໒. ອຠິຘມ຺ມຠາຊນີຍໍ

໔໗໒. ສຕ຺ຕ ໂພຊ຺ຌງ຺ຄາ – ສຕິສມ຺ໂພຊ຺ຌງ຺ໂຄ, ຘມ຺ມວິຈຍສມ຺ໂພຊ຺ຌງ຺ໂຄ, ວີຣິຍສມ຺ໂພຊ຺ຌງ຺ໂຄ, ປີຕິສມ຺ໂພຊ຺ຌງ຺ໂຄ, ປສ຺ສທ຺ຘິສມ຺ໂພຊ຺ຌງ຺ໂຄ, ສມາຘິສມ຺ໂພຊ຺ຌງ຺ໂຄ, ອຸເປກ຺ຂາສມ຺ໂພຊ຺ຌງ຺ໂຄ.

໔໗໓. ຕຕ຺ຖ ກຕເມ ສຕ຺ຕ ໂພຊ຺ຌງ຺ຄາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ສຕ຺ຕ ໂພຊ຺ຌງ຺ຄາ ໂຫນ຺ຕິ – ສຕິສມ຺ໂພຊ຺ຌງ຺ໂຄ…ເປ… ອຸເປກ຺ຂາສມ຺ໂພຊ຺ຌງ຺ໂຄ.

໔໗໔. ຕຕ຺ຖ ກຕໂມ ສຕິສມ຺ໂພຊ຺ຌງ຺ໂຄ? ຍາ ສຕິ ອນຸສ຺ສຕິ…ເປ… ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສຕິສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ຘມ຺ມວິຈຍສມ຺ໂພຊ຺ຌງ຺ໂຄ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ຘມ຺ມວິຈຍສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ວີຣິຍສມ຺ໂພຊ຺ຌງ຺ໂຄ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ວີຣິຍສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ປີຕິສມ຺ໂພຊ຺ຌງ຺ໂຄ? ຍາ ປີຕິ ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ [ໂອທຄ຺ຄໍ (ສີ.) ຘ. ສ. ໙] ອຕ຺ຕມນຕາ ຈິຕ຺ຕສ຺ສ ປີຕິສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ປີຕິສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ປສ຺ສທ຺ຘິສມ຺ໂພຊ຺ຌງ຺ໂຄ? ຍາ ເວທນາກ຺ຂນ຺ຘສ຺ສ ສຎ຺ຎາກ຺ຂນ຺ຘສ຺ສ ສງ຺ຂາຣກ຺ຂນ຺ຘສ຺ສ ວິຎ຺ຎາຓກ຺ຂນ຺ຘສ຺ສ ປສ຺ສທ຺ຘິ ປຏິປ຺ປສ຺ສທ຺ຘິ ປສ຺ສມ຺ຠນາ ປຏິປ຺ປສ຺ສມ຺ຠນາ ປຏິປ຺ປສ຺ສມ຺ຠິຕຕ຺ຕໍ ປສ຺ສທ຺ຘິສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ປສ຺ສທ຺ຘິສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ສມາຘິສມ຺ໂພຊ຺ຌງ຺ໂຄ? ຍາ ຈິຕ຺ຕສ຺ສ ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມາຘິສມ຺ໂພຊ຺ຌງ຺ໂຄ’’.

ຕຕ຺ຖ ກຕໂມ ອຸເປກ຺ຂາສມ຺ໂພຊ຺ຌງ຺ໂຄ? ຍາ ອຸເປກ຺ຂາ ອຸເປກ຺ຂນາ ອຊ຺ຌຸເປກ຺ຂນາ ມຊ຺ຌຕ຺ຕຕາ ຈິຕ຺ຕສ຺ສ ອຸເປກ຺ຂາສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ອຸເປກ຺ຂາສມ຺ໂພຊ຺ຌງ຺ໂຄ’’. ອິເມ ວຸຈ຺ຈນ຺ຕິ ສຕ຺ຕ ໂພຊ຺ຌງ຺ຄາ. ອວເສສາ ຘມ຺ມາ ສຕ຺ຕຫິ ໂພຊ຺ຌງ຺ເຄຫິ ສມ຺ປຍຸຕ຺ຕາ.

໔໗໕. ສຕ຺ຕ ໂພຊ຺ຌງ຺ຄາ – ສຕິສມ຺ໂພຊ຺ຌງ຺ໂຄ…ເປ… ອຸເປກ຺ຂາສມ຺ໂພຊ຺ຌງ຺ໂຄ.

໔໗໖. ຕຕ຺ຖ ກຕໂມ ສຕິສມ຺ໂພຊ຺ຌງ຺ໂຄ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຍາ ຕສ຺ມິໍ ສມເຍ ສຕິ ອນຸສ຺ສຕິ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສຕິສມ຺ໂພຊ຺ຌງ຺ໂຄ’’. ອວເສສາ ຘມ຺ມາ ສຕິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ຘມ຺ມວິຈຍສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ວີຣິຍສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ປີຕິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ປສ຺ສທ຺ຘິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ສມາຘິສມ຺ໂພຊ຺ຌງ຺ຄສມ຺ປຍຸຕ຺ຕາ.

ຕຕ຺ຖ ກຕໂມ ອຸເປກ຺ຂາສມ຺ໂພຊ຺ຌງ຺ໂຄ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຍາ ຕສ຺ມິໍ ສມເຍ ອຸເປກ຺ຂາ ອຸເປກ຺ຂນາ ອຊ຺ຌຸເປກ຺ຂນາ ມຊ຺ຌຕ຺ຕຕາ ຈິຕ຺ຕສ຺ສ ອຸເປກ຺ຂາສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ອຸເປກ຺ຂາສມ຺ໂພຊ຺ຌງ຺ໂຄ’’. ອວເສສາ ຘມ຺ມາ ອຸເປກ຺ຂາສມ຺ໂພຊ຺ຌງ຺ຄສມ຺ປຍຸຕ຺ຕາ.

໔໗໗. ສຕ຺ຕ ໂພຊ຺ຌງ຺ຄາ – ສຕິສມ຺ໂພຊ຺ຌງ຺ໂຄ…ເປ… ອຸເປກ຺ຂາສມ຺ໂພຊ຺ຌງ຺ໂຄ.

໔໗໘. ຕຕ຺ຖ ກຕເມ ສຕ຺ຕ ໂພຊ຺ຌງ຺ຄາ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ …ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ໂຍ ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ – ອິເມ ຘມ຺ມາ ກຸສລາ. ຕສ຺ເສວ ໂລກຸຕ຺ຕຣສ຺ສ ກຸສລສ຺ສ ຌານສ຺ສ ກຕຕ຺ຕາ ຠາວິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ, ຕສ຺ມິໍ ສມເຍ ສຕ຺ຕ ໂພຊ຺ຌງ຺ຄາ ໂຫນ຺ຕິ – ສຕິສມ຺ໂພຊ຺ຌງ຺ໂຄ…ເປ… ອຸເປກ຺ຂາສມ຺ໂພຊ຺ຌງ຺ໂຄ.

໔໗໙. ຕຕ຺ຖ ກຕໂມ ສຕິສມ຺ໂພຊ຺ຌງ຺ໂຄ? ຍາ ສຕິ ອນຸສ຺ສຕິ…ເປ… ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສຕິສມ຺ໂພຊ຺ຌງ຺ໂຄ’’…ເປ….

ຕຕ຺ຖ ກຕໂມ ອຸເປກ຺ຂາສມ຺ໂພຊ຺ຌງ຺ໂຄ? ຍາ ອຸເປກ຺ຂາ ອຸເປກ຺ຂນາ ອຊ຺ຌຸເປກ຺ຂນາ ມຊ຺ຌຕ຺ຕຕາ ຈິຕ຺ຕສ຺ສ ອຸເປກ຺ຂາສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ອຸເປກ຺ຂາສມ຺ໂພຊ຺ຌງ຺ໂຄ’’. ອິເມ ວຸຈ຺ຈນ຺ຕິ ‘‘ສຕ຺ຕ ໂພຊ຺ຌງ຺ຄາ’’. ອວເສສາ ຘມ຺ມາ ສຕ຺ຕຫິ ໂພຊ຺ຌງ຺ເຄຫິ ສມ຺ປຍຸຕ຺ຕາ.

໔໘໐. ສຕ຺ຕ ໂພຊ຺ຌງ຺ຄາ – ສຕິສມ຺ໂພຊ຺ຌງ຺ໂຄ…ເປ… ອຸເປກ຺ຂາສມ຺ໂພຊ຺ຌງ຺ໂຄ.

໔໘໑. ຕຕ຺ຖ ກຕໂມ ສຕິສມ຺ໂພຊ຺ຌງ຺ໂຄ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ໂລກຸຕ຺ຕຣສ຺ສ ກຸສລສ຺ສ ຌານສ຺ສ ກຕຕ຺ຕາ ຠາວິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຍາ ຕສ຺ມິໍ ສມເຍ ສຕິ ອນຸສ຺ສຕິ ສມ຺ມາສຕິ ສຕິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສຕິສມ຺ໂພຊ຺ຌງ຺ໂຄ’’. ອວເສສາ ຘມ຺ມາ ສຕິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ຘມ຺ມວິຈຍສມ຺ໂພຊ຺ຌງ຺ຄສມ຺ປຍຸຕ຺ຕາ …ເປ… ອວເສສາ ຘມ຺ມາ ວີຣິຍສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ປີຕິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ປສ຺ສທ຺ຘິສມ຺ໂພຊ຺ຌງ຺ຄສມ຺ປຍຸຕ຺ຕາ…ເປ… ອວເສສາ ຘມ຺ມາ ສມາຘິສມ຺ໂພຊ຺ຌງ຺ຄສມ຺ປຍຸຕ຺ຕາ.

ຕຕ຺ຖ ກຕໂມ ອຸເປກ຺ຂາສມ຺ໂພຊ຺ຌງ຺ໂຄ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ. ອິເມ ຘມ຺ມາ ກຸສລາ. ຕສ຺ເສວ ໂລກຸຕ຺ຕຣສ຺ສ ກຸສລສ຺ສ ຌານສ຺ສ ກຕຕ຺ຕາ ຠາວິຕຕ຺ຕາ ວິປາກໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ ສຸຎ຺ຎຕໍ, ຍາ ຕສ຺ມິໍ ສມເຍ ອຸເປກ຺ຂາ ອຸເປກ຺ຂນາ ອຊ຺ຌຸເປກ຺ຂນາ ມຊ຺ຌຕ຺ຕຕາ ຈິຕ຺ຕສ຺ສ ອຸເປກ຺ຂາສມ຺ໂພຊ຺ຌງ຺ໂຄ – ອຍໍ ວຸຈ຺ຈຕິ ‘‘ອຸເປກ຺ຂາສມ຺ໂພຊ຺ຌງ຺ໂຄ’’. ອວເສສາ ຘມ຺ມາ ອຸເປກ຺ຂາສມ຺ໂພຊ຺ຌງ຺ຄສມ຺ປຍຸຕ຺ຕາ.

ອຠິຘມ຺ມຠາຊນີຍໍ.