ຠາວນາມຍາ ປຎ຺ຎາ.

໗໗໐. (໓. ກ) ຕຕ຺ຖ ກຕມາ ອຘິສີເລ ປຎ຺ຎາ? ປາຕິໂມກ຺ຂສໍວຣໍ ສໍວຣນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອຘິສີເລ ປຎ຺ຎາ’’.

(ຂ) ຕຕ຺ຖ ກຕມາ ອຘິຈິຕ຺ເຕ ປຎ຺ຎາ? ຣູປາວຈຣາຣູປາວຈຣສມາປຕ຺ຕິໍ ສມາປຊ຺ຊນ຺ຕສ຺ສ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອຘິຈິຕ຺ເຕ ປຎ຺ຎາ’’.

(ຄ) ຕຕ຺ຖ ກຕມາ ອຘິປຎ຺ຎາຍ ປຎ຺ຎາ? ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ – ອຍໍ ວຸຈ຺ຈຕິ ‘‘ອຘິປຎ຺ຎາຍ ປຎ຺ຎາ’’.

໗໗໑. (໔. ກ) ຕຕ຺ຖ ກຕມໍ ອາຍໂກສລ຺ລໍ? ‘‘ອິເມ ຘມ຺ເມ ມນສິກໂຣໂຕ ອນຸປ຺ປນ຺ນາ ເຈວ ອກຸສລາ ຘມ຺ມາ ນ ອຸປ຺ປຊ຺ຊນ຺ຕິ, ອຸປ຺ປນ຺ນາ ຈ ອກຸສລາ ຘມ຺ມາ ປຫີຍນ຺ຕິ. ອິເມ ວາ ປນິເມ ຘມ຺ເມ ມນສິກໂຣໂຕ ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ, ອຸປ຺ປນ຺ນາ ຈ ກຸສລາ ຘມ຺ມາ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ສໍວຕ຺ຕນ຺ຕີ’’ຕິ – ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ອາຍໂກສລ຺ລໍ’’.

(ຂ) ຕຕ຺ຖ ກຕມໍ ອປາຍໂກສລ຺ລໍ? ‘‘ອິເມ ຘມ຺ເມ ມນສິກໂຣໂຕ ອນຸປ຺ປນ຺ນາ ເຈວ ກຸສລາ ຘມ຺ມາ ນ ອຸປ຺ປຊ຺ຊນ຺ຕິ, ອຸປ຺ປນ຺ນາ ຈ ກຸສລາ ຘມ຺ມາ ນິຣຸຊ຺ຌນ຺ຕິ. ອິເມ ວາ ປນິເມ ຘມ຺ເມ ມນສິກໂຣໂຕ ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ, ອຸປ຺ປນ຺ນາ ຈ ອກຸສລາ ຘມ຺ມາ ຠິຍ຺ໂຍຠາວາຍ ເວປຸລ຺ລາຍ ສໍວຕ຺ຕນ຺ຕີ’’ຕິ – ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ອປາຍໂກສລ຺ລໍ’’.

(ຄ) ສພ຺ພາປິ ຕຕ຺ຣຸປາຍາ ປຎ຺ຎາ ອຸປາຍໂກສລ຺ລໍ.

໗໗໒. (໕. ກ) ຈຕູສຸ ຠູມີສຸ ວິປາເກ ປຎ຺ຎາ ວິປາກາ ປຎ຺ຎາ.

(ຂ) ຈຕູສຸ ຠູມີສຸ ກຸສເລ ປຎ຺ຎາ ວິປາກຘມ຺ມຘມ຺ມາ ປຎ຺ຎາ.

(ຄ) ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ເນວວິປາກນວິປາກຘມ຺ມຘມ຺ມາ ປຎ຺ຎາ.

໗໗໓. (໖. ກ) ຕີສຸ ຠູມີສຸ ວິປາເກ ປຎ຺ຎາ ອຸປາທິນ຺ນຸປາທານິຍາ ປຎ຺ຎາ.

(ຂ) ຕີສຸ ຠູມີສຸ ກຸສເລ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ອນຸປາທິນ຺ນຸປາທານິຍາ ປຎ຺ຎາ.

(ຄ) ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນຸປາທິນ຺ນອນຸປາທານິຍາ ປຎ຺ຎາ.

໗໗໔. (໗. ກ) ວິຕກ຺ກວິຈາຣສມ຺ປຍຸຕ຺ຕາ ປຎ຺ຎາ ສວິຕກ຺ກສວິຈາຣາ ປຎ຺ຎາ.

(ຂ) ວິຕກ຺ກວິປ຺ປຍຸຕ຺ຕາ ວິຈາຣສມ຺ປຍຸຕ຺ຕາ ປຎ຺ຎາ ອວິຕກ຺ກວິຈາຣມຕ຺ຕາ ປຎ຺ຎາ.

(ຄ) ວິຕກ຺ກວິຈາຣວິປ຺ປຍຸຕ຺ຕາ ປຎ຺ຎາ ອວິຕກ຺ກອວິຈາຣາ ປຎ຺ຎາ.

໗໗໕. (໘. ກ) ປີຕິສມ຺ປຍຸຕ຺ຕາ ປຎ຺ຎາ ປີຕິສຫຄຕາ ປຎ຺ຎາ.

(ຂ) ສຸຂສມ຺ປຍຸຕ຺ຕາ ປຎ຺ຎາ ສຸຂສຫຄຕາ ປຎ຺ຎາ.

(ຄ) ອຸເປກ຺ຂາສມ຺ປຍຸຕ຺ຕາ ປຎ຺ຎາ ອຸເປກ຺ຂາສຫຄຕາ ປຎ຺ຎາ.

໗໗໖. (໙. ກ) ຕີສຸ ຠູມີສຸ ກຸສເລ ປຎ຺ຎາ ອາຈຍຄາມິນີ ປຎ຺ຎາ.

(ຂ) ຈຕູສຸ ມຄ຺ເຄສຸ ປຎ຺ຎາ ອປຈຍຄາມິນີ ປຎ຺ຎາ.

(ຄ) ຈຕູສຸ ຠູມີສຸ ວິປາເກ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ເນວາຈຍຄາມິນາປຈຍຄາມິນີ ປຎ຺ຎາ.

໗໗໗. (໑໐. ກ) ຈຕູສຸ ມຄ຺ເຄສຸ ຕີສຸ ຜເລສຸ ປຎ຺ຎາ ເສກ຺ຂາ ປຎ຺ຎາ.

(ຂ) ອຸປຣິຏ຺ຐິມາ [ອຸປຣິຏ຺ຐິເມ (ສ຺ຍາ.), ອຸປຣິຏ຺ຐິມໍ (ກ.)] ອຣຫຕ຺ຕຜເລ ປຎ຺ຎາ ອເສກ຺ຂາ ປຎ຺ຎາ.

(ຄ) ຕີສຸ ຠູມີສຸ ກຸສເລ ຕີສຸ ຠູມີສຸ ວິປາເກ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ເນວເສກ຺ຂນາເສກ຺ຂາ ປຎ຺ຎາ.

໗໗໘. (໑໑. ກ) ກາມາວຈຣກຸສລາພ຺ຍາກເຕ ປຎ຺ຎາ ປຣິຕ຺ຕາ ປຎ຺ຎາ.

(ຂ) ຣູປາວຈຣາຣູປາວຈຣກຸສລາພ຺ຍາກເຕ ປຎ຺ຎາ ມຫຄ຺ຄຕາ ປຎ຺ຎາ.

(ຄ) ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອປ຺ປມາຓາ ປຎ຺ຎາ.

໗໗໙. (໑໒. ກ) ຕຕ຺ຖ ກຕມາ ປຣິຕ຺ຕາຣມ຺ມຓາ ປຎ຺ຎາ? ປຣິຕ຺ເຕ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ປຣິຕ຺ຕາຣມ຺ມຓາ ປຎ຺ຎາ’’.

໗໘໐. (ຂ) ຕຕ຺ຖ ກຕມາ ມຫຄ຺ຄຕາຣມ຺ມຓາ ປຎ຺ຎາ? ມຫຄ຺ຄເຕ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ມຫຄ຺ຄຕາຣມ຺ມຓາ ປຎ຺ຎາ’’.

໗໘໑. (ຄ) ຕຕ຺ຖ ກຕມາ ອປ຺ປມາຓາຣມ຺ມຓາ ປຎ຺ຎາ? ອປ຺ປມາເຓ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອປ຺ປມາຓາຣມ຺ມຓາ ປຎ຺ຎາ’’.

໗໘໒. (໑໓. ກ) ຕຕ຺ຖ ກຕມາ ມຄ຺ຄາຣມ຺ມຓາ ປຎ຺ຎາ? ອຣິຍມຄ຺ຄໍ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ມຄ຺ຄາຣມ຺ມຓາ ປຎ຺ຎາ’’.

(ຂ) ຈຕູສຸ ມຄ຺ເຄສຸ ປຎ຺ຎາ ມຄ຺ຄເຫຕຸກາ ປຎ຺ຎາ.

໗໘໓. (ຄ) ຕຕ຺ຖ ກຕມາ ມຄ຺ຄາຘິປຕິນີ ປຎ຺ຎາ? ອຣິຍມຄ຺ຄໍ ອຘິປຕິໍ ກຣິຕ຺ວາ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ມຄ຺ຄາຘິປຕິນີ ປຎ຺ຎາ’’.

໗໘໔. (໑໔) ຈຕູສຸ ຠູມີສຸ ວິປາເກ ປຎ຺ຎາ ສິຍາ ອຸປ຺ປນ຺ນາ, ສິຍາ ອຸປ຺ປາທິນີ, ນ ວຕ຺ຕພ຺ພາ ອນຸປ຺ປນ຺ນາຕິ. ຈຕູສຸ ຠູມີສຸ ກຸສເລ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ນ ວຕ຺ຕພ຺ພາ ອຸປ຺ປາທິນີຕິ.

໗໘໕. (໑໕) ສພ຺ພາວ ປຎ຺ຎາ ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ.

໗໘໖. (໑໖. ກ) ຕຕ຺ຖ ກຕມາ ອຕີຕາຣມ຺ມຓາ ປຎ຺ຎາ? ອຕີເຕ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອຕີຕາຣມ຺ມຓາ ປຎ຺ຎາ’’.

໗໘໗. (ຂ) ຕຕ຺ຖ ກຕມາ ອນາຄຕາຣມ຺ມຓາ ປຎ຺ຎາ? ອນາຄເຕ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອນາຄຕາຣມ຺ມຓາ ປຎ຺ຎາ’’.

໗໘໘. (ຄ) ຕຕ຺ຖ ກຕມາ ປຈ຺ຈຸປ຺ປນ຺ນາຣມ຺ມຓາ ປຎ຺ຎາ? ປຈ຺ຈຸປ຺ປນ຺ເນ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ …ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ປຈ຺ຈຸປ຺ປນ຺ນາຣມ຺ມຓາ ປຎ຺ຎາ’’.

໗໘໙. (໑໗) ສພ຺ພາວ ປຎ຺ຎາ ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ.

໗໙໐. (໑໘. ກ) ຕຕ຺ຖ ກຕມາ ອຊ຺ຌຕ຺ຕາຣມ຺ມຓາ ປຎ຺ຎາ? ອຊ຺ຌຕ຺ເຕ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອຊ຺ຌຕ຺ຕາຣມ຺ມຓາ ປຎ຺ຎາ’’.

໗໙໑. (ຂ) ຕຕ຺ຖ ກຕມາ ພຫິທ຺ຘາຣມ຺ມຓາ ປຎ຺ຎາ? ພຫິທ຺ຘາຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ພຫິທ຺ຘາຣມ຺ມຓາ ປຎ຺ຎາ’’.

໗໙໒. (ຄ) ຕຕ຺ຖ ກຕມາ ອຊ຺ຌຕ຺ຕພຫິທ຺ຘາຣມ຺ມຓາ ປຎ຺ຎາ? ອຊ຺ຌຕ຺ຕພຫິທ຺ຘາ ຘມ຺ເມ ອາຣພ຺ຠ ຍາ ອຸປ຺ປຊ຺ຊຕິ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອຊ຺ຌຕ຺ຕພຫິທ຺ຘາຣມ຺ມຓາ ປຎ຺ຎາ’’.

ເອວໍ ຕິວິເຘນ ຎາຓວຕ຺ຖຸ.

ຕິກໍ.