໑໗. ສຕ຺ຕຣສມວຄ຺ໂຄ

(໑໖໗) ໒. ນຕ຺ຖິ ອຣຫໂຕ ອກາລມຈ຺ຈູຕິກຖາ

໗໘໐. ນຕ຺ຖິ ອຣຫໂຕ ອກາລມຈ຺ຈູຕິ? ອາມນ຺ຕາ. ນຕ຺ຖິ ອຣຫນ຺ຕຆາຕໂກຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອຣຫນ຺ຕຆາຕໂກຕິ? ອາມນ຺ຕາ. ອຕ຺ຖິ ອຣຫໂຕ ອກາລມຈ຺ຈູຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ອຣຫໂຕ ອກາລມຈ຺ຈູຕິ? ອາມນ຺ຕາ. ໂຍ ອຣຫນ຺ຕໍ ຊີວິຕາ ໂວໂຣເປຕິ, ສຕິ ຊີວິເຕ ຊີວິຕາວເສເສ ຊີວິຕາ ໂວໂຣເປຕິ, ອສຕິ ຊີວິເຕ ຊີວິຕາວເສເສ ຊີວິຕາ ໂວໂຣເປຕີຕິ? ສຕິ ຊີວິເຕ ຊີວິຕາວເສເສ ຊີວິຕາ ໂວໂຣເປຕີຕິ. ຫຎ຺ຈິ ສຕິ ຊີວິເຕ ຊີວິຕາວເສເສ ຊີວິຕາ ໂວໂຣເປຕິ, ໂນ ຈ ວຕ ເຣ ວຕ຺ຕພ຺ເພ – ‘‘ນຕ຺ຖິ ອຣຫໂຕ ອກາລມຈ຺ຈູ’’ຕິ. ອສຕິ ຊີວິເຕ ຊີວິຕາວເສເສ ຊີວິຕາ ໂວໂຣເປຕີຕິ, ນຕ຺ຖິ ອຣຫນ຺ຕຆາຕໂກຕິ? ນ ເຫວໍ ວຕ຺ຕພ຺ເພ…ເປ….

໗໘໑. ນຕ຺ຖິ ອຣຫໂຕ ອກາລມຈ຺ຈູຕິ? ອາມນ຺ຕາ. ອຣຫໂຕ ກາເຍ ວິສໍ ນ ກເມຍ຺ຍ, ສຕ຺ຖໍ ນ ກເມຍ຺ຍ, ອຄ຺ຄິ ນ ກເມຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ນນຸ ອຣຫໂຕ ກາເຍ ວິສໍ ກເມຍ຺ຍ, ສຕ຺ຖໍ ກເມຍ຺ຍ, ອຄ຺ຄິ ກເມຍ຺ຍາຕິ? ອາມນ຺ຕາ. ຫຎ຺ຈິ ອຣຫໂຕ ກາເຍ ວິສໍ ກເມຍ຺ຍ, ສຕ຺ຖໍ ກເມຍ຺ຍ, ອຄ຺ຄິ ກເມຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ນຕ຺ຖິ ອຣຫໂຕ ອກາລມຈ຺ຈູ’’ຕິ.

ອຣຫໂຕ ກາເຍ ວິສໍ ນ ກເມຍ຺ຍ, ສຕ຺ຖໍ ນ ກເມຍ຺ຍ, ອຄ຺ຄິ ນ ກເມຍ຺ຍາຕິ? ອາມນ຺ຕາ. ນຕ຺ຖິ ອຣຫນ຺ຕຆາຕໂກຕິ? ນ ເຫວໍ ວຕ຺ຕພ຺ເພ…ເປ….

໗໘໒. ອຕ຺ຖິ ອຣຫໂຕ ອກາລມຈ຺ຈູຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ນາຫໍ, ຠິກ຺ຂເວ, ສຎ຺ເຈຕນິການໍ ກມ຺ມານໍ ກຕານໍ ອຸປຈິຕານໍ ອປ຺ປຏິສໍເວທິຕ຺ວາ ພ຺ຍນ຺ຕີຠາວໍ ວທາມິ; ຕຎ຺ຈ ໂຂ ທິຏ຺ເຐວ ຘມ຺ເມ ອຸປປຊ຺ຊໍ ວາ ອປເຣ ວາ ປຣິຍາເຍ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນຕ຺ຖິ ອຣຫໂຕ ອກາລມຈ຺ຈູຕິ.

ນຕ຺ຖິ ອຣຫໂຕ ອກາລມຈ຺ຈູຕິກຖາ ນິຏ຺ຐິຕາ.