(໑໙໔) ໑. ອສຎ຺ຈິຈ຺ຈກຖາ

໘໕໗. ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີຕິ? ອາມນ຺ຕາ. ອສຎ຺ຈິຈ຺ຈ ປາຓໍ ຫນ຺ຕ຺ວາ ປາຓາຕິປາຕີ ໂຫຕີຕິ? ນ ເຫວໍ ວຕ຺ຕພ຺ເພ…ເປ… ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີຕິ? ອາມນ຺ຕາ. ອສຎ຺ຈິຈ຺ຈ ອທິນ຺ນໍ ອາທິຍິຕ຺ວາ…ເປ… ມຸສາ ຠຓິຕ຺ວາ ມຸສາວາທີ ໂຫຕີຕິ? ນ ເຫວໍ ວຕ຺ຕພ຺ເພ…ເປ….

ອສຎ຺ຈິຈ຺ຈ ປາຓໍ ຫນ຺ຕ຺ວາ ປາຓາຕິປາຕີ ນ ໂຫຕີຕິ? ອາມນ຺ຕາ. ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ນ ໂຫຕີຕິ? ນ ເຫວໍ ວຕ຺ຕພ຺ເພ…ເປ… ອສຎ຺ຈິຈ຺ຈ ອທິນ຺ນໍ ອາທິຍິຕ຺ວາ…ເປ… ມຸສາ ຠຓິຕ຺ວາ ມຸສາວາທີ ນ ໂຫຕີຕິ? ອາມນ຺ຕາ. ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ນ ໂຫຕີຕິ? ນ ເຫວໍ ວຕ຺ຕພ຺ເພ…ເປ….

໘໕໘. ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີຕິ? ອາມນ຺ຕາ. ‘‘ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ‘‘ສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ຫຎ຺ຈິ ‘‘ສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີ’’ຕິ – ອຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອສຎ຺ຈິຈ຺ຈ ມາຕຣໍ ຊີວິຕາ ໂວໂຣເປຕ຺ວາ ອານນ຺ຕຣິໂກ ໂຫຕີ’’ຕິ.

໘໕໙. ນ ວຕ຺ຕພ຺ພໍ – ‘‘ມາຕຸຆາຕໂກ ອານນ຺ຕຣິໂກ’’ຕິ? ອາມນ຺ຕາ. ນນຸ ມາຕາ ຊີວິຕາ ໂວໂຣປິຕາຕິ? ອາມນ຺ຕາ. ຫຎ຺ຈິ ມາຕາ ຊີວິຕາ ໂວໂຣປິຕາ, ເຕນ ວຕ ເຣ ວຕ຺ຕພ຺ເພ – ‘‘ມາຕຸຆາຕໂກ ອານນ຺ຕຣິໂກ’’ຕິ.

ນ ວຕ຺ຕພ຺ພໍ – ‘‘ປິຕຸຆາຕໂກ ອານນ຺ຕຣິໂກ’’ຕິ? ອາມນ຺ຕາ. ນນຸ ປິຕາ ຊີວິຕາ ໂວໂຣປິໂຕຕິ? ອາມນ຺ຕາ. ຫຎ຺ຈິ ປິຕາ ຊີວິຕາ ໂວໂຣປິໂຕ, ເຕນ ວຕ ເຣ ວຕ຺ຕພ຺ເພ – ‘‘ປິຕຸຆາຕໂກ ອານນ຺ຕຣິໂກ’’ຕິ.

ນ ວຕ຺ຕພ຺ພໍ – ‘‘ອຣຫນ຺ຕຆາຕໂກ ອານນ຺ຕຣິໂກ’’ຕິ? ອາມນ຺ຕາ. ນນຸ ອຣຫາ ຊີວິຕາ ໂວໂຣປິໂຕຕິ? ອາມນ຺ຕາ. ຫຎ຺ຈິ ອຣຫາ ຊີວິຕາ ໂວໂຣປິໂຕ, ເຕນ ວຕ ເຣ ວຕ຺ຕພ຺ເພ – ‘‘ອຣຫນ຺ຕຆາຕໂກ ອານນ຺ຕຣິໂກ’’ຕິ.

ນ ວຕ຺ຕພ຺ພໍ – ‘‘ຣຸຫິຣຸປ຺ປາທໂກ ອານນ຺ຕຣິໂກ’’ຕິ? ອາມນ຺ຕາ. ນນຸ ຕຖາຄຕສ຺ສ ໂລຫິຕໍ ອຸປ຺ປາທິຕນ຺ຕິ? ອາມນ຺ຕາ. ຫຎ຺ຈິ ຕຖາຄຕສ຺ສ ໂລຫິຕໍ ອຸປ຺ປາທິຕໍ, ເຕນ ວຕ ເຣ ວຕ຺ຕພ຺ເພ – ‘‘ຣຸຫິຣຸປ຺ປາທໂກ ອານນ຺ຕຣິໂກ’’ຕິ.

໘໖໐. ສງ຺ຆເຠທໂກ ອານນ຺ຕຣິໂກຕິ? ອາມນ຺ຕາ. ສພ຺ເພ ສງ຺ຆເຠທກາ ອານນ຺ຕຣິກາຕິ? ນ ເຫວໍ ວຕ຺ຕພ຺ເພ…ເປ… ສພ຺ເພ ສງ຺ຆເຠທກາ ອານນ຺ຕຣິກາຕິ? ອາມນ຺ຕາ. ຘມ຺ມສຎ຺ຎີ ສງ຺ຆເຠທໂກ ອານນ຺ຕຣິໂກຕິ? ນ ເຫວໍ ວຕ຺ຕພ຺ເພ…ເປ….

໘໖໑. ຘມ຺ມສຎ຺ຎີ ສງ຺ຆເຠທໂກ ອານນ຺ຕຣິໂກຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອຕ຺ຖຸປາລິ, ສງ຺ຆເຠທໂກ ອາປາຍິໂກ ເນຣຍິໂກ ກປ຺ປຏ຺ໂຐ ອເຕກິຈ຺ໂຉ; ອຕ຺ຖຸປາລິ, ສງ຺ຆເຠທໂກ ນ ອາປາຍິໂກ ນ ເນຣຍິໂກ ນ ກປ຺ປຏ຺ໂຐ ນ ອເຕກິຈ຺ໂຉ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ຘມ຺ມສຎ຺ຎີ ສງ຺ຆເຠທໂກ ອານນ຺ຕຣິໂກ’’ຕິ.

໘໖໒. ນ ວຕ຺ຕພ຺ພໍ – ‘‘ຘມ຺ມສຎ຺ຎີ ສງ຺ຆເຠທໂກ ອານນ຺ຕຣິໂກ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອາປາຍິໂກ ເນຣຍິໂກ, ກປ຺ປຏ຺ໂຐ ສງ຺ຆເຠທໂກ;

ວຄ຺ຄຣໂຕ ອຘມ຺ມຏ຺ໂຐ, ໂຍຄກ຺ເຂມາ ປຘໍສຕິ;

ສງ຺ຆໍ ສມຄ຺ຄໍ ເຠຕ຺ວານ, ກປ຺ປໍ ນິຣຍມ຺ຫິ ປຈ຺ຈຕີ’’ຕິ [ຈູຬວ. ໓໕໔; ອ. ນິ. ໑໐.໓໙; ອິຕິວຸ. ໑໘].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສງ຺ຆເຠທໂກ ອານນ຺ຕຣິໂກຕິ.

ອສຎ຺ຈິຈ຺ຈກຖາ ນິຏ຺ຐິຕາ.