໑໕. ປນ຺ນຣສມວຄ຺ໂຄ

(໑໕໔) ໑໐. ອສຎ຺ຎສຕ຺ຕຸປິກກຖາ

໗໓໕. ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາຕິ? ອາມນ຺ຕາ. ອຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ອໂລໂຠ ກຸສລມູລໍ, ອໂທໂສ ກຸສລມູລໍ, ອໂມໂຫ ກຸສລມູລໍ, ສທ຺ຘາ ວີຣິຍໍ ສຕິ ສມາຘິ ປຎ຺ຎາຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ອໂລໂຠ ກຸສລມູລໍ, ອໂທໂສ ກຸສລມູລໍ…ເປ… ປຎ຺ຎາຕິ? ອາມນ຺ຕາ. ຫຎ຺ຈິ ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ອໂລໂຠ ກຸສລມູລໍ, ອໂທໂສ ກຸສລມູລໍ, ອໂມໂຫ ກຸສລມູລໍ, ສທ຺ຘາ ວີຣິຍໍ ສຕິ ສມາຘິ ປຎ຺ຎາ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາ’’ຕິ.

ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາຕິ? ອາມນ຺ຕາ. ອຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ຜສ຺ໂສ ເວທນາ ສຎ຺ຎາ ເຈຕນາ ຈິຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ສຎ຺ຎາເວທຍິຕນິໂຣຘໍ ສມາປນ຺ນສ຺ສ ຜສ຺ໂສ ເວທນາ ສຎ຺ຎາ ເຈຕນາ ຈິຕ຺ຕນ຺ຕິ? ອາມນ຺ຕາ. ອຜສ຺ສກສ຺ສ ມຄ຺ຄຠາວນາ…ເປ… ອຈິຕ຺ຕກສ຺ສ ມຄ຺ຄຠາວນາຕິ? ນ ເຫວໍ ວຕ຺ຕພ຺ເພ…ເປ… ນນຸ ສຜສ຺ສກສ຺ສ ມຄ຺ຄຠາວນາ…ເປ… ສຈິຕ຺ຕກສ຺ສ ມຄ຺ຄຠາວນາຕິ? ອາມນ຺ຕາ. ຫຎ຺ຈິ ສຜສ຺ສກສ຺ສ ມຄ຺ຄຠາວນາ…ເປ… ສຈິຕ຺ຕກສ຺ສ ມຄ຺ຄຠາວນາ, ໂນ ຈ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາ’’ຕິ.

ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາຕິ? ອາມນ຺ຕາ. ເຍ ເກຈິ ສຎ຺ຎາເວທຍິຕນິໂຣຘໍ ສມາປຊ຺ຊນ຺ຕິ, ສພ຺ເພ ເຕ ອສຎ຺ຎສຕ຺ຕຸປິກາຕິ? ນ ເຫວໍ ວຕ຺ຕພ຺ເພ…ເປ….

໗໓໖. ນ ວຕ຺ຕພ຺ພໍ – ‘‘ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາ’’ຕິ? ອາມນ຺ຕາ. ນນຸ ອິຘາປິ ອສຎ຺ຎີ ຕຕ຺ຣາປິ ອສຎ຺ຎີຕິ? ອາມນ຺ຕາ. ຫຎ຺ຈິ ອິຘາປິ ອສຎ຺ຎີ ຕຕ຺ຣາປິ ອສຎ຺ຎີ, ເຕນ ວຕ ເຣ ວຕ຺ຕພ຺ເພ – ‘‘ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາ’’ຕິ.

ອສຎ຺ຎສຕ຺ຕຸປິກກຖາ ນິຏ຺ຐິຕາ.