໑໕. ປນ຺ນຣສມວຄ຺ໂຄ

(໑໕໕) ໑໑. ກມ຺ມູປຈຍກຖາ

໗໓໗. ອຎ຺ຎໍ ກມ຺ມໍ ອຎ຺ໂຎ ກມ຺ມູປຈໂຍຕິ? ອາມນ຺ຕາ. ອຎ຺ໂຎ ຜສ຺ໂສ, ອຎ຺ໂຎ ຜສ຺ສູປຈໂຍ; ອຎ຺ຎາ ເວທນາ, ອຎ຺ໂຎ ເວທນູປຈໂຍ; ອຎ຺ຎາ ສຎ຺ຎາ, ອຎ຺ໂຎ ສຎ຺ຎູປຈໂຍ; ອຎ຺ຎາ ເຈຕນາ, ອຎ຺ໂຎ ເຈຕນູປຈໂຍ; ອຎ຺ຎໍ ຈິຕ຺ຕໍ, ອຎ຺ໂຎ ຈິຕ຺ຕູປຈໂຍ; ອຎ຺ຎາ ສທ຺ຘາ, ອຎ຺ໂຎ ສທ຺ຘູປຈໂຍ; ອຎ຺ຎໍ ວີຣິຍໍ, ອຎ຺ໂຎ ວີຣິຍູປຈໂຍ; ອຎ຺ຎາ ສຕິ, ອຎ຺ໂຎ ສຕູປຈໂຍ; ອຎ຺ໂຎ ສມາຘິ, ອຎ຺ໂຎ ສມາຘູປຈໂຍ; ອຎ຺ຎາ ປຎ຺ຎາ, ອຎ຺ໂຎ ປຎ຺ຎູປຈໂຍ; ອຎ຺ໂຎ ຣາໂຄ, ອຎ຺ໂຎ ຣາຄູປຈໂຍ…ເປ… ອຎ຺ຎໍ ອໂນຕ຺ຕປ຺ປໍ, ອຎ຺ໂຎ ອໂນຕ຺ຕປ຺ປູປຈໂຍຕິ? ນ ເຫວໍ ວຕ຺ຕພ຺ເພ…ເປ….

໗໓໘. ອຎ຺ຎໍ ກມ຺ມໍ, ອຎ຺ໂຎ ກມ຺ມູປຈໂຍຕິ? ອາມນ຺ຕາ. ກມ຺ມູປຈໂຍ ກມ຺ເມນ ສຫຊາໂຕຕິ? ນ ເຫວໍ ວຕ຺ຕພ຺ເພ…ເປ….

ກມ຺ມູປຈໂຍ ກມ຺ເມນ ສຫຊາໂຕຕິ, ອາມນ຺ຕາ. ກຸສເລນ ກມ຺ເມນ ສຫຊາໂຕ ກມ຺ມູປຈໂຍ ກຸສໂລຕິ, ນ ເຫວໍ ວຕ຺ຕພ຺ເພ…ເປ….

ກຸສເລນ ກມ຺ເມນ ສຫຊາໂຕ ກມ຺ມູປຈໂຍ ກຸສໂລຕິ? ອາມນ຺ຕາ. ສຸຂາຍ ເວທນາຍ ສມ຺ປຍຸຕ຺ເຕນ ກມ຺ເມນ ສຫຊາໂຕ ກມ຺ມູປຈໂຍ ສຸຂາຍ ເວທນາຍ ສມ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ທຸກ຺ຂາຍ ເວທນາຍ…ເປ… ອທຸກ຺ຂມສຸຂາຍ ເວທນາຍ ສມ຺ປຍຸຕ຺ເຕນ ກມ຺ເມນ ສຫຊາໂຕ ກມ຺ມູປຈໂຍ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

໗໓໙. ກມ຺ມູປຈໂຍ ກມ຺ເມນ ສຫຊາໂຕຕິ? ອາມນ຺ຕາ. ອກຸສເລນ ກມ຺ເມນ ສຫຊາໂຕ ກມ຺ມູປຈໂຍ ອກຸສໂລຕິ? ນ ເຫວໍ ວຕ຺ຕພ຺ເພ…ເປ….

ອກຸສເລນ ກມ຺ເມນ ສຫຊາໂຕ ກມ຺ມູປຈໂຍ ອກຸສໂລຕິ? ອາມນ຺ຕາ. ສຸຂາຍ ເວທນາຍ ສມ຺ປຍຸຕ຺ເຕນ ກມ຺ເມນ ສຫຊາໂຕ ກມ຺ມູປຈໂຍ ສຸຂາຍ ເວທນາຍ ສມ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ທຸກ຺ຂາຍ ເວທນາຍ…ເປ… ອທຸກ຺ຂມສຸຂາຍ ເວທນາຍ ສມ຺ປຍຸຕ຺ເຕນ ກມ຺ເມນ ສຫຊາໂຕ ກມ຺ມູປຈໂຍ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

໗໔໐. ກມ຺ມໍ ຈິຕ຺ເຕນ ສຫຊາຕໍ, ກມ຺ມໍ ສາຣມ຺ມຓນ຺ຕິ? ອາມນ຺ຕາ. ກມ຺ມູປຈໂຍ ຈິຕ຺ເຕນ ສຫຊາໂຕ, ກມ຺ມູປຈໂຍ ສາຣມ຺ມໂຓຕິ? ນ ເຫວໍ ວຕ຺ຕພ຺ເພ…ເປ… ກມ຺ມູປຈໂຍ ຈິຕ຺ເຕນ ສຫຊາໂຕ, ກມ຺ມູປຈໂຍ ອນາຣມ຺ມໂຓຕິ? ອາມນ຺ຕາ. ກມ຺ມໍ ຈິຕ຺ເຕນ ສຫຊາຕໍ, ກມ຺ມໍ ອນາຣມ຺ມຓນ຺ຕິ? ນ ເຫວໍ ວຕ຺ຕພ຺ເພ…ເປ….

ກມ຺ມໍ ຈິຕ຺ເຕນ ສຫຊາຕໍ, ຈິຕ຺ຕໍ ຠິຊ຺ຊມານໍ ກມ຺ມໍ ຠິຊ຺ຊຕີຕິ? ອາມນ຺ຕາ. ກມ຺ມູປຈໂຍ ຈິຕ຺ເຕນ ສຫຊາໂຕ, ຈິຕ຺ຕໍ ຠິຊ຺ຊມານໍ ກມ຺ມູປຈໂຍ ຠິຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

ກມ຺ມູປຈໂຍ ຈິຕ຺ເຕນ ສຫຊາໂຕ, ຈິຕ຺ຕໍ ຠິຊ຺ຊມານໍ ກມ຺ມູປຈໂຍ ນ ຠິຊ຺ຊຕີຕິ? ອາມນ຺ຕາ. ກມ຺ມໍ ຈິຕ຺ເຕນ ສຫຊາຕໍ, ຈິຕ຺ຕໍ ຠິຊ຺ຊມານໍ ກມ຺ມໍ ນ ຠິຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

໗໔໑. ກມ຺ມມ຺ຫິ ກມ຺ມູປຈໂຍຕິ? ອາມນ຺ຕາ. ຕຎ຺ເຎວ ກມ຺ມໍ ໂສ ກມ຺ມູປຈໂຍຕິ? ນ ເຫວໍ ວຕ຺ຕພ຺ເພ…ເປ….

ກມ຺ມມ຺ຫິ ກມ຺ມູປຈໂຍ, ກມ຺ມູປຈຍໂຕ ວິປາໂກ ນິພ຺ພຕ຺ຕຕີຕິ? ອາມນ຺ຕາ. ຕຎ຺ເຎວ ກມ຺ມໍ, ໂສ ກມ຺ມູປຈໂຍ, ໂສ ກມ຺ມວິປາໂກຕິ? ນ ເຫວໍ ວຕ຺ຕພ຺ເພ…ເປ….

ກມ຺ມມ຺ຫິ ກມ຺ມູປຈໂຍ, ກມ຺ມູປຈຍໂຕ ວິປາໂກ ນິພ຺ພຕ຺ຕຕິ, ວິປາໂກ ສາຣມ຺ມໂຓຕິ? ອາມນ຺ຕາ. ກມ຺ມູປຈໂຍ ສາຣມ຺ມໂຓຕິ? ນ ເຫວໍ ວຕ຺ຕພ຺ເພ…ເປ… ກມ຺ມູປຈໂຍ ອນາຣມ຺ມໂຓຕິ? ອາມນ຺ຕາ. ວິປາໂກ ອນາຣມ຺ມໂຓຕິ? ນ ເຫວໍ ວຕ຺ຕພ຺ເພ…ເປ….

໗໔໒. ອຎ຺ຎໍ ກມ຺ມໍ ອຎ຺ໂຎ ກມ຺ມູປຈໂຍຕິ, ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອິຘ, ປຸຓ຺ຓ, ເອກຈ຺ໂຈ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ [ສພ຺ຍາປຊ຺ຌມ຺ປິ ອພ຺ຍາປຊ຺ຌມ຺ປິ (ກ.) ມ. ນິ. ໒.໘໑ ປສ຺ສິຕພ຺ພໍ] ກາຍສງ຺ຂາຣໍ ອຠິສງ຺ຂໂຣຕິ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ…ເປ… ມໂນສງ຺ຂາຣໍ ອຠິສງ຺ຂໂຣຕິ, ໂສ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ກາຍສງ຺ຂາຣໍ ອຠິສງ຺ຂຣິຕ຺ວາ, ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ວຈີສງ຺ຂາຣໍ…ເປ… ມໂນສງ຺ຂາຣໍ ອຠິສງ຺ຂຣິຕ຺ວາ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປຊ຺ຊຕິ. ຕເມນໍ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ໂລກໍ ອຸປປນ຺ນໍ ສມານໍ ສພ຺ຍາພຊ຺ຌາປິ ອພ຺ຍາພຊ຺ຌາປິ ຜສ຺ສາ ຜຸສນ຺ຕິ. ໂສ ສພ຺ຍາພຊ຺ເຌຫິປິ ອພ຺ຍາພຊ຺ເຌຫິປິ ຜສ຺ເສຫິ ຜຸຏ຺ໂຐ ສມາໂນ ສພ຺ຍາພຊ຺ຌມ຺ປິ ອພ຺ຍາພຊ຺ຌມ຺ປິ ເວທນໍ ເວເທຕິ ໂວກິຓ຺ຓສຸຂທຸກ຺ຂໍ, ເສຍ຺ຍຖາປິ ມນຸສ຺ສາ ເອກຈ຺ເຈ ຈ ເທວາ ເອກຈ຺ເຈ ຈ ວິນິປາຕິກາ. ອິຕິ ໂຂ, ປຸຓ຺ຓ, ຠູຕາ ຠູຕສ຺ສ ອຸປປຕ຺ຕິ ໂຫຕິ, ຍໍ ກໂຣຕິ ເຕນ ອຸປປຊ຺ຊຕິ, ອຸປປນ຺ນເມຕໍ ຜສ຺ສາ ຜຸສນ຺ຕິ. ເອວມ຺ປາຫໍ, ປຸຓ຺ຓ, ‘ກມ຺ມທາຍາທາ ສຕ຺ຕາ’ຕິ ວທາມີ’’ຕິ [ມ. ນິ. ໒.໘໑]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອຎ຺ຎໍ ກມ຺ມໍ, ອຎ຺ໂຎ ກມ຺ມູປຈໂຍ’’ຕິ.

ກມ຺ມູປຈຍກຖາ ນິຏ຺ຐິຕາ.

ປນ຺ນຣສມວຄ຺ໂຄ.

ຕສ຺ສຸທ຺ທານໍ –

ປຈ຺ຈຍຕາ ວວຕ຺ຖິຕາ, ປຏິຈ຺ຈສມຸປ຺ປາໂທ, ອທ຺ຘາ, ຂໂຓ ລໂຍ ມຸຫຸຕ຺ຕໍ, ຈຕ຺ຕາໂຣ ອາສວາ ອນາສວາ, ໂລກຸຕ຺ຕຣານໍ ຘມ຺ມານໍ ຊຣາມຣຓໍ ໂລກຸຕ຺ຕຣາ, ສຎ຺ຎາເວທຍິຕນິໂຣຘສມາປຕ຺ຕິ ໂລກຸຕ຺ຕຣາ, ສຎ຺ຎາເວທຍິຕນິໂຣຘສມາປຕ຺ຕິ ໂລກິຍາ, ສຎ຺ຎາເວທຍິຕນິໂຣຘໍ ສມາປນ຺ໂນ ກາລໍ ກເຣຍ຺ຍ, ສ຺ເວວ ມຄ຺ໂຄ ອສຎ຺ຎສຕ຺ຕຸປປຕ຺ຕິຍາ, ອຎ຺ຎໍ ກມ຺ມໍ ອຎ຺ໂຎ ກມ຺ມູປຈໂຍຕິ.

ຕຕິໂຍ ປຓ຺ຓາສໂກ.

ຕສ຺ສຸທ຺ທານໍ –

ອນຸສຍາ, ສໍວໂຣ, ກປ຺ໂປ, ມູລຎ຺ຈ ວວຕ຺ຖິຕາຕິ.