(໑໕໖) ໑. ນິຄ຺ຄຫກຖາ

໗໔໓. ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ຈິຕ຺ຕໍ ‘‘ມາ ຣຊ຺ຊິ’’, ‘‘ມາ ທຸສ຺ສິ’’, ‘‘ມາ ມຸຍ຺ຫິ’’, ‘‘ມາ ກິລິສ຺ສີ’’ຕິ ນິຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ… ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຸປ຺ປນ຺ໂນ ຜສ຺ໂສ ‘‘ມາ ນິຣຸຊ຺ຌີ’’ຕິ ນິຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ… ປໂຣ ປຣສ຺ສ ອຸປ຺ປນ຺ນາ ເວທນາ…ເປ… ອຸປ຺ປນ຺ນາ ສຎ຺ຎາ… ອຸປ຺ປນ຺ນາ ເຈຕນາ… ອຸປ຺ປນ຺ນໍ ຈິຕ຺ຕໍ… ອຸປ຺ປນ຺ນາ ສທ຺ຘາ… ອຸປ຺ປນ຺ນໍ ວີຣິຍໍ … ອຸປ຺ປນ຺ນາ ສຕິ… ອຸປ຺ປນ຺ໂນ ສມາຘິ…ເປ… ອຸປ຺ປນ຺ນາ ປຎ຺ຎາ ‘‘ມາ ນິຣຸຊ຺ຌີ’’ຕິ ນິຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ຣາຄໍ ປຊຫຕິ… ໂທສໍ ປຊຫຕິ…ເປ… ອໂນຕ຺ຕປ຺ປໍ ປຊຫຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ມຄ຺ຄໍ ຠາເວຕິ… ສຕິປຏ຺ຐານໍ ຠາເວຕິ…ເປ… ໂພຊ຺ຌງ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ທຸກ຺ຂໍ ປຣິຊານາຕິ, ສມຸທຍໍ ປຊຫຕິ, ນິໂຣຘໍ ສຈ຺ຉິກໂຣຕິ, ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ອຎ຺ໂຎ ອຎ຺ຎສ຺ສ ກາຣໂກ, ປຣງ຺ກຕໍ ສຸຂໍ ທຸກ຺ຂໍ ອຎ຺ໂຎ ກໂຣຕິ ອຎ຺ໂຎ ປຏິສໍເວເທຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອຕ຺ຕນາວ ກຕໍ ປາປໍ, ອຕ຺ຕນາ ສໍກິລິສ຺ສຕິ;

ອຕ຺ຕນາ ອກຕໍ ປາປໍ, ອຕ຺ຕນາວ ວິສຸຊ຺ຌຕິ;

ສຸທ຺ຘິ ອສຸທ຺ຘິ ປຈ຺ຈຕ຺ຕໍ, ນາຎ຺ໂຎ ອຎ຺ຎໍ ວິໂສຘເຍ’’ຕິ [ຘ. ປ. ໑໖໕].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີ’’ຕິ.

໗໔໔. ນ ວຕ຺ຕພ຺ພໍ – ‘‘ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ອຕ຺ຖິ ພລປ຺ປຕ຺ຕາ, ອຕ຺ຖິ ວສີຠູຕາຕິ? ອາມນ຺ຕາ. ຫຎ຺ຈິ ອຕ຺ຖິ ພລປ຺ປຕ຺ຕາ, ອຕ຺ຖິ ວສີຠູຕາ, ເຕນ ວຕ ເຣ ວຕ຺ຕພ຺ເພ – ‘‘ປໂຣ ປຣສ຺ສ ຈິຕ຺ຕໍ ນິຄ຺ຄຓ຺ຫາຕີ’’ຕິ.

ນິຄ຺ຄຫກຖາ ນິຏ຺ຐິຕາ.