໑໖. ໂສຬສມວຄ຺ໂຄ

(໑໕໗) ໒. ປຄ຺ຄຫກຖາ

໗໔໕. ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ຈິຕ຺ຕໍ ‘‘ມາ ຣຊ຺ຊິ,’’‘‘ມາ ທຸສ຺ສິ,’’‘‘ມາ ມຸຍ຺ຫິ,’’‘‘ມາ ກິລິສ຺ສີ’’ຕິ ປຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ… ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອໂລຠໍ ກຸສລມູລໍ ຊເນຕິ… ອໂທສໍ ກຸສລມູລໍ ຊເນຕິ… ອໂມຫໍ ກຸສລມູລໍ ຊເນຕິ… ສທ຺ຘໍ ຊເນຕິ… ວີຣິຍໍ ຊເນຕິ… ສຕິໍ ຊເນຕິ… ສມາຘິໍ ຊເນຕິ… ປຎ຺ຎໍ ຊເນຕີຕິ? ນ ເຫວໍ ວຕ຺ຕພ຺ເພ…ເປ… ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຸປ຺ປນ຺ໂນ ຜສ຺ໂສ ‘‘ມາ ນິຣຸຊ຺ຌີ’’ຕິ ປຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ… ປໂຣ ປຣສ຺ສ ອຸປ຺ປນ຺ນາ ເວທນາ…ເປ… ອຸປ຺ປນ຺ນາ ປຎ຺ຎາ ‘‘ມາ ນິຣຸຊ຺ຌີ’’ຕິ ປຄ຺ຄຓ຺ຫາຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ຣາຄໍ ປຊຫຕິ… ໂທສໍ ປຊຫຕິ… ໂມຫໍ ປຊຫຕິ…ເປ… ອໂນຕ຺ຕປ຺ປໍ ປຊຫຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ມຄ຺ຄໍ ຠາເວຕິ… ສຕິປຏ຺ຐານໍ ຠາເວຕິ…ເປ… ໂພຊ຺ຌງ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ປໂຣ ປຣສ຺ສ ອຕ຺ຖາຍ ທຸກ຺ຂໍ ປຣິຊານາຕິ…ເປ… ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ອຎ຺ໂຎ ອຎ຺ຎສ຺ສ ກາຣໂກ, ປຣງ຺ກຕໍ ສຸຂໍ ທຸກ຺ຂໍ ອຎ຺ໂຎ ກໂຣຕິ ອຎ຺ໂຎ ປຏິສໍເວເທຕີຕິ? ນ ເຫວໍ ວຕ຺ຕພ຺ເພ…ເປ….

ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອຕ຺ຕນາວ ກຕໍ ປາປໍ…ເປ… ນາຎ຺ໂຎ ອຎ຺ຎໍ ວິໂສຘເຍ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີ’’ຕິ.

໗໔໖. ນ ວຕ຺ຕພ຺ພໍ – ‘‘ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີ’’ຕິ? ອາມນ຺ຕາ. ນນຸ ອຕ຺ຖິ ພລປ຺ປຕ຺ຕາ, ອຕ຺ຖິ ວສີຠູຕາຕິ? ອາມນ຺ຕາ. ຫຎ຺ຈິ ອຕ຺ຖິ ພລປ຺ປຕ຺ຕາ, ອຕ຺ຖິ ວສີຠູຕາ, ເຕນ ວຕ ເຣ ວຕ຺ຕພ຺ເພ – ‘‘ປໂຣ ປຣສ຺ສ ຈິຕ຺ຕໍ ປຄ຺ຄຓ຺ຫາຕີ’’ຕິ.

ປຄ຺ຄຫກຖາ ນິຏ຺ຐິຕາ.