໔. ກິຣິຍວາໂຣ

໗໔໓. ຕິສ຺ໂສ ປຏິສມ຺ຠິທາ – ອຕ຺ຖປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ.

ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ໂຜຏ຺ຐພ຺ພາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ. ອິເມ ຘມ຺ມາ ອພ຺ຍາກຕາ. ອິເມສຸ ຘມ຺ເມສຸ ຎາຓໍ ອຕ຺ຖປຏິສມ຺ຠິທາ. ຍາຍ ນິຣຸຕ຺ຕິຍາ ເຕສໍ ຘມ຺ມານໍ ປຎ຺ຎຕ຺ຕິ ໂຫຕິ ຕຕ຺ຣ ຘມ຺ມນິຣຸຕ຺ຕາຠິລາເປ ຎາຓໍ ນິຣຸຕ຺ຕິປຏິສມ຺ຠິທາ. ເຍນ ຎາເຓນ ຕານິ ຎາຓານິ ຊານາຕິ – ‘‘ອິມານິ ຎາຓານິ ອິທມຕ຺ຖໂຊຕການີ’’ຕິ, ຎາເຓສຸ ຎາຓໍ ປຏິຠານປຏິສມ຺ຠິທາ.

໗໔໔. ຕິສ຺ໂສ ປຏິສມ຺ຠິທາ – ອຕ຺ຖປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ.

ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ໂສມນສ຺ສສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ…ເປ… ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ, ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ. ອິເມ ຘມ຺ມາ ອພ຺ຍາກຕາ. ອິເມສຸ ຘມ຺ເມສຸ ຎາຓໍ ອຕ຺ຖປຏິສມ຺ຠິທາ. ຍາຍ ນິຣຸຕ຺ຕິຍາ ເຕສໍ ຘມ຺ມານໍ ປຎ຺ຎຕ຺ຕິ ໂຫຕິ ຕຕ຺ຣ ຘມ຺ມນິຣຸຕ຺ຕາຠິລາເປ ຎາຓໍ ນິຣຸຕ຺ຕິປຏິສມ຺ຠິທາ. ເຍນ ຎາເຓນ ຕານິ ຎາຓານິ ຊານາຕິ – ‘‘ອິມານິ ຎາຓານິ ອິທມຕ຺ຖໂຊຕການີ’’ຕິ, ຎາເຓສຸ ຎາຓໍ ປຏິຠານປຏິສມ຺ຠິທາ.

໗໔໕. ຕິສ຺ໂສ ປຏິສມ຺ຠິທາ – ອຕ຺ຖປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ.

ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ໂສມນສ຺ສສຫຄຕາ ຎາຓສມ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ…ເປ… ຣູປາວຈຣໍ ຌານໍ ຠາເວຕິ…ເປ… ອຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ…ເປ… ສພ຺ພໂສ ອາກິຎ຺ຈຎ຺ຎາຍຕນໍ ສມຕິກ຺ກມ຺ມ ເນວສຎ຺ຎານາສຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ອພ຺ຍາກຕາ. ອິເມສຸ ຘມ຺ເມສຸ ຎາຓໍ ອຕ຺ຖປຏິສມ຺ຠິທາ. ຍາຍ ນິຣຸຕ຺ຕິຍາ ເຕສໍ ຘມ຺ມານໍ ປຎ຺ຎຕ຺ຕິ ໂຫຕິ ຕຕ຺ຣ ຘມ຺ມນິຣຸຕ຺ຕາຠິລາເປ ຎາຓໍ ນິຣຸຕ຺ຕິປຏິສມ຺ຠິທາ. ເຍນ ຎາເຓນ ຕານິ ຎາຓານິ ຊານາຕິ – ‘‘ອິມານິ ຎາຓານິ ອິທມຕ຺ຖໂຊຕການີ’’ຕິ, ຎາເຓສຸ ຎາຓໍ ປຏິຠານປຏິສມ຺ຠິທາ.

໗໔໖. ຈຕສ຺ໂສ ປຏິສມ຺ຠິທາ – ອຕ຺ຖປຏິສມ຺ຠິທາ, ຘມ຺ມປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ. ຕິສ຺ໂສ ປຏິສມ຺ຠິທາ ກາມາວຈຣກຸສລໂຕ ຈຕູສຸ ຎາຓສມ຺ປຍຸຕ຺ເຕສຸ ຈິຕ຺ຕຸປ຺ປາເທສຸ, ກິຣິຍໂຕ ຈຕູສຸ ຎາຓສມ຺ປຍຸຕ຺ເຕສຸ ຈິຕ຺ຕຸປ຺ປາເທສຸ ອຸປ຺ປຊ຺ຊນ຺ຕິ. ອຕ຺ຖປຏິສມ຺ຠິທາ ເອເຕສຸ ເຈວ ອຸປ຺ປຊ຺ຊຕິ, ຈຕູສຸ ມຄ຺ເຄສຸ ຈຕູສຸ ຜເລສຸ ຈ ອຸປ຺ປຊ຺ຊຕິ.

ອຠິຘມ຺ມຠາຊນີຍໍ.