໓. ປຎ຺ຫາປຸຈ຺ຉກໍ

໔໘໒. ສຕ຺ຕ ໂພຊ຺ຌງ຺ຄາ – ສຕິສມ຺ໂພຊ຺ຌງ຺ໂຄ, ຘມ຺ມວິຈຍສມ຺ໂພຊ຺ຌງ຺ໂຄ, ວີຣິຍສມ຺ໂພຊ຺ຌງ຺ໂຄ, ປີຕິສມ຺ໂພຊ຺ຌງ຺ໂຄ, ປສ຺ສທ຺ຘິສມ຺ໂພຊ຺ຌງ຺ໂຄ, ສມາຘິສມ຺ໂພຊ຺ຌງ຺ໂຄ, ອຸເປກ຺ຂາສມ຺ໂພຊ຺ຌງ຺ໂຄ.

໔໘໓. ສຕ຺ຕນ຺ນໍ ໂພຊ຺ຌງ຺ຄານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໔໘໔. ສິຍາ ກຸສລາ, ສິຍາ ອພ຺ຍາກຕາ. ປີຕິສມ຺ໂພຊ຺ຌງ຺ໂຄ ສຸຂາຍ ເວທນາຍ ສມ຺ປຍຸຕ຺ໂຕ; ຉ ໂພຊ຺ຌງ຺ຄາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ສິຍາ ວິປາກາ, ສິຍາ ວິປາກຘມ຺ມຘມ຺ມາ. ອນຸປາທິນ຺ນອນຸປາທານິຍາ. ອສໍກິລິຏ຺ຐອສໍກິເລສິກາ. ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ. ປີຕິສມ຺ໂພຊ຺ຌງ຺ໂຄ ນ ປີຕິສຫຄໂຕ, ສຸຂສຫຄໂຕ, ນ ອຸເປກ຺ຂາສຫຄໂຕ; ຉ ໂພຊ຺ຌງ຺ຄາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ. ເນວ ທສ຺ສເນນ ນ ຠາວນາຍ ປຫາຕພ຺ພາ. ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ສິຍາ ເສກ຺ຂາ, ສິຍາ ອເສກ຺ຂາ. ອປ຺ປມາຓາ. ອປ຺ປມາຓາຣມ຺ມຓາ. ປຓີຕາ. ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ນ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ; ສິຍາ ນ ວຕ຺ຕພ຺ພາ ມຄ຺ຄເຫຕຸກາຕິປິ, ມຄ຺ຄາຘິປຕິໂນຕິປິ. ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ນ ວຕ຺ຕພ຺ພາ ອຕີຕາຣມ຺ມຓາຕິປິ, ອນາຄຕາຣມ຺ມຓາຕິປິ, ປຈ຺ຈຸປ຺ປນ຺ນາຣມ຺ມຓາຕິປິ. ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ພຫິທ຺ຘາຣມ຺ມຓາ. ອນິທສ຺ສນອປ຺ປຏິຆາ.

໒. ທຸກໍ

໔໘໕. ຘມ຺ມວິຈຍສມ຺ໂພຊ຺ຌງ຺ໂຄ ເຫຕຸ, ຉ ໂພຊ຺ຌງ຺ຄາ ເຫຕຸສມ຺ປຍຸຕ຺ຕາ. ຘມ຺ມວິຈຍສມ຺ໂພຊ຺ຌງ຺ໂຄ ເຫຕຸ ເຈວ ສເຫຕຸໂກ ຈ, ຉ ໂພຊ຺ຌງ຺ຄາ ນ ວຕ຺ຕພ຺ພາ ເຫຕູ ເຈວ ສເຫຕຸກາ ຈາຕິ, ສເຫຕຸກາ ເຈວ ນ ຈ ເຫຕູ. ຘມ຺ມວິຈຍສມ຺ໂພຊ຺ຌງ຺ໂຄ ເຫຕຸ ເຈວ ເຫຕຸສມ຺ປຍຸຕ຺ໂຕ ຈ, ຉ ໂພຊ຺ຌງ຺ຄາ ນ ວຕ຺ຕພ຺ພາ ເຫຕູ ເຈວ ເຫຕຸສມ຺ປຍຸຕ຺ຕາ ຈາຕິ, ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ. ຉ ໂພຊ຺ຌງ຺ຄາ ນ ເຫຕູ ສເຫຕຸກາ, ຘມ຺ມວິຈຍສມ຺ໂພຊ຺ຌງ຺ໂຄ ນ ວຕ຺ຕພ຺ໂພ ນ ເຫຕຸສເຫຕຸໂກຕິປິ, ນ ເຫຕຸອເຫຕຸໂກຕິປິ. ສປ຺ປຈ຺ຈຍາ. ສງ຺ຂຕາ. ອນິທສ຺ສນາ. ອປ຺ປຏິຆາ. ອຣູປາ. ໂລກຸຕ຺ຕຣາ. ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ. ໂນ ອາສວາ. ອນາສວາ ອາສວວິປ຺ປຍຸຕ຺ຕາ. ນ ວຕ຺ຕພ຺ພາ ອາສວາ ເຈວ ສາສວາ ຈາຕິປິ, ສາສວາ ເຈວ ໂນ ຈ ອາສວາຕິປິ. ອາສວາ ເຈວ ອາສວສມ຺ປຍຸຕ຺ຕາ ຈາຕິປິ, ອາສວສມ຺ປຍຸຕ຺ຕາ ເຈວ ໂນ ຈ ອາສວາຕິປິ. ອາສວວິປ຺ປຍຸຕ຺ຕາ. ອນາສວາ. ໂນ ສໍໂຍຊນາ…ເປ… ໂນ ຄນ຺ຖາ…ເປ… ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ…ເປ… ໂນ ປຣາມາສາ…ເປ… ສາຣມ຺ມຓາ. ໂນ ຈິຕ຺ຕາ. ເຈຕສິກາ. ຈິຕ຺ຕສມ຺ປຍຸຕ຺ຕາ. ຈິຕ຺ຕສໍສຏ຺ຐາ. ຈິຕ຺ຕສມຸຏ຺ຐານາ. ຈິຕ຺ຕສຫຠຸໂນ. ຈິຕ຺ຕານຸປຣິວຕ຺ຕິໂນ. ຈິຕ຺ຕສໍສຏ຺ຐສມຸຏ຺ຐານາ. ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ພາຫິຣາ. ໂນ ອຸປາທາ. ອນຸປາທິນ຺ນາ. ໂນ ອຸປາທານາ…ເປ… ໂນ ກິເລສາ…ເປ… ນ ທສ຺ສເນນ ປຫາຕພ຺ພາ. ນ ຠາວນາຍ ປຫາຕພ຺ພາ. ນ ທສ຺ສເນນ ປຫາຕພ຺ພເຫຕຸກາ. ນ ຠາວນາຍ ປຫາຕພ຺ພເຫຕຸກາ. ສິຍາ ສວິຕກ຺ກາ, ສິຍາ ອວິຕກ຺ກາ. ສິຍາ ສວິຈາຣາ, ສິຍາ ອວິຈາຣາ.

ປີຕິສມ຺ໂພຊ຺ຌງ຺ໂຄ ອປ຺ປີຕິໂກ, ຉ ໂພຊ຺ຌງ຺ຄາ ສິຍາ ສປ຺ປີຕິກາ, ສິຍາ ອປ຺ປີຕິກາ. ປີຕິສມ຺ໂພຊ຺ຌງ຺ໂຄ ນ ປີຕິສຫຄໂຕ, ຉ ໂພຊ຺ຌງ຺ຄາ ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ປີຕິສມ຺ໂພຊ຺ຌງ຺ໂຄ ສຸຂສຫຄໂຕ, ຉ ໂພຊ຺ຌງ຺ຄາ ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ປີຕິສມ຺ໂພຊ຺ຌງ຺ໂຄ ນ ອຸເປກ຺ຂາສຫຄໂຕ, ຉ ໂພຊ຺ຌງ຺ຄາ ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ. ນ ກາມາວຈຣາ. ນ ຣູປາວຈຣາ. ນ ອຣູປາວຈຣາ. ອປຣິຍາປນ຺ນາ. ສິຍາ ນິຍ຺ຍານິກາ, ສິຍາ ອນິຍ຺ຍານິກາ. ສິຍາ ນິຍຕາ, ສິຍາ ອນິຍຕາ. ອນຸຕ຺ຕຣາ. ອຣຓາຕິ.

ປຎ຺ຫາປຸຈ຺ຉກໍ.

ໂພຊ຺ຌງ຺ຄວິຠງ຺ໂຄ ນິຏ຺ຐິໂຕ.