໑໐. ທສມວຄ຺ໂຄ

(໙໗) ໓. ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄກຖາ

໕໗໖. ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ? ອາມນ຺ຕາ. ນນຸ ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ ອຸປ຺ປນ຺ນາຣມ຺ມຓາຕິ? ອາມນ຺ຕາ. ຫຎ຺ຈິ ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ ອຸປ຺ປນ຺ນາຣມ຺ມຓາ, ໂນ ຈ ວຕ ເຣ ວຕ຺ຕພ຺ເພ – ‘‘ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ’’ຕິ.

ນນຸ ປຎ຺ຈວິຎ຺ຎາຓາ ປຸເຣຊາຕວຕ຺ຖຸກາ ປຸເຣຊາຕາຣມ຺ມຓາ ອຊ຺ຌຕ຺ຕິກວຕ຺ຖຸກາ ພາຫິຣາຣມ຺ມຓາ ອສມ຺ຠິນ຺ນວຕ຺ຖຸກາ ອສມ຺ຠິນ຺ນາຣມ຺ມຓາ ນານາວຕ຺ຖຸກາ ນານາຣມ຺ມຓາ ນ ອຎ຺ຎມຎ຺ຎສ຺ສ ໂຄຈຣວິສຍໍ ປຈ຺ຈນຸໂຠນ຺ຕິ, ນ ອສມນ຺ນາຫາຣາ ອຸປ຺ປຊ຺ຊນ຺ຕິ, ນ ອມນສິກາຣາ ອຸປ຺ປຊ຺ຊນ຺ຕິ, ນ ອພ຺ໂພກິຓ຺ຓາ ອຸປ຺ປຊ຺ຊນ຺ຕິ, ນ ອປຸພ຺ພໍ ອຈຣິມໍ ອຸປ຺ປຊ຺ຊນ຺ຕິ, ນ ອຎ຺ຎມຎ຺ຎສ຺ສ ສມນນ຺ຕຣາ ອຸປ຺ປຊ຺ຊນ຺ຕິ, ນນຸ ປຎ຺ຈວິຎ຺ຎາຓາ ອນາໂຠຄາຕິ? ອາມນ຺ຕາ. ຫຎ຺ຈິ ປຎ຺ຈວິຎ຺ຎາຓາ ອນາໂຠຄາ, ໂນ ຈ ວຕ ເຣ ວຕ຺ຕພ຺ເພ – ‘‘ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ’’ຕິ.

໕໗໗. ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ? ອາມນ຺ຕາ. ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓນ຺ຕິ? ອາມນ຺ຕາ. ‘‘ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ຫຎ຺ຈິ ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ – ອຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ຈກ຺ຂຸຎ຺ຈ ປຏິຈ຺ຈ ສຸຎ຺ຎຕຎ຺ຈ ອຸປ຺ປຊ຺ຊຕິ ຈກ຺ຂຸວິຎ຺ຎາຓ’’ນ຺ຕິ.

໕໗໘. ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ? ອາມນ຺ຕາ. ຈກ຺ຂຸວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ? ອາມນ຺ຕາ. ຈກ຺ຂຸວິຎ຺ຎາຓໍ ຜສ຺ສໍ ອາຣພ຺ຠ…ເປ… ເວທນໍ ອາຣພ຺ຠ… ສຎ຺ຎໍ ອາຣພ຺ຠ … ເຈຕນໍ ອາຣພ຺ຠ… ຈິຕ຺ຕໍ ອາຣພ຺ຠ… ຈກ຺ຂຸໍ ອາຣພ຺ຠ… ກາຍໍ ອາຣພ຺ຠ…ເປ… ສທ຺ທໍ ອາຣພ຺ຠ…ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

ມໂນວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ມໂນວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ຈກ຺ຂຸວິຎ຺ຎາຓໍ ສຸຎ຺ຎຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ມໂນວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ມໂນວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ຈກ຺ຂຸວິຎ຺ຎາຓໍ ອຕີຕານາຄຕໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ມໂນວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ມໂນວິຎ຺ຎາຓໍ ຜສ຺ສໍ ອາຣພ຺ຠ… ເວທນໍ ອາຣພ຺ຠ…ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ອາມນ຺ຕາ. ຈກ຺ຂຸວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ຈກ຺ຂຸວິຎ຺ຎາຓໍ ຜສ຺ສໍ ອາຣພ຺ຠ… ເວທນໍ ອາຣພ຺ຠ…ເປ… ໂຜຏ຺ຐພ຺ພໍ ອາຣພ຺ຠ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ….

໕໗໙. ນ ວຕ຺ຕພ຺ພໍ – ‘‘ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອິຘ, ຠິກ຺ຂເວ, ຠິກ຺ຂຸ ຈກ຺ຂຸນາ ຣູປໍ ທິສ຺ວາ ນ ນິມິຕ຺ຕຄ຺ຄາຫີ ໂຫຕິ ນານຸພ຺ຍຎ຺ຊນຄ຺ຄາຫີ…ເປ… ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ ນ ນິມິຕ຺ຕຄ຺ຄາຫີ ໂຫຕິ ນານຸພ຺ຍຎ຺ຊນຄ຺ຄາຫີ’’ຕິ! [ມ. ນິ. ໑.໓໔໙; ອ. ນິ. ໔.໓໗] ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ.

ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄກຖາ ນິຏ຺ຐິຕາ.