໑໕. ປນ຺ນຣສມວຄ຺ໂຄ

(໑໕໓) ໙. ຕຕິຍສຎ຺ຎາເວທຍິຕກຖາ

໗໓໒. ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາຕິ? ອາມນ຺ຕາ. ອຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ມາຣຓນ຺ຕິໂຍ ຜສ຺ໂສ, ມາຣຓນ຺ຕິຍາ ເວທນາ, ມາຣຓນ຺ຕິຍາ ສຎ຺ຎາ, ມາຣຓນ຺ຕິຍາ ເຈຕນາ, ມາຣຓນ຺ຕິຍໍ ຈິຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ມາຣຓນ຺ຕິໂຍ ຜສ຺ໂສ, ມາຣຓນ຺ຕິຍາ ເວທນາ, ມາຣຓນ຺ຕິຍາ ສຎ຺ຎາ, ມາຣຓນ຺ຕິຍາ ເຈຕນາ, ມາຣຓນ຺ຕິຍໍ ຈິຕ຺ຕນ຺ຕິ? ອາມນ຺ຕາ. ຫຎ຺ຈິ ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ມາຣຓນ຺ຕິໂຍ ຜສ຺ໂສ, ມາຣຓນ຺ຕິຍາ ເວທນາ, ມາຣຓນ຺ຕິຍາ ສຎ຺ຎາ, ມາຣຓນ຺ຕິຍາ ເຈຕນາ, ມາຣຓນ຺ຕິຍໍ ຈິຕ຺ຕໍ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາ’’ຕິ.

ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາຕິ? ອາມນ຺ຕາ. ອຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ຜສ຺ໂສ ເວທນາ ສຎ຺ຎາ ເຈຕນາ ຈິຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ຜສ຺ໂສ ເວທນາ ສຎ຺ຎາ ເຈຕນາ ຈິຕ຺ຕນ຺ຕິ? ອາມນ຺ຕາ. ອຜສ຺ສກສ຺ສ ກາລໍ ກິຣິຍາ, ອເວທນກສ຺ສ ກາລໍ ກິຣິຍາ…ເປ… ອຈິຕ຺ຕກສ຺ສ ກາລໍ ກິຣິຍາຕິ? ນ ເຫວໍ ວຕ຺ຕພ຺ເພ…ເປ… ນນຸ ສຜສ຺ສກສ຺ສ ກາລໍ ກິຣິຍາ…ເປ… ສຈິຕ຺ຕກສ຺ສ ກາລໍ ກິຣິຍາຕິ? ອາມນ຺ຕາ. ຫຎ຺ຈິ ສຜສ຺ສກສ຺ສ ກາລໍ ກິຣິຍາ…ເປ… ສຈິຕ຺ຕກສ຺ສ ກາລໍ ກິຣິຍາ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາ’’ຕິ.

ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາຕິ? ອາມນ຺ຕາ. ສຎ຺ຎາເວທຍິຕນິໂຣຘໍ ສມາປນ຺ນສ຺ສ ກາເຍ ວິສໍ ກເມຍ຺ຍ, ສຕ຺ຖໍ ກເມຍ຺ຍ, ອຄ຺ຄິ ກເມຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ສຎ຺ຎາເວທຍິຕນິໂຣຘໍ ສມາປນ຺ນສ຺ສ ກາເຍ ວິສໍ ນ ກເມຍ຺ຍ, ສຕ຺ຖໍ ນ ກເມຍ຺ຍ, ອຄ຺ຄິ ນ ກເມຍ຺ຍາຕິ? ອາມນ຺ຕາ. ຫຎ຺ຈິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ກາເຍ ວິສໍ ນ ກເມຍ຺ຍ, ສຕ຺ຖໍ ນ ກເມຍ຺ຍ, ອຄ຺ຄິ ນ ກເມຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາ’’ຕິ.

ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍາຕິ? ອາມນ຺ຕາ. ສຎ຺ຎາເວທຍິຕນິໂຣຘໍ ສມາປນ຺ນສ຺ສ ກາເຍ ວິສໍ ກເມຍ຺ຍ, ສຕ຺ຖໍ ກເມຍ຺ຍ, ອຄ຺ຄິ ກເມຍ຺ຍາຕິ? ອາມນ຺ຕາ. ນ ນິໂຣຘໍ ສມາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

໗໓໓. ສຎ຺ຎາເວທຍິຕນິໂຣຘໍ ສມາປນ຺ໂນ ນ ກາລໍ ກເຣຍ຺ຍາຕິ? ອາມນ຺ຕາ. ອຕ຺ຖິ ໂສ ນິຍາໂມ ເຍນ ນິຍາເມນ ນິຍໂຕ ສຎ຺ຎາເວທຍິຕນິໂຣຘໍ ສມາປນ຺ໂນ ນ ກາລໍ ກເຣຍ຺ຍາຕິ? ນຕ຺ຖິ. ຫຎ຺ຈິ ນຕ຺ຖິ ໂສ ນິຍາໂມ ເຍນ ນິຍາເມນ ນິຍໂຕ ສຎ຺ຎາເວທຍິຕນິໂຣຘໍ ສມາປນ຺ໂນ ນ ກາລໍ ກເຣຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘໍ ສມາປນ຺ໂນ ນ ກາລໍ ກເຣຍ຺ຍາຕິ.

໗໓໔. ຈກ຺ຂຸວິຎ຺ຎາຓສມງ຺ຄີ ນ ກາລໍ ກເຣຍ຺ຍາຕິ? ອາມນ຺ຕາ. ອຕ຺ຖິ ໂສ ນິຍາໂມ ເຍນ ນິຍາເມນ ນິຍໂຕ ຈກ຺ຂຸວິຎ຺ຎາຓສມງ຺ຄີ ນ ກາລໍ ກເຣຍ຺ຍາຕິ? ນຕ຺ຖິ. ຫຎ຺ຈິ ນຕ຺ຖິ ໂສ ນິຍາໂມ ເຍນ ນິຍາເມນ ນິຍໂຕ ຈກ຺ຂຸວິຎ຺ຎາຓສມງ຺ຄີ ນ ກາລໍ ກເຣຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ຈກ຺ຂຸວິຎ຺ຎາຓສມງ຺ຄີ ນ ກາລໍ ກເຣຍ຺ຍາ’’ຕິ.

ຕຕິຍສຎ຺ຎາເວທຍິຕກຖາ ນິຏ຺ຐິຕາ.