໓. ປຎ຺ຫາປຸຈ຺ຉກໍ

໗໔໗. ຈຕສ຺ໂສ ປຏິສມ຺ຠິທາ – ອຕ຺ຖປຏິສມ຺ຠິທາ, ຘມ຺ມປຏິສມ຺ຠິທາ, ນິຣຸຕ຺ຕິປຏິສມ຺ຠິທາ, ປຏິຠານປຏິສມ຺ຠິທາ.

໗໔໘. ຈຕຸນ຺ນໍ ປຏິສມ຺ຠິທານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໗໔໙. ສິຍາ ກຸສລາ, ສິຍາ ອພ຺ຍາກຕາ. ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ຕິສ຺ໂສ ປຏິສມ຺ຠິທາ ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ; ອຕ຺ຖປຏິສມ຺ຠິທາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ຕິສ຺ໂສ ປຏິສມ຺ຠິທາ ອນຸປາທິນ຺ນຸປາທານິຍາ; ອຕ຺ຖປຏິສມ຺ຠິທາ ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ. ຕິສ຺ໂສ ປຏິສມ຺ຠິທາ ອສໍກິລິຏ຺ຐອສໍກິເລສິກາ; ອຕ຺ຖປຏິສມ຺ຠິທາ ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ.

ຕິສ຺ໂສ ປຏິສມ຺ຠິທາ ສວິຕກ຺ກສວິຈາຣາ; ອຕ຺ຖປຏິສມ຺ຠິທາ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ. ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ. ເນວ ທສ຺ສເນນ ນ ຠາວນາຍ ປຫາຕພ຺ພາ. ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ.

ຕິສ຺ໂສ ປຏິສມ຺ຠິທາ ສິຍາ ອາຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ; ອຕ຺ຖປຏິສມ຺ຠິທາ ສິຍາ ອາຈຍຄາມິນີ, ສິຍາ ອປຈຍຄາມິນີ, ສິຍາ ເນວາຈຍຄາມິນາປຈຍຄາມິນີ.

ຕິສ຺ໂສ ປຏິສມ຺ຠິທາ ເນວເສກ຺ຂນາເສກ຺ຂາ, ອຕ຺ຖປຏິສມ຺ຠິທາ ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ. ຕິສ຺ໂສ ປຏິສມ຺ຠິທາ ປຣິຕ຺ຕາ; ອຕ຺ຖປຏິສມ຺ຠິທາ ສິຍາ ປຣິຕ຺ຕາ, ສິຍາ ອປ຺ປມາຓາ. ນິຣຸຕ຺ຕິປຏິສມ຺ຠິທາ ປຣິຕ຺ຕາຣມ຺ມຓາ; ຕິສ຺ໂສ ປຏິສມ຺ຠິທາ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ.

ຕິສ຺ໂສ ປຏິສມ຺ຠິທາ ມຊ຺ຌິມາ; ອຕ຺ຖປຏິສມ຺ຠິທາ ສິຍາ ມຊ຺ຌິມາ, ສິຍາ ປຓີຕາ. ຕິສ຺ໂສ ປຏິສມ຺ຠິທາ ອນິຍຕາ; ອຕ຺ຖປຏິສມ຺ຠິທາ ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ນິຣຸຕ຺ຕິປຏິສມ຺ຠິທາ ນ ວຕ຺ຕພ຺ພາ – ມຄ຺ຄາຣມ຺ມຓາຕິປິ, ມຄ຺ຄເຫຕຸກາຕິປິ, ມຄ຺ຄາຘິປຕິນີຕິປິ; ອຕ຺ຖປຏິສມ຺ຠິທາ ນ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິນີ, ສິຍາ ນ ວຕ຺ຕພ຺ພາ ມຄ຺ຄເຫຕຸກາຕິປິ, ມຄ຺ຄາຘິປຕິນີຕິປິ; ທ຺ເວ ປຏິສມ຺ຠິທາ ສິຍາ ມຄ຺ຄາຣມ຺ມຓາ, ນ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ ມຄ຺ຄາຣມ຺ມຓາຕິປິ, ມຄ຺ຄາຘິປຕິໂນຕິປິ.

ຕິສ຺ໂສ ປຏິສມ຺ຠິທາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ນ ວຕ຺ຕພ຺ພາ ອຸປ຺ປາທິໂນຕິ; ອຕ຺ຖປຏິສມ຺ຠິທາ ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິນີ. ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ນິຣຸຕ຺ຕິປຏິສມ຺ຠິທາ ປຈ຺ຈຸປ຺ປນ຺ນາຣມ຺ມຓາ; ທ຺ເວ ປຏິສມ຺ຠິທາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ; ອຕ຺ຖປຏິສມ຺ຠິທາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ ອຕີຕາຣມ຺ມຓາຕິປິ, ອນາຄຕາຣມ຺ມຓາຕິປິ, ປຈ຺ຈຸປ຺ປນ຺ນາຣມ຺ມຓາຕິປິ. ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ນິຣຸຕ຺ຕິປຏິສມ຺ຠິທາ ພຫິທ຺ຘາຣມ຺ມຓາ; ຕິສ຺ໂສ ປຏິສມ຺ຠິທາ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ. ອນິທສ຺ສນອປຏິຆາ.

໒. ທຸກໍ

໗໕໐. ເຫຕູ, ສເຫຕຸກາ, ເຫຕຸສມ຺ປຍຸຕ຺ຕາ, ເຫຕູ ເຈວ ສເຫຕຸກາ ຈ, ເຫຕູ ເຈວ ເຫຕຸສມ຺ປຍຸຕ຺ຕາ ຈ, ນ ວຕ຺ຕພ຺ພາ ນ ເຫຕູ ສເຫຕຸກາຕິປິ, ນເຫຕູອເຫຕຸກາຕິປິ.

ສປ຺ປຈ຺ຈຍາ, ສງ຺ຂຕາ, ອນິທສ຺ສນາ, ອປ຺ປຏິຆາ, ອຣູປາ, ຕິສ຺ໂສ ປຏິສມ຺ຠິທາ ໂລກິຍາ, ອຕ຺ຖປຏິສມ຺ຠິທາ ສິຍາ ໂລກິຍາ, ສິຍາ ໂລກຸຕ຺ຕຣາ, ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ໂນ ອາສວາ. ຕິສ຺ໂສ ປຏິສມ຺ຠິທາ ສາສວາ; ອຕ຺ຖປຏິສມ຺ຠິທາ ສິຍາ ສາສວາ, ສິຍາ ອນາສວາ. ອາສວວິປ຺ປຍຸຕ຺ຕາ. ຕິສ຺ໂສ ປຏິສມ຺ຠິທາ ນ ວຕ຺ຕພ຺ພາ ອາສວາ ເຈວ ສາສວາ ຈາຕິ, ສາສວາ ເຈວ ໂນ ຈ ອາສວາ; ອຕ຺ຖປຏິສມ຺ຠິທາ ນ ວຕ຺ຕພ຺ພາ ອາສໂວ [ອາສວາ (ສີ.) ຘາຕຸວິຠງ຺ເຄ ປນ ປາຐນານຕ຺ຕໍ ນຕ຺ຖິ] ເຈວ ສາສວາ ຈາຕິ, ສິຍາ ສາສວາ ເຈວ ໂນ ຈ ອາສໂວ [ອາສວາ (ສີ.) ຘາຕຸວິຠງ຺ເຄ ປນ ປາຐນານຕ຺ຕໍ ນຕ຺ຖິ], ສິຍາ ນ ວຕ຺ຕພ຺ພາ ສາສວາ ເຈວ ໂນ ຈ ອາສວາຕິ. ນ ວຕ຺ຕພ຺ພາ ອາສວາ ເຈວ ອາສວສມ຺ປຍຸຕ຺ຕາ ຈາຕິປິ, ອາສວສມ຺ປຍຸຕ຺ຕາ ເຈວ ໂນ ຈ ອາສວາຕິປິ. ຕິສ຺ໂສ ປຏິສມ຺ຠິທາ ອາສວວິປ຺ປຍຸຕ຺ຕາ ສາສວາ; ອຕ຺ຖປຏິສມ຺ຠິທາ ສິຍາ ອາສວວິປ຺ປຍຸຕ຺ຕາ ສາສວາ, ສິຍາ ອາສວວິປ຺ປຍຸຕ຺ຕາ ອນາສວາ.

ໂນ ສໍໂຍຊນາ…ເປ… ໂນ ຄນ຺ຖາ…ເປ… ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ…ເປ… ໂນ ປຣາມາສາ…ເປ… ສາຣມ຺ມຓາ. ໂນ ຈິຕ຺ຕາ, ເຈຕສິກາ, ຈິຕ຺ຕສມ຺ປຍຸຕ຺ຕາ, ຈິຕ຺ຕສໍສຏ຺ຐາ, ຈິຕ຺ຕສມຸຏ຺ຐານາ, ຈິຕ຺ຕສຫຠຸໂນ, ຈິຕ຺ຕານຸປຣິວຕ຺ຕິໂນ. ຈິຕ຺ຕສໍສຏ຺ຐສມຸຏ຺ຐານາ, ຈິຕ຺ຕສໍສຏ຺ຐສມຸຏ຺ຐານສຫຠຸໂນ, ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ, ພາຫິຣາ, ໂນ ອຸປາທາ, ອນຸປາທິນ຺ນາ.

ໂນ ອຸປາທານາ…ເປ… ໂນ ກິເລສາ…ເປ… ນ ທສ຺ສເນນ ປຫາຕພ຺ພາ. ນ ຠາວນາຍ ປຫາຕພ຺ພາ. ນ ທສ຺ສເນນ ປຫາຕພ຺ພເຫຕຸກາ. ນ ຠາວນາຍ ປຫາຕພ຺ພເຫຕຸກາ. ຕິສ຺ໂສ ປຏິສມ຺ຠິທາ ສວິຕກ຺ກາ; ອຕ຺ຖປຏິສມ຺ຠິທາ ສິຍາ ສວິຕກ຺ກາ, ສິຍາ ອວິຕກ຺ກາ. ຕິສ຺ໂສ ປຏິສມ຺ຠິທາ ສວິຈາຣາ; ອຕ຺ຖປຏິສມ຺ຠິທາ ສິຍາ ສວິຈາຣາ, ສິຍາ ອວິຈາຣາ. ສິຍາ ສປ຺ປີຕິກາ, ສິຍາ ອປ຺ປີຕິກາ. ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ. ຕິສ຺ໂສ ປຏິສມ຺ຠິທາ ກາມາວຈຣາ; ອຕ຺ຖປຏິສມ຺ຠິທາ ສິຍາ ກາມາວຈຣາ, ສິຍາ ນ ກາມາວຈຣາ. ນ ຣູປາວຈຣາ. ນ ອຣູປາວຈຣາ. ຕິສ຺ໂສ ປຏິສມ຺ຠິທາ ປຣິຍາປນ຺ນາ; ອຕ຺ຖປຏິສມ຺ຠິທາ ສິຍາ ປຣິຍາປນ຺ນາ, ສິຍາ ອປຣິຍາປນ຺ນາ. ຕິສ຺ໂສ ປຏິສມ຺ຠິທາ ອນິຍ຺ຍານິກາ; ອຕ຺ຖປຏິສມ຺ຠິທາ ສິຍາ ນິຍ຺ຍານິກາ, ສິຍາ ອນິຍ຺ຍານິກາ. ຕິສ຺ໂສ ປຏິສມ຺ຠິທາ ອນິຍຕາ; ອຕ຺ຖປຏິສມ຺ຠິທາ ສິຍາ ນິຍຕາ, ສິຍາ ອນິຍຕາ. ຕິສ຺ໂສ ປຏິສມ຺ຠິທາ ສອຸຕ຺ຕຣາ; ອຕ຺ຖປຏິສມ຺ຠິທາ ສິຍາ ສອຸຕ຺ຕຣາ, ສິຍາ ອນຸຕ຺ຕຣາ. ອຣຓາຕິ.

ປຎ຺ຫາປຸຈ຺ຉກໍ.

ປຏິສມ຺ຠິທາວິຠງ຺ໂຄ ນິຏ຺ຐິໂຕ.