໑໔. ຈຸທ຺ທສມວຄ຺ໂຄ

(໑໓໙) ໔. ອຣິຍຣູປກຖາ

໖໙໘. ອຣິຍຣູປໍ ມຫາຠູຕານໍ ອຸປາທາຍາຕິ? ອາມນ຺ຕາ. ອຣິຍຣູປໍ ກຸສລນ຺ຕິ? ອາມນ຺ຕາ. ມຫາຠູຕາ ກຸສລາຕິ? ນ ເຫວໍ ວຕ຺ຕພ຺ເພ …ເປ… ມຫາຠູຕາ ອພ຺ຍາກຕາຕິ? ອາມນ຺ຕາ. ອຣິຍຣູປໍ ອພ຺ຍາກຕນ຺ຕິ? ນ ເຫວໍ ວຕ຺ຕພ຺ເພ…ເປ… ອຣິຍຣູປໍ ມຫາຠູຕານໍ ອຸປາທາຍາຕິ? ອາມນ຺ຕາ. ອຣິຍຣູປໍ ອນາສວໍ ອສໍໂຍຊນິຍໍ ອຄນ຺ຖນິຍໍ ອໂນຆນິຍໍ ອໂຍຄນິຍໍ ອນີວຣຓິຍໍ ອປຣາມຏ຺ຐໍ ອນຸປາທານິຍໍ ອສໍກິເລສິຍນ຺ຕິ? ອາມນ຺ຕາ. ມຫາຠູຕາ ອນາສວາ…ເປ… ອສໍກິເລສິຍາຕິ? ນ ເຫວໍ ວຕ຺ຕພ຺ເພ…ເປ… ມຫາຠູຕາ ສາສວາ ສໍໂຍຊນິຍາ…ເປ… ສໍກິເລສິຍາຕິ? ອາມນ຺ຕາ. ອຣິຍຣູປໍ ສາສວໍ ສໍໂຍຊນິຍໍ…ເປ… ສໍກິເລສິຍນ຺ຕິ? ນ ເຫວໍ ວຕ຺ຕພ຺ເພ…ເປ….

໖໙໙. ນ ວຕ຺ຕພ຺ພໍ – ‘‘ອຣິຍຣູປໍ ມຫາຠູຕານໍ ອຸປາທາຍາ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຍໍ ກິຎ຺ຈິ, ຠິກ຺ຂເວ, ຣູປໍ ຈຕ຺ຕາຣິ ມຫາຠູຕານິ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປ’’ນ຺ຕິ [ມ. ນິ. ໑.໓໔໗; ອ. ນິ. ໑໑.໑໕]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຣິຍຣູປໍ ມຫາຠູຕານໍ ອຸປາທາຍາຕິ.

ອຣິຍຣູປກຖາ ນິຏ຺ຐິຕາ.