໑໑. ເອກາທສມວຄ຺ໂຄ

(໑໑໐) ໕. ຎາຓໍ ຈິຕ຺ຕວິປ຺ປຍຸຕ຺ຕນ຺ຕິກຖາ

໖໑໖. ຎາຓໍ ຈິຕ຺ຕວິປ຺ປຍຸຕ຺ຕນ຺ຕິ? ອາມນ຺ຕາ. ຣູປໍ ນິພ຺ພານໍ ຈກ຺ຂາຍຕນໍ…ເປ… ໂຜຏ຺ຐພ຺ພາຍຕນນ຺ຕິ? ນ ເຫວໍ ວຕ຺ຕພ຺ເພ…ເປ… ຎາຓໍ ຈິຕ຺ຕວິປ຺ປຍຸຕ຺ຕນ຺ຕິ? ອາມນ຺ຕາ. ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ຈິຕ຺ຕວິປ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ປຎ຺ຎາ ປຎ຺ຎິນ຺ທ຺ຣິຍໍ ປຎ຺ຎາພລໍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ຈິຕ຺ຕສມ຺ປຍຸຕ຺ໂຕຕິ? ອາມນ຺ຕາ. ຎາຓໍ ຈິຕ຺ຕສມ຺ປຍຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ….

ຎາຓໍ ຈິຕ຺ຕວິປ຺ປຍຸຕ຺ຕນ຺ຕິ? ອາມນ຺ຕາ. ກຕມກ຺ຂນ຺ຘປຣິຍາປນ຺ນນ຺ຕິ? ສງ຺ຂາຣກ຺ຂນ຺ຘປຣິຍາປນ຺ນນ຺ຕິ. ສງ຺ຂາຣກ຺ຂນ຺ໂຘ ຈິຕ຺ຕວິປ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ສງ຺ຂາຣກ຺ຂນ຺ໂຘ ຈິຕ຺ຕວິປ຺ປຍຸຕ຺ໂຕຕິ? ອາມນ຺ຕາ. ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ຈິຕ຺ຕວິປ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ຎາຓໍ ສງ຺ຂາຣກ຺ຂນ຺ຘປຣິຍາປນ຺ນໍ ຈິຕ຺ຕວິປ຺ປຍຸຕ຺ຕນ຺ຕິ? ອາມນ຺ຕາ. ປຎ຺ຎາ ສງ຺ຂາຣກ຺ຂນ຺ຘປຣິຍາປນ຺ນາ ຈິຕ຺ຕວິປ຺ປຍຸຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ປຎ຺ຎາ ສງ຺ຂາຣກ຺ຂນ຺ຘປຣິຍາປນ຺ນາ ຈິຕ຺ຕສມ຺ປຍຸຕ຺ຕາຕິ? ອາມນ຺ຕາ. ຎາຓໍ ສງ຺ຂາຣກ຺ຂນ຺ຘປຣິຍາປນ຺ນໍ ຈິຕ຺ຕສມ຺ປຍຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ຎາຓໍ ສງ຺ຂາຣກ຺ຂນ຺ຘປຣິຍາປນ຺ນໍ ຈິຕ຺ຕວິປ຺ປຍຸຕ຺ຕໍ, ປຎ຺ຎາ ສງ຺ຂາຣກ຺ຂນ຺ຘປຣິຍາປນ຺ນາ ຈິຕ຺ຕສມ຺ປຍຸຕ຺ຕາຕິ? ອາມນ຺ຕາ. ສງ຺ຂາຣກ຺ຂນ຺ໂຘ ເອກເທໂສ ຈິຕ຺ຕສມ຺ປຍຸຕ຺ໂຕ ເອກເທໂສ ຈິຕ຺ຕວິປ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ສງ຺ຂາຣກ຺ຂນ຺ໂຘ ເອກເທໂສ ຈິຕ຺ຕສມ຺ປຍຸຕ຺ໂຕ ເອກເທໂສ ຈິຕ຺ຕວິປ຺ປຍຸຕ຺ໂຕຕິ? ອາມນ຺ຕາ. ເວທນາກ຺ຂນ຺ໂຘ ສຎ຺ຎາກ຺ຂນ຺ໂຘ ເອກເທໂສ ຈິຕ຺ຕສມ຺ປຍຸຕ຺ໂຕ ເອກເທໂສ ຈິຕ຺ຕວິປ຺ປຍຸຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

໖໑໗. ນ ວຕ຺ຕພ຺ພໍ – ‘‘ຎາຓໍ ຈິຕ຺ຕວິປ຺ປຍຸຕ຺ຕ’’ນ຺ຕິ? ອາມນ຺ຕາ. ອຣຫາ ຈກ຺ຂຸວິຎ຺ຎາຓສມງ຺ຄີ ‘‘ຎາຓີ’’ຕິ ວຕ຺ຕພ຺ໂພຕິ? ອາມນ຺ຕາ. ຎາຓໍ ເຕນ ຈິຕ຺ເຕນ ສມ຺ປຍຸຕ຺ຕນ຺ຕິ? ນ ເຫວໍ ວຕ຺ຕພ຺ເພ. ເຕນ ຫິ ຎາຓໍ ຈິຕ຺ຕວິປ຺ປຍຸຕ຺ຕນ຺ຕິ.

ອຣຫາ ຈກ຺ຂຸວິຎ຺ຎາຓສມງ຺ຄີ ‘‘ປຎ຺ຎວາ’’ຕິ ວຕ຺ຕພ຺ໂພຕິ [ສກວາທີປຸຈ຺ຉາ ວິຍ ທິສ຺ສຕິ]? ອາມນ຺ຕາ. ປຎ຺ຎາ ເຕນ ຈິຕ຺ເຕນ ສມ຺ປຍຸຕ຺ຕາຕິ? ນ ເຫວໍ ວຕ຺ຕພ຺ເພ. ເຕນ ຫິ ປຎ຺ຎາ ຈິຕ຺ຕວິປ຺ປຍຸຕ຺ຕາຕິ.

ຎາຓໍ ຈິຕ຺ຕວິປ຺ປຍຸຕ຺ຕນ຺ຕິກຖາ ນິຏ຺ຐິຕາ.