໒. ທຸກນິທ຺ເທໂສ

໗໖໗. (໑) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ໂລກິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ໂລກຸຕ຺ຕຣາ ປຎ຺ຎາ.

(໒) ສພ຺ພາວ ປຎ຺ຎາ ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

(໓) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ສາສວາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນາສວາ ປຎ຺ຎາ.

(໔) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ອາສວວິປ຺ປຍຸຕ຺ຕາ ສາສວາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອາສວວິປ຺ປຍຸຕ຺ຕາ ອນາສວາ ປຎ຺ຎາ.

(໕) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ສໍໂຍຊນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອສໍໂຍຊນິຍາ ປຎ຺ຎາ.

(໖) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ສໍໂຍຊນວິປ຺ປຍຸຕ຺ຕາ ສໍໂຍຊນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ສໍໂຍຊນວິປ຺ປຍຸຕ຺ຕາ ອສໍໂຍຊນິຍາ ປຎ຺ຎາ.

(໗) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ຄນ຺ຖນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອຄນ຺ຖນິຍາ ປຎ຺ຎາ.

(໘) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ຄນ຺ຖວິປ຺ປຍຸຕ຺ຕາ ຄນ຺ຖນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ຄນ຺ຖວິປ຺ປຍຸຕ຺ຕາ ອຄນ຺ຖນິຍາ ປຎ຺ຎາ.

(໙) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ໂອຆນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອໂນຆນິຍາ ປຎ຺ຎາ.

(໑໐) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ໂອຆວິປ຺ປຍຸຕ຺ຕາ ໂອຆນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ໂອຆວິປ຺ປຍຸຕ຺ຕາ ອໂນຆນິຍາ ປຎ຺ຎາ.

(໑໑) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ໂຍຄນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອໂຍຄນິຍາ ປຎ຺ຎາ.

(໑໒) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ໂຍຄວິປ຺ປຍຸຕ຺ຕາ ໂຍຄນິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ໂຍຄວິປ຺ປຍຸຕ຺ຕາ ອໂຍຄນິຍາ ປຎ຺ຎາ.

(໑໓) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ນີວຣຓິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນີວຣຓິຍາ ປຎ຺ຎາ.

(໑໔) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ນີວຣຓວິປ຺ປຍຸຕ຺ຕາ ນີວຣຓິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ນີວຣຓວິປ຺ປຍຸຕ຺ຕາ ອນີວຣຓິຍາ ປຎ຺ຎາ.

(໑໕) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ປຣາມຏ຺ຐາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອປຣາມຏ຺ຐາ ປຎ຺ຎາ.

(໑໖) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ປຣາມາສວິປ຺ປຍຸຕ຺ຕາ ປຣາມຏ຺ຐາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ປຣາມາສວິປ຺ປຍຸຕ຺ຕາ ອປຣາມຏ຺ຐາ ປຎ຺ຎາ.

(໑໗) ຕີສຸ ຠູມີສຸ ວິປາເກ ປຎ຺ຎາ ອຸປາທິນ຺ນາ ປຎ຺ຎາ, ຕີສຸ ຠູມີສຸ ກຸສເລ ຕີສຸ ຠູມີສຸ ກິຣິຍາພ຺ຍາກເຕ ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນຸປາທິນ຺ນາ ປຎ຺ຎາ.

(໑໘) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ອຸປາທານິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນຸປາທານິຍາ ປຎ຺ຎາ.

(໑໙) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ອຸປາທານວິປ຺ປຍຸຕ຺ຕາ ອຸປາທານິຍາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອຸປາທານວິປ຺ປຍຸຕ຺ຕາ ອນຸປາທານິຍາ ປຎ຺ຎາ.

(໒໐) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ສໍກິເລສິກາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອສໍກິເລສິກາ ປຎ຺ຎາ.

(໒໑) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ກິເລສວິປ຺ປຍຸຕ຺ຕາ ສໍກິເລສິກາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ກິເລສວິປ຺ປຍຸຕ຺ຕາ ອສໍກິເລສິກາ ປຎ຺ຎາ.

(໒໒) ວິຕກ຺ກສມ຺ປຍຸຕ຺ຕາ ປຎ຺ຎາ ສວິຕກ຺ກາ ປຎ຺ຎາ, ວິຕກ຺ກວິປ຺ປຍຸຕ຺ຕາ ປຎ຺ຎາ ອວິຕກ຺ກາ ປຎ຺ຎາ.

(໒໓) ວິຈາຣສມ຺ປຍຸຕ຺ຕາ ປຎ຺ຎາ ສວິຈາຣາ ປຎ຺ຎາ, ວິຈາຣວິປ຺ປຍຸຕ຺ຕາ ປຎ຺ຎາ ອວິຈາຣາ ປຎ຺ຎາ.

(໒໔) ປີຕິສມ຺ປຍຸຕ຺ຕາ ປຎ຺ຎາ ສປ຺ປີຕິກາ ປຎ຺ຎາ, ປີຕິວິປ຺ປຍຸຕ຺ຕາ ປຎ຺ຎາ ອປ຺ປີຕິກາ ປຎ຺ຎາ.

(໒໕) ປີຕິສມ຺ປຍຸຕ຺ຕາ ປຎ຺ຎາ ປີຕິສຫຄຕາ ປຎ຺ຎາ, ປີຕິວິປ຺ປຍຸຕ຺ຕາ ປຎ຺ຎາ ນ ປີຕິສຫຄຕາ ປຎ຺ຎາ.

(໒໖) ສຸຂສມ຺ປຍຸຕ຺ຕາ ປຎ຺ຎາ ສຸຂສຫຄຕາ ປຎ຺ຎາ, ສຸຂວິປ຺ປຍຸຕ຺ຕາ ປຎ຺ຎາ ນ ສຸຂສຫຄຕາ ປຎ຺ຎາ.

(໒໗) ອຸເປກ຺ຂາສມ຺ປຍຸຕ຺ຕາ ປຎ຺ຎາ ອຸເປກ຺ຂາສຫຄຕາ ປຎ຺ຎາ, ອຸເປກ຺ຂາວິປ຺ປຍຸຕ຺ຕາ ປຎ຺ຎາ ນ ອຸເປກ຺ຂາສຫຄຕາ ປຎ຺ຎາ.

(໒໘) ກາມາວຈຣກຸສລາພ຺ຍາກເຕ ປຎ຺ຎາ ກາມາວຈຣາ ປຎ຺ຎາ, ຣູປາວຈຣາ ປຎ຺ຎາ ອຣູປາວຈຣາ ປຎ຺ຎາ, ອປຣິຍາປນ຺ນາ ປຎ຺ຎາ ນ ກາມາວຈຣາ ປຎ຺ຎາ.

(໒໙) ຣູປາວຈຣກຸສລາພ຺ຍາກເຕ ປຎ຺ຎາ ຣູປາວຈຣາ ປຎ຺ຎາ, ກາມາວຈຣາ ປຎ຺ຎາ ອຣູປາວຈຣາ ປຎ຺ຎາ ອປຣິຍາປນ຺ນາ ປຎ຺ຎາ ນ ຣູປາວຈຣາ ປຎ຺ຎາ.

(໓໐) ອຣູປາວຈຣກຸສລາພ຺ຍາກເຕ ປຎ຺ຎາ ອຣູປາວຈຣາ ປຎ຺ຎາ, ກາມາວຈຣາ ປຎ຺ຎາ ຣູປາວຈຣາ ປຎ຺ຎາ ອປຣິຍາປນ຺ນາ ປຎ຺ຎາ ນ ອຣູປາວຈຣາ ປຎ຺ຎາ.

(໓໑) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ປຣິຍາປນ຺ນາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອປຣິຍາປນ຺ນາ ປຎ຺ຎາ.

(໓໒) ຈຕູສຸ ມຄ຺ເຄສຸ ປຎ຺ຎາ ນິຍ຺ຍານິກາ ປຎ຺ຎາ, ຕີສຸ ຠູມີສຸ ກຸສເລ ຈຕູສຸ ຠູມີສຸ ວິປາເກ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ອນິຍ຺ຍານິກາ ປຎ຺ຎາ.

(໓໓) ຈຕູສຸ ມຄ຺ເຄສຸ ປຎ຺ຎາ ນິຍຕາ ປຎ຺ຎາ, ຕີສຸ ຠູມີສຸ ກຸສເລ ຈຕູສຸ ຠູມີສຸ ວິປາເກ ຕີສຸ ຠູມີສຸ ກິຣິຍາພ຺ຍາກເຕ ປຎ຺ຎາ ອນິຍຕາ ປຎ຺ຎາ.

(໓໔) ຕີສຸ ຠູມີສຸ ກຸສລາພ຺ຍາກເຕ ປຎ຺ຎາ ສອຸຕ຺ຕຣາ ປຎ຺ຎາ, ຈຕູສຸ ມຄ຺ເຄສຸ ຈຕູສຸ ຜເລສຸ ປຎ຺ຎາ ອນຸຕ຺ຕຣາ ປຎ຺ຎາ.

(໓໕) ຕຕ຺ຖ ກຕມາ ອຕ຺ຖຊາປິກາ ປຎ຺ຎາ?

ຈຕູສຸ ຠູມີສຸ ກຸສເລ ອຣຫໂຕ ອຠິຎ຺ຎໍ ອຸປ຺ປາເທນ຺ຕສ຺ສ ສມາປຕ຺ຕິໍ ອຸປ຺ປາເທນ຺ຕສ຺ສ ກິຣິຍາພ຺ຍາກເຕ ປຎ຺ຎາ ອຕ຺ຖຊາປິກາ ປຎ຺ຎາ, ຈຕູສຸ ຠູມີສຸ ວິປາເກ ອຣຫໂຕ ອຸປ຺ປນ຺ນາຍ ອຠິຎ຺ຎາຍ ອຸປ຺ປນ຺ນາຍ ສມາປຕ຺ຕິຍາ ກິຣິຍາພ຺ຍາກເຕ ປຎ຺ຎາ ຊາປິຕຕ຺ຖາ ປຎ຺ຎາ.

ເອວໍ ທຸວິເຘນ ຎາຓວຕ຺ຖຸ.

ທຸກໍ.